Հայաստանի ամերիկյան համալսարանի շրջանավարտը գործազուրկ չի մնա,- հարցազրույց AUA ACDO ղեկավար Նարինե Պետրոսյանի հետ

2042

Այսօր ուրախ ենք զրուցել Հայաստանի ամերիկյան համալսարանի Շրջանավարտների և կարիերայի զարգացման գրասենյակի (Alumni and Career Development Office – ACDO) ղեկավար Նարինե Պետրոսյանի հետ: staff.am-ը 2017թմարտ ամսից համագործակցում է ACDOի հետ և մեր համագործակցության շրջանակներում կցանկանայինք ավելի մանրամասն զրուցել այս կարևոր կառույցի մասին:

Նարինե, շատ շնորհակալ ենք հրավերն ընդունելու և մեր հարցերին պատասխանելու համար: Հավատացած ենք, որ staff.amի համայնքին հետաքրքիր տեղեկություններ են սպասում:  

1․Կպատմե՞ք մի փոքր Շրջանավարտների և կարիերայի զարգացման գրասենյակի մասին մեր այն ընթերցողներին, ովքեր բավականաչափ ծանոթ չեն Ձեր գործունեությանը: Ի՞նչ նպատակի է ծառայում այն:

Հպարտությամբ պետք է նշեմ, որ գրասենյակը սկսել է իր աշխատանքները համալսարանի հենց առաջին ավարտական արարողությունից հետո: Հիմնական նպատակը եղել է հնարավորինս ամուր պահել կապը շրջանավարտների հետ, հետևել նրանց մասնագիտական հաջողություններին, ինչպես նաև աջակցել նրանց համապատասխան աշխատանքներ գտնելու հարցում: Գրասենյակը պատասխանատու է նաև շրջանավարտների տվյալների բազայի համար, որը թարմացվում է ամեն տարի:

2․ Իսկ որո՞նք են այն հիմնական ծրագրերը, որոնք արդեն իրականացրել եք Շրջանավարտների և կարիերայի զարգացման գրասենյակի աշխատանքների շրջանակներում:

Շրջանավարտների և կարիերայի զարգացման գրասենյակի գործառույթներն իրականացվում են երկու ուղղությամբ՝ հարաբերությունների ամրապնդում շրջանավարտների հետ և աջակցություն աշխատանքային կարիերայի զարգացման գործում։ Գրասենյակի կապը շրջանավարտների հետ սերտ է։  Հաճախակի կազմակերպվում են հանդիպումներ հաջողակ այն շրջանավարտների հետ, ովքեր պատրաստ են իրենց փորձառությունը կիսել ուսանողների և այլ շրջանավարտների հետ։ Կազմակերպվում է նաև շրջանավարտների “տունդարձի» համահամալսարանական ամենամյա հավաք, որն իր տեսակի մեջ բացառիկ և հուզական է։  Ի երախտագիտություն ստացած բարձրորակ կրթության, միջոցառման շրջանակներում իրականացվում է դրամահավաք և գոյացած գումարը ուղղվում է շրջանավարտների կրթաթոշակային  ֆոնդին՝ աջակցելու լավագույն առաջադիմությամբ զատվող, սակայն ֆինանսական դժվարություններ ունեցող կարիքավոր ուսանողներին: Այս հիմնադրամն իր տեսակի մեջ այսօր միակն է Հայաստանում։ Տարեցտարի ավելանում են կրթաթոշակից օգտվող ուսանողների թիվը․ նրանք  երախտապարտ են իրենց ուսմանն աջակցող նախկին ուսանողներին և ցանկություն ունեն իրենց հերթին աջակցել այլ ուսանողների ՀԱՀ-ն ավարտելուց հետո։

Գրասենյակի գործունեության կարևոր մյուս ուղղությունը ներքին շուկայում գործատուների հետ համագործակցության զարգացումն է, որի շնորհիվ մենք կարողանում ենք օգնել շրջանավարտներին և ուսանողներին ցանկալի աշխատանք գտնելու հարցում: Կազմակերպում ենք հանդիպումներ գործատուների հետ, ինչպես նաև սեմինարներ՝  աշխատանք փնտրելու, հարցազրույցներին  պատրաստվելու հմտությունների վերաբերյալ:

3․ Շրջանավարտների և կարիերայի զարգացման գրասենյակի հիմնադրման օրվանից արդեն երկար ժամանակ է անցել։ Ըստ Ձեզ, որո՞նք են համարվում գրասենյակի երեք ամենակարևոր նվաճումներն այս ժամանակահատվածում:

Առաջին հերթին՝ բազմաթիվ շրջանավարտներին աշխատատեղով  ապահովելը։ Բացի այդ, շնորհիվ շրջանավարտների հետ սերտ համագործակցության,  մեզ հաջողվում է համալսարանի տարբեր բաժինների ուսանող երիտասարդների համար կազմակերպել մասնագիտական վերապատրաստումներ Հայաստանի լավագույն պետական և մասնավոր կազմակերպություններում։  Համալսարանում ուսանողության համար հաճախակի կազմակերպվում են նաև կարիերայի օրեր, որտեղ ուսանողներին հնարավորություն է ընձեռնվում անձամբ շփվել տարբեր կազմակերպությունների մարդկային ռեսուրսների աշխատակիցների հետ և ստանալ  սպառիչ պատասխաններ իրենց հետաքրքրող հարցերին։ 

Երկրորդ՝ շրջանավարտների համար հետաքրքիր մասնագիտական և սոցիալ-մշակութային, սպորտային միջոցառումների կազմակերպումը և հարազատ բուհի հետ նրանց կապի պահպանումը, որը մի կողմից նպաստում է շրջանավարտների միմյանց մեջ մասնագիտական, ընկերական հարաբերությունների զարգացմանը, և մյուս կողմից՝ բուհի կյանքի մեջ նրանց ընդգրկվածությանը և շարունակական կրթության ապահովմանը։

Երրորդ՝  վերջապես ոչ պակաս կարևոր է այն կամավորական, մասնագիտական և ֆինանսական աջակցությունը, որը հոգածությամբ տրամադրում են շրջանավարտները իրենց բուհին և  բուհի ներկա ուսանողներին։

4․ Որպես շրջանավարտների և կարիերայի զարգացման համար պատասխանատու օղակ, ինչպիսի՞ նոր միտումներ եք տեսնում աշխատաշուկայում, մասնավորապես, ինչպես աշխատակիցների, այնպես էլ աշխատանքի փնտրման համատեքստում:

Ուրախությամբ փաստեմ, որ վերջին  շրջանում նկատվում է  գործատուների կողմից ուսանողներին վերապատրաստման հնարավորություն ընձեռելու միտում, ինչն անհրաժեշտ է ապագա աշխատաշուկա մտնող ցանկացած սկսնակի համար և այդ հնարավորությունը, որը, ի դեպ, աշխարհում լայն տարածում ունի, մեծ ոգևորությամբ է ընդունվում մեր ուսանողների կոմից։  Վստահ եմ, որ ՀԱՀ-ի շրջանավարտը գործազուրկ չի մնա։ Այլ հարց է՝ թե հայրենի աշխատաշուկան որքան արագ կարող է զարգանալ նրանց բարձր հմտություններն առավելագույնս օգտագործելու և գրավիչ պայմաններ առաջարկելու համար։

5Ի՞նչ խորհուրդ կտայիք այն ուսանողներին և շրջանավարտներին, ովքեր հիմա առաջին քայլերն են կատարում աշխատաշուկայում: Արդյո՞ք գոյություն ունեն հետագայում լավ կարիերա ունենալու նախապայմաններ, որոնց մասին պետք է մտածել առաջին օրվանից:

Խորհուրդ կտամ լինեն նպատակասլաց և աշխատասեր: Երբեք չհիասթափվեն և պայքարեն նպատակին հասնելու համար: Չբավարարվեն ստացած գիտելիքներով և լինեն նախաձեռնող: 

Powered by staff.am.