Դանիացի ուսանողները Հայաստանում պրակտիկայի ծրագրի են մասնակցում

1024

staff.am «Ինթերնշիփային ծրագրեր Հայաստանում» նախագծի շրջանակներում հատուկ անդրադարձ ենք կատարել Հայաստանի Քաղաքացիական ավիացիայի կոմիտեում անցկացվող պրակտիկայի ծրագրի հաջողության պատմությանը։ Մինչ այս, շատուշատ լուսաբանումներ ենք կատարել մասնավոր ընկերություններում պրակտիկայի ծրագրերի հաջողության պատմությունների մասին, անդրադարձել ենք՝ ինչ ուղղությամբ և մասնագիտական ոլորտներում են անցկացվում այդ ծրագրերը, որոնք բոլորն էլ յուրովի հետաքրքիր են եղել։

Այս անգամ ուրախ ենք տեղեկացնել, որ առաջին անգամ Հայաստանի Քաղաքացիական ավիացիայի կոմիտեում՝ պետական հատվածում,  5-ամսյա պրակտիկայի ծրագիր է մեկնարկել, որին մասնակցում են ուսանողներ արտերկրից: Պրակտիկայի ծրագիրը չվճարվող է և իրականացվում է Դանիայի կառավարության ֆինանսական աջակցությամբ։

To read the article in English, you can click here.

staff.am-ում մեծ հաճույքով հյուրընկալեցինք Նիկոլասին և Նիելին, ովքեր ժամանել են Հայաստան Դանիայից, և զրուցեցինք Հայաստանում իրենց պրակտիկայի հաջողության մասին։ Նշենք, որ Նիկոլասը և Նիելը Կոպենհագենի համալսարանում Ռիսկերի կառավարման մասնագիտացումն են ընտրել, այժմ ներառված են մագիստրոսական ծրագրում, և խիստ պատահական իրենց դասախոսներից տեղեկանում են Հայաստանի Քաղ․ ավիացիայի կոմիտեում պրակտիկայի ծրագրի մասին։

«Մեր այցը Հայաստան պլանավորված չէր, մենք պատահական տեղեկացանք այս հնարավորության մասին ու այդ ժամանակ նույնիսկ գաղափար չունեինք Հայաստանի Քաղ․ ավիացիայի մասին, թե  օրինակ ում հետ ենք աշխատելու։ Միայն տեղյակ էինք, որ կառույցը գտնվում է օդանավակային կից։ Ամեն ինչ պարզ էր, նման հնարավորություն պետք չէ բաց թողնել։ Հայաստան գալը մեզ համար շատ մեծ ու կարևոր քայլ էր», – ոգևորությամբ պատմում էր Նիկոլասը։

«Ի սկզբանե տեխնիկական կրթություն ունեմ, սովորել եմ Դանիայի տեխնիկական համալսարանում, սակայն միշտ հետաքրքրված եմ եղել անվտանգության ոլորտում ռիսկերի կառավարմամբ։ Նաև շատ-շատ եմ սիրում հաղորդակցվել մարդկանց հետ։ Հենց այդ հետաքրքրություններն էլ ինձ բերեցին Հայաստան։ Այս ծրագիրն իսկապես հրաշալի հնարավորություն է ինձ համար», – նշեց Նիելը։

Niels

Հայաստանի Քաղ․ ավիացիայում այժմ բարեփոխումներ են կատարվում և կոմիտեի նախագահ Տաթևիկ Ռևազյանի խորհրդով պրակտիկանտներ Նիկոլասը և Նիելը ներգրավված են մի քանի ոլորտների աշխատանքներում։ Մասնավորապես, ուսումնասիրում են տարբեր երկրների ավիացիայում անվտանգության խնդիրները կարգավորող օրենքները և փորձում լավագույնները ներդնել Հայաստանում։

«Աշխատանքը վիթխարի է, բավականին շատ ուսումնսիրություններ ենք կատարում, ծանոթանում հարյուրավոր էջերով փաստաթղթերի հետ, որպեսզի կարողանանք միջազգային լավագույն փորձը կիրառել այստեղ՝ Հայաստանում»,- հավելեց Նիելսը։

Նիկոլասը նաև պատմեց,- «Քանի որ Դանիայում հրշեջ անվտանգության ոլորտում եմ աշխատել, այստեղ՝ Հայաստանում, մենք նաև զբաղվում ենք անձնակազմի, ուղևորների, կառույցի և նավիգացիոն աշտարակի հրշեջ անվտանգությամբ»։

Մեր հարցին, թե ինչ մարտահրավերների են հանդիպել Հայաստանում, նրանք փոքր-ինչ կատակով պատասխանեցին, ինչպես կպատմեր յուրաքանչյուր զբոսաշրջիկ առաջին անգամ Հայաստան այցելելիս՝ օդանավակայանից տաքսի վերցնելու հետաքրքիր պատմությունից մինչև Հայաստանի կենսաձևին ադապտացումը։ Ի դեպ, Նիկոլասն արդեն հաճախում է հայոց լեզվի դասընթացների և զրույցի ընթացքում օգտագործում էր «հա», «չէ», «լավ» բառերը ?

«Մարտահրավեր կարող ենք համարել լեզվային բարիերը, որը շատ հաճախ սահմանափակում է շփումը։ Ինչպես նաև, մեր կոլեգաների աջակցության շնորհիվ այժմ բնակվում ենք քաղաքի կենտրոնում, որտեղից առավել հարմար է այցելությունը տեսարժան վայրեր։ Առավելություններից է նաև այն, որ Հայաստանում հեշտ է կողմնորոշվել, քանի որ կայքերը մեծամասամբ անգլերեն են»,- պատմեցին Նիկոլասը և Նիելը։

2

Նիկոլասի և Նիելի հետ հետաքրքիր էր զրուցել նաև Հայաստանի առանձնահատկությունների մասին․ «Դանիայի հետ համեմատած այստեղ մշակույթը և կենսաձևը տարբերվում են, մարդիկ ավելի ընկերական են և հյուրընկալ։ Երբ քայլում ես փողոցով նաև հասկանում ես, որ շատ օգնող են ցանկացած հարցում։ Չենք կարող չնշել նաև, որ այստեղ խենթ երթևեկություն է» 🙂

edited_Danish-students

Անչափ ոգևորիչ է, երբ Հայաստանի աշխատաշուկայում նման հնարավորություններ են ընձեռվում արտասահմանի մասնագետներին, ովքեր կարող են իրենց մասնագիտական ներուժն օգտագործել տարբեր կազմակերպությունների աշխատանքների իրականացման և զարգացման գործում։ Դանիացի պրակտիկանտները պատրաստվում են իրենց ձեռք բերած հմտությունները կիրառել ապագայում կամ հայրենի երկրում կամ արտասահմանում, մասնավորապես, պրակտիկայի ընթացքում մեծ հետաքրքրություն է առաջացել աշխատել ավիացիայի ոլորտում։

staff.am «Ինթերնշիփային ծրագրեր Հայաստանում» նախագիծը շարունակական բնույթ ունի, որի ընթացքում լուսաբանում ենք և մասնավոր, և պետական ոլորտի ընկերություններում ինթերնշիփային հաջողության պատմությունները։

Powered by staff.am.