Հայ հիմնադիրներ ունեցող ServiceTitan ամերիկյան հաջողված ստարթափը, որը տնային ծառայությունների ոլորտում բիզնես կառավարման լուծումներ է առաջարկում, արդեն գրասենյակ է բացել Հայաստանում։ Եթե հիշում եք, ընդամենը մի քանի ամիս առաջ ServiceTitan ընկերությունը հայտարարեց Հայաստանում ինժեներական գրասենյակ բացելու մասին և սկսեց իր տեխնիկական թոփ մասնագետների հավաքագրումը staff.am-ի միջոցով։ Այսօր արդեն ուրախ ենք ձեզ հետ կիսվել ServiceTitan ընկերության հաջողության պատմությամբ։
2012թ. Արա Մահդեսյանի եւ Վահե Կուզոյանի կողմից հիմնադրված ServiceTitan-ը հարթակ է տրամադրում տնային ծառայություններ մատուցող բիզնեսներին, որպեսզի նրանք առանց ավելորդ ջանքերի կառավարեն եւ ավելի ռացիոնալ դարձնեն իրենց գործողությունները, բարելավեն հաճախորդների սպասարկումը եւ զարգացնեն բիզնեսը:
Ընկերությունն այսօր արդեն ունի ավելի քան 600 աշխատակից Լոս Անջելեսում և Ատլանտայում, և 2500-ից ավելի հաճախորդ՝ ողջ ԱՄՆ-ի տարածքում։
Խոսելով երևանյան գրասենյակի մասին, Կուզոյանն ասել է․
Սկզբնական շրջանում գրասենյակում կաշխատեն ավագ ինժեներներ՝ արտադրանքի զարգացմամբ զբաղվող թիմն ընդլայնելու նպատակով։ Եթե ընթացքում հաջողություններ գրանցենք, ապա վստահ կարող եմ ասել, որ աշխատակիցների թիվը գնալով կավելանա։ Ամեն ինչ կախված է նրանից, թե որքան դինամիկ ու արդյունավետ մենք կկարողանանք զարգանալ։
Ընկերության համահիմնադիր Վահե Կուզոյանի խոսքով իրենց արմատները Հայաստանում են, և իրենց համար կարևոր է ոչ միայն ներկա լինել հայրենիքում, այլև ներդրումներ կատարել։
Մեր նպատակն է նպաստել աշխատուժի կրթությանը և հնարավորություններ տալ, որպեսզի լավագույն մասնագետները ստիպված չլինեն լքել երկիրը,- ասել է Վահեն։
Կուզոյանը նաև հույս է հայտնել ստեղծել այնպիսի միջավայր և մշակույթ, որոնք կօգնեն զարգացնել տեխնիկական ներուժը Հայաստանում։
Անչափ ոգևորիչ է նաև այն տեսլականը, որ կիսում է ընկերության համահիմնադիր և գործադիր տնօրեն Արա Մահդեսյանը․
Մենք ցանկանում ենք, որ բոլորը՝ սկսած ուսանողներից մինչև ավագ ինժեներներ, հավատան, որ եթե միասին աշխատենք, կհասնենք համաշխարհային մակարդակի։ Սա չի լինելու մի վայր, որտեղ մի քանի տարի հետո կարելի է ձանձրանալ ու կարիերայի նոր հնարավորություններ փնտրել։
Մաղթում ենք հաջողություն ServiceTitan-ին իր գործունեությունում, իսկ staff.am-ը շարունակում է խթանել Հայաստանում միջազգային ընկերությունների ներկայացուցչական գրասենյակների բացմանը և զարգացմանը՝ տրամադրելով մարդային ռեսուրսների հավաքագրման արդյունավետ գործիքներ։
Եթե հետաքրքրված եք զարգացնել ձեր կարիերան ServiceTitan ստարթափում, ապա կարող եք ՀԵՏԵՎԵԼ ընկերությանը staff.am-ում առաջիկայում հրապարակվող թափուր աշխատատեղերին առաջինը ծանոթանալու և դիմելու համար։
