StaffMedia հարցազրույց. «AI-ը կարող է օգնել մասնագետներին որոշակի վերլուծությունների, տվյալների հավաքագրման հարցում, բայց փոխարինել՝ ոչ»

1436

«Վերափոխելով բանականությունը» խորագրով «Գլոբալ ինովացիոն ֆորում»-ի ընթացքում աշխարհի 20 երկրների ավելի քան 90 գիտնականներ, նորարարության և բիզնես ոլորտի ներկայացուցիչներ քննարկում են արհեստական բանականության դրսևորումները տարբեր ոլորտներում։ StaffBlog-ը՝ որպես գործընկեր, ձեզ հետ կկիսվի կարիերայում AI-ի ունեցած ազդեցության մասին՝ հարցազրույց ունենալով ակնառու հյուրերի, ներկաների և տարբեր ոլորտի գիտնականների հետ։

Այս անգամ մեր զրույցը Icometrix ընկերության Գործադիր տնօրեն, դոկտոր Ուիմ Վան Հեքիի հետ էր։

Այս օրերի ընթացքում բազմիցս խոսվում է AI-ը մաթեմատիկայում, AI-ը բժշկությունում, Մեծ տվյալները ֆիզիկայում թեմաներով, իսկ մի քանի բառով ինչպե՞ս կնկարագրեք «AI-ը աշխատանքի նկարագրություններում»։ Այսինքն, ինչ փոխակերպումներ կլինեն այս ոլորտում, ինչպիսի հմտություններով մասնագետներ առավել պահանջված կլինեն։

AI-ը ակնհայտ է, որ ներխուժել է բիզնես աշխարհ: Շնորհիվ իր կարողությունների և հնարավորությունների այն մեծ պոտենցիալ ունի ապագայում:

Մենք աշխատում ենք առողջապահության բնագավառում: Ակնհայտ է, որ բժիշկները դեռևս չեն զիջի իրենց տեղը և կմնան կարևոր, բայց կրթական առումով AI-ը կունենա մեծ ազդեցություն: AI-ը կարևոր նշանակություն ունի հավելյալ գիտելիք ստանալու և AI-բիզնես կապի առումով: Սա արդեն իսկ ընթացք ստացած փոփոխություն է և կշարունակվի ապագայում:

Մոդեռնիզացված գիտություններին կհաջորդեն մոդեռնիզացված մասնագիտությունները․ արդյո՞ք կլինեն մասնագիտություններ, որոնք նորագույն տեխնոլոգիաների կողմից ազդեցության չեն ենթարկվի։ Որո՞նք են։

Անկեղծ ասած չեմ կարծում, որ AI-ը տարածում ունի շատ ոլորտներում: Այն ապագան գրավող միտում ունի, բայց իրականում չի կարող ամբողջապես փոխարինել շատ ու շատ բաների: Այն կօգնի որոշակի առումներով այն դեպքերում, երբ տվյալ գործը համակարգիչն ավելի լավ կանի: Օրինակ, առողջապահության ոլորտում 2 տարի առաջ մենք վախ ունեինք, որ AI-ը կփոխարինի ճառագայթաբաններին, բայց սա այդ դեպքը չէր: Այն կարող է օգնել վերջիններիս որոշակի վերլուծությունների, տվյալների հավաքագրման հարցում, բայց փոխարինել՝ ոչ: Ճառագայթաբանները ներկայումս կարևոր դերակատարություն ունեն:

Ես այս ամենը երբեմն համեմատում եմ հաշվիչ մեքենայի հետ: Երբ ստեղծվեց հաշվիչը, բոլոր հաշվապահները կարծում էին, որ կկորցնեն իրենց աշխատանքը, քանի որ այդ փոքրիկ սարքը ավելի արագ էր կատարում հաշվարկները: Բայց հաշվապահներ դեռ կան, իսկ սարքը պարզապես օգնում է նրանց ավելի արդյունավետ աշխատանք կատարել:

Որևէ սահմանափակում չեմ տեսնում AI-ի կիրառման մեջ, բայց կարևոր է, որ այն արժեքավոր դեր խաղա մասնագիտական ոլորտներում: Մարդ-համակարգիչ համագործակցությունը կստեղծվի արդյունքում:

Տարբեր ժամանակաշրջաններում գիտական նորությունները լուրջ ազդեցություն են ունեցել, կխնդրենք նշել արհեստական բանականության 1 առավելություններից և 1 թերություններից։

Առավելություններից մեկն այն է , որ AI-ը կարող է տալ ավելի արագ և ճշգրիտ հաշվարկներ, որոնք մարդկային ուղեղն ի վիճակի չէ կատարել:

Եվ կրկին առողջապահության ոլորտին վերադառնանք. այնքան տեղեկատվություն կարելի է պեղել տարբեր աղբյուրներից՝ կլինի գիտական հրապարակում, թե վերլուծական ինֆորմացիա: Այս ամենը ինքներս կատարել անկարող ենք:

Թերություններից կնշեմ հետևյալը՝ AI-ը պետք չէ դիտարկել որպես սև արկղ: Պետք է չափազանց զգույշ լինել, քանզի ոչ  բոլոր ալգորիթմների ստեղծման պատճառները գիտես: Անհրաժեշտ է իմանալ ինչն ինչի համար է մշակված և ինչի համար է օգտագործվում: Հակառակ դեպքում վտանգավոր իրավիճակ կստեղծվի: Եվ ահա այստեղ  է, որ AI-ի և պրոֆեսիոնալների համագործակցությունն այդքան կարևոր է դառնում:

Զրուցեց Նազելի Բադալյանը

Powered by staff.am.