Syn-cover
Սկիզբ / Մեր Գործատուները / Հայաստանի տեխնոլոգիական հսկան արդեն 15 տարեկան է. Synopsys Armenia

Հայաստանի տեխնոլոգիական հսկան արդեն 15 տարեկան է. Synopsys Armenia

Վերջերս Հայաստանի տեխնոլոգիական հսկան՝ Սինոփսիս Արմենիան, տոնեց իր 15-ամյակը, որին հրավիրված էր մասնակցելու նաև staff.am թիմը։ Կազմակերպված միջոցառումները բազմաբնույթ էին և արտացոլում էին ընկերության ակտիվությունը տարբեր ոլորտներում՝ Հայաստանի տեխնոլոգիական ներուժի զարգացումից մինչև երկրի էկոլոգիական խնդիրների լուծումը։

Այս առիթով որոշեցինք հատուկ անդրադարձ կատարել Սինոփսիս Արմենիայի 15-ամյակին։

Կարող ենք վստահորեն ասել, որ Սինոփսիսը տոնում էր ոչ միայն այս նշանակալից իրադարձությունը, այլ նաև նորարարությունների 15-ամյակը, իր հարուստ պատմությունը, լավագույն գործատու կոչումը և բացառիկ համբավը Հայաստանում։  Սիլիկոնյան Հովտի Մաունթին Վյու քաղաքում Սինոփսիս ընկերության գլխամասում գնահատեցին հայերի տեխնոլոգիական ներուժը՝ դեռևս 2004 թվականին հիմնելով ներկայացուցչական գրասենյակ Հայաստանում։

Եվ այսօր, երբ մարդիկ ձգտում են սմարթ և ապահով լուծումների կյանքի ցանկացած բնագավառում, կլինի դա կրթություն, բժշկություն, ֆինանսական ոլորտ, երբ գրեթե մեզնից յուրաքանչյուրը չի պատկերացնում իր օրն առանց սմարթֆոնների ու IoT-ի, Սինոփսիս Արմենիայում ավելի քան 850 պրոֆեսիոնալ մասնագետ, որոնցից 11%-ը գիտությունների թեկնածուներ և դոկտորներ են, իսկ 35%-ից ավելին՝ կանայք, մասն է կազմում այդ ամենի՝ իր գիտելիքներով, փորձով ու հմտություններով։

Իսկ եթե այլ կերպ, ապա Սինոփսիսը ծրագրային ապահովման, էլեկտրոնային նախագծման ավտոմատացման ծրագրերի մշակման և սպասարկման, անալոգային, ներկառուցված հիշողության բլոկների և կիսահաղորդչային մտավոր սեփականության, վերջին տարիներին նաև ծրագրային ապահովման անվտանգության և որակի ստուգման ոլորտներում առաջատարն է՝ 2019թ․-ին ունենալով ավելի քան 3,4 մլրդ ԱՄՆ դոլարի եկամուտ։

Թերևս, այս բոլոր հաջողությունների հիմքում Սինոփսիսի աշխատակիցներն են։

 Եվ պատահական չէր, որ 15-ամյակի միջոցառումները սկսվեցին բացօթյա տոնական փարթիով՝ համախմբելով բոլոր աշխատակիցներին։ Բազմամյա աշխատանքն էլ իր հերթին նույնպես արժանացավ բարձր գնահատականի։ Այն աշխատակիցները, ովքեր արդեն 15 տարի աշխատում են ընկերությունում, պարգևատրվեցին շնորհակալագրերով և գավաթներով։

Բայց ինչպես նշեցինք, տոնական փարթին միայն սկիզբն էր 🙂 Շարժվենք առաջ․․․

Սինոփսիս Արմենիան իր ավանդույթ դարձած «Սինոփսիսի շաբաթ»-ը այս տարի կազմակերպեց 15-ամյակի տոնական միջոցառումների շարքում, որի պաշտոնական բացումը կատարեց Synopsys-ի նախագահ և համատնօրեն Չի-Ֆուն Չանը։

«Վերջին տարիներին Synopsys Հայաստանը վիթխարի փոփոխություններ է իրականացրել, մեկնարկել տարաբնույթ նախագծեր, որոնք Հայաստանում առաջինն էին՝ ապահովելով ոլորտում մեծ առաջընթաց։ Այդ իսկ պատճառով էլ մենք հակված ենք ծավալել մեր գործունեությունը նաև Գյումրիում»,- իր ելույթում նշեց Չի-Ֆուն Չանը։

6

Կարծում եմ, tech ոլորտով հետաքրքրված ուսանողները և մասնագետները միշտ անհամբերությամբ են սպասում «Սինոփսիսի շաբաթ»-ին։

Այս տարի շուրջ 300 ուսանող կարողացավ օգտվել «Սինոփսիսի շաբաթ»-ի շրջանակներում անցկացվող էքսպո-ցուցահանդեսին մասնակցելու հնարավորությունից և ծանոթանալ Սինոփսիս Արմենիայի ուսումնական դեպարտամենտի (SAED) կրթական հնարավորություններին ու ընկերությունում առկա աշխատանքի հնարավորություններին։

Դեռ ավելին, բացի ուսումնական դեպարտամենտի միջոցով գիտելիքների փոխանցումը և նոր մասնագետների պատրաստումը, Սինոփսիս Արմենիան նախաձեռնողն ու գլխավոր կազմակերպիչն է նաև Միկրոէլեկտրոնիկայի ամենամյա միջազգային օլիմպիադայի։ 

Օլիմպիադան հատուկ հնարավորություն է տալիս բացահայտելու և զարգացնելու երիտասարդների ներուժը միկրոէլեկտրոնիկայի ոլորտում։ Այս տարի Միկրոէլեկտրոնիկայի  14-րդ ամենամյա միջազգային օլիմպիադայի եզրափակիչ փուլը կայացավ «Սինոփսիսի շաբաթ»-ի ընթացքում՝ «Սինոփսիս Արմենիա ուսումնական դեպարտամենտ»-ում ՀՀ Վարչապետի հովանու ներքո, ՎիվաՍել ՄՏՍ-ի հետ համատեղ գործընկերությամբ, Unicomp ընկերության հովանավորությամբ և Էլեկտրական և էլեկտրոնիկայի ինժեներների միջազգային կազմակերպության (IEEE) հետ համագործակցությամբ:

34 մասնակից 18 երկրից՝ Հայաստանից, Բելառուսից, Բրազիլիայից, Կոլումբիայից, Եգիպտոսից, Գերմանիայից, Իրանից, Հորդանանից, Ֆիլիպիններից, Լեհաստանից, Ռուսաստանից, Սաուդյան Արաբիայից, Սերբիայից, ԱՄԷ-ից, Ուկրաինայից, Ուրուգվայից, ԱՄՆ-ից և Վիետնամից, մասնակցեցին օլիմպիադային։ Իսկ հաղթողներն արժանացան հատուկ մրցանակների հանդիսավոր երեկոյի ընթացքում։

Սինոփսիս Արմենիան այն ընկերություններից է Հայաստանում, որի արժեքների կենտրոնում Կորպորատիվ սոցիալական պատասխանատվությունն է։ Աշխատակիցները վստահ են, որ համայնքին նվիրված իրենց կամավորական ծրագրերով ապահովում են առողջ, էկոլոգիապես մաքուր և արդյունավետ աշխատանքային միջավայր։ 

15-ամյակի կապակցությամբ Սինոփսիս Արմենիայի ավելի քան 100 կամավոր տնկեցին 430-ից ավելի էնդեմիկ տեսակի ծառատեսակներ։ Ուշագրավ է, որ այս 15 տարիների ընթացքում Սինոփսիս Արմենիայի աշխատակիցների կողմից տնկվել է շուրջ 9500 ծառ 😊

Իսկ ավելի վաղ՝ հոկտեմբերի 18-ին Հայաստանյան մասնաճյուղի կամավորները փայլուն հնարավորություն ունեցան մաս դառնալու Սինոփսիս ընկերության մի բացառիկ կամավորական միջոցառման՝ ուղղված մշակութային ժառանգության վերաբերյալ իրազեկվածության բարձրացմանն ու պահպանման գործընթացում համայնքների ներգրավվածության խթանմանը: Կամավորները նվիրեցին իրենց ժամանակն ու ոգին`Հայաստանի միջնադարյան ճարտարապետական հրաշքներից մեկի` Թալին Կաթողիկե տաճարի շրջակա տարածքի մաքրման և գեղեցկացման համար` «Թանգարանային աշխատողների և ընկերների ասոցիացիա» ՀԿ-ի և«Հայաստան ծառատունկ» ծրագրի աջակցությամբ:

Կամավորական այս միջոցառումն անցկացվեց «Ստեղծարար համայնքներ» նախաձեռնության հովանու ներքո՝ Կրթության, գիտության, մշակույթի և սպորտի նախարարության և Հայ Եկեղեցու համաշխարհային երիտասարդական միավորման (ՀԵՀԵՄ) կենտրոնական գրասենյակի ներգրավմամբ և ուղղված էր պատասխանատու համայնքների ձևավորմանն ու կամավորական ոգու սերմանմանը, ինչպես նաև գործընկերության և համագործակցության մշակույթի խթանմանը:

Եվ այսպիսով, Սինոփսիս Արմենիայի 15-ամյակին նվիրված միջոցառումները եզրափակվեցին «Արամ Խաչատրյան» համերգասրահում տեղի ունեցած գալա երեկոյով, որին մասնակցեցին ՀՀ Վարչապետ Նիկոլ Փաշինյանը, ՀՀ Կրթության, գիտության, մշակույթի և սպորտի նախարար Արայիկ Հարությունյանը, ՀՀ Կառավարության անդամներ, դեսպաններ, այլ գործընկերներ և բարձրաստիճան հյուրեր։

Բոլոր մասնակիցներն ու ներկաները մեծ հիացմունքով ծանոթացան Սինոփսիս Արմենիայի 15-ամյա հաջողության պատմությանը, որտեղ ամփոփված էր հսկայածավալ աշխատանք։

Իսկ թե ինչով է պայմանավորված այս հաջողությունը, իր ողջույնի խոսքում Սինոփսիս Արմենիայի նախագահ և գլխավոր ճարտարագետ Երվանդ Զորյանը նշեց․

«R&D-ի ոլորտում մենք առաջատարն ենք և ապահովում ենք էլեկտրոնային դիզայնի ավտոմատացման (EDA) և կիսահաղորդչային մտավոր սեփականության (IP) լուծումներ։ Մեր առանձնահատուկ աջակցությունն այս ոլորտին հնարավոր եղավ միայն մեր տաղանդների, նորարարության և այն բացառիկ անհատների նվիրական աշխատանքի շնորհիվ, ովքեր կիսում են մեր տեսլականը և արժեքները»։

Որպես գործատու՝ Սինոփսիս Արմենիան նորարարությունների խթանման համար սահմանել է հատուկ մրցանակներ՝  «The Best Innovative Idea», «The most publications author», «The most Patents owner», որոնք նույնպես շնորհվեցին գալա երեկոյի ընթացքում։

Խրախուսվեցին նաև ՏՏ ոլորտի լավագույն ուսանողներն ու աշակերտները Կրթական պարգևի 15-րդ մրցանակաբաշխության շրջանակներում։

Մրցանակաբաշխության հանձնաժողովի նախագահ, Սինոփսիս Արմենիայի տնօրեն Հովիկ Մուսայելյանը ներկայացրեց այս տարվա մրցանակաբաշխության արդյունքները՝ առանձնացնելով առանձնահատկություններն ու դիտարկումները։ ՀՀ Վարչապետ Նիկոլ Փաշինյանը մրցանակներ հանձնեց 47 մրցանակակրի։

 

Եվ ինչպես իր շնորհավորանքի խոսքում նշեց ՀՀ Վարչապետ Նիկոլ Փաշինյանը, այս հաջողությունը մեր երկրի հաջողությունն է և մեր քայլերը պետք է ուղղված լինեն նման ընկերությունների բացմանն ու զարգացմանը Հայաստանում։

«Շնորհավորում եմ «Սինոփսիս Արմենիա» ընկերության հիմնադրման 15-րդ տարեդարձի կապակցությամբ և շնորհավորում եմ ոչ միայն «Սինոփսիս» ընկերությանը, ոչ միայն «Սինոփսիս Արմենիա» ընկերությանը և նրա աշխատակիցներին, այլև շնորհավորում եմ բոլորիս, Հայաստանի Հանրապետությանը, որովհետև կարծում եմ, որ «Սինոփսիս» ընկերության նման ընկերությունների մուտքը Հայաստանի Հանրապետություն շատ կարևոր և նշանակալի բան է նշանակում բոլորիս համար:

Հանդիսավոր երեկոն եզրափակվեց Սինոփսիս Արմենիայի «Նաիրի» Ազգագրական պարային համույթի կատարումներով, որոնք առանձնահատուկ շուք հաղորդեցին տոնական միջոցառմանը։

JIW_7809

Նշենք, որ այս 15-ամյա հաջողությունները շատ շուտով կհամալրվեն թռիչքային նոր ձեռքբերումներով։ Synopsys ընկերությունը մեծ հետաքրքրություն ունի շարունակել իր ներդրումները Հայաստանում և նախատեսում է բացել նոր գրասենյակ Գյումրի քաղաքում։  Եվ դեռ ավելին, Synopsys-ը շուտով  ևս մեկ գրասենյակ կբացի Երևանում, որը կգործի Թումո կենտրոնի շենքում։

Անչափ գովելի է տեխնոլոգիական ոլորտում նման աշխարհահռչակ ընկերության լայնածավալ գործունեությունը, որը 15 տարի առաջ ներդրեց գործատու և աշխատակից կապի, գիտելիքի փոխանցման և ամբողջ աշխարհում մրցունակ մասնագետների պատրաստման սինոփսիսյան մշակույթը Հայաստանում և շարունակում է սահուն կերպով զարգացնել։ Կշարունակենք հետևել Սինոփսիս Արմենիայի նորություններին՝ ձեզ հետ առաջինը կիսվելու համար։  

cover_syns

Այցելություն Սինոփսիս Արմենիա. Ինչպիսի՞ն է տեխնոլոգիական հսկան իր աշխատակիցների աչքերով

Այս անգամ staff.am-ի թիմն այցելել էր Սինոփսիս Արմենիա ծանոթանալու ընկերության աշխատակիցների հետ

Կարդալ ավելին

 

Այցելեք staff.am այսօր և ստեղծեք Ձեր օնլայն CV-ին

Հեղինակը՝ StaffBlog

Դիտեք նաև

eb_cover-final size

Գործատուի բրենդավորման 4 կարևոր գործիք staff.am-ից

Հայաստանում ավելի ու ավելի շատ ընկերություններ են սկսել ուշադրություն դարձնել Գործատուի բրենդավորմանը՝ դիմելով սոց․ ցանցերի, …

Leave a Reply

Your email address will not be published. Required fields are marked *