st_wfp-cover

#WorkFromHome. ServiceTitan-ի լավագույն փորձը

Արդեն շուրջ մեկ շաբաթ է, ինչ Հայաստանում շատ ընկերություններ անցում են կատարել նոր աշխատանքային ռեժիմի՝ հոգ տանելով իրենց աշխատակիցների անվտանգության և առողջության մասին։ Ինչ-որ ժամանակով բացակայում է եռուզեռը գրասենյակներում, ազատ են meeting room-երը, խոհանոցից չի լսվում «state of the art» սուրճի ապարատի ձայնը, դատարկ են հանգստի ու խաղերի սենյակները, բայց աներևակայելի ձևով ու նույն պրոդուկտիվությամբ առաջ են ընթանում աշխատանքները, իսկ թիմային ոգին ու մոտիվացիան` մշտականի պես բարձր ու տրամադրող։

Իսկ ինչպե՞ս․ ահա այս հարցի պատասխանի որոնման արդյունքում էլ մենք բացահայտեցինք ServiceTitan-ի՝ տնային ծառայությունների ոլորտում բիզնես կառավարման լուծումներ առաջարկող ամերիկյան առաջատար ստարթափ ընկերության “Work from home”-ի լավագույն փորձը։ Հատուկ շնորհակալ ենք ServiceTitan-ի թիմին մեզ օգնելու համար ։)

photo-of-macbook-pro-near-iphone-and-apple-magic-keyboard-2528116

Work from home՝ ServiceTitan-ի արձագանքը COVID-19-ին

Ինչպես գրեթե բոլորը, մենք էլ սկզբնական շրջանում ամբողջությամբ չէինք զգում ստեղծված իրավիճակի լրջությունը, շատ էր անորոշությունը՝ ի՞նչ է կատարվում, ի՞նչ է պետք անել։ Լավ է, որ համացանցի միջոցով կարողանում ես շատ արագ տեղեկանալ՝ ինչ է տեղի ունենում աշխարհի տարբեր ծայրերում, բայց միևնույն ժամանակ տեղեկության արագ հոսքը դժվարեցնում էր ընտրությունը՝ հավատալ լրատվականների՞ն, թե՞ մարդկանց։

Եվ մեր ընկերությունը, որն ունի ավելի քան 1000 աշխատակից գլխամասում՝ Գլենդելում, Երևանի և Ատլանտայի գրասենյակներում, շատ արագ քայլեր ձեռնարկեց բոլոր աշխատակիցների համար։

WORK FROM HOME! Այո՛, սա մեր ընկերության լավագույն պատասխանն էր այս նոր վիրուսին։ 

Երբ ընկերության գլխամասից տեղեկացրեցին, որ սկսում ենք տանից աշխատել, անմիջապես մեր ընկերությունն օգնեց ստեղծել անհրաժեշտ պայմանները տանից աշխատելու համար։

Ամեն օր ամբողջ թիմը թարմացումներ է ստանում ընկերության գլխամասից իրավիճակի մասին, թե ինչպես է պետք պաշտպանվել վիրուսից և ինչ անել, երբ ինչ-որ նախանշաններ են նկատում։ Թիմին ուղարկում են տանից աշխատանքն ավելի արդյունավետ դարձնող ուղեցույցներ, թարմացումներ ընկերության՝ հաճախորդներին նույն ինտենսիվությամբ սպասարկելու, ընկերության ֆինանսական վիճակի մասին և տեղեկություններ, թե ինչպես են մեր հաճախորդներն ավելի շատ գումար խնայում մեր ծրագրային լուծման շնորհիվ։ Այս բոլոր թարմացումները նպաստում են, որ թիմը խուճապի չմատնվի, շարունակի հանգիստ աշխատել տանից և իրեն ավելի ապահով զգալ։

Բոլորս շատ մտահոգ ենք, սակայն դրական տրամադրվածությունը մեր առօրյայի անբաժան մասն է կազմում, չէ՞ որ որպես թիմ մենք վիրտուալ էլ ենք կարողանում նույն զվարճալի, մոտիվացնող ու աշխատանքային աուրան ստեղծել։ Այլ կերպ, #TechnologyRocks, մեր թիմը նույնպես 🙂

3

icon

Նշեցիք տեխնոլոգիաների մասին, իսկ ի՞նչ tech գործիքներ եք օգտագործում տանից աշխատանքը կազմակերպելու համար։

Քանի որ ընկերությունում բոլորը սովոր են հեռահար աշխատանքի, շարունակում ենք օգտագործել նույն գործիքակազմը։ Օգտվում ենք հիմնականում Slack-ից՝ ներքին հաղորդակցման համար, տեսազանգերի համար օգտագործում ենք Zoom, Google Meet, իրար հետ ինչ-որ նյութեր կիսելու կամ միաժամանակ աշխատելու համար Sysinternals-ի ZoomIT, Google Drive ու Quip։ Թիմային աշխատանքի համար նաև օգտագործում ենք Confluence, draw.io, և այլ ծրագրեր։

1

icon

Անչափ ոգևորող է, երբ տեսնում ես, որ այսքան կազմակերպված ու սահուն աշխատանքը ընթանում է անկախ ստեղծված իրավիճակից։ Իսկ հետաքրքիր է, արդյո՞ք Ձեր ընկերությունն ուներ հատուկ մշակված Work from home մեթոդաբանություն մինչև համաճարակի տարածումը, թե համապատասխան քայլերը ձեռնարկվել են իրավիճակից ելնելով։ 

Քանի որ մեր ընկերության գլխամասը Գլենդելում է, իսկ երկու գրասենյակները Ատլանտայում և Երևանում, իսկ թիմակիցների թիվը հասնում է 1000-ի, ընկերությունը միշտ ունեցել է հեռահար` այդ թվում տանից աշխատելու համար մշակված մեխանիզմ։

Հայաստանյան թիմում հիմա 50+ աշխատակից կա, ու մեր թիմակիցները հաճախ են տանից աշխատում օրվա կեսը կամ ամբողջ օրը։ Բացի այդ՝ շատ աշխատանքներ արվում են հեռահար՝ տարբեր երկրներում ու ժամային գոտիներում լինելու պատճառով։

Այսինքն՝ ընդհանուր խուճապ կամ մեծ մտավախություններ չկային տանից աշխատելու տարբերակին անցնելիս։ Այս դեպքում տարբերությունն այն է, որ ամբողջ թիմն է տանից աշխատում ու շատ կարևոր է ամեն ինչ անել, որ արդյունավետությունը չնվազի ու թիմերը կապի մեջ լինեն իրար հետ։

icon

Արդեն շուրջ մեկ շաբաթ է, ինչ աշխատում եք այս ռեժիմով, ի՞նչ խնդիրների ու մարտահրավերների եք բախվել։ Եթե արդեն նախանշել եք լուծման ուղիները, կխնդրենք նույնպես կիսվել՝ որպես օգտակար ուղեցույց։

Պետք է հաշվի առնել, որ առհասարակ տանից աշխատելու բարդությունները կամ առավելությունները տարբեր են վիրուսի պայմաններում տանից աշխատելու ժամանակ առաջ եկածներից։ Վերջինիս դեպքում նոր սահմանափակումներ են առաջ գալիս՝ օրինակ` աշխատանքից հետո չես կարող ընկերներիդ կամ ընտանիքիդ հետ ինչ-որ տեղ գնալ, ավելի հաճախ դուրս գալ, գնալ մարզումների և այլն։

Հիմնական մեծ մտավախությունն ամենօրյա շփման բացը լրացնելն ու թիմի անդամների միջև կապը պահելն էր։ Դա շատ կարևոր է ընդհանուր տրամադրվածությանն ու աշխատանքային արդյունավետությանը նպաստելու համար։

Արդյունքում՝ ստեղծել ենք առցանց խոհանոց (zoom link), որը միշտ հասանելի է օրվա ընթացքում։  Թիմի անդամներն անցնում են այդ zoom-ի հղումով, «միասին» սուրճ խմում, ինչ-որ աշխատանքային և ոչ աշխատանքային թեմաներ քննարկում՝ ճիշտ այնպես, ինչպես օրվա ընթացքում անում էինք գրասենյակում։

final

Ամեն շաբաթ մենք ունենք “All hands” հանդիպումներ ամբողջ թիմի հետ, որոնց ժամանակ քննարկում ենք նախապես ընտրված տարբեր աշխատանքային թեմաներ։ Հիմա նորից իրականացնում ենք այդ հանդիպումները՝ անպայման տեսազանգի միջոցով։ Հիմնվելով մեր փորձի վրա բոլորին ենք խորհուրդ տալիս բոլոր զանգերը փոխարինել տեսազանգերով. դա  թույլ է տալիս լրացնենք իրար հաճախ չտեսնելու բացը։

4

Հատկապես վիրուսի ժամանակ տանից աշխատելու դեպքում, երբ տանից դուրս գալու հնարավորությունները քիչ են, թիմի անդամներից շատերը զգում էին, որ երբեմն «կորցնում» են աշխատանքի ու առօրյայի սահմանը ու շատ ավելի երկար են աշխատում։ Այդ իսկ պատճառով Slack-ի խմբում հիշեցումներ ենք ավելացրել, որպեսզի օրվա ընթացքում մի քանի անգամ թիմը ծանուցում ստանա, որ ժամանակն է սուրճ խմելու, երեխաների հետ զբաղվելու կամ մեկ այլ-ինչ-որ բան անելու համար։

Ծանուցում են ստանում նաև, որ աշխատանքային ժամն ավարտվել է և, եթե շատ շտապ ոչինչ չկա անելու, «գնան տուն» 🙂

Կարևոր է, որ տանից աշխատելու դեպքում անգամ մարդ կարողանա հանգստանալ ու անցնել իր սովորական առօրյային։ Երեխաներ ունեցող աշխատակիցների համար հիմնական մարտահրավերը երեխաների հետ տանից աշխատանքը կազմակերպելն է։ Երբ դա նկատեցինք որպես խնդիր, ընկերությունն առաջարկեց դայակի ծառայության փոխհատուցում ընկերության կողմից, որպեսզի ծնողների համար ավելի հեշտ լինի աշխատանքային ժամերին կենտրոնանալ աշխատանքի վրա։

Անշարժությունը թիմակիցների կողմից նշված հերթական անհարմարությունն էր, քանի որ մեծ մասն այս օրերին չեն կարող գնալ մարզումների և հիմնական ժամանակն անցկացնում են նստած։ Դա նույնպես լուծելի է՝ մարզվել ցանկացող թիմի անդամները պարզապես առցանց միանում են իրար ու օրվա ընթացքում գոնե 30 րոպե տրամադրում մարզվելուն, շարժվելուն։

Մշտական կապը, ոգևորող խոսքերը, հումորները, երեխաների արկածներն ու շփման նոր տարբերակները (օրինակ առցանց փոքր խումբ ստեղծել ու որոշել՝ ինչ հագնել ամեն առավոտ, կամ օրինակ առցանց մաֆիա խաղալու փորձեր կատարել) լցնում են մեր առօրյան ու մոտիվացնում ամեն օր։

icon

Նոր աշխատանքային ռեժիմ, նոր արկածներ։ Մեդիան ինչքան լի է այս նոր տեսակի վիրուսի մասին նյութերով, այնպես էլ տարբեր հումորային դիպվածներով, որոնք պատահում են տանից աշխատանքի ժամանակ։ Կկիսվե՞ք նաև Ձեր թիմի դիպվածներով 🙂

Մեր թիմակիցը՝ Էդուարդը պատմեց, որ մի քանի օր առաջ իր աղջիկը որոշել է, որ ինքն է աշխատելու, իսկ էդուարդը պետք է իր տիկնիկներով խաղա։ Մի քանի րոպե անց Էդուարդը (խաղից կտրվելով 🙂 ) մոտենում է էկրանին ու տեսնում, որ մոնիտորը 180 աստիճանով շրջված է իսկ coding file-ի մեջ տարօրինակ բաներ են գրված։ Ինչպես Էդուարդն է ասում՝ «Մտքումս շնորհակալություն հայտնեցի մանկապարտեզին երեխաներին նոր ծրագրավորման լեզու սովորեցնելու համար»։

Նկարում, արդեն ապահովության համար, խաղն ու աշխատանքը համատեղում են։ Համոզված եղեք՝ մեծ համբերատարությամբ։

Դե իսկ, մեզ համար ծիծաղելի է պատկերացնել՝ ինչպես է Դավիթը (ինքն է պատմել, անկեղծ չենք հետևել) միթինգներից հետո արագ վազում բակ, տղայի հետ հեծանիվ քշում, արագ զբոսնում, ու նորից հետ վերադառնում հաջորդ միթինգին այնպես, կարծես ոչինչ չի եղել։ Այ եթե Էդուարդի աղջիկը Դավիթենց տանը լիներ, հաստատ Դավիթի փոխարեն կաշխատեր մինչև վերադառնար։

Շատ ուրախ փորձառություն ունեցանք առաջին ընդհանուր Zoom տեսազանգի ժամանակ, երբ բոլորս փորձարկում էինք հետնանկարի տարբեր տեսարաններ։ Արդյունքում՝ ունեցանք ծիծաղելի տեսանյութ ու շատ ուրախ միթինգ։

Եթե, իհարկե, ինչ-որ մեկը հետևեր Slack-ի մեր ընդհանուր խմբի նամակներին, որտեղ անընդհատ ծիծաղելի մեկնաբանություններ ենք գրում ու փորձում համեմատականներ տանել մեր «նախկին առօրյայի» հետ, կհասկանա, որ դեռ մի քանի շաբաթ էլ այսպես կդիմանանք։ Բայց դե, ինչ խոսք, կարոտում ենք իրար ու մեր սովորական առօրյան։

icon

Իսկ ի՞նչ եք կարծում, ի՞նչ առավելություններ ունի տանից աշխատանքը և ի՞նչ դրական արդյունք կարելի է ստանալ այս ամենից։ Կարծում եմ համամիտ եք, որ ցանկացած իրավիճակից կարելի է օգուտ քաղել։

Թիմի որոշ անդամների համար տանից աշխատելն ունի առավելություններ՝ ավելի հանգիստ է, անաղմուկ, հեշտ ես կենտրոնանում, եթե ցանկանում ես բարձր երաժշտություն լսելով ես աշխատում, ունենում ես ավելի ճկուն գրաֆիկ, աշխատանքի հասնելու համար խցանումների մեջ չես ընկնում։

Շատ կարևոր ձեռքբերում՝ շատերն են փաստում, որ համոզվել են, որ շատ «միթինգների» անհրաժեշտություն իրականում չկա։ Շատ հարցեր երկար տեղում քննարկելու փոխարեն կարելի է պարզապես նամակ գրել ու հարցին ավելի հեշտ և արագ լուծում տալ։

2

Դրական է նաև մենեջերների կողմից թիմի նկատմամբ վստահության աճը, որն էլ տանում է պատասխանատվության նոր չափաբաժնի։ ServiceTitan-ում մշտապես աշխատանքային շատ թափանցիկ միջավայր է եղել, որտեղ բոլորը վստահում են իրար ու ամեն ինչ անում են արդյունավետ ու հետաքրքիր աշխատանքի համար, նույնը պահպանվում է այժմ։

Ստեղծված իրավիճակից ելնելով՝ թիմի անդամները շատ ավելի ժամանակ են անցկացնում ընտանիքի, երեխաների հետ, ինչը, իհարկե, ունի իր դրական կողմերը։

Մենք արդեն շատ բան հասցրինք սովորել և արժևորել այս մեկ շաբաթվա ընթացքում։

icon

Ամփոփենք մեր վիրտուալ հարցազրույցը ServiceTitan թիմակիցների հետ բլից հարցով։ Ո՞րը կլինի Ձեր առաջին քայլը, երբ պանդեմիայից հետո թիմով գնաք գրասենյակ աշխատանքի։

Այս հարցի շուրջ տարբեր մոտեցումներ կան թիմի կողմից՝ ամենառեալիստիկը՝ այն ինչ տարել ենք գրասենյակից՝ համակարգիչներ, մոնիտորներ, հետ տանել 🙂

Ավելի էմոցիոնալ՝ գրկախառնվել։

Ավելի գործնական՝ գործ չանել գոնե մեկ օր։

Ավելի պրակտիկ՝ գնալ քաղաքից դուրս team building-ի։

Դեռ մտածելու ժամանակ ունենք ^_^

#WorkFromHome VS #OfficeWork

Ի դեպ, փոքր գաղտնիք բացահայտենք ձեզ համար, այս բլից հարցերի պատասխանները մենք կունենանք նաև լուսանկարներով և անպայման կկիսվենք ձեզ հետ, թե ինչպես է ServiceTitan-ի ողջ թիմը գրկախառնվում, մեկ օր «ոչ աշխատանքային» հռչակում ու ավելին՝ գնում քաղաքից դուրս հետաքրքիր team building-ի։ Ուրեմն, շարունակեք հետևել մեր նորություններին ServiceTitan-ի մասին թարմացումները բաց չթողնելու համար, իսկ այժմ կարող եք ծանոթանալ նաև առկա թափուր աշխատատեղերին և, իհարկե, դիմել: Նրանք շատ հմուտ են տեխնոլոգիաներում ու վիրտուալ հարցազրույցների միջոցով կարող եք դառնալ նրանց վիրտուալ գործընկերը 🙂

Թափուր աշխատատեղեր

Այցելեք staff.am այսօր և ստեղծեք Ձեր օնլայն CV-ին

Հեղինակը՝ StaffBlog

Դիտեք նաև

eb_cover-final size

Գործատուի բրենդավորման 4 կարևոր գործիք staff.am-ից

Հայաստանում ավելի ու ավելի շատ ընկերություններ են սկսել ուշադրություն դարձնել Գործատուի բրենդավորմանը՝ դիմելով սոց․ ցանցերի, …

Leave a Reply

Your email address will not be published. Required fields are marked *