Ժամանակակից աշխատաշուկայում հաջողելու համար բավարար չէ միայն հմտություններով և փորձով փայլել։ Կարևոր է նաև, թե ինչպես եք ներկայացնում Ձեզ՝ սկսած էլ․ փոստի հասցեից մինչև CV-ի ձևաչափը, ուղեկցող նամակը և հարցազրույցների ժամանակ Ձեր հաղորդակցման մշակույթը։
Այս հոդվածում մենք կներկայացնենք հստակ կառուցվածքով, համակարգված ուղեցույց, որը կօգնի ձեզ ոչ միայն խուսափել տարածված սխալներից, այլև կառուցել վստահելի, մասնագիտական պրոֆիլ՝ բարձրացնելով հարցազրույցի հրավեր ստանալու հնարավորությունը։
Քայլ 1․ Միշտ սկսեք աշխատանքի հայտարարության ամբողջական ընթերցումից
Աշխատանքի հայտարարությունը Ձեր և գործատուի միջև առաջին պաշտոնական շփումն է։ Այն պարունակում է կարևոր տեղեկատվություն, որը ոչ միայն օգնում է հասկանալ՝ արդյոք Դուք համապատասխան թեկնածու եք, այլև հնարավորություն է տալիս ճիշտ կազմակերպել դիմումի ընթցաքը։
Հայտարարությունն ընթերցելիս ուշադրություն դարձրեք հետևյալ կետերին․
- Հաստիքի անվանումը և հիմնական պարտականությունները
- Պահանջվող հմտությունները և որակավորումը
- Դիմելու հստակ ընթացակարգը և նախընտրելի ձևաչափը
- Դիմումների ընդունման վերջնաժամկետը
Շատ թեկնածուներ, ցավոք, բավարար ուշադրություն չեն դարձնում աշխատանքի հայտարարության ամբողջական բովանդակությանը՝ ընթերցելով միայն վերնագիրը կամ առաջին պարբերությունը։ Արդյունքում հաճախ թույլ են տալիս հետևյալ սխալները․
- Դիմում են սխալ ձևաչափով՝ չպահպանելով պահանջվող ֆայլի կառուցվածքը կամ ձևը (օրինակ՝ ուղարկում են Word ֆայլ, երբ հստակ նշված է՝ PDF):
- Օգտագործում են սխալ հարթակ՝ ուղարկելով CV էլ․ փոստով այն դեպքում, երբ պահանջվում է դիմել կայքի կամ հատուկ հարթակի միջոցով:
- Տեղադրում են + նշանը սոց․ մեդիայի մեկնաբանություններում՝ պարզապես նշելով «+» կամ գրելով «դիմել եմ», այն դեպքում երբ դա չի դիտարկվում որպես պաշտոնական դիմում:
- Չեն լրացնում պահանջվող դիմումի ձևը՝ ուղարկելով միայն CV այն դեպքում, երբ գործատուն պահանջում է լրացնել համապատասխան ձևաթուղթ կամ գրանցվել հարթակում:
Այս գործողությունները գործատուի մոտ ստեղծում են տպավորություն, որ թեկնածուն բավարար ուշադրություն չի դարձրել մանրամասներին, ինչը բացասաբար է անդրադառնում նրա պրոֆեսիոնալ կերպարի ընկալման վրա։
📍Հուշում․ Նախքան հարց ուղարկելը կամ դիմելու գործընթացը սկսելը, մանրամասն կարդացեք ամբողջ հայտարարությունը՝ համոզվելու համար, որ Ձեր հարցերի պատասխանը արդեն նշված չէ։ Հարցերի կրկնումը կարող է ընկալվել որպես անուշադիր կամ մակերեսային մոտեցում՝ նվազեցնելով Ձեր պրոֆեսիոնալ իմիջը։
Քայլ 2․ Պահպանեք գործատուի սահմանած ընթացակարգը
Յուրաքանչյուր գործատու կարող է ունենալ դիմումների ընդունման իր ձևաչափը և ընթացակարգը, որը պետք է անպայմանորեն պահպանվի թեկնածուի կողմից։ Այս պահանջները պատահական չեն․ դրանք միտված են համակարգված կերպով հավաքագրելու տվյալ թեկնածուների հայտերը, ապահովելու իրավական համապատասխանություն և կազմակերպչական հստակություն։
Դիմելու առավել տարածված եղանակներն են՝
- Էլեկտրոնային հասցեի միջոցով դիմումը՝ կցելով CV և ուղեկցող նամակ
- Լրացնելով ընկերության պաշտոնական կայքում առկա դիմումի ձևը
- Աշխատանքային հարթակների (օրինակ՝ staff.am) միջոցով ուղիղ դիմում
Միջազգային կամ հատկապես Եվրոպական Միության տարածքում գործող կազմակերպությունները ղեկավարվում են GDPR (General Data Protection Regulation) կանոնակարգով, որը նախատեսում է խիստ մոտեցում անձնական տվյալների հավաքագրման և պահպանման հարցում։
Այսպիսի դեպքերում՝
- Թեկնածուն նախքան դիմումը պետք է հաստատի իր համաձայնությունը տվյալների մշակման վերաբերյալ՝ հատուկ նշված ձևաթղթի միջոցով։
- Եթե դիմումը ուղարկվում է ոչ սահմանված եղանակով, գործատուն իրավական տեսանկյունից չի կարող բացել կամ դիտարկել այն։
📍Հուշում․ Նախքան դիմելը համոզվեք, որ մանրամասն ծանոթացել եք պահանջված ընթացակարգին և հետևում եք դրան ամբողջությամբ։ Այս մոտեցումը ոչ միայն ընդգծում է ձեր պրոֆեսիոնալիզմը, այլև նպաստում է գործընթացի արդյունավետ ընթացքին։
3․ Փաստաթղթերի պատրաստման ստանդարտներ
Աշխատանքի դիմումը միայն CV ուղարկելը չէ։ Դա նաև Ձեր պրոֆեսիոնալիզմի արտացոլումն է։ Ձեր ուղարկած փաստաթղթերը (CV, ուղեկցող նամակ, հավելյալ ֆայլեր) պետք է կազմված լինեն տեխնիկապես ճիշտ, հստակ և առանց թերությունների։ Յուրաքանչյուր մանրուք կարևոր է․ սկսած ֆայլի ձևաչափից մինչև էլ․ նամակի կառուցվածքը։
Մի քանի խորհոիրդ staffmedia.am-ից․
- Եթե աշխատանքի հայտարարությունում հատուկ նշված չէ, որ պահանջվում է Word կամ այլ ֆորմատ, ընտրեք PDF ձևաչափը։ Դա ապահովում է՝ որ ֆայլը բացվի ճիշտ տեսքով՝ առանց աղավաղումների։
- Ուղարկվող փաստաթղթերի անունները պետք է լինեն հստակ և ինֆորմատիվ։ Խուսափեք անանուն կամ ընդհանուր անուններից՝ ինչպիսիք են 1.pdf, cv_updated, կամ final_version.docx։ Ճիշտ տարբերակն է՝ Անուն_Ազգանուն_CV.pdf
- Հղումներ Google Drive կամ այլ հարթակներից․ եթե հղում եք տրամադրում, ապա անպայման ստուգեք հասանելիությունը։
- Էլեկտրոնային նամակ ուղարկելիս՝ թեմա (Subject line) դաշտում միշտ նշեք այն հաստիքի անվանումը, որին դիմում եք։ Սա օգնում է մասնագետին հեշտությամբ կողմնորոշվել և կառուցել համապատասխան արխիվավորում։
- Նամակում, թեկուզ շատ հակիրճ, պետք է ներառել ողջույնի նախադասություն և շնորհակալություն՝ թեկնածության դիտարկման համար։ Դա մինիմալ բարեկրթության և պրոֆեսիոնալ հաղորդակցման նշան է։
- Միշտ օգտագործեք «Դուք» ձևը գրավոր շփման ժամանակ։ Խուսափեք ծանոթ, փաղաքշական, կամ ավելորդ մտերմիկ ձևակերպումներից։ Եթե գիտեք կոնկրետ անձի անունը, կարող եք դիմել անունով՝ Օրինակ․ «Հարգելի Անուն», եթե ոչ՝ ընտրեք չեզոք ձևաչափ՝ Օրինակ․ «Հարգելի հավաքագրման թիմ» կամ «Հարգելի HR բաժին»։
📍Հուշում․ Երբեք մի ուղարկեք դատարկ նամակ՝ միայն կցված ֆայլով։ Նույնիսկ եթե ուղարկում եք ընդամենը երկու նախադասություն, դա կասի շատ ավելին Ձեր մասին, քան ամբողջությամբ բացակայող հաղորդակցությունը։
4․ Ուղեկցող նամակ
Ուղեկցող նամակը միաժամանակ լրացնում և ընդգծում է Ձեր CV-ի կարևոր կետերը՝ առանց դրանք կրկնելու։ Այն տալիս է հստակ պատասխաններ հետևյալ հարցերին․
- Ինչու եք դիմում տվյալ հաստիքին – Ինչն է Ձեզ գրավում․ ընկերության գործունեությունը, թիմի արժեքները, ոլորտը կամ տվյալ պաշտոնը։
- Ի՞նչն է Ձեզ դարձնում համապատասխանում թեկնածու – Որոնք են Ձեր այն հմտությունները, փորձը կամ մոտեցումները, որոնք ներդաշնակ են աշխատանքային հայտարարության պահանջներին։
- Եթե դիմում եք նոր ոլորտում հաստիքի համար – Նշեք Ձեր շարժառիթը, սովորվելու պատրաստակամությունը և այն հմտությունները, որոնք փոխադրելի են (transferable skills) նոր հաստիքի համար։
📍Հուշում․
Ուղեկցող նամակը կարելի է կառուցել ընդամենը 3-4 նախադասությամբ։ Անհրաժեշտ է խուսափել հաճախ կրկնվող, վերացական արտահայտություններից (օր․՝ «ձգտում եմ աշխատել դինամիկ միջավայրում»)։
5․ Դիմումների մոնիթորինգ
Դիմումների ընթացքին հետևելը թեկնածուի ինքնակազմակերպվածության կարևոր ցուցիչ է։ Դիմոումի ըթացքում նախքան Ձեզ կհրավիրեն հարցազրույցի կան տարածված իրավիճակներ, որոնցից արժե խուսափել, օրինակ՝
- «Կհիշեցնե՞ք, որ ընկերությանն եմ դիմել»
- «Չեմ հիշում անունը՝ շատ տեղ եմ դիմել»
- «Ի՞նչ էր անում ձեր ընկերությունը»
- «Մի հատ էլ կասե՞ք՝ ինչ հաստիք էր»
Այս պատասխանները վկայում են ոչ միայն ուշադրության պակասի, այլև՝ անկազմակերպ և մակերեսային մոտեցման մասին։ Հավաքագրման մասնագետը ենթադրում է, որ թեկնածուն պետք է հետաքրքրված և նախապատրաստված լինի յուրաքանչյուր հնարավորությամբ, որի համար դիմել է։
Որպեսզի զերծ մնաք նման իրավիճակներից՝ կիրառեք պարզ, բայց արդյունավետ մոնիթորինգի մեթոդներ․
- Պահպանեք թվային նոթ կամ աղյուսակ (Excel, Google Sheets, կամ նոթերի հավելված), որտեղ կնշեք՝
- Ընկերության անվանումը
- Հաստիքի անվանումը
- Դիմելու ամսաթիվը
- Դիմելու եղանակը (էլ․ փոստ, կայք, staff.am և այլն)
- Հետևելու անհրաժեշտություն (օրինակ՝ արդյոք պետք է follow-up նամակ ուղարկել)
- Օգտվեք staff.am-ի հնարավորություններից․ Եթե դիմում եք staff.am հարթակի միջոցով, ապա Ձեր բոլոր դիմումները պահպանվում են Ձեր անձնական պրոֆիլում՝ “Իմ դիմումները” բաժնում։ Այստեղ կարող եք տեսնել ոչ միայն ընկերությունների և հաստիքների անվանումները, այլև աշխատանքային հայտարարությունների ամբողջական նկարագրությունը։ Սա կարևոր միջոց է՝ պատրաստվելու հարցազրույցին, հիշելու, թե որ կազմակերպության և հաստիքի համար եք դիմել և հետևելու, արդյոք տվյալ ընկերությունը դիտարկել է Ձեր դիմումը։
📍Հուշում․ Մոնիթորինգը նաև օգնում է խուսափել կրկնվող դիմումներից կամ սխալ վերնագրերով նամակ ուղարկելուց։ Այս պրակտիկան Ձեր պրոֆեսիոնալ մոտեցման ցուցիչներից է։
7․ Իրատեսական գնահատում և ինքնավերլուծություն
Մասնագիտական ազնվությունը սկսվում է ինքնավերլուծությունից։ Ամեն աշխատանքային հայտարարության մեջ հստակ նշված են այն հիմնական պահանջները, որոնք գործատուն համարում է առանցքային։ Կարևոր է, որ թեկնածուն օբյեկտիվ գնահատի՝ արդյո՞ք ունի բավարար փորձ, գիտելիք և հմտություններ տվյալ պաշտոնի համար։
Եթե պահանջների մեծամասնությանը չեք համապատասխանում, դիմելն առնվազն կտրամադրի սխալ ազդակ գործատուին և կվատնի ինչպես Ձեր, այնպես էլ հավաքագրման մասնագետի ժամանակը։
Սակայն՝ միևնույն ժամանակ եթե համապատասխանում եք հիմնական պահանջներին, և ընդամենը 1-2 ոչ առանցքային կետերում դեռ չունեք փորձ, բայց ունեք սովորելու պատրաստակամություն և արագ ինտեգրվելու ներուժ, ապա այդ դեպքում Ձեր դիմումը լիովին տեղին է։ Այդ մոտեցումը հաճախ ընկալվում է որպես զարգանալու և մարտահրավերներ ընդունելու պատրաստակամություն՝ հատկապես այն կազմակերպություններում, որտեղ կարևորվում է աճի ներուժը։
📍Հուշում․ Ուղեկցող նամակում անպայման նշեք, որ գիտակցում եք դեռ չձևավորված ոլորտային փորձի առկայությունը, սակայն պատրաստ եք արագ սովորել և ներդնել ջանք։
8․ Հարցեր, ֆիդբեք և հաղորդակցության բարեկիրթ դինամիկա
Դիմումից հետո տարբեր գործատուներ կիրառում են տարբեր արձագանքման մեխանիզմներ․
- Եթե ստացել եք ավտոմատ պատասխան, որտեղ նշված է որևէ ժամանակային հատված (օր.՝ «կկապվենք երկու շաբաթվա ընթացքում»), ապա անհրաժեշտ է սպասել այդ ժամկետի ավարտին։ Ժամանակից շուտ կամ մի քանի անգամ հարցում ուղարկելը կարող է ընկալվել որպես ճնշում գործատուի վրա։
- Եթե նշված ժամկետից անցել է երկու շաբաթ, և դեռ պատասխան չեք ստացել, կարող եք ուղարկել քաղաքավարի հիշեցման նամակ, որտեղ կխնդրեք հաստատել դիմումի ստացումը և ճշտել՝ արդյոք այն դիտարկվում է։
- Եթե ստացել եք մերժում, ընդունված պրակտիկա է հարցնել հետադարձ կապ՝ ֆիդբեքի տեսքով։ Սա ցույց է տալիս Ձեր բաց լինելը ինքնակատարելագործման նկատմամբ և կարող է Ձեզ տալ արժեքավոր տեղեկատվություն՝ ապագա դիմումների համար։
📍Հիշեցում․ Անկախ արդյունքից՝ միշտ պահպանեք գրագետ, բարեկիրթ և հարգալից տոն։ Նույնիսկ մերժման դեպքում՝ երբեք մի արձագանքեք վիրավորական կերպով, մի քննադատեք կազմակերպությունը կամ կայացրած որոշումը։ Դա ոչ միայն ոչ պրոֆեսիոնալ քայլ է, այլ նաև կարող է ազդել Ձեր հեղինակության վրա՝ հատկապես փոքր շուկաներում, ինչպիսին Հայաստանն է։
***Խորհուրդ staff.am-ից․ Օգտագործեք “Actively Searching” բեջը staff.am-ում։
Եթե աշխատանաք փնտրելու փուլում եք, կարևոր է, որ գործատուներն իմանան դրա մասին։ staff.am հարթակում կարող եք ակտիվացնել “Actively Searching” բեջը, որի շնորհիվ ձեր պրոֆիլը տեսանելի է դառնում գործատուներին։
Այն ցույց է տալիս, որ դուք ակտիվորեն փնտրում եք նոր աշխատանքային հնարավորություններ։ Այդ նշանն ավելացվում է Ձեր պրոֆիլին, ինչը մեծացնում է դիտումների քանակը եւ հարցազրույցի հրավեր ստանալու հավանականությունը։
📍 Հուշում. Այս գործիքն ակտիվացնելու համար պարզապես անհրաժեշտ է լրացնել Ձեր պրոֆիլը առնվազն 70% և ակտիվացնել համապատասխան կարգավորումը։
Աշխատանքի դիմելու գործընթացը վաղուց վերածվել է ոչ միայն փաստաթուղթ ուղարկելու պարզ գործողության, այլ դիմորդի մասնագիտական հմտությունների և արժեքների դրսևորման հարթակի։
Այս ամենը ձևավորում են այն տպավորությունը, որը երբեմն կարող է լինել ավելի ազդեցիկ, քան Ձեր մասնագիտական փորձը։
Հետևաբար՝ եղեք ուշադիր, տեղեկացված, հարգալից և պատրաստ՝ յուրաքանչյուր դիմումը դիտարկել որպես հնարավորություն ներկայացնելու ոչ միայն Ձեր կարողությունները, այլև Ձեր վերաբերմունքը՝ աշխատելու մշակույթի հանդեպ։
Իսկ այս ամենի մասին ավելի մանրամասն ու գործնական խորհուրդներ ստանալու համար առաջարկում ենք դիտել Career Factory by staff.am-ի 4C դասընթացի երրորդ մոդուլի տեսադասը։
