Մեր ազգի պատմությունը հարուստ է հերոսական դեմքերով, որոնք դժվարին պահերին կանգնել են հայության կողքին՝ պաշտպանելով մեր հողն ու արժեքները: Այսօր, երբ Հայաստանը կանգնած է նոր մարտահրավերների առջև, առավել քան երբևէ կարևոր է դաստիարակել այնպիսի սերունդ, որը զինված կլինի ոչ միայն ժամանակակից գիտելիքներով, այլև հայրենասիրության, քաջության և միասնականության ոգով: Այս համատեքստում Դավիթբեկյան խաղերը դարձել է երիտասարդության համախմբման և զարգացման հզոր հարթակ։
Ինչ է Դավիթբեկյան խաղերը, և ինչու Սյունիքում
Դավիթբեկյան խաղերը, Սյունիքի մարզում անցկացվող ամենամյա մրցույթ-փառատոն է, որը մեկնարկել են 2022 թվականին և վերածվել է հայ երիտասարդության զարգացման կարևորագույն հարթակի, հատկապես ռազմավարական նշանակություն ունեցող այս տարածաշրջանում։
Հայաստանում շատ պատանիներ դեռ բավարար չեն ճանաչում մեր երկրի իրական հարստությունը, մասնավորապես՝ Սյունիքը: Խաղերը նպատակ ունեն փոխելու այս ընկալումը՝ մասնակիցներին հնարավորություն տալով անձամբ զգալ, ճանաչել ու արժևորել Սյունիքի պատմական, մշակութային և բնական հարստությունները։
Դավիթբեկյան խաղերը հարթակ են ստեղծում, որտեղ մասնակիցները ցուցաբերում են հաղթելու թիմային ու անհատական նպատակադրում և կամային հատկություններ, կիրառում են ձեռք բերած գիտելիքներն ու հմտությունները, ձևավորում են մնայուն միջանձնային հարաբերություններ, ստեղծում են կապեր և համախոհների ցանց, տոնում համատեղ ձեռքբերումները, արժևորում նոր ընկերներին, ձեռքբերված գիտելիքներն ու փորձը:
Հիմնական նպատակները
Դավիթբեկյան խաղերի կարգախոսը՝ «Սեր, Ուժ, Կամք, Հավատ, Միասնականություն», արտացոլում է այն հիմնարար արժեքները, որոնք ընկած են այս միջոցառման հիմքում: Այս կարգախոսն ընդգծում է ոչ միայն մրցակցության, այլև համատեղ հաղթանակների կարևորությունը:
Մրցույթ-փառատոնն ունի մի քանի հիմնական նպատակներ.
- Բարձրացնել հանրության հայրենասիրական ոգին և ազգային գիտակցությունը,
- Խթանել երիտասարդների ֆիզիկական պատրաստվածությունը, մարտավարական գիտելիքները և հոգեբանական դիմակայունությունը,
- Ամրապնդել մշակութային, հոգևոր և պատմական արժեքների գնահատումը և պահպանումը,
- Ստեղծել համագործակցության հարթակ կազմակերպությունների, ուսումնական հաստատությունների և սպորտային թիմերի միջև,
- Խթանել հետաքրքրությունը դեպի Սյունիքի պատմամշակութային ժառանգությունը։
2025թ. Դավիթբեկյան խաղեր՝ ավելի մասշտաբային և ընդգրկուն
2025թ.-ին, պատշաճ հովանավորության դեպքում, Հայաստանից և Սփյուռքից 200 պատանիներ հնարավորություն կունենան մասնակցելու խաղերին, բացահայտելու Սյունիքը, զարգացնելու թիմային և անհատական կարողությունները և ստեղծելու ամուր ընկերական կապեր:
Դավիթբեկյան խաղերի 4-րդ մրցույթ-փառատոնը այս տարի կանցկացվի երկու փուլով՝
- Առաջին փուլ՝ հուլիսի 7-13 և հուլիսի 14-20, որտեղ կմրցեն առավելագույնը 20 թիմ
երկու խմբերում։
- Եզրափակիչ փուլ՝ հուլիսի 28-ից օգոստոսի 3-ը, 6 լավագույն թիմերի միջև։
Դավիթբեկյան խաղերն այս ծավալով իրականցնելու համար միջոցառման կազմակերպիչ՝ «Ամրոց» հիմնադրամը նախաձեռնել է բարեգործական մրցույթ-վիկտորինա։ Խաղին կարող է մասնակցել մեզանից յուրաքանչյուրը՝ ցուցաբերելով աջակցություն հայ երիտասարդների զարգացմանը և ազգային ինքնագիտակցության ամրապնդմանը միաժամանակ ստանալով հնարավորություն հաղթելու արժեքավոր մրցանակներ և դառնալու այս կարևոր նախաձեռնության մի մասնիկ։
Մասնակցության, տոմսերի, հովանավորության և բոլոր այլ մանրամասների համար անհարժեշտ է կապ հաստատել Ամրոց հիմնադրամի հետ։
Դավիթբեկյան խաղերին աջակցելով՝ կազմակերպություններն ու անհատները ցուցաբերում են տեսանելի սոցիալական պատասխանատվություն, որը միավորում է երիտասարդներին և ամրապնդում ազգային միասնականությունը՝ նպաստելով Հայաստանի այս կենսական մարզի զարգացմանն ու պաշտպանությանը:
Յուրաքանչյուրի ներդրումն այս գործում անչափ կարևոր է, քանի որ այսպիսով մենք ներդրում ենք ունենում այնպիսի սերնդի ձևավորման գործում, որը կկառուցի իր ինքնությանն ու արժեքներին տեր և ուժեղ Հայաստան։
