«Հարեհաս»-ը Գեղարքունիքում | Կրթությամբ դեպի ուժեղ համայնքեր

Այսօր, երբ աշխարհի ամենազարգացած երկրներն են դեռ պայքարում կանանց տնտեսական զորացման համար, Գեղարքունիքում մեկնարկել է մի ծրագիր, որը ոչ միայն խոստանում է, այլ արդեն փաստում է՝ կրթությունը, համայնքային զարգացումը և կանանց աջակցությունը կարող են արմատական փոփոխություններ բերել համայնքների սոցիալական իրականության մեջ։

Ի՞նչ է «Հարեհաս»-ը

«Հարեհաս»-ը կրթական ու զարգացման նախաձեռնություն է, որը 6 տարում կանցնի Գեղարքունիքի 88 գյուղերով, կկրթի 3520 կին, հիմնելով 40 կրթական կենտրոն և խթանելով 176 նոր բիզնես-նախագծի ստեղծում։ Այն չի սահմանափակվում միայն կրթական պարապմունքներով. այս ծրագիրն իրականում վերաիմաստավորում է համայնքային դերակատարությունը, կնոջ ինքնուրույնությունը և երկարաժամկետ տնտեսաքաղաքական զարգացումը։

Ինչու՞ հենց Գեղարքունիքում

Գեղարքունիքը՝ լինելով Հայաստանի ամենագեղեցիկ, սակայն միևնույն ժամանակ սոցիալ-տնտեսական առումով ամենախոցելի մարզերից մեկը, ունի մի շարք խորքային խնդիրներ՝

• Բռնություն՝ ցուցանիշով 1-ին մարզը ՀՀ-ում,
• Կրթության ցածր մակարդակ,
• Գործազրկության բարձր մակարդակ։

Ծրագիրն իրականացնող «Դէկավվա» հիմնադրամը հենց 1-ին տարում աջակցել է 876 մարդու (երեխաներ, կանայք, Արցախից տեղահանված ընտանիքներ)։

Արդեն մեկնարկած հաջողություններ

Ծրագիրն արդեն մեկնարկել է Գեղարքունիքի 3 գյուղերում՝

• Զովաբերում 30 կին կրթություն է ստանում և հիմնում մանկական զարգացման կենտրոն,
• Գեղամավանում վերանորոգվում է «Հարեհաս» կենտրոնի տարածքը,
• Լճաշենում հավաքագրվում են շահառու կանայք։

Այս գործընթացը ոչ միայն կրթություն է, այլ նաև վերաիմաստավորում է համայնքային կյանքը։

Մարդիկ և կազմակերպություններ, որոնք արդեն միացել են

Նախաձեռնության շուրջ ձևավորվել է մի հզոր համայնք՝

• Armenian Code Academy-ն պատրաստել է անվճար թվային հարթակ բոլոր 3520 շահառուների համար,
• Դալմա մոլը նվիրաբերել է 2 մլն դրամ,
• 60+ անհատ և կազմակերպություն՝ ընդհանուր 11 մլն դրամ,
• TCF-ի համահիմնադիր Մարիամ Համբարձումյանը նվիրաբերել է իր ծննդյան նվերներից ստացած գումարի մի մասը՝ շուրջ 250,000 դրամ,
• Ռեժիսոր Ջիվան Ավետիսյանը իր «Թևանիկ» ֆիլմը բերում է գյուղեր՝ անվճար ցուցադրության։
• «10:30 ակումբ»-ը կրթական հավաքույթներ է կազմակերպում «Հարեհաս»-ի բոլոր կենտրոններում։ 

Ծրագիրը դեռ իր առաջին փուլում է և «ռեԱրմենիա» հարթակում դրամահավաք է կազմակերպում 10 գյուղի կրթական կենտրոնների համար՝ 55,000,000 դրամի չափով, որից արդեն 2-ի ֆինանսավորումը ամբողջությամբ ապահովված է։

Դուք ևս կարող եք զորացնել 3520 կնոջ, հիմնել 40 կրթական կենտրոն, ու սկիզբ դնել 176 բիզնեսի։
Մեզանից յուրաքանչյուրը կարող է միանալ «Հարեհաս»-ին՝ տարածելով իր ազդեցությունը ողջ Գեղարքունիքում։