Հայ մշակույթը՝ իր բոլոր նրբերանգներով, հազարամյակների խորքից պահպանվել և մեզ է հասել ոչ միայն գրքերում գրված լինելու, այլ այն ապրեցնողների շնորհիվ։ Մշակույթը կենդանի է քանի դեռ տարածվում է, շարժվում ու շնչում։
Հենց այս սկզբունքով է առաջնորդվում Վարը Վարենկ կրթամշակութային հասարակական կազմակերպությունը։ Համարելով մշակույթը ազգային ինքնության պահպանման լավագույն միջոց՝ Վարը Վարենկը կենցաղ է վերադարձնում ազգայինը։ Ձգտելով առկա խնդիրները լուծել միասնականության, ազգային մտածելակերպի ձևավորմամբ՝ կազմակերպությունն առաջնային է համարում հասարակության լայն շրջանակներում ազգային մշակույթի յուրացումն ու տարածումը։ Կազմակերպության նպատակն է ազգայինն ու ավանդականը վերադարձնել մարդկանց առօրյա կյանք՝ ոչ թե պահպանելու համար միայն, այլ՝ ապրեցնելու։
Այս ճանապարհի կարևորագույն կետերից մեկը Վարը Վարենկի ամենամյա մեծ միջոցառումն է, որն այս տարի տեղի է ունենալու արդեն չորրորդ անգամ։ Մշակութային այս տոնը դարձել է սպասված իրադարձություն բոլոր նրանց համար, ովքեր ուզում են ոչ միայն լսել ազգայինի մասին, այլ դառնալ դրա ակտիվ մասնակիցը։ Յուրաքանչյուր տարի միջոցառումը նվիրվում է ազգային տոնի կամ գաղափարի և դրա շուրջ ձևավորված ծեսերին ու դրանց մշակութային արժեքին՝ ստանալով խորհրդանշական խորագիր։
Միջոցառման խորագիրն այս տարի ևս յուրահատուկ է «Մամի՛կ, մամի՛կ ինչ կը բանիս»։ Միջոցառումը նվիրված է հայ կնոջ կերպարին, նրա անփոխարինելի դերին ավանդական տոնածիսական արարողությունների, ընտանեկան կենցաղի և մշակույթի փոխանցման մեջ։ Այս տարի ևս Վարը Վարենկը հյուրընկալվելու է Հայաստանի ամենագեղատեսիլ գյուղերից մեկում՝ Մեղրաձորում։
Միջոցառման շրջանակում նախատեսվում են տարբեր վարպետաց դասեր՝ ժանյակագործություն, նետաձգություն, ասեղնագործություն, ազգային նվագարաններ և այլ հետաքրքիր ուղղություններ։ Այցելուները հնարավորություն կունենան մասնակցելու ազգային պարերի, երգերի, ավանդական խաղերի և իհարկե ամենագեղեցիկ ծիասկան հատվածների ուսուցմանը։ Իսկ երեկոյան ծրագիրն ամբողջացնելու է գեղեցիկ համերգային հատվածը, ազգային ռիթմերը և իհարկե խարույկն ու մտերմիկ զրույցները։
Վարը Վարենկի այս միջոցառումը բաց է բոլորի համար՝ անկախ տարիքից կամ մասնագիտությունից։ Այն բոլոր նրանց համար է, ովքեր ցանկանում են մշակույթը ճանաչել ոչ թե հեռվից, այլ դառնալ դրա մաս։ Այն հարթակ է, որտեղ ազգային մշակույթը դառնում է անձնական փորձառություն։
Եթե ցանկանում եք ավելին իմանալ այս յուրահատուկ միջոցառման մասին, հետևե՛ք Վարը Վարենկի էջերին, միացե՛ք և դարձե՛ք ազգային այս յուրահատուկ տոնի մասնակից։
