«Շաբաթվա գիրքը» շարքի նախորդ հոդվածում անդրադարձել էինք Բեն Հորովիցի «Դուք այն եք, ինչ անում եք» գրքին, որտեղ ներկայացվում է կազմակերպության մշակույթի կարևորությունը և այն ձևավորելու սկզբունքները։ Հոդվածում անդրադարձել էինք գրքի հիմնական պրակտիկ հատվածներին, որոնք կազմակերպությունների ղեկավարների համար կարող են ուղենիշ ծառայել ներքին ամուր մշակույթ ձևավորելու գործում։
Այս հոդվածում մենք կքննարկենք «Նյու Յորք Թայմս»-ի բեսթսելլերի հեղինակ Քևին Կրուզի «15 գաղտնիք, որ հաջողակ մարդիկ գիտեն ժամանակի կառավարման մասին» գիրքը, որտեղ հեղինակը ներկայացնում է սուպեր արտադրողականության սուպեր գաղտնիքները։
Հաջողակ մարդիկ ժամանակի մասին չեն մտածում այդքան շատ։ Փոխարենը նրանք մտածում են արժեքների, առաջնահերթությունների և սովորությունների մասին։
Գաղտնիք 1 | Ժամանակը ձեր ամենաարժեքավոր և միևնույն ժամանակ ամենասակավ ռեսուրսն է
«Ինչպիսի՜ մեծ բացահայտում»,- հեգնանքով կմտածեք դուք։ Բայց գաղտնիքն այստեղ կայանում է ոչ թե զուտ իմանալու, այլ գաղափարը գիտակցելու և կիրառելու մեջ։ Դուք չեք կարող գնել ժամանակը, վարձակալել այն կամ պարտքով վերցնել մեկ ուրիշից։ Հաջողակ մարդիկ այլ կերպ են ընկալում ժամանակը․ նրանց համար ժամանակը ամենաթանկ կապիտալն է։
Քևին Կրուզը՝ որպես գլխավոր գործադիր տնօրեն, հաճախ էր լսում «Կտրամադրե՞ք մեկ րոպե» արտահայտությունը։ Այդ «մեկ րոպեները» կուտակվում և դառնում էին ժամեր։ Հեղինակը գիտակցում էր, որ ժամանակ տրամադրելով ուրիշների առաջնահերթություններին՝ անտեսում էր իր սեփական առաջնահերթությունները, ուստի նա սկսեց կիրառել 1440-ի մեթոդը։
1440 – կախարդական թիվը, որը կարող է փոխել ձեր կյանքը։
1440՝ ահա օրվա կտրվածքով ձեզ ընձեռված րոպեների քանակը, որը նա փակցրել էր իր աշխատասենայկի դռանը։ Այսկերպ նա ինքն իրեն անընդհատ հիշեցնում էր, թե ժամանակն ինչքան սահմանափակ է, և թե որքան զգուշորեն և մտածված պետք է այն օգտագործել։ Այս մեթոդի շնորհիվ հեղինակը սկսեց ավելի արդյունավետորեն օգտագործել ժամանակը՝ կենտրոնանալով միայն կարևոր և հրատապ հարցերի վրա։
Գաղտնիք 2 | Հստակեցրեք ձեր ամենակարևոր առաջադրանքները և առաջին հերթին աշխատեք հենց դրանց վրա
Եթե դուք չեք աշխատում ձեր սեփական նպատակների համար, ապա դուք աշխատելու եք ուրիշի նպատակներն իրականացնելու համար։
Անելիքները շատ են, սակայն ժամանակը խելամտորեն կառավարելու համար պետք է տարբերակել կարևորը անկարևորից։ Մեզ պետք են հստակ սահմանված, չափելի նպատակներ, որից հետո արդեն կարելի է մտածել նպատակներին հասնելու ճանապարհների մասին։
Գաղտնիք 3 | Աշխատելիս առաջնորդվեք օրացույցով, ոչ թե to-do ցուցակով
To-do ցուցակների 41%-ը երբեք չի կատարվում։
Բոլորիս քաջ ծանոթ առաջադրանքների ցուցակ (to-do list) կազմելը այդքան էլ արդյունավետ չէ։ Ցանկում առաջադրանքները տարբերակված չեն ըստ առաջնահերթության կամ կարևորության, հետևաբար շատ հավանական է, որ առաջին հերթին ցանկից կընտրեք այն առաջադրանքները, որոնք ավելի քիչ ժամանակատար են, սակայն՝ ոչ միշտ առաջնահերթ։ Բացի այդ անկատար առաջադրանքներով լի ցանկը կարող է ավելորդ լարվածություն առաջացնել։ Փոխարենը՝ հեղինակը խորհուրդ է տալիս օգտագործել օրացույց և բոլոր առաջադրանքների համար սահմանել հստակ ժամկետներ՝ ըստ կարևորության և առաջնահերթության։
Գաղտնիք 4 | Պրոկրաստինացիային վերջ դնելու համար հաղթիր քո ապագա «ես»-ին
Պրոկրաստինացիան (հետաձգելու հակվածությունը) պարզապես ծուլություն չէ, այն մոտիվացիայի բացակայություն է և ներկա պահի թերագնահատում։ Մեր ներկա և ապագա «ես»-երը հավերժ պայքարի մեջ են։ Մեր ներկա որոշումները պետք է կայացնենք այնպես, որ հաղթենք մեր ապագա «ես»-ին, որ կարծում է, թե «հետո»-ն ավելի լավ ժամանակ է գործելու համար, ու գտնելու է հնարավոր ամեն մի պատճառ արդարացնելու մեր ներկա պահի չարաճճիությունները։
Գաղտնիք 5 | Ընդունեք այն փաստը, որ անելու բաներ միշտ էլ լինելու են
Անելիքներ միշտ կան և լինելու են, սակայն մարդկային ռեսուրսները սահմանափակ են։ Օրվա կտրվածքով մենք կարող ենք կատարել սահմանափակ թվով առաջադրանքներ, ուստի դադարեք մեղավոր զգալ չկատարված առաջադրանքների համար։ Ներդաշնակ և հավասարակշռված կյանք վարելու համար պետք չէ թողնենք, որ մեր to-do ցուցակները մեզ կառավարեն։
Գաղտնիք 6 | Ձեզ հետ միշտ ունեցեք նոթատետր
Նոթատետրը հիանալի տարբերակ է մտքերը, գաղափարները գրի առնելու և իրականությանը ավելի մոտեցնելու համար։ Ընդ որում, խորհուրդ է տրվում նշումները կատարել ձեռքով, քանի որ այսպես ինֆորմացիան ավելի ընկալելի է դառնում մեր ուղեղի համար։
Գաղտնիք 7 | Կառավարեք ձեր էլեկտրոնային փոստը
Էլեկտրոնային նամակները կարող են շեղել ձեզ ձեր կարևոր գործերից և դառնալ ավելորդ սթրեսի պատճառ։ Այստեղ պետք է ցուցաբերել ռազմավարական մոտեցում․ ամեն անգամ, երբ բացում եք էլ․ փոստը ընտրեք այս 4 տարբերակներից որևիցե մեկը՝ պատասխանել, պատվիրակել, հետաձգել կամ ջնջել՝ պարզ, բայց միևնույն ժամանակ շատ արդյունավետ։
Գաղտնիք 8 | Հանդիպումները՝ որպես վերջին տարբերակ
Հաճախ գործնական հանդիպումները ոչ այլ ինչ են, քան ժամանակի կորուստ։ Սովորաբար դրանք սկսվում են ուշ, քննարկմանը ներգրավված են լինում ոչ համապատասխան մարդիկ, որ կենտրոնանում են ոչ էական խնդիրների վրա։ Ուստի հանդիպումը դիտարկեք որպես հաղորդակցության վերջին տարբերակ։
Գաղտնիք 9 | Ասա «ոչ» այն ամենին, ինչը չի մոտեցնում քեզ քո նպատակներին
Սովորեք ասել «ոչ» առանց մեղքի զգացման։ Ընդ որում, հիշեք՝ «ոչ»-ը ամբողջական նախադասություն է, և դուք պարտավոր չեք տալ բացատրություններ, եթե չեք ցանկանում։ Որոշումներ կայացնելիս մտածեք ձեր իսկ բարօրության, ոչ թե ուրիշներին հաճոյանալու մասին։
Հաջողակ մարդիկ պաշտպանում են իրենց ժամանակը ցանկացած գործողությունից, որն իրենց չի մոտեցնի իրենց նպատակներին։
Գաղտնիք 10 | Կիրառեք Պարետոյի սկզբունքը
Արդյունքի 80%-ը պայմանավորված է ջանքերի 20%-ով։
Սկզբունքը խրախուսում է առաջնահերթությունը տալ ամենաազդեցիկ գործողություններին և պարզեցնել կամ վերացնել ոչ արդյունավետ գործողությունները: Կենտրոնանալով միայն էական գործողությունների վրա, որոնք ապահովելու են ամենամեծ արդյունքը՝ դուք կարող եք բարելավել ձեր արդյունավետությունը, արտադրողականությունը և ընդհանուր բավարարվածությունը:
Գաղտնիք 11 | Կենտրոնացեք ձեր ուժեղ կողմերի վրա
Բացահայտեք ձեր ուժեղ կողմերը և կենտրոնացեք այն առաջադրանքների վրա, որոնց համար անհրաժեշտ են ձեր ունակությունները, իսկ մնացյալ առաջադրանքները պատվիրակեք այն մարդկանց, որ կարող են կատարել դրանք ավելի արդյունավետորեն։ Այսպես հնարավոր կլինի խնայել ժամանակ և բարձրացնել ընդհանուր արդյունավետությունը։
Գաղտնիք 12 | Տեսակավորեք ձեր օրերը՝ ըստ գործունեության տեսակների
Եթե անելիքների ամեն մի տեսակին նվիրեք շաբաթվա մեկ կամ մի քանի հստակ օր, ապա նշանակալիորեն կբարելավեք ձեր արդյունավետությունը։ Դուք հստակ կիմանաք, որ, օրինակ, երկուշաբթիները կազմակերպչական աշխատանքների համար են նախատեսված, և այդ օրերին կենտրոնացած կաշխատեք հենց կազմակերպչական հարցերի վրա։
Գաղտնիք 13 | Եթե առաջադրանքը պահանջում է 5 րոպեից քիչ ժամանակ, արեք դա անմիջապես
Մեզնից շատերը ինչ-որ բան անելու կամ չանելու մասին մտածելու վրա ավելի շատ ժամանակ են ծախսում, քան բուն առաջադրանքը կատարելու։ Հաջողակ մարդիկ գնահատում են իրենց ժամանակն ու էներգիան, ուստի ցանկացած առաջադրանք, որը շատ ժամանակ չի պահանջում, կատարում են միանգամից՝ առանց այս ու այն կողմ ընկնելու։
Գաղտնիք 14 | Օրվա առաջին 60 րոպեն նվիրեք ինքներդ ձեզ
Փոխեք ձեր առավոտը և կփոխեք ձեր կյանքը:
Արթնանալուց հետո միանգամից աշխատանքի մասին մտածելու փոխարեն մշակեք առավոտվա հատուկ արարողակարգ (օր․՝ մեդիտացիա, երախտագիտություն, յոգա և այլն), որը կպատկանի միայն ձեզ։ Ներդնելով ժամանակ ձեր մեջ՝ դուք կզինվեք դրական էներգիայով և կունենաք արդյունավետ ու գերհագեցած օր։
Գաղտնիք 15 | Արդյունավետությունը էներգիայի և կենտրոնացման մասին է, ոչ թե ժամանակի
Դուք չեք կարող ստանալ ավելի շատ ժամանակ, փոխարենը դուք կարող եք ստանալ ավելի շատ էներգիա։
Հիմնական գաղափարն այն է, որ արտադրողականությունը ոչ թե ժամանակի, այլ էներգիայի ավելի արդյունավետ կառավարումն է։ Ինչ ուզում եք արեք, միևնույնն է՝ օրն ունի 24 ժամ, մինչդեռ, եթե խելամտորեն վարվեք և բավարար ժամանակ տրամադրեք հանգստին, ապա կունենաք էներգիայի ավելի բարձր մակարդակ, հետևաբար նաև ավելի բարձր աշխատունակություն։
Սահմանափակ ժամանակում ավելի շատ բան հասցնելու գաղտնիքը ձեր ֆիզիկական և մտավոր էներգիայի մակարդակների բարձրացման մեջ է, ինչը թույլ է տալիս ավելի արդյունավետ աշխատել և պահպանել կենտրոնացումը ողջ օրվա ընթացքում։
Դե ինչ, հուսանք՝ այս գաղտնիքները կօգնեն ձեզ ավելի արդյունավետ և խելամիտ կառավարել ձեր ամենաթանկ ու ամենասակավ ռեսուրսը՝ ժամանակը։
