Պատկերացրեք, որ Ձեզ հրավիրել են աշխատանքի հարցազրույցի և Դուք նախապես գիտեք այն բոլոր հարցերը, որոնք պետք է տրվեն Ձեզ այդ ժամանակ։ Իհարկե, հրաշալի կլիներ։

Իսկ քանի որ դեռևս մենք չենք կարող կարդալ մարդկանց մտքերը, StaffBlog-ն  առաջարկում է մեկ այլ հրաշալի բան՝ 7 ամենատարածված հարցերը, որոնք շատ հաճախ են տրվում HR մասնագետների կողմից և թե ինչպես պատասխանել այդ հարցերին։

Բնավ, մենք չենք առաջարկում միշտ օգտագործել ճիշտ նույն պատասխանները, այլ խորհուրդ ենք տալիս տրամադրել որոշ ժամանակ և աչքի անցկացնել բոլոր այն հարցերն ու պատասխանները,  որոնք ամենաշատն են ակնկալվում հարցազրույցին:

Ահա և StaffBlog հարցազրույցի ուղեցույցը․

fired

1. Կարո՞ղ եք փոքր-ինչ պատմել Ձեր մասին։

Շատ պարզ հարց է թվում, բայց մեծամասնությունը դժվարանում է այս վճռական հարցին պատրաստվել։ Այս դեպքում մի պատմեք Ձեր ողջ անձնական կամ աշխատանքային պատմությունը։ Ընդհակառակը, համոզիչ խոսքով պետք է ներկայանաք, որն անմիջապես ազդեցություն կթողնի հարցազրուցավարի վրա։ Առանձնացրեք 2-3 առանձնահատուկ հաջողություններ և աշխատանքային փորձեր, որոնց վրա կցանկանայիք մեծ ուշադրություն դարձվեր։ Այնուհետև պատմեք, թե ինչպես Ձեր զբաղեցրած նախկին աշխատատեղը կարող է նպաստել Ձեր աշխատանքի արդյունավետությանը։

2. Որտեղի՞ց եք լսել այս հայտարարության մասին։

Կրկին թվացյալ հեշտ հարց։ Իրականում, այս հարցին պատասխանելիս ճիշտ ժամանակն է տարբերվել մյուս թեկնածուներից և ցույց տալ Ձեր նվիրվածությունն ընկերությանը։ Օրինակ, եթե աշխատանքի մասին տեղեկացել եք Ձեր ընկերոջից կամ այլ մասնագետից, ով նույնպես այդտեղ է աշխատում, նշեք այդ մարդու անունը և ներկայացրեք, թե հատկապես ինչի համար եք այդքան մոտիվացված։ Եթե նոր աշխատատեղի մասին տեղեկացել եք ինչ-որ հանդիպման, իրադարձության ժամանակ կամ սոց․ կայքից, կիսվեք անպայման անկեղծ պատասխանով։ Իսկ եթե աշխատանքը գտել եք staff.am-ի միջոցով, կիսվեք, թե հատկապես ինչն է գրավել Ձեր ուշադրությունը։

interview_03

3. Ի՞նչ գիտեք այս ընկերության մասին։ 

Ցանկացած թեկնածու կարող է անվերջ տեղեկություններ հավաքել ընկերության մասին: Ամենևին, հարցազրուցավարը չի ակնկալում, որ պատմեք իրենց ընկերության մասին որքան հնարավոր է շատ կամ անգիր ասեք նրանց առաքելությունը։ Հարցազրույցի ժամանակ ցանկանում են տեսնել Ձեր նվիրվածությունն ընկերության առաքելությանը։ Մեկ նախադասությամբ ներկայացրեք, որ հասկացել եք ընկերության նպատակները։ Չմոռանաք օգտագործել Ձեր անձնական ոճն ու մոտեցումը։ Օրինակ, <<Ես նվիրված եմ այս առաքելությանը, քանի որ․․․>> կամ <<Ես իսկապես հավատում եմ այս մոտեցմանը, քանի որ․․․>> և կարող եք շարունակել՝ ավելացնելով Ձեր անձնական փորձը։

4. Ինչո՞ւ պետք է Ձեզ ընտրենք։ 

Հարցազրույցի ժամանակ տրվող այս հարցը շատ ուղիղ է թվում։ Բայց հավատացեք, որ Դուք բախտավոր եք, եթե Ձեզ հարցնում են։ Չկա ավելի լավ հնարավորություն Ձեր հմտություններն ու առավելությունները վաճառելու և Ձեզ մյուս թեկնածուներից տարանջատելու համար։ Այստեղ Դուք պետք է գործի դնեք Ձեր ճարպկությունը։ Պատասխանի մեջ պետք է ներառել 3 հիմնական կետեր․

ա/Դուք ոչ միայն կարող եք կատարել այդ աշխատանքը, այլ նաև ապահովել հիանալի արդյունքներ։
բ/ Ընկերության թիմին և մշակույթին խիստ համապատասխանում եք։
գ/ Դուք ավելի լավ ընտրություն կլինեք նրանց համար, քան մյուս թեկնածուները։

Workstation

5. Ո՞րն է Ձեր ամենամեծ մասնագիտական նվաճումը։

Ոչինչ այնքան չի հուշում, որ Ձեզ աշխատանքի վերցնեն, որքան նախկին աշխատանքում ցուցաբերած արդյունքները։ Պատասխանի ամենալավ ձևը STAR մեթոդի կիրառումն է։ Նշեք իրավիճակը (the situation) և հանձնարարությունը (the task), որը Ձեզնից պահանջվում էր իրականացնել (օրինակ,  որպես կրտսեր վերլուծաբան աշխատելիս իմ պարտականությունն էր ժամանակակից իրադարձությունների մոնիթորինգը): Բայց խորհուրդ ենք տալիս ժամանակի մեծ մասը հատկացնել գործողությունների (the action) նկարագրության և արդյունքների (the result) վրա։ Օրինակ․ <<Անցյալ ամիս կիրառելով նոր մեթոդ՝ ես կրճատեցի աշխատանքի համար պահանջվող ժամանակը>>։

6. Որտե՞ղ եք Դուք Ձեզ տեսնում 5 տարի անց։

Այս հարցին պատասխանելիս եղեք անկեղծ։ HR մենեջերը ցանկանում է իմանալ.
ա/ թե արդյոք ունեք իրական ակնկալիքներ Ձեր կարիերայում,
բ/ ձգտումներ ունեք, թե ոչ,
գ/ արդյոք առկա աշխատատեղը համապատասխանում է Ձեր նպատակներին և աճին։
Դուք, նախևառաջ, պետք է հաշվի առնեք թե այդ աշխատատեղն ուր Ձեզ կհասցնի։ Եթե այն <<մեկ ուղղությամբ տոմս չէ դեպի Ձեր ձգտումները>>, ապա կարող եք պատասխանել, որ դեռևս չունեք ապագայի հստակ պատկերը։ Իսկ այս աշխատանքը կօգնի Ձեզ կայացնել այդ որոշումը։

7. Ի՞նչ աշխատավարձ եք ակնկալում։

Նախ, անհրաժեշտ է նախապես տեղեկանալ, թե այդ ընկերությունում աշխատավարձն ինչ սահմաններում է լինում։ Խորհուրդ ենք տալիս առաջին հերթին նշել բարձր թիվ՝ հիմնված Ձեր աշխատանքային փորձի և գիտելիքների վրա։ Այնուհետև խոսքի մեջ  նշեք, որ Դուք շատ ճկուն եք, բայց նաև միաժամանակ բարձր եք գնահատում հմտությունները։ Իսկ քանի որ աշխատանքն այն է, ինչ Դուք փնտրում էիք, պատրաստ եք բանակցել։

StaffBlog հարցազրույցի ուղեցույցը շարունակ համալրվելու է նոր խորհուրդներով և օգտակար տեղեկություններով, որոնք կօգնեն Ձեզ գտնել ցանկալի աշխատանք ցանկալի ընկերությունում։