8 գիրք միլիարդատերերի գրադարանից․ Ի՞նչ են կարդում աշխարհի ամենահարուստ մարդիկ

2154

Ասում են՝ մենք այն ենք, ինչ ուտում ենք։ Վստահ կարելի է ավելացնել, որ մենք նաև այն ենք, ինչ կարդում ենք, ինչով՝ ոգեշնչվում և լցնում մեր միտքն ու հոգին։

Գիրք նվիրելու օրվան ընդառաջ staff.am-ը ձեզ համար հավաքել է աշխարհի ամենահարուստ մարդկանց սիրած գրքերի փոքրիկ ցանկ, որպեսզի իմանաք՝ ինչ ստեղծագործություններ են մոտիվացրել աշխարհի ուժեղներին և հաջողակներին։

Իլոն Մասկ ($268․1 մլրդ)

Աշխարհի ամենահարուստ մարդկանց Forbes ցուցակը գլխավորող Մասկը՝ SpaceX-ի և Tesla-ի հայտնի հիմնադիրը, իր սիրելի գրքերի ցանկեր կազմելու սովորություն չունի, սակայն տարբեր տարիների և տարբեր հարցազրույցների ընթացքում նշել է այն գրքերը, որոնք նրան ամենաշատն են մոտիվացրել։ Եվ այդ ցանկից ամենագլխավորը, թերևս, Ուոլթեր Այզեքսոնի «Բենջամին Ֆրանկլինի ինքնակենսագրությունը» (The Autobiography of Benjamin Franklin) գիրքն է։ ԱՄՆ «հիմնադիր հայրերից» մեկի կերպարը միշտ է ոգեշնչել Մասկին․ Ֆրանկլինը նրա համար իսկական առաջնորդի, գյուտարարի և ձեռներեցի լավագույն օրինակն է։ Իսկ աղքատությունից մինչև ԱՄՆ գլխավոր մարդը դառնալու՝ Ֆրանկլինի անցած ճանապարհը մեր ժամանակների ամենահարուստ մարդը համարում է իրական հերոսություն։

Մասկը միշտ խորհուրդ է տալիս կարդալ գրքեր, որոնք կզարգացնեն երևակայությունը։ Նման գրքերից է Ջոն Ռոնալդ Ռուել Թոլքինի «Մատանիների տիրակալը» (The Lord of the Rings), որը, ըստ միլիարդատիրոջ, օգնել է իրեն ձևակերպել ապագայի տեսլականը։ Հավանաբար, այս և նման այլ գրքերն են, որ արթնացրել են Մասկի մեջ ապագայի կերտման մեջ այդքան ակտիվ մասնակցելու և նոր աշխարհ ձևավորելու ձգտումը։

Ջեֆ Բեզոս ($188 մլրդ)

Forbes ցուցակում երկրորդն Amazon-ի հիմնադիրն է։ Հենց նրա սերը գրքերի նկատմամբ է սկիզբ դրել ժամանակակից աշխարհում այս ամենածաղկուն բիզնեսներից մեկի, չէ՞ որ Amazon-ը սկզբում ընդամենը գրքերն առցանց վաճառելու հարթակ էր։ Բեզոսի սիրելի գրքերից մեկը Պիտեր Ֆերդինանդ Դրուկերի «Էֆեկտիվ ղեկավարն» (The Effective Executive) է, որը սովորեցնում է՝ ինչպես զարգացնել ժամանակի կառավարման հմտությունները սեփական ընկերության համար էֆեկտիվ ղեկավար լինելու համար։ Բեզոսն ասում է, որ հետևել է Դրուկերի խորհուրդներին, և դա օգնել է իրեն ավելի լավ կազմակերպել Amazon-ի աշխատանքը։

Բեզոսի սիրելիներից է նաև Նասիմ Թալեբի «Սև կարապ․ Անկանխատեսելիության նշանի տակ» (The Black Swan: The Impact of the Highly Improbable) գիրքը։ Երբ միլիարդատիրոջ մասին պատմող՝ «Ամեն ինչի խանութը․ Ջեֆ Բեզոսը և Amazon-ի դարաշրջանը» գրքի հեղինակ Բրեդ Սթոունն առաջին անգամ դիմել էր Բեզոսին նրա մասին գրելու թույլտվություն ստանալու համար, Բեզոսը՝ բերելով «Սև կարապի» օրինակը, խնդրել էր գրել «առանց ավելորդ սոֆիստիկայի»։ Նրա խոսքով՝ Թալեբի գիրքը թույլ է տալիս բարդ իրավիճակները դիտարկել պարզ պատմությունների պրիզմայով։

Բիլ Գեյթս ($134․5 մլրդ)

Microsoft-ի հիմնադրին դավադրության տեսությունների սիրահարները պարբերաբար մեղադրում են տարատեսակ «հանցանքների» մեջ՝ վիրուսների ստեղծումից մինչև պատվաստանյութերով մարդկությունը վերացնելու փորձեր։ Իսկ ի՞նչ է անում աշխարհի ամենահարուստ մարդկանցից մեկը․ կարդում է, կարդում է հաճախ ու շատ և պարբերաբար կիսվում է խորհուրդներով իր բլոգում։ Համեմատաբար թարմ գրքերից Գեյթսը հավանել է Գրեմ Սիմսիոնի «Ռոզի նախագիծը» (The Rosie Project)։ Անձնական հարաբերությունների, դրանք կառուցելու և սերը գտնելու դժվարությունների մասին այս թեթև եռագրությունը միլիարդատերն ուղարկել է իր բոլոր ընկերներին։

Բնականաբար, Գեյթսը շատ է կարդում նաև բիզնեսի մասին։ Ռոբերտ Այգերի «Ուղևորություն կյանքի տևողությամբ» (The Ride of a Lifetime) գիրքը Գեյթսն անվանել է բիզնես-գրականության մեջ լավագույններից, որ կարդացել է վերջին մի քանի տարում։ Ըստ հայտնի գործարարի՝ գրքում շատ լավ է նկարագրված, թե ինչ է նշանակում լինել գլխավոր տնօրեն մեծ ընկերությունում։ Գեյթսը հատկապես խորհուրդ է տալիս կարդալ այդ գիրքը գործնական գաղափարներ փնտրողներին։

Մարկ Ցուկերբերգ ($117․5 մլրդ)

2015-ին երիտասարդ միլիարդատերը հայտարարեց, որ այսուհետ փորձելու է ամսական 2 գիրք կարդալ, և սկսեց պարբերաբար կիսվել իր սիրելի գրքերի մասին խորհուրդներով՝ հորդորելով միանալ իր չելենջին։ Ցուկերբերգի կարդացած բազմաթիվ գրքերից դժվար էր ընտրել ընդամենը երկուսը, բայց մենք որոշեցինք, որ ձեզ կհետաքրքրի Մեթ Ռիդլիի «Ռացիոնալ լավատեսը» (The Rational Optimist), որում գիտական լրագրողը լավատեսական և համարձակ կարծիք է արտահայտում մարդկության պայծառ ապագայի վերաբերյալ՝ չնայած բոլոր դժվարություններին և ճգնաժամերին։ Ցուկերբերգը համեմատում է այդ գիրքն իր մեկ այլ սիրելի՝ Տարոն Աճեմօղլուի և Ջեյմս Ռոբինսոնի «Ինչու են ձախողվում ազգերը» (Why Nations Fail) գրքի հետ, փորձելով հասկանալ՝ որ տեսակետներն են հաղթում։

Միլիարդատիրոջ մյուս հավանած գրքերից է վերջերս նաև Հայաստանում շատ պոպուլյար դարձած՝ Յուվալ Նոյ Հարարիի «Բանական մարդը» (Homo Sapiens): 2014-ին միջազգային բեսթսելլեր դարձած գրքում Երուսաղեմի համալսարանի պրոֆեսոր Հարարին պատմում է՝ ինչպես է պատմության ընթացքն ազդել քաղաքակրթության ձևավորման և մարդկության էվոլյուցիայի վրա։ Ցուկերբերգն անվանում է գիրքը «Մարդկային քաղաքակրթության մեծ պատմություն»։ Ի դեպ, նույն գրքի մասին Գեյթսն ասում է, որ հենց այն կտաներ իր հետ անմարդաբնակ կղզի։


Մենք էլ մեր կողմից խորհուրդ ենք տալիս ձեզ կարդալ, նվիրել իրար հետաքրքիր գրքեր, քննարկել ընկերների հետ սիրված գրքերը, կիսվել ու մտքեր փոխանակել ընթերցածի վերաբերյալ և ձեր ոգեշնչումը գտնել ճիշտ գրականության մեջ։ Մասնակցե՛ք Գիրք նվիրելու օրվան ընդառաջ staff.am-ի կազմակերպած մրցույթին և մեր միջոցով հաճելի անակնկալ մատուցեք ձեր ընկերներին՝ շահելով նրանց համար գիրք։

Powered by staff.am.