Երբևէ ուշադրություն դարձրե՞լ եք այն հարցին, թե Ձեր ընկերության հատկապես որ առավելություններն են գրավում Ձեր կողմից առաջարկվող այս կամ այն աշխատանքին դիմող իդեալական թեկնածուներին։
Ստանալով աշխատանքի նոր առաջարկներ և ունենալով այլընտրանքային ընտրության հնարավորություն՝ ծրագրավորողներն առավելությունը տալիս են հենց այն առաջարկներին, որոնք համապատասխանում են իրենց չափանիշներին։
Ըստ 2018թ․-ի Developer Hiring Landscape զեկույցի, աշխատանքի ընտրության չափանիշների մեծ մասը մնացել է անփոփոխ, այսինքն շատ են կարևորվում օբյեկտիվ վարձատրությունը, մասնագիտական զարգացման հնարավորությունները և աշխատանքային առողջ պայմանները։ Նախագծի շրջանակներում կազմակերպված հարցմանը մասնակցող ծրագրավորողների 18.3%-ն առաջնահերթությունը տվել է ընկերության կողմից տրամադրվող փոխհատուցումների և բենեֆիթների փաթեթներին։
Կարելի է ասել նաև, որ առաջնային կարևորություն է տրվել նաև այն լեզուներին, framework-երին և տեխնոլոգիաներին, որոնց հետ պետք է աշխատի ծրագրավորողը, մասնավորապես, ռեսպոնդենտների 17,3%-ը։
Ծրագրավորողների 16%-ը առավելությունը տալիս է մասնագիտական զարգացման հնարավորություններին, 13.6%-ը աշխատանքի միջավայրին կամ ընկերության կորպորատիվ մշակույթին։
Զարմանալի չէ նաև այն փաստը, որ ռեսպոնդենտների 10.3%-ը աշխատանքի առաջարկն ընդունելու համար ուշադրություն է դարձնում, թե արդյոք տնից կամ remote աշխատելու հնարավորություն ունեն։
Պակաս կարևոր չէ նաև ընկերության կամ կազմակերպության բազմաբնույթ գործունեությունը, թե ինչ հիմնական խնդիրների հետ են առնչվում աշխատանքի ընթացքում։
Երբ արդեն գիտեք, թե նոր աշխատանքի առաջարկը դիտարկելիս ինչի վրա են հիմնականում ուշադրություն դարձնում ծրագրավորողները, ապա այս չափանիշները կարող են ուղեցույց լինել ՄՌԿ ոլորտի մասնագետների համար ռեքրութմենթն ավելի արդյունավետ կազմակերպելու համար։
Սակայն լիարժեք հավաքագրում իրականացնելու համար կարևոր է կազմել աշխատանքի համապատասխան և բովանդակալից առաջարկ։ Պարտադիր նախապայման չէ, որ այդ առաջարկը լինի ծավալուն, քանի որ դրա ամբողջությամբ ընթերցումն իրական չի լինի։ Կարելի է չափանիշների ուղեցույցից ընտրել մի քանիսը և, ըստ այդմ, բոլոր նախընտրելի թեկնածուներին ուղարկել անհատական առաջարկ։
Ինչ վերաբերվում է Ձեր ընկերության կամ կազմակերպության առավելություններին և դրական կողմերին, ապա այդ մասին աշխատանքային առաջարկի մեջ ներառելիս մի առաջնորդվեք ծրագրավորողների կողմից նշված չափանիշներով։ Ներառեք այն առավելություններն ու առանձնահատկությունները, որոնք դարձնում են Ձեր ընկերությունը կամ կազմակերպությունը յուրօրինակ, տարբերվող, մրցակցային և չափազանց հետաքրքիր։
