Մեկնարկում են ԱԹՍ կառավարման արագացված դասընթացներ

842

Ժամանակն է թելադրում մասնագիտություն ու մասնագիտացում․ հավատացած ենք, որ կհամաձայնեք այս մոտեցման հետ, իսկ պատերազմական իրավիճակն ու ռազմական դրությունը անգամ կարող են աքսելերացնել այդ գործընթացը՝ հնարավորինս կարճ ժամկետում պատրաստելով պահանջված մասնագետներ։

Դեռևս հոկտեմբերի սկզբին ռազմական դրությամբ պայմանավորված Գյումրու ավիամոդելային խմբակն իր ներուժն ի շահ Հայաստանի ծառայեցնելու նպատակով հայտարարեց անմիջական և ավտոմատ կառավարվող թռչող սարքերի (ԱԹՍ) կառավարման արագացված դասընթացներ 20-ից 35 տարեկան հայորդիների համար։ Եվ մենք որոշեցինք հատուկ հարցազրույց ունենալ Գյումրու ավիամոդելային խմբակի տնօրեն Խաչատուր Թադևոսյանի հետ այս հիանալի նախաձեռնության մասին ձեզ հետ կիսվելու համար։

Շնորհակալ ենք, Խաչատուր, որ կարողացաք նման բազմազբաղ օրերին ժամանակ հատկացնել և պատմել խմբակի հիմնադրման, գործունեության ու հեռանկարների մասին։


Ինչո՞վ էր պայմանավորված խմբակի ստեղծումը, և ո՞րն է գործունեության հիմնական նպատակը։

2016թ․ ապրիլյան պատերազմից հետո առաջացավ այս խմբակի ստեղծման գաղափարը, միանգամից գործի անցա, ներդրեցի ողջ գիտելիքներս ու ժամանակս և այդպես խումբը ձևավորվեց։ Նպատակը շատ պարզ է, մենք՝ հայերս, բավականին մեծ տեխնոլոգիական ներուժ ունենք, որը կարող ենք կիրառել ռազմական դաշտում հակառակորդին ոչնչով չզիջելու համար։ Այսօրվա պատերազմի զենքը բոլորիս արդեն քաջ հայտնի ԱԹՍ-ներն են, որոնց անմիջական և ավտոմատ կառավարման մոդելների պատրաստման ու առհասարակ կառավարման մեջ հմտանում են մեր խմբակի սաները։

Ի՞նչ բազային հմտություններ են անհրաժեշտ այս խմբակին մասնակցության համար և ովքե՞ր կարող են մասնակցել։

Մասնագետ դառնալու համար տարբեր հմտություններ են անհրաժեշտ։ Իմ օրինակը բերեմ թերևս․ մասնագիտությամբ ինժեներ եմ, ինչպես նաև ռադիոտեխնիկայի ոլորտի մոտ 15 տարվա աշխատանքային փորձ ունեմ, որոնք մի շարք այլ գիտելիքների հետ համատեղ ինձ շատ են օգնում։ Հավելեմ, որ կարևոր է նյութատեխնիկական ոլորտի գիտելիքներին տիրապետելը։

Իսկ թե ովքեր կարող են մասնակցել․ կցանկանամ խոսել մեր երկու կրթակարգերի և այժմ հայտարարված արագացված դասընթացների մասին։

Առաջին կրթակարգը 1 տարի տևողությամբ է և նախատեսված է 6-12 տարեկան երեխաների համար։ Դասընթացներն անցկացվում են շաբաթական 2 օր, 4 ժամ ծանրաբեռնվածությամբ։ Այս կրթակարգի ժամանակ երեխաները սովորում են հեռակառավարվող ավիամոդելներ պատրաստել և կառավարել։

Երկրորդ կրթակարգը 3 տարի տևողությամբ է և նախատեսված է 12-ից բարձր տարիքի պատանիների և երիտասարդների համար։ Դասընթացների շնորհիվ նրանք սովորում են ավտոմատ կառավարվող անօդաչու թռչող սարքեր (ԱԹՍ) պատրաստել քաղաքացիական նպատակներով օգտագործման համար։

Եվ մեր այս ողջ ներուժն ի նպաստ հայրենիքին օգտագործելու համար մեկնարկել ենք անմիջական և ավտոմատ կառավարվող թռչող սարքերի (ԱԹՍ) կառավարման արագացված դասընթացներ 20-ից 35 տարեկան հայորդիների համար։ Արդեն ահռելի մեծ քանակությամբ՝ 1000-ից ավելի դիմումներ ենք ստացել ու ջանք չենք խնայում, որ տեսանելի արդյունքներ գրանցենք։

Ովքե՞ր են համակարգում այս գործընթացը և արդյոք այն աջակցություն է ստանում տարբեր կառույցների կողմից։

Ամբողջական գործընթացը համակարգվում է իմ կողմից, իսկ դասընթացների վարման պրոցեսում ինձ հետ զուգահեռ ներգրավված են նաև գիտնականներ, ավիամոդելիստներ ու սպորտի վարպետներ։

Աջակցության մասին խոսելիս, կցանկանամ նշել, որ մենք բավականին թեթևացրել ենք ծնողների ֆինանսական բեռը։ Դասավանդումն ամբողջությամբ անվճար ենք իրականացնում, խմբակի սաների կողմից միայն վճարվում է կիրառվող նյութի արժեքի փոքր մասը, իսկ մյուս մեծ մասը հայթայթում ենք տարբեր աղբյուրներից։

Եվ վերջում, ամփոփենք՝ խոսելով խմբակի զարգացման հեռանկարների մասին։

Իհարկե, մեծ հպարտությամբ ցանկանում եմ նշել, որ առաջիկա մեկ տարվա ընթացքում նախատեսում ենք խմբակներ բացել Հայաստանի մարզերում, և առաջինը կլինի Հադրութում։

Նշենք, որ անմիջական և ավտոմատ կառավարվող թռչող սարքերի (ԱԹՍ) կառավարման արագացված դասընթացների ընդունելությունը դեռևս շարունակվում է։

Պարապմունքները նախատեսված են 20-ից 35 տարեկան երիտասարդների համար։ Դասընթացը ներառում է․

  • տեսական ուսուցում ԱԹՍ-ի կառուցվածքի և գործառույթների վերաբերյալ,
  • համակարգչային հատուկ ծրագրով ԱԹՍ-ի կառավարման դասընթաց,
  • ԱԹՍ-ի մոդելավորում և պատրաստում,
  • դաշտային պարապմունքներ։

Դասընթացի տևողությունը մեկ ամիս է՝ ամենօրյա գրաֆիկով օրական 2-3 ժամ տևողությամբ։ Մասնակցության համար պետք է գրանցվել՝ սեղմելով ստորև կոճակին։


Շնորհակալություն։ Հաջողություն ենք մաղթում ձեր ծրագրերում և բոլորիս ՄԵԾ ՈՒ ՍՊԱՍՎԱԾ ՀԱՂԹԱՆԱԿ։

#ՀաղթելուԵնք