Ավելի քան յոթ տասնամյակ Հայ կրթական հիմնարկությունը (ՀԿՀ) անխոնջ կերպով իրականացնում է իր կարևորագույն առաքելությունը՝ կրթությամբ ուժեղացնել հայության ապագան։ Հիմնադրման օրվանից՝ կազմակերպությունը նպատակ ունի ապահովել կրթության հասանելիությունը հայ երիտասարդների համար՝ ինչպես Հայաստանում, այնպես էլ Սփյուռքում։ ՀԿՀ-ի համոզմունքն է․
Կրթությունն է այն հիմնաքարը, որը կարող է փոխել համայնքների, իսկ ավելի լայն իմաստով՝ ամբողջ ազգի ապագան։
Այս տարիների ընթացքում ՀԿՀ-ը վերածվել է հավատարիմ գործընկերոջ հազարավոր հայ երիտասարդների համար՝ նրանց տրամադրելով կրթաթոշակներ, աջակցելով ՏՏ ոլորտի ուսուցմանը, վերանորոգելով սահմանամերձ գյուղերի դպրոցները և ապահովելով երեխաներին անհրաժեշտ դպրոցական պարագաներով։
Կրթաթոշակներ, դպրոցների վերանորոգում և ՏՏ ծրագրեր՝ ՀԿՀ-ի գլխավոր ուղղությունները
ՀԿՀ-ի կրթաթոշակային ծրագրերն արդեն 2007 թվականից ի վեր հնարավորություն են տվել ավելի քան 6000 ուսանողի ստանալ բարձրագույն կրթություն։ Այս կրթաթոշակները հատուկ նշանակություն ունեն հատկապես Արցախից տեղահանված ուսանողների համար, որոնցից ավելի քան 140-ը շարունակել են ուսումը Հայաստանում ՀԿՀ-ի շնորհիվ։
Ի դեպ, 2025-2026 ուսումնական տարվա համար արդեն բաց են կրթաթոշակի հայտադիմումները։ Մրցույթին կարող են մասնակցել ՀՀ պետական բուհերի վճարովի համակարգում 2025 թ-ի սեպտեմբերից 1-ին կուրսում սովորող ուսանողները (դիմելու պահին դեռևս դպրոցում սովորող) և բարձր կուրսերի ուսանողներ, մագիստրոսներ։ Մրցույթին կարող են մասնակցել ՀՀ քաղաքացիները, սիրիահայ և լիբանանահայ ուսանողները, ինչպես նաև Ջավախքում բնակվող ազգությամբ հայ ուսանողները։
Մրցույթին մասնակցելու համար անհրաժեշտ է լրացնել Կրթաթոշակի առցանց հայտը։
Բացի կրթաթոշակներից, հիմնարկությունը կարևոր տեղ է հատկացնում դպրոցների վերանորոգմանը։ ՀԿՀ-ն իր գործունեության ընթացքում վերանորոգել է ավելի քան 200 դպրոցներ Հայաստանում, Արցախում և Ջավախքում։ Այս ծրագրերը ոչ միայն բարելավում են կրթական պայմանները, այլև օգնում են կանխելու գյուղերի ամայացումը՝ վերածելով դպրոցները համայնքային կենտրոնների։
ՀԿՀ-ն նաև մեծ ուշադրություն է դարձնում ՏՏ ոլորտի զարգացմանը։ «Արմաթ» ինժեներական լաբորատորիաների ֆինանսավորմամբ գյուղական դպրոցների աշակերտները ձեռք են բերում ծրագրավորման, ռոբոտաշինության և ինժեներական հմտություններ՝ պատրաստ լինելով աշխատաշուկայի ժամանակակից պահանջներին։
Միաժամանակ կազմակերպությունը կամուրջներ է կառուցում կրթության և աշխատաշուկայի միջև՝ կազմակերպելով սեմինարներ և մրցակցային ծրագրեր, որոնք ներգրավում են բազմաթիվ միջնակարգ և ավագ դպրոցներ՝ զարգացնելով սերունդներ, որոնք պատրաստ են դիմակայել ապագայի մարտահրավերներին:
«Ինչպես հաջողության հասնել աշխատանքի շուկայում» թեմայով սեմինար ՀԿՀ ուսանողների համար
Փետրվարի 28-ին Հայ կրթական հիմնարկության 100-ից ավելի ուսանողներ մասնակցեցին «Ինչպես հաջողության հասնել աշխատանքի շուկայում» խորագրով սեմինարին, որը վարում էր Staff.am-ի և Hirebee-ի համահիմնադիր, տեխնիկական գիտությունների թեկնածու, «ՀՀ աշխատաշուկա» զեկույցի հեղինակ Լուիզա Ավետիսյանը։
Այս բացառիկ հանդիպման ընթացքում ՀԿՀ-ի ուսանողները ստացան իրական գործիքներ և խորհուրդներ՝ մասնագիտական ուղին վստահորեն կառուցելու համար։ Լուիզա Ավետիսյանը կիսվեց իր կարիերայի հետաքրքիր և ոգեշնչող պատմությամբ՝ սկսած ակադեմիական հաջողություններից մինչև ձեռնարկատիրական նախագծերի հաջող իրականացում։ Նա հատուկ ուշադրություն դարձրեց աշխատաշուկայի արագ փոփոխվող դինամիկային և նոր հնարավորություններին, որոնք հասանելի են նպատակասլաց երիտասարդության համար։
Սեմինարի ընթացքում ներկայացվեց մի շարք կարևոր թեմաներ: Մասնավորապես, Լուիզա Ավետիսյանը բացատրեց, թե ինչպես կարելի է կառուցել արդյունավետ մասնագիտական պրոֆիլ, որը կգրավի պոտենցիալ գործատուներին։ Նա անդրադարձավ նաև աշխատաշուկայում ճիշտ կողմնորոշվելու խնդրին՝ օգնելով ուսանողներին հասկանալ տարբեր ոլորտների պահանջարկն ու մրցակցային առավելությունները։
Խոսվեց նաև, այն հմտությունների մասին, որոնք անհրաժեշտ է զարգացնել ժամանակակից աշխատաշուկայում մրցունակ մնալու համար։ Առանձնահատուկ հետաքրքրություն առաջացրեց Career Factory հարթակի մասին տեղեկատվությունը, որը Staff.am-ը գործարկել է 2023 թվականին։ Այն հնարավորություն է տալիս ուսանողներին և մասնագետներին անցնել կարիերայի զարգացման արդիական դասընթացներ և ստանալ հավաստագրեր։ Հարթակը նախագծված է այնպես, որ մասնակիցները կարողանան ոչ միայն ձեռք բերել տեսական գիտելիքներ, այլև զարգացնել գործնական հմտություններ՝ բարձրացնելով իրենց մրցունակությունը աշխատաշուկայում։
Սեմինարը ուսանողների համար ծառայեց ոչ միայն որպես տեղեկատվական հանդիպում, այլև դարձավ իրական խթան՝ սեփական կարիերայի զարգացման հաջորդ քայլերի մասին մտածելու համար։ Լուիզա Ավետիսյանի հարուստ փորձառությունն ու հաջողության պատմությունը ոգեշնչեցին ներկաներին վստահել սեփական ուժերին և լիարժեք օգտագործել կրթական ու մասնագիտական զարգացման հնարավորությունները։
Հայ կրթական հիմնարկությունը շարունակաբար զարգացնում է նման ծրագրերը՝ հավատալով, որ կրթությամբ կարող ենք կառուցել ուժեղ, կայուն և զարգացող հասարակություն։ Ինչպես նշում է հիմնարկության գործադիր տնօրեն Արմինե Հարոյանը․
Կրթությունը առաջընթացի հիմքն է: Զինելով մեր ուսանողներին գիտելիքներով, հմտություններով և հնարավորություններով` մենք նրանց զորացնում ենք ավելի պայծառ ապագա կերտելու իրենց և իրենց համայնքների համար: Կրթության մեջ յուրաքանչյուր ներդրում ներդրում է ավելի ուժեղ, ավելի բարեկեցիկ Հայաստանում։
