1-ը հունիսի՜, 1-ը հունիսի՜, մանուկների տոնն է, որն Աթենքի մարդուկներն արդեն երեք տարի շարունակ կիսում են միասին։ staffmedia.am-ի նախորդ հոդվածներից, երևի, արդեն կռահել եք, որ Աթենքում յուրաքանչյուր աշխատանքային օրը տոն է իրենց աշխատանքն անչափ սիրող Աթենքցիների համար։ Բայց այ թե որքան հատուկ են նշվում տոներն այստեղ և որքան ինքնատիպ՝ Աթենքի ոճով, դեռ առիթ չէինք ունեցել պատմելու։ Ուղղենք այս սխալը տարվա ամենաբարի ու լուսավոր տոնի՝ հունիսի 1-ի մասին մեր անդրադարձով։
Այս ամենի ետևում Աթենքի էնտուզիաստների թիմն է, որը ջանք ու եռանդ չի խնայել փոքրիկ աթենքցիների վառ էմոցիաներն ու անմոռանալի տոնն իրականություն դարձնելու համար։
Աշխատակիցների միջև էմոցիոնալ կապի ամրապնդումը մեզ համար ամուր և միասնական թիմի գրավական է, և այդ նպատակով ընկերությունը բազմաթիվ միջոցառումներ է կազմակերպում։ Փոքրիկների տոնն առանձնահատուկ է նրանով, որ այստեղ հաստատվում են նաև ընտանեկան ծանոթություններ և շփումներ։ Սա յուրահատուկ մշակույթ է, որը մենք սիրով տարածում ենք։ Մեր գործընկերներին հայրիկի և մայրիկի պաշտոններում տեսնելը ֆանտաստիկ գեղեցիկ է։
Աթենքի հաղորդակցության մասնագետ Լենա Աբրահամյան
Աթենքի կազմակերպչական թիմից տեղեկացանք, որ այս տարի փոքրիկների տոնն աննախադեպ է իր ակտիվությունների բազմազանությամբ։ Ինքներս էլ միջոցառման ընթացքում համոզվեցինք դրանում։ Հսկա բատուտ, քարթինգ, պղպջակե տնակ, թռչող բարձեր, գունազարդման պատեր, աճպարարներ և ծաղրածուներ, գեղեցկության անկյուն, ակտիվ խաղեր, թափվող փուչիկների շոու և շա՜տ ավելին․․․
Փոքրիկների արձագանքից հասկացանք, որ միջոցառման ամենասպասված պահերից էր փրփուր փարթին և գունեղ հրավառությունը։
Այսչափ գերհագեցած միջոցառումից հետո դժվար է ի մի բերել տպավորությունները, և, կարծում ենք, որ պետք էլ չէ։ Փոխարենը ավելի լավ է կիսվենք օրվա հերոսների և նրանց ծնողների մասնակցությամբ տեսանյութով, որում օրվա ողջ տրամադրությունը փոխանցված է։
Իսկ վերջում, ուզում ենք ասել, որ անչափ հպարտ ենք համագործակցել Աթենքի հետ՝ այն եզակի գործատուներից, որն այսչափ կարևորում է ոչ միայն իր աշխատակիցների, այլ նաև վերջիններիս հարազատների բարեկեցությունը։
Շնորհակալ ենք այս տոնի, վառ զգացողությունների ու հրավերի համար։ Իսկ մեր ընթերցողներին առաջարկում ենք հետևել Աթենքի կարիերայի էջին staff.am-ում, որպեսզի բաց չթողնեք ընկերության հետագա թարմացումները։
Ո՞վ գիտի, միգուցե հաջորդ տարի, մեզ հետ միասին, դուք ևս մասը կազմեք այս հեքիաթի և Աթենքի թիմի։
