Համաշխարհային AWS համայնքը գալիս է Հայաստան` համախմբվելու տեղական համայնքի հետ։ Ամպային տեխնոլոգիաներին և կրթությանը նվիրված տարվա գլխավոր իրադարձություններից մեկը՝ AWS Community Day Armenia 2025-ը կայանալու է մայիսի 24-ին՝ Հայաստանի Ամերիկյան Համալսարանում։
AWS Community Day-ը հայաստանյան համայնքի կողմից կազմակերպվող տեխնիկական միջոցառում է, որտեղ հանդես են գալիս AWS փորձագետներ, միջազգային և տեղական մասնագետներ, ոլորտի առաջատարներ ու համայնքի ակտիվ անդամներ։ Միջոցառումը ներառում է խորացված տեխնիկական և ոչ տեխնիկական քննարկումներ, պրակտիկ սեմինարներ և ուսուցողական ցուցադրություններ։
Այս տարի հատուկ հյուրը՝ AWS-ի փոխնախագահ Chief Evangelist Ջեֆ Բարն է, որն առաջին անգամ կլինի Հայաստանում։ Նա հանդես կգա բանախոսությամբ՝ ներկայացնելով իր տեսլականը ամպային տեխնոլոգիաների և ծրագրավորման ապագայի վերաբերյալ։
Նրան կմիանա նաև Անտոն Բաբենկոն՝ AWS Hero և Terraform տեխնոլոգիաների ոլորտում ճանաչված մասնագետ, որը հեղինակել է AWS-ի ինտեգրացիայի համար ամենաշատ օգտագործվող Terraform մոդուլների մեծ մասը:
Այս միջոցառումը AWS-ի կողմից պաշտոնապես ճանաչված և հովանավորվող առաջին և միակ միջոցառումն է Հայաստանում։ Մեր նպատակն է ապահովել համաշխարհային որակի բովանդակություն, կիսվել իրական կյանքում կիրառելի փորձով և փոխանցել իրական արժեք մեր մասնակիցների համար։ Այս պահին արդեն ունենք 700-ից ավելի գրանցում, ինչը խոսում է միջոցառման կարևորության մասին:
AWS User Group Armenia-ի հիմնադիր և ղեկավար Քրիստինե Արմիյանց
Միջոցառումն իրականություն է դարձել հովանավորների աջակցությամբ, որոնց թվում են՝ Հայաստանի Ամերիկյան Համալսարանի Ակյան գիտության և ճարտարագիտության քոլեջը, Adobe, DasMeta, JetBrains և Grid Dynamics ընկերությունները։
AWS Community Day Armenia 2025-ը հյուրընկալելու է ինչպես տեղական, այնպես էլ միջազգային առաջատար մասնագետների, որոնք հանդես կգան ելույթներով՝ անդրադառնալով ամպային տեխնոլոգիաներին, «DevOps»-ին, «Infrastructure as Code»-ին, «serverless» տեխնոլոգիաներին և արհեստական բանականությանը։
Մասնակիցները հնարավորություն կունենան մասնակցելու գործնական սեմինարների, լսելու փորձառու ինժեներների, ուղղելու նրանց հարցեր, քննարկելու և ծանոթանալու ոլորտում նորարարական հաջող պատմություններին։
Ամպային տեխնոլոգիաներով հետաքրքրված բոլոր մասնագետները, ինժեներները և նորարարությամբ ոգեշնչվողները սիրով հրավիրվում են միանալու AWS User Group Armenia-ին և մասնակցելու 2025 թվականի AWS Community Day-ին։
Մասնակցությունն անվճար է, սակայն նախնական գրանցումը պարտադիր է։
Սեմինարներին մասնակցելու համար պետք է ներկայանալ համակարգչով։
