staff.am-ի այցը Beeline Հայաստան՝ հեռահաղորդակցության ոլորտի առաջատար ընկերություն

6983

StaffCoverages նախագծի շրջանակներում մեր այցն այս անգամ հեռահաղորդակցության ոլորտի առաջատար ընկերություն էր՝ Beeline Հայաստան, որը նաև ամբողջ Հայաստանի տարածքում խոշոր գործատու է։ Ներդրված պրոցեսները, աշխատանքային գործընթացը, ինչպես նաև աշխատակիցների տարբեր սերունդներ տեսնելիս, միանգամից հասկանում ես, որ ընկերությունը երկար տարիների պատմություն և փորձ ունի այս ոլորտում։ 

Միևնույն ժամանակ ակնհայտ է, որ գոյություն ունեցող պարզության, բաց և ազատ մթնոլորտի, վառ կորպորատիվ մշակույթի, արժեքների ու ընկերական միջավայրի շնորհիվ է, որ Beeline Հայաստանն առաջարկում է նորարարական լուծումներ, խթանում նոր գաղափարների ձևավորմանն ու Հայաստանում ստարտափ էկոհամակարգի զարգացմանը։ 

Մեր այցը մեծ ոգևորություն և էներգիա պատճառեց, որով կկիսվենք ձեզ հետ ստորև ինչպես տեսաանդրադարձով, այնպես էլ ֆոտոանդրադարձով։ 

Հատուկ շնորհակալություն ենք հայտնում Գրիգորի Յուրինին մեր այցը կազմակերպելու համար։

ԹԻՄԱԿԻՑՆԵՐ         ՏԵՍԱՆՅՈՒԹ          ԹԱՓՈՒՐ ԱՇԽԱՏԱՏԵՂԵՐ            ԲԵՆԵՖԻԹՆԵՐ             ԼՈՒՍԱՆԿԱՐՆԵՐ

BEELINE ՀԱՅԱՍՏԱՆԻ ՄԱՍԻՆ

Հայաստանում հեռահաղորդակցության առաջատարներից մեկը` Beeline Հայաստանը 1995թ-ից մատուցում է կապի ծառայություններ Հայաստանի ողջ տարածքում, 2008 թ-ից՝ Beeline ապրանքանիշի ներքո:

2000 ԱՇԽԱՏԱԿԻՑ           78 ՍՊԱՍԱՐԿՄԱՆ ԿԵՆՏՐՈՆ1

BEELINE ՀԱՅԱՍՏԱՆ ԹԻՄԱԿԻՑՆԵՐ

Pyatakhin

ԱՆԴՐԵՅ ՊՅԱՏԱԽԻՆ
Գլխավոր տնօրեն

AShkhen

ԱՇԽԵՆ ՊՈՂՈՍՅԱՆ
HR տնօրենի պաշտոնակատար

Anjela

ԱՆԺԵԼԱ ԱԼԵՔՅԱՆ
Կորպորատիվ պատասխանատվության մենեջեր

Grigory

ԳԵՈՐԳԻ ԱՂԱՋԱՆՅԱՆ
Գործառնական ծախսերի պլանավորման և վերահսկման մենեջերNarine

ՆԱՐԻՆԵ ՇԱՔԱՐՅԱՆ
Կոնտակտային կենտրոնի ղեկավար
Հաճախորդների սպասարկման ծառայություն
Elen

ԷԼԵՆ ՍԻՄՈՆՅԱՆ

Ինտերնետ հեռուստատեսության արտադրանքների
զարգացման մենեջեր

Arman

ԱՐՄԱՆ ԴԵՄԻՐԽԱՆՅԱՆ

Տեխնիկական բլոկի, Պլանավորման և նախագծերի իրականացման ծառայության,
Հաշվառման և անձնագրավորման բաժնի պետ

Anahit

ԱՆԱՀԻՏ ՄԵՂՐՈՅԱՆ

Վաճառքի և սպասարկման գրասենյակների կենտրոն
ուղղության ղեկավար

BEELINE ՀԱՅԱՍՏԱՆԸ ՏԵՍԱՆՅՈՒԹՈՒՄ

Beeline Հայաստանի մասին ավելին բացահայտեցինք՝ զրուցելով Գլխավոր տնօրեն Անդրեյ Պյատախինի հետ։

– Beeline-ը Հայաստանում հիմնադրվել է բավականին վաղ և գաղտնիք չէ, որ առաջին հեռախոսները տրամադրվել են մեր ընկերության կողմից։ Այնուհետև ընկերությունը զարգացավ ու առաջինը տրամադրեց ինտերնետ ծառայություն։

– Beeline Հայաստանը միջազգային խոշոր կորպորացիայի մաս է կազմում Ամստերդամում գտնվող գլխամասային գրասենյակով, որի մեջ մտնում են 10 երկրներ։

– Մենք բերում ենք Հայաստան միջազգային որակ, միջազգային փորձ, գիտելիքներ և, հավելյալ, պայծառ ու հետաքրքիր բրենդ։

– Մեր սարքավորումները համապատասխանում են բոլոր ստանդարտներին, ՏՏ համակարգը նույնպես ամենաառաջադեմն է։ Մենք նաև աշխատում ենք մեր գովազդային ու մարքեթինգային արշավներն իրականացնել միջազգային լավագույն փորձը հաշվի առնելով։ Հաղորդակցման ծառայություններն այստեղ նման են ամենաառաջատար երկրներում մատուցվող ծառայություններին։

Խոսելով տեղական շուկայում Beeline-ի առանձնահատկությունների մասին, Անդրեյ Պյատախինը հավելեց․ 

– Beeline-ը կարող է մատուցել ինտերնետի ծառայություն ամբողջ երկրում և Հայաստանի հեռավոր համայնքներում։ Իսկ ինտերնետը կյանքում շատ կարևոր դեր ունի։ Ոչ միայն նորություններին հետևելը, այլ նաև հարազատների հետ շփումը Հայաստանի սահմաններից դուրս ամենավերջին հետաքրքիր նորույթներն են, որոնք մենք տրամադրում ենք մեր կորպորատիվ հաճախորդներին։ Մենք հիմնական ուշադրությունը կենտրոնացնում ենք հեռախոսային ինտերնետ կապի տրամադրման վրա, ինչը մեր հաճախորդներին խիստ անհրաժեշտ է։ Ստեղծում ենք նաև 3G, 4G ցանցեր, այսինքն՝ այն, ինչը կարևոր է մեր հաճախորդների կյանքը ավելի լավը դարձնելու համար։

– Կրկին կցանկանամ նշել, որ ոչ միայն Երևանում, Գյումրիում կամ Վանաձորում, այլ նաև Հայաստանի հեռավոր համայնքներում, փոքր գյուղերում կարող են օգտվել Beeline -ի ծառայություններից։

Ինչպես գիտենք, այսօր Beeline Հայաստանն ապահովում է մարդկային արժեքներից ամենակարևորը՝ միմյանց միջև հաղորդակցությունը։ Մեր հարցին, թե ինչն են համարում նման հաջողության հիմքը, Անդրեյ Պյատախինը պատասխանեց․

– Առաջինը, դա 5G ցանցն է՝ բազային տեխնոլոգիական հնարավորությունները, որոնք մարդկանց թույլ են տալիս հաղորդակցվել, ինտերնետից օգտվել։ Բավականին շատ ռեսուրսներ և միլիոնավոր դոլարներ ենք ծախսում, որպեսզի այդ հնարավորությունները ստեղծենք՝ ձգտելով մեկ միասնական նպատակի իրագործման․ ամենուրեք հասանելի, բոլորին հասանելի, արագ և որակյալ առանց խափանումների։

– Բացի այդ մարդկանց համար կարևոր է նաև, թե ինչ ընկերություն է այդ ծառայությունը մատուցում, ինչպիսի կարգավիճակ ունի Հայաստանում, ինչով է առանձնանում ընկերության բրենդը։ Ուստի մենք միշտ մասնակցություն ենք ունենում Հայաստանում իրականացվող այն սոցիալական նախագծերին, որոնք մեր երկրի զարգացմանն են ուղղված և հեռանկարային են։ Այս գաղափարախոսությունը մեր ընկերության անբաժան մասն է կազմում։ Այսինքն՝ մարդկանց ոչ միայն ինտերնետ է հարկավոր, այլ ինտերնետ այն ընկերությունից, որը սոցիալական ծրագրերում ակտիվ է, աջակցում է այն ամենին, ինչը հարկավոր է մեր երկրի զարգացման համար և, իհարկե, որին կարելի է վստահել։

Որպես միջազգային խոշոր կորպորացիայի մաս՝ Beeline Հայաստանի գրասենյակ այցելելիս Դուք էլ կնկատեք տարբեր շնորհակալագրեր, մրցանակներ, որոնք միջազգային հաջողությունների և ձեռքբերումների մասին են խոսում․ 

– Ընկերությունը գործում է աշխարհի տաս երկրներում և յուրաքանչյուր երկիր ինքն իրենով շատ հետաքրքիր է։ Վեոն խմբում մենք փորձում ենք հետևել ամենաբարձր էթիկական նորմերին գործընկերների, հաճախորդների նկատմամբ, ովքեր միշտ մեր արժեքներում կարևորում են մեր արդարությունը, հարգանքը այն երկրի նկատմամբ, որտեղ գործում ենք, համապատասխանությունը ամենաբարձր միջազգային նորմերին։ Այս արժեքների շնորհիվ է նաև, որ մեզ շատ են գնահատում։

Beeline Հայաստանում լավագույն HR case-երի, մասնագետների հավաքագրման և աշխատակիցների համար նախատեսված զանազան ծրագրերի մասին խոսեցինք HR տնօրենի պաշտոնակատար Աշխեն Պողոսյանի հետ։  

– Աշխատանքի ընդունվելիս բոլոր թեկնածուները բացի հարցազրույցներից անցնում են նաև թեստավորում և կատարում են գործնական աշխատանքներ, որոնց նպատակն է հասկանալ և գնահատել թեկնածուների մասնագիտական գիտելիքները և նրանց կոմպետենցիաները։

– Քանի որ մեզ համար շատ կարևոր է սպասարկման բարձր որակ ապահովելը, ֆռոնտլայն աշխատանքի համար սպասարկման ոլորտի թեկնածուները մինչև աշխատանքի ընդունվելը անցնում են 1-ամսյա հատուկ ուսուցում։ Ուսուցման արդյունքում նրանք անցնում են որակավորման քննություն, և լավագույններն ընդունվում են աշխատանքի։

Աշխենի հետ զրուցեցինք նաև աշխատակիցների կատարողականության գնահատման հիմնական գործիքների մասին։

– Ընկերությունում գործում է արդյունքների կառավարման ամենամյա համակարգ։ Այն մեզ հնարավորություն է տալիս գնահատել աշխատանքի տարեկան արդյունքները և կատարողականը յուրաքանչյուր աշխատակցի, որոշել նրա ուժեղ և թույլ կողմերը և կառուցել նրա համար հաջորդ տարվա կտրվածքով զարգացման պլան։

– Նաև կիրառում ենք 360օ գնահատման համակարգը, որի միջոցով որոշում ենք ղեկավարների կառավարչական և համագործակցության հմտությունները։

– Ունենք նաև մեկ այլ գործիք՝ Տաղանդների կառավարման գործընթացը, որի շրջանակներում ամեն տարի ձևավորում ենք տաղանդների բանկ: Այստեղ ներառված աշխատակիցները կազմում են մեր կադրային ռեզերվը հետագա առանցքային պաշտոնները ներքին ռեսուրսներով համալրման համար: Նրանց վրա դրված ծրագրերի հիման վրա մշակվում է անհատական զարգացման պլան, որի իրականացումը տարվա ընթացքում անընդմեջ քննարկվում է HR-ի, անմիջական ղեկավարի և աշխատակցի մասնակցությամբ և անհրաժեշտության դեպքում փոփոխվում է` ընկերության ռազմավարությանը համապատասխան: Անհատական զարգացման համար դասընթացներ են իրականացվում ոչ միայն Beeline համալսարանի կողմից, այլ նաև հրավիրում ենք հատուկ թրեյներներ տարբեր երկրներից։

Մեր հարցին՝ ինչքանո՞վ է կարևորում Beeline Հայաստանը ուսանողների հետ աշխատանքը, Աշխենը նշեց․ 

– Այսօրվա ուսանողները մեր ապագա աշխատակիցներն են, ուստի մենք սերտորեն համագործակցում ենք ԲՈՒՀ-երի հետ և շատ կարևորում ենք այդ համագործակցությունը։

– Հայաստանյան բուհերի ավագ կուրսի ուսանողները հնարավորություն ունեն անցնել ստաժավորում մեր Ընկերության տարբեր ստորաբաժանումներում՝ 3-րդ սերունդ ստաժավորման ծրագրի շրջանակներում:

– 11 ամիսների ընթացքում բոլոր ստաժորները մասնակցում են իրական պրոդուկտների ու պրոցեսների մշակմանը, ինչպես նաև վարձատրվում են և օգտվում են ընկերության կողմից առաջարկվող արտոնություններից՝ մասնակցելով կորպորատիվ Beeline համալսարանի ուսուցողական ծրագրերին և ստանալով անվճար ծառայողական հեռախոսակապ։

– Լավագույնները 6 ամիս անց անցնում են աշխատանքի։ Ծրագիրը գործում է արդեն 11 տարի և այդ ընթացքում մեր ընկերությունում ստաժավորում է անցել 130 ուսանող, որոնցից գրեթե 40% -ը համալրել են ընկերության շարքերը՝ զբաղեցնելով առանցքային պաշտոններ տարբեր ստորաբաժանումներում:

Ընկերությունը, որն ունի մոտ 2000 աշխատակից ներառյալ ոչ միայն մայրաքաղաքում գտնվող գրասենյակը և սպասարկման կենտրոնները, այլ նաև մարզերի կենտրոնական ու այլ հեռավոր համայնքների կենտրոնները, ինչպիսի՞ թիմային միջոցառումներ է կազմակերպում։

29

– Այո՛, ճիշտ նշեցիք։ Արդեն ունենք մոտ երկու հազար աշխատակից, որոնք տարբեր են թե ազգությամբ, թե տարիքով, թե նախասիրություններով։ Միջոցառումները կազմակերպելիս մենք միավորում ենք և՛ մեր կորպորատիվ արժեքները, և՛ տարբեր մարդկանց առանձնահատկությունները։

– Մեր աշխատանքը և կորպորատիվ մշակույթը հիմնվում է մեր 5 արժեքների վրա՝ Նորարարություն, Նախաձեռնողականություն, Համագործակցություն, Հաճախորդամետություն և Ազնվություն։

– Նորարարության և նախաձեռնողականության խթանման համար մենք խրախուսում ենք աշխատակիցներին առաջարկել իրենց նոր գաղափարները, որոնք ուղղված են Ընկերության գործունեության բարելավմանը և իրականացնել դրանք։

– Արդեն 4-րդ տարին է մենք կազմակերպում ենք ներքին Դիջիթոններ։ Դա մի հարթակ է, որտեղ տարբեր ստորաբաժանումների աշխատակիցներ (ծրագրավորողներ, մարքեթոլոգներ, իրավաբաններ և այլն) կազմավորում են թիմ և 24 ժամվա ընթացքում ստեղծում են իրական պրոդուկտի նախատիպ՝ բջջային հավելվածներ, նոր ծառայություններ։ Հաղթող թիմը մեկնում է Ամստերդամ՝ Խմբի մակարդակով կազմակերպվող միջոցառմանը մասնակցելու, որտեղ հավաքվում են Խմբի անդամ երկրների լավագույն թիմերը։

– Հաճախորդամետություն արժեքի շրջանակներում մենք գլխավոր տնօրենի և այլ ղեկավարների հետ միասին կազմակերպում ենք այցեր դեպի մարզեր, հանդիպում ենք աշխատակիցների հետ և քննարկում տարբեր հարցեր` կապված բիզնեսի հետ և ոչ միայն։ Այս հանդիպումները անցնում են ազատ ու անկաշկանդ մթնոլորտում, աշխատակիցները կարող են ուղղել իրենց հուզող բոլոր հարցերը հենց գլխավոր տնօրենին և ստանալ պատասխաններ։ Անկախ հարցի դրական կամ բացասական լուծումից, բոլոր հարցերը ստանում են պատասխաններ։

– Նաև կազմակերպվում են այլ միջոցառումներ, որոնք ուղղված են թիմային ոգու բարձրացմանը, Ակումբային ֆորմատով կազմակերպում են թեմատիկ կինոդիտումներ և քննարկումներ տարբեր թեմաների շուրջ և փորձի փոխանակում։

– Մենք կազմակերպում ենք միջոցառումներ ոչ միայն աշխատակիցների, այլ նաև նրանց երեխաների համար։ Որպեսզի մեր աշխատակիցների երեխաները ավելի մոտիկից ծանոթանան իրենց ծնողների աշխատանքին և մեր ընկերությանը՝ յուրաքանչյուր ամսվա վերջին ուրբաթը հայտարարվում է բաց դռների օր մեր երեխաների համար։

Սոֆթ թե՞ մասնագիտական հմտություններ․ որի՞ն եք տալիս նախապատվությունը՝ նոր աշխատակից ընտրելիս։ 

– Դա կախված է այս կամ այն պաշտոնի համար նախատեսված պարտադիր որակավորումների և գիտելիքների պահանջներից։ Մենք ունենք Կորպորատիվ Beeline Համալսարան, որտեղ իրականացվում է աշխատակիցների ուսուցումն ու զարգացումը ինչպես սոֆթ, այնպես էլ մասնագիտական ուղղություններով։

Ուսուցումն անցկացվում է մեր թրեյներների կողմից, անհրաժեշտության դեպքում, ներգրավվում են արտաքին թրեյներներ՝ լոկալ և միջազգային շուկայից։

Աշխատակիցների work life-ը բարելավելուն և աշխատանքի նկատմամբ նվիրվածության աճին ուղղված հատուկ գործընթացներ նույնպես իրականցվում են Beeline Հայաստանում։

– Ընդհանուր առմամբ, կարող ենք ասել, որ մոտիվացիայի և աշխատանքի նվիրվածության չափանիշը յուրաքանչյուր մարդու համար տարբեր է՝ կախված տարիքից, նախասիրություններից և այլն։  Որպեսզի հաշվի առնենք յուրաքանչյուր աշխատակցի նախասիրությունները, ամեն տարի մենք իրականացնում ենք աշխատակիցների ներգրավվածության հարցում։ Մեզ համար այս հարցումը պրակտիկ գործիք է, որը օգնում է աշխատակիցներին կիսվել Ընկերությունում աշխատելու վերաբերյալ իրենց կարծիքներով և առաջարկներ ներկայացնել Ընկերությունը որպես գործատու ավելի լավը դարձնելու համար:

– Որպես գործատու այս հետազոտությունը մեզ թույլ է տալիս հասկանալ թե ինչպես է տարեց տարի փոփոխվում աշխատակիցների վերաբերմունքը աշխատանքի հանդեպ, ներդնել կոնկրետ գործընթացներ, որոնք ուղղված են կորպորատիվ մշակույթի բարելավմանը և մոտիվացիայի ու ներգրավվածության բարձրացմանը։

Զրույցը շարունակեցինք Վաճառքի և սպասարկման գրասենյակների կենտրոն ուղղության ղեկավար Անահիտ Մեղրոյանի հետ․ ինչպիսի՞ն է զգացողությունը աշխատել խոշոր ընկերությունում ի տարբերություն փոքր և սկսնակ թիմ ունեցող ընկերությունների։  

– Չեմ վախենա համեմատել մեծ ընկերությունում աշխատանքը մեծ քաղաքում ապրելու հետ։ Այսինքն, դու քեզ զգում ես մեծ հասարակության, բազմամշակույթ օրգանիզմի մի մաս, շփվում ես տարատեսակ մարդկանց հետ տարբեր ստորաբաժանումների ներսում, համագործակցում ես, ինչ-որ հարցեր ես քննարկում, լուծումներ տալիս։

Անահիտից տեղեկացանք նաև՝ ինչն է ապահովում աշխատակիցների բարձր մոտիվացիան։

– Ինձ համար մոտիվացնող է ազատության զգացողությունը։ Չկան պատեր, ստորաբաժանումներն առանձնացնող պատնեշներ ու շփման արգելքներ, դա արդեն իսկ բոլոր աշխատակիցների համար մեծ մոտիվացիա է։ Յուրաքանչյուր աշխատակից այստեղ կարող է ցանկացած գաղափարով կիսվել, նախագիծ առաջարկել և քննարկել ընդհուպ նաև գլխավոր տնօրենի հետ:

– Օրինակ, վերջերս ներգրավվեցի թիմերից մեկում, որն աշխատում էր Аgile-ի Scrum մեթոդով։ Եվ այդ նույն ժամանակ Մոսկվայից կոնֆերանսի մասնակցության առաջարկ ստացա։ Սկզբից վախենում էի՝ ինչպես պետք է ներկայացնեմ տնօրենին։ Այնուհետև, պատահականորեն հանդիպեցի վերելակում ու պատմեցի, որ հրավեր եմ ստացել և հնարավոր է Մոսկվա գնամ։ Բնականաբար, ինքը ողջունեց այդ քայլը և ընդմիջումից հետո ավելի մանրամասն քննարկեցինք կոնֆերանսին մասնակցությունը։ Դա արդեն իսկ շատ ոգևորիչ է, երբ շփվում ես պարզ, թափանցիկ և ազատ։

Ես, իհարկե, մասնակցեցի այդ կոնֆերանսին, որը շատ օգտակար էր իմ աշխատանքի համար։

6

Կորպորատիվ պատասխանատվության (CR) ծրագրի շրջանակներում իրականացված միջոցառումների մասին խոսեցինք Կորպորատիվ պատասխանատվության մենեջեր Անժելա Ալեքյանի հետ։ 

– Կորպորատիվ պատասխանատվության ծրագրի շրջանակներում Beeline- ի ամբողջ խումբն ունի մեկ մոտեցում․ աշխատում ենք երկու ուղղություններով՝ թվային գրագիտության և “Make your Mark” ռազմավարության, որն իրենից ենթադրում է ստարտափների աջակցություն։

– Այսօրվա դրությամբ թվային տեխնոլոգիաները շատ կարևոր են աշխատաշուկայում մրցունակ լինելու համար ու այդ իսկ պատճառով սովորեցնում ենք երեխաներին օգտվել թվային տեխնոլոգիաներից։

– Իսկ “Make your Mark”-ի շրջանակներում աջակցում ենք ստարտափներին՝ գիտելիքներ տրամադրելով իրենց բիզնեսը զարգացնելու համար։ Եթե, օրինակ, դուք ունեք թիմ ու լավ գաղափար, բայց չեք պատկերացնում՝ ինչպես կազմակերպել մարքեթինգը և բիզնեսը, ապա մենք ձեզ կսովորեցնենք։

Հաջողության պատմությունների մասին խոսելիս Անժելան մեծ ոգևորությամբ պատմեց իրենց հպարտության՝ Beeline Startup Incubator-ի մասին, որտեղ ընտրում են ստարտափներին և կրթություն տալիս։ 

– Մենք համագործակցում ենք Հայաստանի բիզնես հրեշտակների ցանցի հետ (BANA) ու այս տարի արդեն ունենք չորս ներդրում և ևս երկու ներդրում ակնկալվում է մինչև տարեվերջ։ Այսինքն, կարող եմ ասել, որ մեր ստարտափները շատ մեծ հաջողություն են ունենում․ բիզնես են ստեղծում Հայաստանում, դուրս են գալիս թե՛ տեղական, և թե՛ միջազգային շուկա։

Էլենը, ով բավականին վերջերս էր ընդունվել Beeline Հայաստան աշխատանքի և զբաղեցնում էր Ինտերնետ հեռուստատեսության արտադրանքների զարգացման մենեջերի պաշտոնը, կիսվեց Beeline-ի մասին իր առաջին տպավորություններով։

– Մինչև Beeline-ում աշխատելը առաջին հայացքից այս քարե շենքը բոլորովին այլ տպավորություն էր թողնում՝ հին «սովետական» 🙂 Իսկ երբ-որ մտա շենք ու սկսեցի հարկերով բարձրանալ, ամեն հարկն ինձ համար առանձին բացահայտում և զարմանք էր իր աշխատակիցներով հանդերձ։ Open space, հետաքրքիր միջավայր, տարբեր հարմարություններ թե առանձին, և թե թիմային աշխատանքի համար։ Ինձ մոտ այն տպավորությունն էր, որ ես Googlе եմ ընդունվել աշխատանքի։

Էլենը կառավարման ոլորտի մասնագետ է, և մեզ հետաքրքիր էր՝ ինչո՞վ էր պայմանավորված նրա որոշումը Beeline-ին որպես գործատու ընտրելուն։

– Դեռևս ուսանող էի, երբ փնտրում էի աշխատանք ու նպատակ ունեի սկսել ինթերնշիփի ծրագրերից։ Բազմիցս լսել էի Beeline-ի ստաժավորման ծրագրի մասին, որ շատ գործնական հմտություններ ես ձեռք բերում և լավագույններին ընտրում են որպես աշխատակից։  Եվ այդպես որոշեցի դիմել։

Ֆինանսական պլանավորման և վերլուծության ծառայության բաժնից Գործառնական ծախսերի պլանավորման և վերահսկման մենեջեր Գեորգի Աղաջանյանը նշեց այն արտոնությունները, որոնցից օգտվում է Beeline-ի յուրաքանչյուր աշխատակից՝ 

– Ընկերությունն ամեն ինչ անում է, որպեսզի ստեղծի ընկերական միջավայր, հարմար պայմաններ աշխատակիցների առաջ գնալու և զարգանալու համար։

Կարող ենք՝

– աշխատել BeeFree համակարգով, այսինքն՝ տանից,

– օգտվել Beeline-ի ծառայությունների հատուկ զեղչերից,

– oգտվել անվճար հեռախոսակապից,

– ձեռք բերել հատուկ փաթեթներ,

– օգտվել բժշկական ապահովագրությունից։

Beeline-ում կարելի է ասել տեխնոլոգիական նորույթների տեղատարափ է և այդքան էլ հեշտ չէ շատ հակիրճ խոսել այս մասին։ Բայց մենք փորձեցինք ճշտել, թե ո՞րն է եղել ամենավերջին տեխնոլոգիական նորույթը։

Ի դեպ, այս հարցում մեզ օգնեց Տեխնիկական բլոկի, Պլանավորման և նախագծերի իրականացման ծառայության, հաշվառման և անձնագրավորման բաժնի պետ Արման Դեմիրխանյանը, ով նաև իրականացնում է Beeline Հայաստանի «Կապի թանգարանում» ընկերության հյուրերի համար, մյուս աշխատակիցների հետ միասին, պատմական շրջայց։ 

– Մեր ընկերությունն անընդհատ զարգանում է և հիմնադրման օրվանից տարբեր տեխնոլոգիաներ է կիրառել։ Ամենավերջին նորույթներից են FTTB և VDSL ցանցերի կառուցումն է, որը թույլ տվեց մինչև 100 Մբ/վ արագությամբ ինտերնետ տրամադրել մեր օգտատերերին։ Դա 10 անգամ ավելի արագ է, քան տաս տարի առաջ։

Արմանը նաև պատմեց՝ որն է իր աշխատանքի ամենահետաքրքիր և միևնույն ժամանակ ամենադժվար ու մարտահրավերներով լի մասը։ 

– Շատ դժվարություններ կան, իսկ հետաքրքիրը պլանավորումն է։ Երբ դեռևս որևէ տեխնոլոգիա չկա ու պետք է այնպես պլանավորել ռիսկերը, նյութերի ապահովումը, ժամանակացույցը, բոլոր գործողությունները և անհրաժեշտ մարդկային ռեսուրսները, որպեսզի նախագծի իրականացման ժամանակ որևէ խնդիրներ չառաջանան։

Մենք նույնպես հնարավորություն ունեցանք շրջելու «Կապի թանգարանում», ծանոթացանք զանգ կատարելու համակարգին հին կամուտատորի միջոցով և «Առաջին SMS-ի» պատմությանը։ 

Կապի բնագավառում առաջին կոմերցիոն զանգը և SMS-ը եղել են 1997 թվականին Կապի նախարարի և իր տեղակալի միջև։ Այդ ընթացքում կապի նախարարը SMS-ում ասել է հետևյալ խոսքերը՝ «Շախմատը շարի, գալիս եմ» 🙂

Շրջայցի ժամանակ տեղեկացանք նաև, որ Հայաստանում հեռախոսաֆիկացումը սկսվել է 1913թ․-ից։

Մեր զրույցն ամփոփեցինք Նարինե Շաքարյանի հետ, ով Beeline Հայաստանում զբաղեցնում է Հաճախորդների սպասարկման ծառայության Կոնտակտային կենտրոնի ղեկավարի պաշտոնը։ Պատահական չէր, որ Նարինեի հետ խոսեցինք մասնագիտական զարգացման հնարավորությունների և հաճախորդների մասին, քանի որ Beeline Հայաստանում, ինչպես արդեն նշվեց, հաճախորդների սպասարկման բաժնի աշխատակիցները հատուկ դասընթաց են անցնում մինչև հիմնական աշխատանքի անցնելը։ 

– Ընկերության բոլոր աշխատակիցներն ունեն հնարավորություն զարգանալու և աճելու։ Շարունակական սկզբունքով անցկացվում են զանազան մաստերկլասեր և դասընթացներ։ Նաև աշխատակիցների համար ստեղծված է մի հարթակ, որտեղ յուրաքանչյուր աշխատակից կարող է ընտրել իրեն հետաքրքրող թեմա և այդ թեմայով անցնել թրեյնինգներ և սեմինարներ։ Այսպիսով, աշխատակիցն ունի իրական հնարավորություն աճելու և ինքնազարգանալու։ Նաև ընկերության կողմից պարբերաբար անցկացվում են մասնագիտական վերապատրաստման դասընթացներ։

– Բոլոր աշխատակիցները ցանկության դեպքում կարող են մասնակցել ընկերության տարբեր ստորաբաժանումներում հայտարարված թափուր հաստիքների մրցույթներին։

Beeline-ում հաճախորդն ամենակարևորն է։ Ընկերության բոլոր ջանքերն ուղղված են հաճախորդի համար ստեղծելու ավելի հարմարավետ թվային պրոդուկտներ, ծառայություններ, փաթեթներ,- զրույցի ժամանակ հավելեց Նարինեն։

divider

BEELINE ՀԱՅԱՍՏԱՆԻ ԿՈՂՄԻՑ ԱՇԽԱՏԱԿԻՑՆԵՐԻՆ ՏՐԱՄԱԴՐՎՈՂ ԱՐՏՈՆՈՒԹՅՈՒՆՆԵՐ

Յուրաքանչյուր աշխատակից ապահովագրված է 4 տեսակի ապահովագրությամբ՝ Առողջության ապահովագրություն, Կրիտիկական հիվանդությունների, Դժբախտ պատահարի և Արտասահմանյան ճամփորդության ընթացքում ապահովագրություն։

Ընդ որում` ապահովագրական ծածկույթը բավականին լայն է և ընդգրկում է հաճախակի հանդիպող շատ հիվանդություններ:

Ընկերությունում գործում է նաև սոց․ փաթեթ, որն իր մեջ ներառում է սոցիալական օգնություն, ինչպես նաև վճարներ երեխայի ծննդյան կամ հարազատի մահվան կապակցությամբ։ Կան մի շարք փոխհատուցումներ, որոնք վճարվում են օրենքով սահմանված նվազագույն շեմից բարձր չափով։

Լինելով ժամանակակից ընկերություն կառուցված է նաև ինքնակրթման մշակույթ։ Beeline Հայաստանն ունի SLL (Self Learning Lab), որտեղ յուրաքանչյուր աշխատակցի համար 24/7 ռեժիմով հասանելի են ուսուցողական համաշխարհային օնլայն հարթակներ, ինչպիսիք են՝ Coursera, Linda, Alpina Publisher օնլայն գրադարանը և այլն։

Նոր open-space ֆորմատով գրասենյակ տեղափոխվելուց հետո ներդրվել է BeeFree աշխատանքային ռեժիմը, որը թույլ է տալիս աշխատակիցներին աշխատել ճկուն գրաֆիկով և հեռավորության վրա։ Դրա համար միայն անհրաժեշտ է աշխատանքի հանդեպ բարձր պատասխանատվություն թե ղեկավարի, թե աշխատակցի կողմից և ժամանակի ճիշտ կառավարում։

Իհարկե, գործի բնույթից ելնելով՝ կան աշխատակիցներ, որոնք իրենց պարտականությունները կատարելու համար պարտադիր պետք է գտնվեն գրասենյակում կամ աշխատավայրում, օրինակ ՎՍԳ մասնագետները, Հաճախորդների սպասարկման ծառայության աշխատակիցները, կամ ցանցը սպասարկող տեխնիկական մասնագետները։

Եվ, ամենակարևորը, Beeline Հայաստանում վստահում են միմյանց՝ համագործակցելով ազատ, բաց ու ազնիվ:

BEELINE ՀԱՅԱՍՏԱՆԸ ԼՈՒՍԱՆԿԱՐՆԵՐՈՒՄ

Ամփոփենք ։)

Beeline Հայաստանը մեր երկրում պահպանում և ամրացնում է ի սկզբանե ձևավորված արժեքներն ու գաղափարները՝ էթիկական նորմերի չափանիշներով շփում աշխատակիցների, գործընկերների, հաճախորդների հետ, արդարություն, նվիրվածություն, պարզություն, ակտիվորեն օգտագործում է մեծ ռեսուրսներ թե իր աշխատակիցների շարունակական զարգացման, ուսանողների գործնական հմտությունների ձեռքբերման և թե պրոդուկտների ամենաբարձր միջազգային նորմերին համապատասխանելիությունն ապահովելու համար։ Այստեղ յուրաքանչյուր գաղափար արժեք է և հատուկ սոցիալական ծրագրեր են իրականացվում նաև երեխաների թվային գրագիտության ստեղծման և ստարտափ գաղափարների իրագործման համար։

Staff.am-ում մենք անչափ կարևորում ենք Beeline Հայաստանի հետ մեր գործակցությունը, որի արդյունքում շատուշատ իրենց գործում հմուտ մասնագետներ միանում են ընկերության մեծ և հզոր թիմին։ 

Powered by staff.am.