staff.am-ի անունից սիրով շնորհավորում ենք մայրության և գեղեցկության տոնը ու հատուկ թողարկում նվիրում այս առթիվ։ ԻՆչպես գիտեք, բոլորովին վեջերս կայացավ staff.am «Կոչումից այն կողմ» նախագծի անդրանիկ թողարկումը, որը նվիրված էր կանանց միամսյակի տոնին։ Այդ օրը մենք պատիվ ունեինք մեկ հարկի տակ համախմբելու անվանի կանանց, ովքեր կյանքի տպավորիչ ճանապարհ են անցնում՝ յուրաքանչյուր փուլում կերտելով նոր կոչումներ։
Հնագետ, արտիստ, բժիշկ, գինեգործ, հիմնադիր-ղեկավար, գնդապետ, օդաչու, ճարտարագետ, պրոֆեսոր… և, իհարկե, Մայր։
Մեկ վայրում այսքա՜ն բացառիկ տաղանդներով ու կոչումներով հավաքված մեր հյուր-խոսնակները կիսվեցին իրենց կոչումներին հասնելու ամենահետաքրքիր պատմություններով։
Հատուկ շնորհակալություն ենք ցանկանում հայտնել Synopsys Armenia-ին: Քանի որ ընկերությունում Կանանց ներուժի զարգացումը կարևորվում է և ընկերությունն իրականացնում է բազմաթիվ ծրագրեր ուղղված բարձր տեխնոլոգիաների ոլորտում կանանց ներուժի ներգրավմանը և մասնակցության խթանմանը, staff.am «Կոչումից այն կողմ» նախագծի առաջին թողարկումն իրականացվեց մեր գործընկեր Synopsys Armenia գլխավոր հովանավորությամբ։
Թողարկումն ամբողջությամբ հասանելի է staff.am YouTube ալիքում՝ Մաս 1 և Մաս 2 բաժիններով, իսկ ստորև կկիսվենք մեր խոսնակներից փոքրիկ մեջբերումներով:
ՄԱՍ 1
ՄԱՍ 2
ԼԱՐԻՍԱ ՀՈՎՀԱՆՆԻՍՅԱՆ
«Դասավանդի՛ր, Հայաստան»
Հիմնադիր և Գործադիր տնօրեն
«…Իմ կյանքը փոխվեց, իմ առաջնահերթությունները փոխվեցին, ես սկսեցի հասկանալ, թե ինչքան կարևոր է անել ինչ-որ բան ուրիշ մարդու համար։ Նույնիսկ, եթե դա մեկ երեխա է, ում կյանքը դու մի քիչ լավացնում ես, մի քիչ փոխում ես, դա արդեն ամեն ինչ արժե։
Եվ ես հասկացա, որ հաստատ հետ չեմ կարող գնալ բիզնեսի ոլորտ, պետք է զբաղվեմ սոցիալական գործունեությամբ։ Մայրս հայ է, հայրս՝ ոչ։ Հայրս իռլանդացի է, մայրս միշտ ասում էր… «Շատ լավ է, որ այս ամեն ինչն անում ես, բայց ավելի լավ կլինի, որ այս ամենն անես Հայաստանում»։ Եվ Հայաստանի ճանապարհս սկսվեց 2012թ.-ին…»։
ԱՆԻ ԱԲՐԱՀԱՄՅԱՆ
Synopsys Armenia Ավագ ճարտարագետ
«Երբեմն լինում են դեպքեր, երբ դու չես ընտրում կոչումդ, այլ անում ես այն, ինչ պետք է անես, դու չես կարող այլ կերպ վարվել։ Ինչպես ընտրվեց իմ նախնական մասնագիտությունը։ 15 տարեկանում ես բացարձակ չէի հասկանում մարդկանց, բայց շատ լավ հասկանում էի մաթեմատիկա, ամեն ինչ պարզ էր, կանխատեսելի էր, ռացիոնալ էր, տրամաբանական էր, այնտեղ ես զգում էի, ինչպես ձուկը ջրում։ Հետևաբար ընտրությունը դժվար չէր։ Երկրորդ մասնագիտությունս՝ կառավարման հոգեբանություն, էլի ընտրեցի նույն պատճառով, կրկին մարդկանց չէի հասկանում…»։
ԱՐՄԻՆԵ ՀԱՅՐԱՊԵՏՅԱՆ
Ճգնաժամային Կառավարման պետական ակադեմիայի պրոռեկտոր, փրկարար ծառայության գնդապետ
«…Փորձեք ինքներդ լուծել այդ քառուղիների և բազմաթիվ ոլորանների հանելուկը, թե ինչպես կարող է հնագիտության մասնագիտությունը ինչ-որ մի հարցում մարդուն հասցնել փրկարար ծառայության մեջ։
Ես 9 տարվա ռազմական ոլորտում, Պաշտպանության նախարարությունում ծառայության պատիվ ունեմ։ Իհարկե, դրանք ոչ միշտ է, որ դրական ճանապարհներ են, երբեմն ցավերի ճանապարհներ են, որոնք մեզ հասցնում են այդտեղ։ Բայց ոչինչ պատահական ու հենց այնպես չի լինում։
Ես այս պահին և այն ժամանակ, երբ անցա ծառայության, գիտակցեցի, որ առաջին իսկ պահից, երբ որ ես ծունկ չոքեցի իմ երկրի, հայրենի աշխարհի մշակույթը, պատմությունը ուսումնասիրելու և վրձինը առա ձեռքս այդ անհայտը բացահայտելու համար ոչ միայն բավարարում էի իմ գիտական կամ գիտելիքի անհագուրդ ծարավը և ռեբուսներ լուծելու իմ սիրելի զբաղմունքը, այլև ծառայություն էի մատուցում իմ երկրին ու մշակույթին…»:
ԴԻԱՆԱ ՍԱՀԱԿՅԱՆ
ՄԻԲՍ ԲԿ Բժիշկ-ռադիոլոգ, ՄՌՏ բաժանմունքի ղեկավար
«Ուղիս սկսվեց հենց մանկուց, ինչպես նշեցինք, մայրիկները շատ մեծ դեր են ունեցել մեր բոլորի զարգացման մեջ։ Իմ մայրը բժիշկ է, իսկ հայրս՝ օդաչու։ Ի վերջո ընտրեցի բժշկությունը, բայց 8-րդ դասարանում շատ խենթանում էի և շատ մեծ ցանկություն ունեի դառնալու ուղղաթիռի օդաչու…»։
«Առհասարակ, երբ որ վերևից նայում ես աշխարհին, հասկանում ես՝ ինչքան փոքր են մեր առօրյա խնդիրները, և հասկանում ես, որ կյանքը հենց հիմա է, հենց այս պահին, պետք է ապրել լիովին, որովհետև չգիտես վաղը ինչ է լինելու, պետք է ապրել երջանիկ, պետք է կառուցել, պետք է լինել ավելի լավը, ամեն օր ավելի լավը…»:
ՄԱՐԻԱՄ ՍԱՂԱԹԵԼՅԱՆ
In Vino Հիմնադիր-տնօրեն
«…հիմա հասկանում եմ՝ ինչքան ճիշտ քայլ էր ծնողներիս կողմից վերադառնալ մեր երկիր, ու հիմա բացահայտում եմ ինձ լրիվ ուրիշ կողմից։
Իմ կյանքում շատ մեծ դեր են ունեցել նաև շատ ուժեղ տղամարդիկ, ովքեր իմ մոտ ստեղծել են ինչ-որ էտալոն, թե տղամարդն ինչպիսին պետք է լինի։
Իմ գործընկեր Վահե Բալոլյանը մի օր ինձ և իմ կնքահոր տղային՝ Ալեքսանդրին, ասեց. «ուզում եմ մի հատ պրոյեկտ սկսենք գինու հետ կապված (ես էլ այդ ժամանակ 19 տարեկան էի), պատրա՞ստ եք ձեր անձնական կյանքը զոհաբերել, այսպիսի պրոյեկտ սկսենք»։
Ու գաղափարը գինիների առաջին մասնագիտացված խանութ և բարը Երևանում ստեղծելն էր։
ԼԱԼԱ ՄՆԱՑԱԿԱՆՅԱՆ
ՀՀ վաստակավոր արտիստ, պրոֆեսոր
«…Ես չգիտեմ՝ ինչպես եմ դարձել դերասանուհի, ես ծնվել եմ այդ մթնոլորտում։ Մայրս եղել է դերասանուհի, հետո թողել է, որովհետև բալիկներ պետք է մեծացներ։ … Ու երևի մայրիկիս արցունքները եղան, որ ես ինքս ինձ որոշեցի, որ ես իմ մասնագիտությունը երբեք չեմ թողնի։ Որովհետև ինչ ընտրություն էլ կատարենք մենք, ընտանիք, թե մասնագիտություն, միշտ մենք գտնում ենք, որ ինչ-որ տեղ թերանում ենք։ Մենք մեզ մեղավոր ենք զգում մեր ընտանիքի առաջ, ասում ենք՝ մենք չարեցինք այն, ինչ մեզ պետք էր։ Ամեն դեպքում, ես որոշում կայացրեցի իմ մեջ, որ ինչ էլ անեմ, մյուս թերանալու հարցում ես ինձ չեմ մեղադրելու…»։
ԼՈՒԻԶԱ ԱՎԵՏԻՍՅԱՆ
Staff.am և Hirebee համահիմնադիր
staff.am «Կոչումից այն կողմ» նախագծի այս թողարկումը հրաշալի կերպով ու բարձր պրոֆեսիոնալիզմով վարեց staff.am և Hirebee համահիմնադիր Լուիզա Ավետիսյանը, ինչի շնորհիվ բոլորս կարողացանք կարճ ժամանակում ոգեշնչվել կոչումից անդին պատմություններով։
«ԿՈՉՈՒՄԻՑ ԱՅՆ ԿՈՂՄ», VOL. 1 ԹՈՂԱՐԿՈՒՄԸ ԼՈՒՍԱՆԿԱՐՆԵՐՈՒՄ
