Մեր սիրելի գործընկեր Աթենքին հյուր գնալը դարձել է staffmedia.am-ի թիմի սիրելի ավանդույթներից։ Աթենքի նոր, ընդարձակ ու հարմարավետ գրասենյակը չէր կարող անմասն մնալ staffmedia.am-ի «ՀՀ լավագույն գրասենյակներ» նախագծին, քանի որ, բացի հետաքրքիր լուծումներից, այստեղ ամեն ինչ արված է աշխատակիցների հարմարավետությունն ապահովելու և աշխատանքի գեղեցիկ ու տրամադրող միջավայր ստեղծելու համար:
Չչարաշահելով ձեր համբերությունը հրավիրում ենք մեզ հետ շրջելու Աթենքի գրասենյակում և մասը կազմելու Աթենքային ջերմագույն մթնոլորտի։ Մինչ սպասում ենք վերելակին, հիշեցնենք, որ Աթենքի մասին մեր նախորդ նյութերը կգտնեք այստեղ։
Վերելակի դռները բացվում են և մենք հայտնվում ենք երրորդ հարկում, որտեղ էլ մեզ ժպիտով դիմավորում է Աթենք ընկերության հաղորդակցման մասնագետ Լենա Աբրահամյանը։
«Հիմա ունենք ավելի ընդարձակ ու լուսավոր աշխատասենյակներ՝ թափանցիկ պատերով, իրար ավելի հաճախ տեսնելու, հանդիպելու, բարևելու, ինչ-որ հարցեր քննարկելու հնարավորությամբ։ Իսկ սենյակներից ուղիղ ելքը դեպի բաց պատշգամբ սուրճի ընդմիջումների, բացօթյա բրեյնսթորմինգների ու ուղղակի գործընկերների հետ ջերմ զրույցների յուրահատուկ մշակույթ է տարածել մեր մեջ: Այս ամենը չէր կարող դրական ազդեցություն չունենալ թե՛ աշխատանքային հարաբերությունների, թե՛ աշխատանքի արդյունավետության վրա։ Մենք միանգամից զգացինք այդ փոփոխությունը»։
Լենա Աբրահամյան
Լենայի խոսքով նոր գրասենյակ տեղափոխվելու որոշումը պայմանավորված է երկու կարևոր գործոնով՝ թիմի ընդլայնում և Աթենքցիների աշխատանքային հարմարավետության բարելավման ցանկություն։
Աթենքի թիմն այս տարվա հունվարից է տեղափոխվել նոր գրասենյակ, բայց այս մի քանի ամսվա ընթացքում հասցրել է գրասենյակի տարածքում տարբեր հետաքրքիր միջոցառումներ կազմակերպել:
Մեր թիմը երբեք բաց չի թողել միասին ակտիվ ժամանց կազմակերպելու հնարավորությունը, և պատկերացրեք աթենքցիներիս ոգևորությունը, երբ իմացանք, որ նոր գրասենյակում մեզ սպասում է մեծ ու ընդարձակ պատշգամբ: Կարճ ժամանակում ձևավորվեց ուրբաթ երեկոների մշակույթը: Գերկենսուրախ թիմ, բաց պատշգամբ, երաժշտություն, Աթենքի համեղագույն նրբերշիկներով հոթդոգեր․․․Էլ ի՞նչ է պետք ուրբաթ երեկոները գործընկերների հետ ֆանտաստիկ անցկացնելու և դրական լիցքերով աշխատանքային շաբաթն ամփոփելու համար:
Լենա Աբրահամյան
Գրասենյակի նախապատմությունն իմացանք, այժմ իսկական ժամանակն է շրջելու ու բացահայտելու բոլոր հետաքրքիր անկյունները։
Աթենքը տեղական շուկայում ոլորտի բացարձակ առաջատարն է և իր արտադրանքը ներկայացնում է Հայաստանի ողջ տարածքում: Ավելին, որպես մասնագիտացված ֆիրմային խանութների ցանց՝ Հայաստանում ամենամեծն է և ունի 28 ֆիրմային խանութ: Հենց այս լայն ծածկույթն է խորհրդանշում երրորդ հարկի քարտեզը: Առաջիկայում կան հավակնոտ նպատակներ էլ ավելի ընդլայնելու իրենց աշխարհագրությունը:
Երրորդ հարկի հետաքրքիր սենյակների ուսումնասիրությունը սկսենք «հանդիպումների սենյակ»-ից, որտեղ աթենքցիները փոխանակվում են գաղափարներով, սահմանում նպատակներ ու գծում դրանց հասնելու ուղիները:
Սա նաև այն վայրն է, որտեղ թիմը քննարկում է ընթացիկ նախագծերի արդյունքները, պլանավորում նոր նախագծեր և մշակում նորարարական լուծումներ:
Մեր այցը շարունակենք չորրորդ՝ «ամենահագեցած» հարկում, որտեղ մեզ սպասում են «սիրուն սենյակ»-ը, «Idea lab»-ը, կորպորատիվ դասընթացների համար նախատեսված սենյակը և այլ հետաքրքիր անկյուններ։
Առաջինը, ինչն աչքի է ընկնում ներս մտնելու պահին՝ Աթենքի թիմային լուսանկարներով զարդարված պատն է, որի վրա, թեպետ, բառեր չկան, բայց այն պակաս խոսուն չէ։
Սեփական փորձից կարող ենք փաստել, որ գրասենյակի այս հատվածում կարելի է երկար կանգ առնել ու անվերջ ուսումնասիրել այն հետաքրքիր, հագեցած ու արկածներով լի ճանապարհը, որն Աթենքի մարդիկ անցել են միասին՝ ստեղծելով և անմահացնելով այսչափ արժեքավոր հիշողություններ։
Յուրաքանչյուր Աթենքցի, ում հասցրել ենք հանդիպել, փայլող աչքերով է պատմում ընկերության և իր աշխատանքի մասին։
Այս լուսանկարներում տեսնում եք Աթենքի «սիրուն սենյակ»-ը, որի հետաքրքրիր պատմությամբ ևս Լենան մեզ հետ կիսվեց։
Մեր նախորդ գրասենյակում ունեինք «Սիրուն սենյակ»: Անունը ինքնաբուխ ենք որոշել․ երբ նոր էինք կահավորել սենյակը, ամեն անգամ սենյակի մասին խոսելիս ասում էինք «էն սիրուն սենյակը», հետո հասկացանք, որ մեր «սիրուն»-ին ավելի լավ անուն գտնել չենք կարող: Կարճ ժամանակում «սիրուն»-ը դարձավ բոլորիս սիրելի վայրը քննարկումների, ծննդյան տոներ նշելու և այլ փոքրիկ միջոցառումների համար: Իսկ նոր գրասենյակն առանց «սիրուն»-ի մենք թողնել չէինք կարող:
Լենա Աբրահամյան
«Սիրուն սենյակ»-ի անմիջապես կողքին գտնվում է «Idea lab»-ը՝ գեղեցիկ, լուսավոր ու շատ տրամադրող սենյակ, որն ապահովում է թիմային բրեյնսթորմինգների և, երբեմն նաև, աշխատանքի հարցազրույցների ավելի անկաշկանդ և անմիջական մթնոլորտը։
Աշխատակիցների շարունակական ինքնակատարելագործումը և մասնագիտական զարգացումն Աթենքի առաջնահերթություններից է։
Նոր գրասենյակում կորպորատիվ դասընթացների համար նախատեսված հատուկ սենյակն ապահովված է բոլոր հարմարություններով, որպեսզի Աթենքի մարդկանց համար կազմակերպվող դասընթացներն առավելագույնս արդյունավետ լինեն։
Այստեղ շարունակական ուսուցումը և գիտելիքահեն զարգացումը կարևորագույն արժեքներ են։
Հիմա հերթը վերջին՝ հինգերորդ հարկինն է, որը, կարծես, ամփոփում է ամբողջ գրասենյակի տեսլականն ու արժեքները՝ ապահովելով ամբողջական պատկերը Աթենքի թիմի և մշակույթի մասին։
Սկսենք ամենատպավորիչ անկյունից՝ մեկ ամբողջ պատ ընկերության տասնամյակների պատմության ամենանշանակալի ձեռքբերումների մասին։ Ի դեպ, ինչպես կարող եք տեսնել լուսանկարներում, 2024 թ.-ն Աթենքի համար նշանավորվում է որպես «նոր շունչ» բերելու տարի։
Ամենահետաքրքիրն էլ թողել ենք վերջում՝ Աթենքի մարդկանց վերալիցքավորվելու օրական չափաբաժինն ապահովող այդքան սիրելի պատշգամբը:
Ի դեպ, երկրորդ լուսանկարից փորձեք կռահել, թե ընկերության որ թիմն է պատկերված։)
Իսկ սա այն սենյակն է, որտեղ դիտարկվում են Աթենքի թեկնածուների CV-ները, նշանակվում հարցազրույցներ և, առհասարակ, կազմակերպվում են հավաքագրման և HR գործընթաները։
Հետևեք Աթենքի կարիերայի էջին staff.am-ում, որպեսզի բաց չթողնեք ընկերության թիմին միանալու հնարավորությանը։ Չէ՞ որ, հիմա էլ, արդեն գիտեք, թե ուր է հասնելու ձեր դիմումը։
Եթե փորձենք մեկ նախադասությամբ ամփոփել մեր այցը, ապա, միանշանակ, կասենք, որ Աթենքի գրասենյակն առանձնանում է հենց Աթենքի մարդկանցով։ Բոլորովին զարմանալի չէ, որ անգամ staffmedia.am-ի «ՀՀ լավագույն գրասենյակներ» շարքում, որի ձևաչափը ենթադրում է կենտրոնացում հենց գրասենյակի վրա, միևնույն է, Աթենքի գրասենյակի լուսաբանումը ևս մարդակենտրոն ստացվեց։
