Շատ մարդ, շատ գործ․ ինչպես ապահովել կամավորների լավագույն փորձը (Volunteer experience)

268

Սեպտեմբերյան մեր առօրյան իրական աշուն էր․ սկզբից լուսաշող ու պայծառ եղանակ էր, բոլորս չնայած համավարակին՝ վայելում էինք մեր ամեն օրվա արևի բաժինը, բայց եղանակը կտրուկ փոխվեց ու խոժոռվեց՝ պատվելով հրետանիներից արձակված ծխով (սահմանում՝ իրական, իսկ թիկունքում՝ անիրական թվացող ու վիրտուալ)։ Այնուհետև սկսեց հորդառատ անձրև տեղալ ու քչերս էինք, իհարկե, պատրաստ այդ անձրևին, բայց կային մարդիկ, ովքեր ունեին անձրևանոցներ ձեռքի տակ կամ շատ արագ ինչ-որ տեղից այն վերցրեցին ու անմիջապես գործի անցան․ մեկ անձրևանոցի տակ հավաքելով մեծաթիվ մարդկանց։

Այս այն մարդիկ էին ու կազմակերպությունները, որոնք միանգամից գտան այն թիրախային ուղղությունները, որոնց օգնել ու աջակցել է պետք, բայց նաև հզորացնել ու ամուր պատ է պետք սարքել։ Իսկ այդտեղ յուրաքանչյուրս ունենք մեր գործը՝ որպես խմբագիր, լրագրող, թարգմանիչ, սոց․ մեդիա մասնագետ, ուսուցիչ թե զինվոր։

Այլ կերպ, հարկավոր է շատ մարդ շատ գործ անելու համար։ Իսկ ինչպես ճիշտ ու արդյունավետ կազմակերպել գործը՝ հավաքագրելով կամավորների։

StaffMedia-ում առանձնացրել ենք մի քանի խորհուրդ կամավորների հավաքագրումը համակարգված և արդյունավետ կազմակերպելու համար։


1. Հստակ մշակեք ձեր ուղերձը

Շատ կարևոր է ճիշտ մեսիջի ձևակերպումը, որն ընդհանուր պատկերացում կտրամադրի ձեր գործունեության մասին, թե ինչ խնդիր եք ցանկանում լուծել։ Մեսիջի ձևակերպումը ճիշտ ուղղությամբ տանելու համար կարող եք այս հարցերով առաջնորդվել․

  • արդյո՞ք այն գրավում է կամավորներին,
  • ի՞նչ հմտություններով մարդկանց եմ ուզում ներգրավել իմ խմբում,
  • արդյո՞ք այն ճիշտ է ներկայացնում խնդիրը։

2. Որոշեք, թե ում է այն ուղղված

Կախված Ձեր կողմից ընտրված խնդրից՝ պետք է որոշել լսարանը։ Որոշ խնդիրներ լուծելու համար միգուցե հարկավոր է միանգամից շատ մարդ ներգրավել և գործը ավարտին հասցնել (օրինակ, զինվորական ցանցեր գործել, գլխարկներ ու տաք հագուստ փաթեթավորել)։ Այսպիսի լայն հավաքագրումը սովորաբար անվանում են warm body recruitment, երբ կարճաժամկետ նպատակով հավաքագրում ես շատ մարդկանց ու կազմակերպում աշխատանքը։

Մինչդեռ կան աշխատանքներ, որոնք կարելի է իրականացնել միայն թիրախավորված հավաքագրման շնորհիվ, այսինքն անհրաժեշտ են հատուկ հմտություններով մասնագետներ (օրինակ, անհրաժեշտ են ուսուցիչներ արցախցի երեխաների հետ աշխատելու համար, թարգմանիչներ, ովքեր տիրապետում են ադրբեջաներենին ու թուրքերենին, սոց․ մեդիա մասնագետներ և այլն, և այլն)։

Իսկ հրատապ ժամկետում հատուկ հմտություններով մասնագետներ գտնելու համար առաջնային պլան են մղվում հարցազրույցները։

3. Կազմակերպեք արագ հարցազրույցներ կամավորների հետ

Եթե ձեր կամավորական ընտրացանկում կան մի քանի խնդիրներ ու պետք է բաշխեք թեկնածուներին լավագույն արդյունք ստանալու համար, ապա հարցազրույցի ժամանակ կարող եք առաջնորդվել հետևյալ հարցերով․

  • Նշվածներից ո՞ր խնդրով առավել արդյունավետ կարող եք զբաղվել։
  • Ի՞նչ փորձ ունեք, որը կարող է օգնել ձեզ այս կամավորական աշխատանքում։
  • Աշխատանքային ի՞նչ գրաֆիկ ձեզ առավել հարմար կլինի։

Եվ հիշենք, որ անկախ իրավիճակից կարևոր է պրոֆեսիոնալ, կազմակերպված մոտեցում ցուցաբերել, լինել առավել քան ճկուն՝ ապահովելով կամավորների հետ աշխատանքի լավագույն փորձը (Volunteer experience)։ Ու վստահ ենք, որ քայլում ենք դեպի հաղթանակ, քանի որ «Երբ ազգը բանակ է դառնում, նրան հնարավոր չէ ծնկի բերել» (Գարեգին Նժդեհ)։