Beyond podcast 02. Մհեր Մեհրաբյան | Հայկական աերոտիեզերական ծրագիրը

293

«Փոքր ժամանակ երազում էի թռչել»․ այսպես է սկսվում «Հայկական աերոտիեզերական գործակալության» կամ հայկական NASA-ի հիմնադրման պատմությունը, որի շուրջ էլ ծավալվեց Beyond Podcast-ի թվով երկրորդ էպիզոդը Մհեր Մեհրաբյանի հետ։

Beyond Podcast-ի այս էպիզոդի ընթացքում պատրաստվեք հատելու մտացածին սահմանները և ճախրելու երազանքների անծայրածիր տիեզերքում, լսելու ճշմարտություններ, որոնք դառը կթվան, բայց ոգեշնչվելու ու երբեք երազանքից չհրաժարվելու պայմանով միայն։

Հայկական NASA-ի հիմնադիր Մհեր Մեհրաբյան

Մեր հյուրի մասին

Մեր 2-րդ էպիզոդի հյուրն է գիտնական, գործարար, Հայկական աերոտիեզերական գործակալության հիմնադիր, աերոտիեզերական ոլորտի փորձագետ, «Արեն Մեհրաբյան» բարեգործական հիմնադրամի համահիմնադիր, հայրենիքի նվիրյալ Մհեր Մեհրաբյանը։ Զրուցել ենք Մհերի երազանքների, նրա հեղաշրջիչ նախաձեռնության մոտիվների, AMADEE-24-ի ազդեցության, գիտության ռազմավարական նշանակության, մարդկային կապիտալի կարևորության, համահայկական 7 ԱՄԵՆԱերազանքների և շատ ու շատ անպայման լսելու ու իմանալու թեմաների մասին։

«Աշխարհում գոյություն ունի 2 տեսակի շարժում՝ իներցիոն և գրավիտացիոն։ Իներցիայի դեպքում արտաքին ազդակի առկայությունը պարտադիր է․ ինչ-որ մեկը շարունակ պետք է հրի կամ քաշի օբյեկտը, այլապես այն կդադարի շարժվել։ Գրավիտացիայի դեպքում մարմինը, տեսնելով լույսը, ինքնաբուխ կերպով շարժվում է այդ ուղղությամբ՝ անկախ այն հանգամանքից, թե ինչ խոչընդոտներ կան ճանապարհին։ Մարդն ինքն է որոշում, թե շարժման որ տեսակով ապրի։ Ներքին գրավիտացիա ունեցող մարդու համար այդ լույսը հե՛նց երազանքն է, և հենց այդ երազանքին հասնելու ուժգին ցանկությունն է ստիպում մարդուն առաջ շարժվել»։ Փոքր ժամանակ միջտիեզերական թռիչքների մասին երազող Մհերը այսօր ահա հանդիսանում է հայկական NASA-ի հիմնադիրը։ 

Մհերը հավատարիմ է մնում ոչ միայն իր, այլ նաև հերոսամարտիկ որդու կիսատ մնացած երազանքին․ Հայաստանում ունենալ աերոտիեզերական մեքենաշինություն՝ այսպիսով հիմք դնելով հայկական տիեզերական ծրագրին: 44-օրյա պատերազմը բաժանեց մեզ Արենից, բայց նրա երազանքը՝ Հայաստանը որպես աերոտիեզերական առաջատար երկիր տեսնելը, ավելի ուժեղ է, քան թշնամին։ Մեհրաբյան ընտանիքի նախաձեռնությամբ ծնունդ առած «Արեն Մեհրաբյան» բարեգործական հիմնադրամը այստեղ է՝ շարունակելու նրա երազանքը։ Ի դեպ, դու և՛ս հնարավորություն ունես դառնալու դեպի տիեզերք տանող այս թռիչքի ուղևորներից մեկը, իսկ թե ինչպես, կիմանաս՝ այցելելով այս հղումով։

Մեր գործընկերոջ մասին

Այս էպիզոդի գործընկերն է Սինոփսիս Արմենիան։ Սինոփսիսը կարևորագույն առաքելություն ունի տեխնոլոգիական նորարարության համար և ապահովում է չիպ ստեղծելու ամենաընդգրկուն հավաքակազմը։ Չիպերի շուկան, ի դեպ, էքսպոնենցիալ աճ է գրանցում, ինչը նշանակում է, որ աճում է նաև այդ ոլորտի մասնագետների պահանջարկն աշխարհում և Հայաստանում։ Սինոփսիսում իսկապես կենտրոնանում են մարդկանց և մշակույթի վրա, դա է վկայում մի քանի անվանակարգով ամենասիրված աշխատավայր ճանաչվելը։

Synopsys

Հայաստանի աերոտիեզերական ներուժը բացահայտելու և անսպառ մոտիվացիա ստանալու համար դիտի՛ր դեպի երազանք տանող այս էպիզոդն ամբողջությամբ։ Չմոռանա՛ս բաժանորդագրվել մեր յութուբյան ալիքին՝ մշտապես տեղեկացված և մոտիվացված լինելու համար։ Դե ինչ, մաղթում ենք քեզ հաճելի դիտում։