«Ստարթափներ սկսելը նման է ինքնաթիռից առանց պարաշյուտ թռնելուն․ բարեհաջող վայրէջք կատարելու համար օդի մեջ պետք է սովորել, թե ինչպես պարաշյուտ պատրաստել․․․»
Մեր հյուրի մասին
Մեր երրորդ էպիզոդի հյուրն է ViralMango և SmartClick ընկերությունների համահիմնադիր, Forbes ամսագրի սյունակագիր և AI հապավումը որպես “Armenian intelligence” ներկայացնող Ռեմ Դարբինյանը։ Ռեմի հետ զրուցել ենք ստարթափների, ներդրումների, արհեստական բանականության և ինֆլուենսեր մարքեթինգի մասին։
Եթե ունես գաղափար, որը ցանկանում ես վերածել ստարթափի, ապա պետք չէ տրվել կասկածանքներին․ չէ՞ որ փորձելու դեպքում ունես երկու հնարավոր տարբերակ՝ կամ կհաջողես, կամ կձախողես, իսկ չփորձելու դեպքում տարբերակը մեկն է։ Ստարթափ սկսելը Ռեմը համեմատում է ինքնաթիռից առանց պարաշյուտ ցատկելու հետ։ Քայլ դեպի անորոշություն՝ առանց ապահովության․ սա է ռեալ ստարթափ մտածելակերպը։ Եվ եթե խիզախել ես ու որոշում ես կայացրել սկսելու, ապա Ռեմը խորհուրդ է տալիս նախ հասկանալ, թե այն խնդիրը, որը փորձում ես լուծել, արդյոք իրական է։ Դա անելու լավագույն միջոցը պարզապես զրույց ունենալն է պոտենցյալ օգտատերերի հետ։ Հաջորդիվ, ճիշտ թիմ ձևավորելն է, թիմ, որը նույնքան սրտացավ է և նույնչափ սիրահարված է խնդրին, որքան որ դու։ Մնացածը ժամանակի հարց է։
Խոսելով ստարթափներից, ներդրումներից, մարքեթինգից՝ չէինք կարող շրջանցել AI-ը։ Թևակոխել ենք մի ժամանակաշրջան, որտեղ ապրում ենք արհեստական բանականության հետ կողք կողքի։ Իսկ ի՞նչ հմտություններն են հարկավոր AI-ի հետ խաղաղ կյանք վարելու համար։ Ռեմն այն կարծիքին է, որ կրիտիկական մտածելակերպը և արագ ադապտացվելու կարողությունն են, որ անժամկետ են և միշտ անհրաժեշտ են լինելու ցանկացած իրավիճակում հաջողելու համար։ Ինչպես ասել է էվոլյուցիոն տեսաբան Չարլզ Դարվինը․
Տեսակներից գոյատևում է ոչ թե ամենաուժեղը, կամ ամենախելացին, այլ այն, որն ամենաարագն է ադապտացվում փոփոխություններին”
Չարլզ Դարվին
Մեր գործընկերոջ մասին
Այս էպիզոդի գործընկերն է Սինոփսիս Արմենիան։
Ի դեպ, Սինոփսիս Արմենիայի 37%-ը կանայք և աղջիկներ են, որոնք ակտիվ դեր ու մասնակցություն ունեն աշխարհի տարբեր երկրներում իրականացվող այնպիսի նորարարական նախագծերում, որոնց մեկնարկով իրականություն են դառնում մեր խելացի հեռախոսները, ինքնավար մեքենաներն ու այն ամենը, ինչը մեր կյանքը դարձնում է ավելի հարմարավետ, անվտանգ ու ապահով։
Իսկ թե ինչ կապ ունեն Քիմ Քարդաշյանը, նեխուրը և գլադիատորները, կիմանաս էպիդոդն ամբողջությամբ դիտելու դեպքում։ Չմոռանա՛ս բաժանորդագրվել մեր յութուբյան ալիքին՝ մշտապես տեղեկացված և մոտիվացված լինելու համար։ Դե ինչ, մաղթում ենք քեզ հաճելի դիտում։
