«Կարիերա և ոչ թե աշխատանք․ զբաղվեք այն բանով, ինչն իրոք բավարարվածություն է պատճառում և ինչից որ հաճույք եք ստանում»,- Արթուր Բարխուդարյան, Synopsys Armenia։
Մեր հյուրի մասին
Beyond Podcast-ի այս էպիզոդի հյուրն է մաթեմատիկոս, Synopsys Armenia-ի R&D ինժեներ, ծրագրավորման ավագ ճարտարապետ Արթուր Բարխուդարյանը։ Դեռ դպրոցական տարիներից Արթուրը հետաքրքրված էր մաթեմատիկայով, մասնակցել է մի շարք օլիմպիադաների և գրանցել հաջողություններ։ Հավատարիմ մնալով մաթեմատիկային՝ ընդունվել է ԵՊՀ-ի Մաթեմատիկայի ֆակուլտետ, իսկ արդեն երկրորդ կուրսից ուսումնառությունը շարունակել է Պրահայաում՝ հեղինակավոր Կառլի համալսարանում։ Հենց այստեղ էլ ավարտել է մագիստրատուրան, պաշտպանել գիտական աստիճան և վերադարձել հայրենիք։ Արդեն 15 տարի է, ինչ հանդիսանում է Synopsys Armenia-ի թիմակից։ Իր հիմնական գործունեությունից զատ, Արթուրը զբաղվում է նաև երիտասարդ կադրերի զարգացմամբ։ Արթուրի հետ զրույցը կառուցել ենք Հայաստանում և աշխարհում Synopsys-ի կարևորության և ծավալած գործունեության շուրջ։
Ժամանակակից աշխարհի տեխնոլոգիական քարտեզում մեր հաստատուն տեղն ամրագրելու տեսանկյունից անգնահատելի է Synopsys Armenia-ի դերը, որը Հայաստանի ՏՏ (տեղեկատվական տեխնոլոգիաներ) ոլորտի զգալի մասն է կազմում։ Արթուրի և Արթուրի նման մարդկանց շնորհիվ է, որ այս ոլորտում մենք ևս ասելիք ունենք։ Հատկանշական է, որ Արթուրը անցյալ տարի իր կոլեգաների հետ միասին Հայաստան է բերել Synopsys Excellence Award-ը, որը շնորհվում է Synopsys-ի խիստ սակավաթիվ աշխատակիցներին՝ լուրջ նվաճումների դեպքում միայն։
Մասնագիտությունը, որն ընտրում ենք, ինչ-որ չափով ձևավորում է մեր անհատականությունը, ազդում է մեր մտածողության վրա, հետևաբար մասնագիտական որոշումներ կայացնելիս շատ կարևոր է, որ առաջնորդվենք մեր նախասիրություններով։ Զբաղվեք այն բանով, ինչն իրոք բավարարվածություն է պատճառում և ինչից որ հաճույք եք ստանում, արդյունքում կունենաք կարիերա և ոչ թե աշխատանք։ Ինչի վրա էլ որ կանգնի ձեր ընտրությունը, երբեք չխուսափեք մարտահրավերներից և խնդիրներից, քանի որ դրանք հաղթահարելու և լուծելու ձգտումներն են, որ մեզ անընդհատ առաջ են մղում։
Մեր գործընկերոջ մասին
Այս էպիզոդի գործընկերն է Սինոփսիս Արմենիան։
Սինոփսիս Արմենիայում ծրագրային ապահովման ստեղծման և ճարտարագիտական աշխատանքների հետ մեկտեղ զբաղվում են նաև գիտությամբ։ 20 տարիների ընթացքում այստեղ հաջողությամբ պաշտպանվել են 90-ից ավել թեկնածուական ատենախոսություններ, արտոնագրվել 60-ից ավել գյուտեր, հրատարակվել ավելի քան 600 գիտական հոդվածներ և մենագրություններ։
Զրույցին ամբողջությամբ ծանոթանալու համար խորհուրդ ենք տալիս դիտել էպիզոդը, որտեղ կբացահայտեք շատ ավելին։ Չմոռանա՛ք բաժանորդագրվել մեր յութուբյան ալիքին՝ մշտապես տեղեկացված և մոտիվացված լինելու համար։ Դե ինչ, մաղթում ենք հաճելի դիտում։
