«Պետք է հարցեր տալ և պատասխաններ փնտրել։ Շատ հաճախ մենք հարցեր չենք տալիս․ մեզ են հարցեր տալիս։ Մե՛նք պետք է դառնանք հարց տվողը, առաջին հերթին` ինքներս մեզ», – ֆինանսների նախարար Վահե Հովհաննիսյան։
Մեր հյուրի մասին
Beyond Podcast-ի այս էպիզոդի հյուրն է ՀՀ ֆինանսների նախարար Վահե Հովհաննիսյանը, ում հետ զրուցել ենք իր մասնագիտական ուղու, ֆինանսների նախարարի պաշտոնը ստանձնելու, նախարարությունում ընթացող փոփոխությունների, պետական ոլորտում աշխատելու առանձնահատկությունների և շատ այլ հետաքրքիր թեմաների շուրջ։
Փոքր ժամանակ արևելյան երկրում թղթակցի ապագայի մասին երազող Վահեն իր կարիերան կառուցեց ֆինանսների նախարարությունում։ Մասնագիտական կողմնորոշման հարցում մեծ ներդրում է ունեցել մայրը, ով որդու մեջ նկատել էր տնտեսագիտական ներուժը և խորհուրդ տվել հենց այդ ուղղությամբ էլ շարունակել ուսումը։ Պետության համար աշխատելը, պետությանը ծառայելը պարոն Հովհաննիսյանի համար մեծ առաքինություն է և պատիվ։ Նախարարն այն կարծիքին է, որ եթե այս մտածելակերպը արմատացած լինի նաև քաղաքացիների գիտակցության մեջ, եթե նրանք ևս ներգրավված լինեն պետության խնդիրները լուծելու գործում, ապա կունենանք էլ ավելի հզոր և համախմբված հայրենիք։
Հիշելով մասնագիտական ուղու վաղ տարիները՝ պարոն Հովհաննիսյանը շեշտում է փորձնակության ծրագրերին մասնակցելու կարևորությունը։ Այն հիանալի միջավայր է փորձ և ֆունդամենտալ գաղափարներ կուտակելու համար։ Նախարարը հորդորում է մասնագիտական կարիերան սկսելիս կենտրոնանալ ոչ թե վարձատրության, այլ աշխատանքի ընձեռած ինքնազարգանալու, նոր գիտելիք ստանալու հնարավորությունների վրա։
Քննարկման ընթացքում պարոն Հովհաննիսյանը անդրադարձավ նաև նախարարությունում իրականացվող մշակութային վերափոխումներին։ Կառավարման արդյունավետությունը բարձրացնելու նպատակով նախարարը փորձում է ապակենտրոնացնել որոշումների կայացումը։ Այսուհետ աշխատակիցները ևս ունեն պատասխանատվության իրենց չափաբաժինը ընդունված որոշումների մեջ, քանի որ նրանք ևս մասնակցում են դրանց կայացմանը։ Ներդրված նորարարական մոտեցումներից է նաև վարչությունների հետ նախարարի անմիջական քննարկումները, ինչը մեծացնում է կառավարչական գործընթացներում միջին օղակի ներգրավվածության աստիճանը։ Պարոն Հովհաննիսյանը նշեց նաև, որ նախարարությունը սիրով սպասում է երիտասարդ կադրերին, և բոլոր հետաքրքրվածները կարող են դիմել ու միանալ պետական երազանքները իրականացնելու հայրենանվեր առաքելությանը։
Իսկ հարցին, թե ինչ խորհուրդ կտար նախարարը 18 տարեկան Վահեին, պարոն Հովհաննիսյանը պատասխանում է, որ ինքն ակտիվ կարդալը սկսել է 24 տարեկանից և խորհուրդ կտար ավելի վաղ հասակից ուշադրություն դարձնել ընթերցանությանը։
Մեր գործընկերոջ մասին
Այս էպիզոդի գործընկերն է Hirebee-ն։ Hirebee-ն հավաքագրման ավտոմատացման լիարժեք գործիք է։ Այն օգնում է հարյուրավոր ընկերությունների ավտոմատացնել թիմակիցների հավաքագրման գործընթացը, խնայել ժամանակ և գումար։ Եթե դուք էլ եք ցանկանում ձեր ընկերությունում ավելի արդյունավետ կազմակերպել աշխատակիցների հավաքագրման գործընթացը, ապա գրանցվեք և փորձեք Hirebee-ն լիովին անվճար։
Զրույցին ամբողջությամբ ծանոթանալու համար խորհուրդ ենք տալիս դիտել էպիզոդը, որտեղ կբացահայտեք շատ ավելին։ Չմոռանա՛ք բաժանորդագրվել մեր յութուբյան ալիքին՝ մշտապես տեղեկացված և մոտիվացված լինելու համար։ Ի դեպ, յութուբում մեկնաբանություն թողնելու դեպքում հնարավորություն կունենաք ստանալու նվեր։ Պատահականության սկզբունքով կընտրենք որևիցե մեկնաբանություն, որի հեղինակին կնվիրենք նախարարի սիրելի գրքերից Աշոտ Հովհաննիսյանի «Իսրայել Օրին և հայ ազատագրական գաղափարը»։
