«Ստեղծագործող մարդուն պատմության ընթացքում երբեք ոչինչ չի խոչընդոտել»։
Մեր հյուրի մասին
Beyond Podcast-ի տաղավարում այս անգամ հյուրընկալել ենք ArmComedy-ի հաղորդավար, սցենարիստ, SPiN Ideas Agency-ի համահիմնադիր Նարեկ Մարգարյանին։ Նարեկի հետ զրուցել ենք ArmComedy-ի և նմանատիպ ունիկալ քոնթենթների ստեղծման առանձնահատկությունների, դժվարությունների, սցենարների ստեղծման պրոցեսի, storytelling-ի կարևորության, ֆիզիկական ակտիվության անհրաժեշտության և այն գործոնների մասին, որոնց պետք է ուշադրություն դարձնել մասնագիտություն ընտրելիս։
Մի քիչ ռիսկ, մի քիչ ամբիցիա. ստեղծագործ մարդը պետք է այնքան հավատա իր գաղափարին, որ վստահ լինի` բացի իրենից իր գաղափարը հետաքրքրելու է այլ մարդկանց ևս: Բայց գաղափարները ոչինչ են, եթե նրանց պահում ենք մեր գլխում և ոչինչ չենք ձեռնարկում: Պետք է փորձել, անընդհատ փորձել ու չհանձնվել. պատմությունը մտապահում է միայն այն մարդկանց անունները, որոնք անցել են թերահավատության անտեսանելի մաղի միջով և շարունակ փորձել են։
Ստեղծագործող մարդու համար շատ կարևոր է նաև տաղանդի և աշխատասիրության ճիշտ հարաբերակցությունը: Տաղանդն ինքնին կյանքի ամենագեղեցիկ երևույթներից է, սակայն կարող է կործանարար ազդեցություն ունենալ, եթե հույսը դնենք միայն տաղանդի վրա: Կյանքում շատ են պահերը, երբ մենք չունենք ստեղծագործելու ներշնչանք և տրամադրություն, և այդ տաղանդ ասվածը բավարար չէ։ Այս ժամանակ մեզ օգնության է հասնում աշխատասիրությունը․ տաղանդն առանց աշխատասիրության երկար կյանք չունի:
Ժամանակի ընթացքում մարդկանց ուշադրությունը գրավելու ժամանակը կրճատվել է։ Որոշիչը առաջին 3 վայրկյանն է, եթե այդ ընթացքում քեզ չհաջողվեց գրավել մարդու ուշադրությունը, ապա կարելի է ասել, որ «գնացքն արդեն գնացել» է։ Նարեկն այն կարծիքին է, որ գաղափարը ընկալելի դարձնելու ամենաարագ և արդյունավետ գործիքը storytelling-ն է։ Դեռ մանկուց մենք ծրագրավորվում ենք story-ների լեզվով․ սկզբում լսում ենք հեքիաթներ, հետո դիտում ենք մուլտֆիլմեր, իսկ ավելի մեծ տարիքում սկսում ենք կարդալ, և այսպես, մեզ հարազատ է դառնում ամեն ինչ պատմությունների տեսքով ներկայացնելը։ Ուստի՝ storytelling-ը մարդկանց ուշադրությունը գրավելու համար հիանալի գործիք է։
Նարեկը նաև ֆիլմերի սցենարիստ է․ փաստ, որի մասին քչերը գիտեն։ Ֆիլմերի սցենարներ գրելու Նարեկի առաջին քայլը ձիով էր․ նա «Քայլ ձիով» ֆիլմի սցենարի համահեղինակն է։ Ժամանակին անհավանական թվացող այս միտքը Նարեկի համառության և իր գաղափարի հանդեպ ունեցած հավատի շնորհիվ դարձավ իրականություն։ Նշենք, որ Նարեկն այժմ էլ ակտիվ կերպով զբաղվում է այս ուղղությամբ և նպատակ ունի իր արտադրանքը հասանելի դարձնելու նաև միջազգային լսարանին։
Նարեկի համար աշխատանքային թեժ կյանքից կտրվելու և էներգիայով լիցքավորվելու համար հիանալի տարբերակ է սպորտը։ Նա եռամարտի (լող, հեծանվավազք և վազք) սիրահար է։ Նարեկի կարծիքով սպորտը կոփում է ոչ միայն մարմինը, այլ նաև կամքը․ ինքդ քեզ համար սահմանում ես չափելի նպատակներ ու հասնում դրանց՝ աստիճանաբար բարձրացնելով նշաձողը՝ սկզբում 5կմ վազք, հետո 10 կմ և այսպես շարունակ։
Մեր գործընկերոջ մասին
Այս էպիզոդի գործընկերն է Hirebee ավտոմատացման համակարգը։ Hirebee-ի նպատակն է հեշտացնել թեկնածուների փնտրման, հավաքագրման, հարցազրույցների վարման, թեստավորման և իհարկե աշխատանքի ընդունման գործընթացները։ Եթե դուք էլ ցանկանում եք ավելի օպտիմալ և սահուն դարձնել հավաքագրման գործընթացը ձեր ընկերություններում, ապա գրանցվեք և փորձեք Hirebee-ն լիովին անվճար։
Իսկ թե ինչ խորհրդով Նարեկը կիսվեց մասնագիտության ընտրության հարցում, կբացահայտեք էպիզոդն ամբողջությամբ դիտելու դեպքում։ Չմոռանա՛ք բաժանորդագրվել մեր յութուբյան ալիքին՝ մշտապես տեղեկացված և մոտիվացված լինելու համար։
