Շարունակում ենք «Շաբաթվա գիրքը» շարքը։ Նախորդ անգամ քննարկել էինք Քևին Կրուզի «15 գաղտնիք, որ հաջողակ մարդիկ գիտեն ժամանակի կառավարման մասին» գիրքը, որտեղ հեղինակը ներկայացնում է սուպեր արտադրողականության սուպեր գաղտնիքները։ Գիրքը կարելի է համարել ժամանակի արդյունավետ և խելամիտ օգտագործման պրակտիկ ուղեցույցը։
Այս հոդվածում կանդրադառնանք հեղինակավոր INSEAD միջազգային դպրոցի պրոֆեսորներ Կիմ Վի Չանի և Ռենե Մոբորնի «Կապույտ օվկիանոսի ռազմավարությունը» աշխատությանը։ Գիրքը հիմնված է ավելի քան 15 տարի տևած հետազոտության, Harvard Business Review-ի հրապարակումների, մի շարք ակադեմիական հոդվածների, ինչպես նաև ավելի քան 100 տարվա տվյալների վրա։ Ավելին, գրքում տեղ գտած գաղափարները, գործիքները փորձարկվել են Եվրոպայի, Ասիայի և Միացյալ Նահանգների կորպորատիվ պրակտիկայում։
Գիրքն առաջարկում է բիզնես ռազմավարության բոլորովին այլ, ոչ ավանդական մոտեցում։ Այն ոչ միայն մարտահրավեր է նետում ընկերություններին, այլև ցույց է տալիս այդ մարտահրավերը հաղթահարելու ուղիները։
Բիզնեսի փոթորկոտ օվկիանոսում շուկայական ծովամարտերի կատաղի մրցակցությունը ներկում է օվկիանոսն ամբողջությամբ կարմիր։ Սա կարմիր օվկիանոսն է, օվկիանոս, որտեղ գտնվում են շուկայի բոլոր խաղացողները։ Այստեղ խաղի կանոնները հայտնի են բոլորին։ Հաղթելու՝ այսինքն շուկայի ավելի մեծ մասնաբաժնին տիրանալու համար անհրաժեշտ է պայքարի մեջ մտնել մրցակիցների հետ, ընդ որում, մրցակիցների ավելացմանը զուգընթաց՝ ուժեղանում է նաև մրցակցությունը։ Իսկ ինչպե՞ս կարելի է հաղթել այս արյունոտ մրցակցությունը։
Մրցակցությունը հաղթելու միակ միջոցը մրցակցությունը հաղթելու փորձերը դադարեցնելն է։
Որքան էլ պարադոքսալ թվա այս միտքը, հենց սրա վրա է հիմնված գրքի ողջ գաղափարախոսությունը։ Կարմիր օվկիանոսում նավարկելու և մրցակցության մեջ թաթախվելու փոխարեն ստեղծեք ձեր կապույտ օվկիանոսը։ Այս օվկիանոսում աճելու և զարգանալու հնարավորությունները շատ ավելի մեծ են, և հաղթելու համար ամենևին էլ պետք չէ «արյուն թափել»։
Կարմիր օվկիանոսում՝ արդեն իսկ գոյություն ունեցող շուկայում, հաղթելու համար անհրաժեշտ է մեկ ուրիշին պարտության մատնել, իսկ կապույտ օվկիանոսում ռազմավարությունը այլ է։ Այստեղ դուք ստեղծում եք նոր շուկա և առաջարկում եք նոր, նախկինում գոյություն չունեցող արժեք, և այդպիսով մրցակցությունը դառնում է անտեղի կամ հասնում է նվազագույնի։
Կապույտ օվկիանոսի հիմնաքարը արժեքային նորարարությունն է։
Կապույտ օվկանոսի ռազմավարության հիմնարար հասկացություններից է արժեքային նորարարությունը, որն ընդգծում է թե՛ արժեքը, թե՛ նորարարությունը: Եթե ստեղծեք արժեք՝ առանց նորարարության, չեք առանձնանա մրցակիցներից, իսկ նորարարությունը՝ առանց արժեքի, հաճախորդի տեսանկյունից կարող է գրավիչ չլինել։
Գրքում առաջարկվում են նաև մի շարք պրակտիկ գործիքակազմեր, որոնցից է 4 գործողությունների հայեցակարգը։ Ըստ այս հայեցակարգի՝ շուկայում բարենպաստ դիրք գրավելու համար անհրաժեշտ է իրականացնել այս 4 գործողությունները․
1․ Բացառել | Բացառեք այն գործոնները, որոնք շուկայում համարվում են ապրանքի կամ ծառայության ընդունելի ստանդարտ, սակայն այլևս արժեք չեն ներկայացնում։ Սպառողների նախասիրությունները փոխվում են, ուստի ընդունված ստանդարտերին հետևելու փոխարեն՝ ուշադրություն դարձրեք սպառողների արժեհամակարգային փոփոխություններին։
2. Նվազեցնել | Նվազեցրեք այն գործոնները, որոնց միակ նպատակը ապրանքը կամ ծառայությունը գերմրցակցային դարձնելն է և որոնք շատ ժամանակ ու ծախս են պահանջում։
3. Ավելացնել | Ավելացրեք այն գործոնները, որոնք շուկայում թերագնահատված են, սակայն կարող են լուծել հաճախորդի այնպիսի խնդիրներ, որոնք այլ ընկերությունների կողմից անուշադրության են մատնված։
4. Ստեղծել | Եվ վերջապես ստեղծեք այնպիսի գործոններ, որոնք շուկայում երբևիցե չեն առաջարկվել և կարող են ստեղծել նոր արժեք։ Այս քայլը պահանջում է հաճախորդի հետաքրքրությունների և նախասիրությունների խորը ու մանրազնին ուսումնասիրություն։ Մտքով տեղափոխվեք ապագա և մտածեք բոլոր այն խնդիրների մասին, որոնց հետ հաճախորդները կարող են առնչվել։
Գրքում կարող եք գտնել շատ ավելի շատ օգտակար ու պրակտիկ խորհուրդներ, որոնց շնորհիվ կկարողանաք ստեղծել ձեր կապույտ օվկիանոսը ու վայելել ձեր հաղթական նավարկությունը։
Գիրքը հայերեն թարգմանությամբ հասանելի է այստեղ։
