Նոյեմբերի 17-ին կայացավ ՀՀ-ում ԱՄՆ դեսպանության աջակցությամբ կազմակերպված Ձեռներեցության համաշխարհային շաբաթվա ամփոփիչ միջոցառումը՝ Կարիերայի և ձեռնարկատիրության տոնավաճառը, որտեղ ներկայացված էին բիզնես, կրթական կազմակերպություններ՝ իրենց թափուր աշխատատեղերի առաջարկներով, ինչպես նաև staff.am-ը «Մասնագիտությունների պահանջարկ․ ներկան և զարգացման միտումները» թեմայով հատուկ սեմինարով։
Սեմինարը կազմակերպվեց Մարիոթ հյուրանոցում, որին մասնակցում էին աշխատաշուկայի զարգացման միտումներով և իրենց կարիերայի զարգացմամբ հետաքրքրված ավելի քան 30 երիտասարդներ և փորձառու մասնագետներ։
Սեմինարի ժամանակ ներկայացվեցին այնպիսի թեմաներ, ինչպիսիք են 2017թ․ աշխատաշուկայում ամենապահանջված մասնագիտությունները, ի՞նչ հմտություններ են պահանջում գործատուները պոտենցիալ թեկնածուներից և թե ինչպիսի չափանիշներով են այսօր մրցունակ մասնագետներն առաջնորդվում գործատուի ընտրության հարցում։
«Կարող եմ հաստատել՝ Հայաստանում աշխատատեղեր կան»,- Տոնավաճառին բացման խոսքով հանդես եկավ ՀՀ-ում ԱՄՆ դեսպան Ռիչարդ Միլսը ՝ հավելելով, – «Այսօրվա գլոբալ աշխարհում ձեռներեցներն ու աշխատանք փնտրողները պետք է ճկուն լինեն, պատրաստ ռիսկի դիմել և օգտվել հնարավորություններից, երբ դրանք ընձեռվում են: Այս միջոցառումն հենց մի այդպիսի հնարավորություն է»։
Ձեռներեցության համաշխարհային շաբաթվա ընթացքում, որը նշվում է աշխարհի ավելի քան 170 երկրներում, Կարիերայի և ձեռնարկատիրության տոնավաճառը ԱՄՆ դեսպանության աջակցությամբ իրականացված այս տարվա ամենամեծ միջոցառումն էր, որի կազմակերպիչներից էին նաև Հայկուհի Գևորգյանը՝ ի դեմս Career Lab-ի և Արաքսյա Մարտիրոսյանը՝ ի դեմս IAB Բիզնեսի միջազգային ակադեմիայի:
