Հոկտեմբերի 12 -14-ը Գյումրիում կայացավ Հայաստանի մանուկներ հիմնադրամի (COAF) կողմից իրականացվող մասնագիտական կողմնորոշման ծրագրի ուսուցիչների վերապատրաստումը, որին մասնակցում էին Շիրակի մարզի 7 շահառու գյուղերի՝ Սառնաղբյուրի, Լանջիկի, Գուսանգյուղի, Հոռոմի, Բենիամինի, Վարդաքարի, Մեղրաշենի դպրոցների ուսուցիչները։ Ծրագրի շրջանակներում վերապատրաստում անցած ուսուցիչներն աշակերտների հետ աշխատելու են մասնագիտական կողմնորոշման ուղղությամբ։
Մասնագիտական կողմնորոշման ծրագրի վերապատրաստման մեջ իր յուրահատուկ ներդրումն ուներ նաև staff.am-ը: staff.am Մարքեթինգի և հաղորդակցության բաժնի ղեկավար Նազելի Բադալյանը շահառու դպրոցների ուսուցիչներին ներկայացրեց Շիրակի մարզում աշխատաշուկայի վիճակագրական տվյալները, թե ինչ մասնագիտական հմտություններ է այսօր գործատուն կարևորում, որ ոլորտներում են աշխատակիցների ամենամեծ պահանջարկը։ staff.am-ի կողմից նաև ներկայացվեցին ՀՀ-ում աշխատավարձերի վերլուծության տվյալները։
Դասընթացն անցավ ակտիվ քննարկումների մթնոլորտում և կարիերայի կողմնորոշմանն ուղղված մեթոդական խաղերի կիրառմամբ, ինչի շնորհիվ մասնակիցները կարողացան էլ ավելի խորությամբ ծանոթանալ staff.am կարիերայի մասնագիտական հարթակի հնարավորություններին, աշխատաշուկայի պահանջարկին և Շիրակի մարզում նրանց կիրառելիությանը։
Հայաստանի մանուկներ հիմնադրամի Մասնագիտական կողմնորոշման ծրագրի շրջանակներում կազմակերպվեց նաև այց Մարիամ և Երանուհի Ասլամազյան քույրերի պատկերասրահ։
Դասընթացի մասնակից ուսուցիչները նշեցին, որ բավականին օգտակար էին կազմակերպված դասընթացները, ինչի շնորհիվ իրենք կարող են իրենց դպրոցների աշակերտներին ծանոթացնել մասնագիտության ընտրության հնարավորություններին, բացահայտել աշակերտների կարողություններն ու հմտությունները, տալ ինքնաճանաչման եւ ինքնադրսեւորման հնարավորություն։
Մասնագիտական կողմնորոշում ծրագիրը Հայաստանի մանուկներ հիմնադրամի կողմից 2012 թվականից իրականացվել է HSBC Հայաստան բանկի համաֆինանսավորմամբ։ Ներկայում COAF-ը շարունակում է ծրագիրը սեփական ֆինանսավորմամբ։ Ծրագրի հաջողության պատմությանը կարող եք ծանոթանալ ստորև տեսանյութում։
Նշենք, որ այս տարեսկզբին իր կորպորատիվ սոցիալական պատասխանատվության ծրագրի ռազմավարության շրջանակներում staff.am-ը համագործակցության հուշագիր է ստորագրել Հայաստանի մանուկներ հիմնադրամի (COAF) հետ՝ նպատակ ունենալով ՀՀ աշխատաշուկայի վերաբերյալ վիճակագրական տեղեկատվություն ներկայացնել, մասնագիտական կողմնորոշմանն ուղղված մենթորական խորհրդատվություն տրամադրել գյուղաբնակ երիտասարդներին ու ներգրավել ՔՈԱՖՍՄԱՐԹ նախաձեռնության իրագործման համար երկրի լավագույն մասնագետներին staff.am կարիերայի օնլայն հարթակի միջոցով։
Հատուկ շնորհակալություն ենք հայտնում Հայաստանի մանուկներ հիմնադրամ (COAF)-ին Մասնագիտական կողմնորոշման ծրագրի նախաձեռնության համար, որը շատ մեծ կարևորություն ունի երիտասարդների կողմից իրենց հետաքրքրություններին համապատասխան մասնագիտության ընտրության հարցում։ staff.am-ն իր գործունեությամբ միշտ աջակցում է Հայաստանում աշխատաշուկայի զարգացմանը և խթանում նոր մասնագետների կարիերայի զարգացմանը՝ մասնակցելով մասնագիտական կողմնորոշման տարաբնույթ ծրագրերի։
