StaffBlog-ի այս նախագծի նպատակն է օգնել աշխատանք փնտրողներին լավագույնս ներկայանալ ցանկալի գործատուին։ Ստորև ուրախ ենք ներկայացնել staff.am համահիմնադիր Լուիզա Ավետիսյանի օգտակար խորհուրդները CV կառուցման մասին։
ԼՈՒԻԶԱ ԱՎԵՏԻՍՅԱՆ
staff.am համահիմնադիր
CV-ն պետք է ունենա հետևյալ կառուցվածքը՝
-Աշխատանքային փորձ՝ սկզբում նշելով ներկա աշխատանքը,
-Կրթություն,
-Մասնագիտական և Սոֆթ հմտություններ,
-Լեզուների իմացություն,
-Համակարգչային գիտելիքներ,
-Կոնտակտային տվյալները կարող եք նշել կամ սկզբում, կամ վերջում:
Գործատուի ուշադրությունն անմիջապես գրավելու համար
մասնագիտական յուրաքանչյուր փորձի տակ նշեք աշխատանքային ձեռքբերումները՝ օգտագործելով դրական տպավորություն ստեղծող բառեր. օրինակ՝ սկսել, կառավարել, կոորդինացնել, վերահսկել, ձեռք բերել։
Եթե որոշել եք ներառել լուսանկար, որն ի դեպ կարող եք և չներառել, ապա հավաստիացեք, որ այն համապատասխանում է այս պահանջներին՝
– Անձնագրային նկար չէ,
– Սելֆի չէ,
– Այլ մարդիկ չկան նկարում,
– Որակով ցածր լուսանկար չէ:
Ձեր էլ. հասցեն նույնպես պետք է լինի պրոֆեսիոնալ, մի դիմեք աշխատանքի այլ մարդու պատկանող էլ.փոստից, օգտագործեք Ձեր անունը, օրինակ՝ aram.aramyan@gmail.com՝ kotik@mail.ru-ի փոխարեն։
Օգտագործեք ընթեռնելի տառաձև, եթե CV-ին հայերեն է, ապա հավաստիացեք, որ այն Unicode-ով է։
Ներառեք Ձեր Linkedin սոց. կայքի հղումը:
Պետք չէ մոռանալ ուղեկցող նամակի մասին. Եթե ուղեկցող նամակ չի պահանջվում, ապա երբեք առանց տեքստի դատարկ էլ.նամակ մի ուղարկեք, առնվազն ողջունեք, նշեք թե որտեղից եք տեղեկացել աշխատանքի մասին, և հույս հայտնեք, որ կհրավիրեն Ձեզ հարցազրույցի:
Մի ծանրաբեռնեք CV-ն ավելորդ և ոչ պատշաճ տեղեկատվությամբ։ Ձեր ասելիքը ձևակերպեք հստակ և կոնկրետ։
Պետք չէ օգտագործել Europass կամ նման տիպի CV builder-ներ, խիտ աղյուսակներում տեղավորված տեղեկություններով և անընթեռնելի ֆոնտերով ֆայլեր:
Խուսափեք ներառել ակնկալվող աշխատավարձի չափը: Եթե գործատուն նախապես չի պահանջել նշել այն, ապա ավելի լավ է դրա մասին բանակցել հարցազրույցի ժամանակ:
Խուսափեք ներառել տվյալներ, որոնք տվյալ աշխատանքի հետ կապ
չունեն, օրինակ, եթե դիմում եք մարքեթիգի աշխատանքի և 2 տարի առաջ հաշվապահակա դասընթացների եք մասնակցել, ապա գործատուին այդ տեղեկատվությունն այդքան էլ անհրաժեշտ չէ:
Երբեք CV-ն մի ուղարկեք Word, Excel, rtf կամ նման ֆորմատներով, այն պետք է լինի PDF ձևաչափով:
CV-ն չպետք է գերազանցի 2 A4 էջը:
