Հոկտեմբերի 22-24-ը Երևանում տեղի ունեցավ ITU միջազգային կիբեռվարժանքը՝ CyberDrill Armenia 2025-ը, որը միավորեց աշխարհի առաջատար փորձագետների, պետական գերատեսչությունների ներկայացուցիչների, տեղական և միջազգային գործընկերների, տեխնոլոգիական ոլորտի առաջատարների՝ թվային անվտանգության բարձրացման և գործընկերության շուրջ։
Միջոցառումը կազմակերպվել էր Հայաստանի տեղեկատվական համակարգերի գործակալության և Հեռահաղորդակցության միջազգային միության կողմից՝ ՀՀ բարձր տեխնոլոգիական արդյունաբերության նախարարության, տեղական և միջազգային գործընկերների հետ համագործակցությամբ։ Միջոցառման հիմնական նպատակը՝ բարձրացնել ազգային և միջազգային մակարդակով կիբեռդիմակայունությունը, ինչպես նաև ամրապնդել կրիտիկական ենթակառուցվածքների պաշտպանությունը։
Թվային երկխոսության հարթակ
CyberDrill Armenia 2025-ը բացառիկ հնարավորություն էր մասնագետների, կառավարման և անվտանգության ոլորտի ներկայացուցիչների համար՝
● փորձի փոխանակման,
● համակարգման հմտությունների կատարելագործման,
● և համատեղ ռազմավարությունների մշակման միջոցով առավել անվտանգ թվային միջավայր ձևավորելու տեսանկյունից։
Միջոցառման ընթացքում անցկացվել են ինտերակտիվ վարժանքներ և գործնական ուսուցումներ, որոնք ուղղված են եղել կիբեռսպառնալիքներին արձագանքելու հմտությունների զարգացմանը։
Համագործակցություն՝ CERT (Computer Emergency Response Team) -երի միջև
CyberDrill-ի առանցքային նպատակը միջազգային CERT թիմերի և ազգային կառույցների համագործակցության խորացումն էր։
Մասնակիցները կիսվել են տեղեկատվությամբ, ներկայացրել են իրենց փորձը և ստեղծել են երկարատև գործընկերություններ՝ ձևավորելով թվային անվտանգության նոր մակարդակ։
CyberDrill Armenia 2025-ը Հայաստանը վերածել է տարածաշրջանի թվային անվտանգության առաջատար վայրի՝ ընդգծելով երկրի դերը կիբեռանվտանգության գլոբալ համակարգում։
