StaffBlog-ում այսօր հատուկ անդրադարձել ենք ABBYY ընկերությունների խմբի հիմնադիր Դեյվիդ Յանի 2020թ․-ին կորոնավիրուսով պայմանավորված ճգնաժամի հաղթահարման մասին տեսակետներին, որոնք նա հայտնել է YouTube-յան ալիքի նոր թողարկման՝ «Forbes Карантин»-ի եթերում։
Ըստ Դեյվիդ Յանի, կորոնավիրուսի տարածմանը զուգընթաց արագանում է նաև ընկերությունների կորպորատիվ մշակույթի փոխակերպումը։ Այլ կերպ, մարդկությունը թվային փոխակերպման ոլորտում մի քանի տարով առաջ շարժվեց։ Եվ այժմ մեծաքանակ ընկերությունների կողմից տարբեր մեխանիզմներ ու մեթոդներ են մշակվում այս իրավիճակի հաղթահարման համար։
HR-Ի ԴԵՐԸ 2020Թ․ ՃԳՆԱԺԱՄԻՆ
Ամենակարևորն այս ընթացիկ իրադարձություններում վերաիմաստավորումն է այն ամենի, թե ինչպես են մարդիկ աշխատել, ինչով են զբաղվել, ինչ արժեք են ստեղծել իրենց օգտատերերի համար:
Այս իրադրությունը ստիպեց ընկերություններին հասկանալ, որ բիզնեսի ամենագլխավոր ակտիվը մարդիկ են։ ABBYY-ի հիմնադիրը նաև իր ելույթում մեջբերեց արևմտյան առաջատար HR փորձագետ Ջոշ Բերսինի խոսքը, որը նա հայտարարել էր վերջերս վեբինարներից մեկում․
«Եթե 2008 թվականին բիզնեսները փրկվեցին ֆինանսական ոլորտի ղեկավարների շնորհիվ, ապա 2020 թվականի ճգնաժամին ընկերություններին կփրկեն HR ղեկավարները»։
«Նա պատահականորեն չի խոսում այդ մասին։ Բանն այն է, որ հեռահար աշխատանքի արդյունքում թիմերում ակնհայտորեն երևաց, թե ինչպես են մարդիկ որոշումներ ընդունում, ինչպես են համագործակցում, ով է եղել ոչ ֆորմալ լիդեր, և ով է եղել ֆորմալ լիդեր»,- հավելեց Դեյվիդ Յանը։
Վերջին ժամանակներում Ջոշ Բերսինը հաճախ է խոսում այն մասին, որ այս ճգնաժամը լուրջ և էական կոչ էր HR մասնագետների համար։ Ըստ էության, նրանք ստիպված են արտակարգ ռեժիմով փնտրել լուծումներ տարատեսակ հարցերի շուրջ՝ կապված հեռահար աշխատանքի պայմաններում անձնակազմի կառավարման հետ։ Ահա և այդ հարցերից մի քանիսը՝
- Ինչպիսի՞ն պետք է լինեն այժմ օֆիսից դուրս (off-site) հանգստի պայմանները։
- Ինչպե՞ս հեռահար կառավարել թիմերին։ Ի՞նչ գործիքներ կարելի է կիրառել այդ նպատակով։ «Թվային փոխակերպման երկարատև գործընթացն այժմ հանկարծակի արագ տեմպ է ստացել։ Յուրաքանչյուր համակարգ, ցանկացած գործիք պետք է կիրառություն ստանա այս պահին»,- առանձնակի շեշտում է Ջոշ Բերսին։
- Ինչպե՞ս անձնակազմի մոտ ձևավորել հանդուրժողականություն ցանկացած տեսակի «աշխատանքային անհարթությունների» նկատմամբ։
- Ինչպե՞ս է այժմ բաշխվելու HR-ի գործառույթը։
Ըստ ABBYY-ի կողմից իրականացված ուսումնասիրության, 84% որոշումներն ընկերություններում ընդունվում են գործընկերների 3%-ի կողմից և ազդում են ավելի քան 80% աշխատակիցների վրա։ Այս 3%-ը կազմում են ոչ ֆորմալ լիդերները, որոնք շատ հազվադեպ են ամբողջությամբ համապատասխանում ֆորմալ լիդերներին։ Եվ բիզնեսների համար շատ կարևոր է բացահայտել այդ ոչ ֆորմալ լիդերներին, ովքեր ներգրավում են մարդկանց աշխատանքում, ստեղծում են հորիզոնական կապեր և ինքնակրթվող ընկերություն։ Հենց այսպիսի ընկերություններն են դինամիկ զարգանում, որոնք չեն հենվում «Ղեկավարն ասել է, իսկ մյուսները կատարել են» խիստ սկզբունքի վրա։
ԻՆՉՊԵՍ ԿՓՈԽՎԻ ԱՌԱՋՆՈՐԴՈՒԹՅՈՒՆԸ
Դեյվիդ Յանն օնլայն թողարկման ընթացքում կիսվեց նաև առաջնորդության մասին իր տեսակետով և հայտնի մոտեցումներով, մասնավորապես․ «Առաջնորդությունը վերահսկողությունը չէ, այլ լիազորումը (empowerment)»:
«Ես մի քանի անգամ փորձել եմ գտնել empowerment բառի իսկական թարգմանությունը, բայց այդպես էլ չի հաջողվել։ Ամեն դեպքում, արտահայտության իմաստը կայանում է նրանում, որ ժամանակակից առաջնորդությունը դա վերահսկողությունը կամ ուղղահայաց կառավարումը չէ։ Ժամանակակից առաջնորդությունն այն է, երբ ստեղծում ես այնպիսի թիմ, որտեղ յուրաքանչյուրն իրեն զգում է որպես առաջնորդ ինչ-որ չափով, երբ մարդիկ վերցնում են պատասխանատվություն իրենց վրա և ճիշտ են օգտվում այդ հնարավորությունից»։
Այսպիսով, այժմյան կառավարումը կարողությունն է ստեղծելու այնպիսի մթնոլորտ, որտեղ թիմի բոլոր անդամները ներգրավված են աշխատանքում, «Forbes Карантин»-ի եթերում իր խոսքը ամփոփեց Դեյվիդ Յանը։
Աղբյուրը` Forbes
