Շարունակում ենք StaffCoverages մեր սիրելի թողարկումների շարքը։ Եվ այսօրվա մեր այցը Develandoo ընկերության հայաստանյան մասնաճյուղն էր, որը հիմնադրվել է հայ հիմնադիրների կողմից Գերմանիայում։
Առաջին տպավորությունը, որ ստանում ես ընկերությունից, հաճելի, ընկերական միջավայրն է, ազատ հաղորդակցության մշակույթը։ Միանգամից նկատում ես, որ այստեղ մարդիկ աշխատում են սիրով ու կիսում են նույն հոբբիներն ու հետաքրքրությունները։ Ի դեպ 🙂 «Who will kill Daeneryes Targaryen?» այսպիսի հումորային հարցով էլ սկսվեց մեր հարցազրույցը Develandoo թիմակիցների հետ։ Կարծում եմ արդեն պատկերացրեցիք, որ այստեղ նաև Game of Thrones-ի ֆանատ են 🙂
Շնորհակալություն ենք հայտնում Սյուզի Մուրադյանին մեր այցի կազմակերպմանն աջակցելու համար
Մեր մասինԹիմակիցներԲենեֆիթներԼուսանկարներԴե ինչ, սկսենք 🙂
DEVELANDOO ԹԻՄԱԿԻՑՆԵՐ
Ալբերտ Ստեփանյան
Chief Executive Officer
Լենա Կարպովիչ
Senior Recruiter
Աշոտ Հարությունյան
Chief Technology Officer
Սյուզի Մուրադյան
Content Marketing Manager
Լիլիթ Գրիգորյան
Project Manager
Եվգենիա Շուբնիկովա
UX/UI designer
Ժորա Գևորգյան
Data Scientist
Կարեն Խաչատրյան
Android developer
Develandoo ընկերության CEO Ալբերտ Ստեփանյանի հետ, ով մեր այցի ժամանակ Հայաստանում էր, զրուցեցինք ընկերության հիմնադրման պատմության, գործունեության մոդելների մասին։
– Develandoo ընկերությունը, որը համարվում է արհեստական բանականության ինովացիոն լաբորատորիա (AI Innovation lab) և մասնագիտացած է վաղ փուլում ընկերությունների ստեղծման և կառուցման մեջ, հիմնադրվել է 2014 թվականին Մյունխենում։ Ընկերությանը միանալու և ստեղծման գործընթացն արդեն իսկ շատ հետաքրքիր էր և մարտահրավերներով լի:
– 2012 թվականից բնակվում եմ Գերմանիայում և աշխատել եմ այնպիսի մեծ ընկերություններում, ինչպիսիք են Allianz Germany-ն և այլ վենչուրային խմբեր, որտեղ էլ և հանդիպեցի Develandoo-ի համահիմնադիրներ Աշոտ Հարությունյանին և Արմեն Գաբրիելյանին։
– 2014-2016 թվականներին ընկերությունը դեռևս գտնվում էր սաղմնավորման փուլում, իսկ 2016 թվականը շատ բեկումնային տարի էր մեզ համար։ Մենք որոշեցինք թողնել մեր կորպորատիվ աշխատանքները և ամբողջությամբ նվիրվել Develandoo-ի զարգացմանը։ Եվ արդյունքն ակնհայտ էր 🙂
– 2016 թվականից մինչև այսօր տարեկան 200-400% աճ ենք ունեցել թե ֆինանսական, թե աշխատակիցների քանակով։ Այժմ Develandoo-ն ունի մասնաճյուղեր Հայաստանում, Բելառուսում և ԱՄՆ-ում։ Թողարկել ենք 30-ից ավելի պրոդուկտներ և բոլոր մասնաճյուղերը միասին կազմում ենք 100-ից ավելի աշխատակիցներով հզոր թիմ։ Իսկ Հայաստանում մեր թիմը բաղկացած է 60 աշխատակցից՝ ինժեներական, վաճառքի, մարքեթինգի բաժիններով։
Develandoo ընկերությունն ունի հոլդինգային կառուցվածք, որտեղ գործունեությունն իրականացվում է տարբեր մոդելներով։ ITaaS (Innovation Team as a Service/ Նորարարական թիմը` որպես ծառայություն) մոդելի շնորհիվ օգնում են ընկերություններին հասկանալ իրենց տվյալները և ձեռք բերել նոր եկամուտներ՝ օգտագործելով արհեստական բանականությունը: CBaaS (Company Building as a Service/Ընկերության կառուցումը, որպես ծառայություն) մոդելի շնորհիվ աշխատում են ընկերությունների հետ ստեղծման վաղ փուլերում՝ ապահովելով ինժեներական բոլոր կարիքները մինչև պրոդուկտի վերջնական թողարկումը։
Company building as a service-ը հազվադեպ, բայց գործունեության բավականին հետաքրքիր մոդել է։ Կպատմե՞ք այս ուղղությամբ Ձեր հաջողությունների մասին։
– Այո, իհարկե, ինչպես նշեցի 2016 թվականից սկսեցինք մեծացնել ընկերությունը ու մշակեցինք բիզնես մոդել՝ ներկայանալով նաև որպես ինովացիոն լաբորատորիա (innovation lab): Այսինքն՝ մենք ստեղծում ենք ստարտափներ Develandoo-ի, մեծ կորպորացիաների կամ ներդրողների համար գաղափարի ստեղծումից մինչև պրոդուկտի վերջնական թողարկումը։ Եվ բոլոր այդ ստարտափներից 4-5% բաժնետոմսերը պատկանում են Develandoo-ին։
– Այս մոդելի շնորհիվ բարձրանում է ինչպես Develandoo-ի շուկայական գինը, այնպես էլ մեր հարաբերությունները հաճախորդների ու գործընկերների հետ ավելի լոյալ են դառնում։ Այստեղ կարևոր է նշել նաև, որ ամեն ստարտափ ունի իր առանձին թիմը, որը կախված կիրառվող տեխնոլոգիաներից կազմավորվում է կամ մեր աշխատակիցներով, կամ նոր մասնագետներ հավաքագրելով։
Իսկ որո՞նք են այն հաջողակ ստարտափերը, որոնց հիմնադիրը Develandoo-ի նորարար թիմն է։
Ունենք մոտավորապես 4 ստարտափ, որոնք արդեն հաջողության են հասել։
NEON BANKING
Շվեյցարական բանկային խմբերի և Develandoo-ի համատեղ ստարտափը, որը ամենաարագ աճող ստարտափներից մեկն է Շվեյցարիայում ու մրցակից է գերմանական N26 բանկին, որն, ի դեպ, առաջին մոբայլ բանկինգն է։
SCYLLA
Երկրորդը Scylla-ն է՝ հանրությանը սպառնացող վտանգի հայտնաբերման և ազդարարման համակարգ է հիմնված արհեստական բանականության վրա (Threat Detection Engine): Այս պրոդուկտով մենք առաջինն ենք աշխարհում և Scylla-ն հատուկ լուսաբանվել է BBC, Forbes և այլ մեդիաների կողմից։
Մոտ երկուսուկես տարի առաջ սկսեցինք մշակել այս պրոդուկտը՝ ունենալով սոցիալական նպատակ։ Ցանկանում ենք անվտանգ դարձնել ոչ միայն Հայաստանը, այլ նաև ամբողջ աշխարհը։ Scylla համակարգը ներդրվում է բանկերում, հանրային տարածքներում տեսախցիկների վրա՝ հայտնաբերելով ինչպես վնասակար գործիքներ՝ զենք կրող մարդկանց, այնպես էլ բռնի վարքագիծը։
EPICA
Epica-ն, որը CRM-ի հիման վրա արհեստական բանականությամբ աշխատող կանխատեսման համակարգ է (Prediction engine), վերլուծում է լսարանի վարքաձևերը իրական ժամանակում և թույլ է տալիս բացահայտել լավագույն հաճախորդներին։
Այս ստարտափի շրջանակներում ունենք այնպիսի գործընկերներ, ինչպիսիք են՝ Unilever-ը, Master Card-ը, Samsung-ը և այլն։ Epica-ն արդեն մեծ ընկերություն է և խոշոր ներդրումներ է ստացել։
PROTOGEN AI
Չորրորդ ստարտափը, որը թերևս նոր է, բայց կցանկանամ նշել, Protogen-ն է։ Այն բանկային ոլորտում ռիսկերի կրեդիտավորման արհեստական բանականությամբ (AI) հարթակ է, որը կարող է կիրառվել նաև ապահովագրական ընկերություններում։
Ալբերտից հետաքրքիր էր տեղեկանալ ՝ ինչ աշխարհագրություն ունեն Develandoo-ի հաճախորդները և օգտատերերը։
– Ունենք մոտ 16 B2B հաճախորդ, որոնցից 6-ի հետ բաժնետիրական պայմանագրային համագործակցություն է։ Մեր հաճախորդները հիմնականում Գերմանիայից են, Շվեյցարիայից, Ավստրիայից, ԱՄՆ-ից, մասնավորապես, Կալիֆոռնիայից։ Գործընկերներ ունենք նաև Դուբայից, Աֆրիկայից, Հարավային Ամերիկայից և Մեքսիկայից։
Ցանկացած ընկերության հաջողության ճանապարհին առկա են որոշակի մարտահրավերներ, որոնք հաղթահարելով միայն հնարավոր է հասնել թոփ արդյունքի։ Ինչպիսի՞ դժվարությունների եք հանդիպել Դուք Develandoo-ում։
– Նոր հիմնադրման ժամանակ հիմնական խնդիրը ճանաչելիությունն էր։ Քանի որ մենք ծագումով հայ էինք, մի քիչ ավելի դժվար էին մեզ հետ համագործակցում։ Բայց գերմանական շուկայում ցույց տալով որակ թե հաճախորդների սպասարկման, թե աջակցման ոլորտում, ցույց տալով մեր առավելությունները լոկալ ընկերությունների նկատմամբ ՝ մենք հաղթահարեցինք այդ խոչընդոտը։ Մեզ միանշանակ օգնում էր նաև այն փաստը, որ բնակվում ենք Գերմանիայում։ Եվ այսպես էլ սկսվեց ընկերության արագ աճը։ 2016թ․-ից սկսած վաճառքի հետ կապված ընդհանրապես խնդիրներ չենք ունեցել։
– Մեզ համար նաև մարտահրավեր էր Հայաստանում թիմ հավաքագրելը։ Ի սկզբանե, մենք Հայաստանում ներդրեցինք գերմանական կորպորատիվ մշակույթը, որն այդքան էլ չէր համապատասխանում տեղականին։ Մենք անգամ ներգրավվածություն չունեինք ներքին օղակներում, լինի դա Աչաջուրը, Լոֆթը, միթափները, ինչն էլ, իհարկե, խանգարում էր մասնագետների հավաքագրմանը։ Բայց այսօր շուկայում արդեն մեզ ճանաչում են, գիտեն, որ արհեստական բանականության ոլորտում առաջատարն ենք ու ցանկանում են աշխատել մեզ մոտ։
Կնշե՞ք այնպիսի միջազգային նվաճում, որի շնորհիվ Ձեր ընկերությունն էլ ավելի ճանաչելի դարձավ թե Հայաստանում, թե գլոբալ աշխարհում։
– 2018թ․ մենք, ըստ Clutch.co-ի, ճանաչվել ենք Գերմանիայի թոփ ընկերություններից մեկը՝ որպես արհեստական բանականությամբ B2B ծառայություններ մատուցող։ 80 մլն․-ից ավելի բնակչություն ունեցող Գերմանիայում տասնյակի մեջ լինելը շատ լուրջ արդյունք էր մեզ համար։
Իսկ վերջում Ալբերտի հետ զրուցեցինք հայաստանյան շուկայի հետ կապված համագործակցության պլանների մասին։
– Մենք Հայաստանում կոնսորցիում սարքելու տեսլական (vision) ունենք, այսինքն` ընկերությունների միավորում, որոնցից ամեն մեկը թիրախային (niche) ծառայություններ է մատուցում կամ թիրախային (niche) պրոդուկտներ ունի։ Ու առաջին համագործակցությունը եղել է Digitain-ի հետ։ Վերջերս կնքեցինք բացառիկ պայմանագիր, ըստ որի ՝ մեր պրոդուկտները ՝ Epica-ն, Protogen-ը, ներդրվելու են Digitain-ի հիմնական հարթակի մեջ, ու ապահովելու ենք իրենց արհեստական բանականությամբ (AI) կանխատեսումները, որը Digitain-ին կառանձնացնի իր մրցակիցներից թե՛ Հայաստանում, թե՛ Հայաստանից դուրս։
– Բանակցում ենք Պաշտպանության նախարարության և Ոստիկանության հետ Scylla-ի ինտեգրման համար։ Այս առումով փոքր-ինչ աջակցության կարիք ունենք, քանի որ բանակցությունները դանդաղ են ընթանում։ Նաև ծրագրեր ունենք Հայաստանում բացել «Ավտոմատացված մեքենաների գերազանցության կենտրոն» (Autonomous driving excellence centre) գերմանական ավտոպրոմի ներկայացուցիչների հետ համատեղ, ինչը մեզ թույլ կտա պատրաստել մասնագետներ անմիջապես ինքնավար ավտոմեքենաների ոլորտում։
Մեր հաջորդ զրուցակիցը Develandoo ընկերության CTO Աշոտ Հարությունյանն էր։ Աշոտը մեզ պատմեց ընկերությունում օգտագործվող տեխնոլոգիաների խմբի և տեխնիկական թիմի կառուցվածքի մասին։
– Develandoo-ում մենք օգտագործում ենք տարբեր տեխնոլոգիաներ՝ կախված պրոդուկտներից, բայց բոլորն էլ tech աշխարհում մեծ հանրաճանաչություն են վայելում։ Այլ կերպ ասած, հիմնականում օգտագործում ենք այն տեխնոլոգիաները, որոնք երկարաժամկետ աջակցություն ունեն։
– Ինչ վերաբերվում է մեր տեխնիկական թիմին, մեզ մոտ հրաշալի վայր է սովորելու համար։ Աշխատանքում ներգրավում ենք ինչպես փորձառու մասնագետների, այնպես էլ սկսնակ և միջին։ Ավագ ծրագրավորողները միշտ հանդես են գալիս նոր տեխնոլոգիաների առաջարկներով պրոդուկտները զարգացնելու և նորացնելու համար, ինչպես նաև պատասխանատու են տեխնոլոգիական որոշումներ կայացնելու համար, իսկ սկսնակ մասնագետները շնորհիվ փորձի փոխանակման ազատ հնարավորությունների, ձեռք են բերում նոր գիտելիքներ և ունենում կարիերայի աճ։
– Իհարկե, լինում են դեպքեր, երբ Հայաստանում ռեսուրսներ չենք գտնում և դիմում ենք մեր արտասահմանյան գործընկերներին առաջատար տեխնոլոգիաների բացը լրացնելու համար։
Neon Banking, Scylla, Epica՝ այն պրոդուկտներն են, որոնք մեծ ճանաչում ունեն այսօր։ Իսկ ինչ գործընթացով է իրականացվում պրոդուկտի ստեղծումը և որն է հաջողության հիմնական գաղտնիքը։
– Պրոդուկտների հաջողությունը հիմնված է տեխնիկական թիմի վրա, այսինքն` եթե չլինի տեխնիկական ճիշտ լուծում, չեն լինի նաև հաճախորդներ, աշխատող պրոդուկտ և այլն։ Այսինքն` մեր գործընկերության և հաջողության հիմքում մեր տեխնիկական թիմն է։
– Սկզբում կնքում ենք գործընկերություն, որից հետո նախագծում ենք պրոտոտիպը, որը և հաստատվում է հաճախորդների կողմից։ Արդյունքում սկսում ենք մշակել ու թողարկում ենք MVP (minimum viable product), այսինքն` այդտեղ արդեն ամեն ինչ աշխատում է, բայց մինիմալ ձևով։ Եվ մենք շարունակ ավելացնում ենք նոր հնարավորություններ և զարգացնում պրոդուկտը։
Իսկ մասնագիտական աճի՝ հորիզոնական և ուղղահայաց, ինչպիսի՞ հնարավորություններ կան աշխատակիցների համար։
– Develandoo-ում մասնագիտական աճի համար չափազանց մեծ հնարավորություններ կան, ինչպես ուղղահայաց, այնպես էլ հորիզոնական։ Թիմային մշակույթը մեզ մոտ այնպես է ձևավորված, որ սկսնակ ծրագրավորողները կարող են ցանկացած հարցով դիմել ավագ մասնագետներին, ուղղություն ստանալ և արդյունքում ձեռք բերել նոր գիտելիքներ։ Տրամադրում ենք նաև վիդեոկուրսեր, գրքեր, օնլայն դասընթացներին մասնակցելու հնարավորություն։ Ես ինքս միացել եմ ընկերությանը 4 տարի առաջ եւ զբաղեցնում եմ Գլխավոր տեխնիկական տնօրենի պաշտոնը։
– Հորիզոնական աճի տեսանկյունից մեր ընկերությունը նաև առանձնանում է շուկայում նրանով, որ մենք նոր ստարտափներ ենք ստեղծում, որոնցից ամեն մեկը կարող է աշխատել տարբեր տեխնոլոգիաներով։ Ու մեր աշխատակիցները հնարավորություն ունեն միանգամից տեղափոխվել (shift) և այլ պրոդուկտի վրա աշխատել։
Սյուզիի հետ, ով զբաղվում է Կոնտենտ մարքեթինգի ռազմավարության մշակմամբ և իրականացմամբ, խոսեցինք ընկերության հիմնարար արժեքների մասին։
– Develandoo՝ The land of developers կամ, եթե թարգմանեմ «Ծրագրավորողների երկիր» 🙂 ստեղծվել է 3-4 հոգուց բաղկացած թիմով։ Մենք նպատակ ենք ունեցել հավաքագրել շատ ամուր թիմ ու դա մեզ մոտ ստացվել է, այսօր հասել ենք շատ լավ ցուցանիշի։ Այս ամենը նաև նրա շնորհիվ է, որ մենք՝ որպես շատ հստակ սկզբունք, ընդունում ենք թիմային աշխատանքը։ Այստեղ ուշադրություն են դարձնում աշխատակիցների աճին, հետևում են տարբեր մակարդակներում, մարտահրավերներ են դնում թիմակիցների առաջ, փորձում են կոմֆորտ զոնայից հանել։ Եվ միմյանց աջակցելով էլ ստեղծվել և ստեղծվում է այս հետաքրքիր թիմային միջավայրը։
Այսօր շատ մասնագետներ ցանկանում են անցում կատարել tech ոլորտ։ Ինչո՞վ է առանձնանում այս ոլորտը և ինչպիսի՞ մարտահրավերներ կան այս ճանապարհին։
– Develandoo-ն իմ առաջին մուտքն է tech ոլորտ, ինչի համար իսկապես շատ ուրախ եմ։ Այստեղ զբաղվում եմ կոնտենտ մարքեթինգի աշխատանքով, որին օգնում է որպես լրագրող իմ մասնագիտությունը։ Ամենամարտահրավերային մասն այս ոլորտի այն է, որ պետք է անընդհատ նորամուծություններ, նորարարություններ անել, քայլել տեխնոլոգիական աշխարհի զարգացումներին համընթաց, որպեսզի թե հետաքրքիր լինի մարդկանց համար, և թե էլ ավելի օգտակար լուծումներ տրամադրենք տարբեր ոլորտներում։
Մեր հարցին, թե ինչ խորհուրդներ կտաք այն մարդկանց, ովքեր ցանկանում են անցում կատարել tech ոլորտ, Սյուզին պատասխանեց․
– Կարծում եմ, որ պետք չէ վախենալ փոփոխություններից, որովհետև ինչպես ասում են՝ ռիսկը գործի կեսն է ։): Բավականին մարտահրավերային ոլորտ է, բայց շատ հետաքրքիր ու հեռանկարային։ Գաղտնիք չէ, որ ՏՏ-ն ամենաեկամտաբեր ոլորտներից է, եւ Ազգային վիճակագրական ծառայությունն այն ներառել է ամենաբարձր վարձատրվող ոլորտների հնգյակում։ Այնուամենայնիվ, ես խորհուրդ կտամ չգայթակղվել այս հանգամանով եւ գալ ՏՏ ոլորտ զուտ հետաքրքրությունից, ցանկությունից դրդված։
Develandoo-ի կորպորատիվ մշակույթի մասին շարունակեցինք զրույցը UI/UX դիզայներ Ժենյայի հետ, ով արդեն շուրջ մեկ տարի աշխատում է ընկերությունում։
– Այստեղ մարդիկ շատ ընկերական են։ Երբ աշխատանքի ես գալիս, ասես ընտանիքում լինես։ Ցանկացած հարցով, եթե մոտենամ մեր թիմակիցներին, իրենք միանգամից օգնում են, կիսվում խորհուրդներով։ Կորպորատիվ մշակույթն ընկերական միջավայրն է։
– Միասին գնում ենք լանչի, ամեն ամիս կորպորատիվ հավաքույթներ ենք ունենում, որտեղ մեր ղեկավարությունը ներկայացնում է՝ ինչ հաջողություններ ենք ունեցել այդ ամիս, և մենք տեսնում ենք այն ուղիները, որոնց ձգտում է մեր ընկերությունը։ Եվ մենք բոլորս միասին ենք ձգտում զարգացման այն կետին հասնել, որն ընտրել է ընկերությունը։ Շատ կարևորում ենք նաև այն, որ մենք մեզ թիմի մի մասն ենք զգում, ինչը կորպորատիվ ոգին է ձևավորում և բարձրացնում աշխատանքի մոտիվացիան։
Մեր կորպորատիվ մշակույթի հիմնաքարերից է նաև բաց հաղորդակցության մշակույթը (Open Communication Culture)-ը, երբ մենեջմենթը բաց է թիմակիցների հետ հաղորդակցվելու համար։
Իսկ 3 բառով ինչպե՞ս կնկարագրեք Develandoo ընկերությունը։
Ընկերության լոգոն երեք գույներից է բաղկացած՝ կարմիր, սպիտակ և սև։ Եվ երբ ինձ հարցնում են՝ ինչ բառերով կնկարագրեմ ընկերությունը, միանգամից մտաբերում եմ լոգոյի երեք գույները: Develandoo-ի եռագույնը իմ ամենօրյա աշխատանքի անբաժան մասնիկն է 🙂
Develandoo-ում մենք չէինք կարող չանդրադառնալ մեր ավանդական հարցին՝ որն էր ամենահետաքրքիր բացահայտումը Ձեզ համար, որն իմացել եք աշխատանքի ընդունվելուց հետո։Այս հարցի շուրջ մենք հետաքրքիր զրույց ունեցանք Android ծրագրավորող Կարենի հետ։
– Աշխատանքի ընդունվելուց հետո ամենահետաքրքիր բացահայտումն ինձ համար այն էր, որ այստեղ բոլորս կիսում ենք նույն հոբիները, հետաքրքրությունները։ Բացի այն, որ պրոդուկտները նույնպես գրավիչ են, աշխատում եմ այնպիսի թիմակիցների հետ, ովքեր սիրում են շախմատ խաղալ, Game of Thrones են նայում, Մարվելի ֆանատ են։ Լանչից հետո նույնիսկ հերթ է գոյանում շախմատի սեղանի մոտ։
Կարենը նաև կիսվեց պոտենցիալ թիմակիցներին ուղղված խորհուրդներով՝
Այն մասնագետներին, ովքեր հետաքրքրված են միանալ մեր թիմին, խորհուրդ եմ տալիս հետևել Develandoo-ի նորություններին, աշխատանքի հնարավորություններին, միշտ աշխատեն իրենց վրա և տեղեկացված լինեն տեխնոլոգիական աշխարհի նոր զարգացումներին, որովհետև նոր տեխնոլոգիական հնարավորությունների թողարկումից հետո մենք անմիջապես սկսում ենք աշխատել այդ ուղղությամբ և կիրառել մեր աշխատանքում։
Լիլիթը, ով զբաղվում է ՏՏ ոլորտում մեծ պահանջարկ ունեցող աշխատանքով՝ նախագծերի կառավարմամբ (Project management), խոսեց այն մարտահրավերների մասին, որոնց հանդիպել է աշխատանքում և այսօր հաջողությամբ հաղթահարել է։
– Develandoo-ին միացել եմ մի քանի ամիս առաջ։ Անկեղծ կլինեմ․․։) Մշակույթի մասով շատ նոր էր ինձ համար, շատ բազմազան (diverse), պահանջկոտ, բայց ինչն էլ իհարկե, շատ հետաքրքիր է դարձնում աշխատանքը, այսինքն` ոչ միայն պրոդուկտ մենեջմենթի մեջ ես հմտանում, այլ նաև մարդկանց կառավարման (people management):
– Իսկ ամենադժվար մասը թիմին ինտեգրումն էր, շատ challenging էր աշխատել պահանջկոտ ծրագրավորողների հետ, քայլել տեխնոլոգիաներին համընթաց։
Ամեն դեպքում ցանկացած մարտահրավեր հաղթահարելի է զվարճալի, ստեղծարար և համագործակցող թիմակիցների հետ։ Ազատ շփումը թե ընկերության ներսում, թե հաճախորդների հետ ամենաբարձր մակարդակի վրա է։ Այստեղ ոչ մի օղակ սահմանափակված չէ առաջարկներ անելու, ինչ-որ բաներ փորձելու, լավագույն տարբերակը գտնելու համար, ինչն էլ տանում է պրոդուկտների զարգացմանը։
Նախագծերի կառավարման գործիքներից խոսելիս, Լիլիթը ավելացրեց՝
– Նախագծերի կառավարման (Project management)-ի որևէ հստակ մեթոդաբանություն առանձնացնելն այդքան էլ հեշտ չէ։ Քանի որ նախագծերը տարբեր են, տարբեր են նաև գործիքները՝ կախված անհրաժեշտությունից և նախագծի առանձնահատկություններից։
– Օրինակ, այժմ աշխատում ենք բավականին ամբիցիոզ պրոդուկտի վրա, որը շուտով կթողարկվի։ Կիրառում ենք agile-ի տարբեր գործիքներ՝ Scrum-ից և Kanban-ից վերցրած մի քանի մոտեցումներ, որոնք ավելի մոտ են ընկերության ընդհանուր պատկերացումներին և թիմային մշակույթին։
Հայաստանում tech ոլորտը բուռն կերպով աճում է ու ընկերությունները, որոնք առաջարկում են տվյալագետի աշխատանք, օրեցօր ավելանում են։ Ժորայից հետաքրքիր էր իմանալ՝ ինչով է պայմանավորված Develandoo-ի՝ որպես գործատու ընտրությունը։
Մասնագիտությունս Computer Vision-ն է, և Develandoo-ն՝ որպես ընկերություն, գրավիչ էր ինձ համար թե պրոդուկտով, թե տեխնոլոգիական առումով։ Այստեղ միայն Data Science-ի գործերով չեմ զբաղվում, այսինքն տվյալների որոնմամբ (research), այլ նաև ներգրավված եմ ծրագրավորման մյուս աշխատանքներում։
Ժորայի հետ զրուցեցինք նաև այն տեխնոլոգիական նորույթների մասին, որոնց ներդրման մեջ ինքն անմիջական մասնակցություն ունի։
– Նախագիծը, որի վրա հիմա աշխատում եմ, Scylla-ն է։ Այս պահին ունենք ամենաարագ ու ամենալավ օբյեկտների բացահայտման (object detection) համակարգը, որն աշխարհում միակն է իր մշակվածությամբ։ Արագությունը բարելավել ենք ոչ թե open source-ով, այլ մեր ալգորիթմներով։ Այն հիմնված է GB Programming-ի վրա, որտեղ էլ իմ ներդրումը մեծ է եղել։
– Առաջիկայում նաև նախատեսվում է գործուղում Գերմանիա Scylla պրոդուկտի զարգացման հետ կապված և ծրագրեր կան, որ անվտանգության ցանկացած սպառնալիքի դեպքում օբյեկտների բացահայտում լինի։
DEVELANDOO ԸՆԿԵՐՈՒԹՅԱՆ ՌԵՔՐՈՒԹՄԵՆԹԻ ՄԱՍԻՆ
Ռեքրութմենթի առանձնահատկությունների մասին շարունակեցինք մեր զրույցը Senior Recruiter Լենա Կարպովիչի հետ, ով զբաղվում է Develandoo-ի բոլոր ներկայացուցչությունների՝ ԱՄՆ-ի, Բելառուսի և Հայաստանի թիմերի հավաքագրման գործընթացներով։
– Ռեքրութմենթի գործընթացը սկսում ենք թափուր աշխատատեղերի համար CV-ների հավաքագրումից, որոնց հայտարարությունները կարող են գտնել staff.am և մեր կայքում ու սոց․ մեդիա աղբյուրներում՝ Facebook, LinkedIn: Այնուհետև որոշում ենք հավանական թեկնածուներին որոշակի չափանիշներով և ծանուցում հավանության արժանացած մասնագետներին։ Ընդհանրապես, մենք ապահովում ենք հետադարձ կապ բոլոր թեկնածուների հետ ՝ անկախ նրանից իրենք համապատասխանում են հաստիքներին, թե ոչ։ HR մասնագետի հետ հարցազրույցից հետո տեխնիկական առաջադրանք ենք տալիս, որից հետո լավագույնների հետ կազմակերպվում է տեխնիկական հարցազրույց։ Վերջնական որոշումը կայացնում ենք՝ հաշվի առնելով մի շարք գործոններ։
Մասնագիտական, թե՞ սոֆթ․ որ հմտություններն եք առավել կարևորում ռեքրութմենթի ժամանակ։
Շատ-շատ հետազոտություններ կան այս թեմայով։ Վերջերս Հարվարդի համալսարանը կազմել էր իդեալական հաջողակ թեկնածուի կերպարը, ով ուներ 80% սոֆթ և 20% մասնագիտական հմտություններ։ Մենք, իհարկե, հաշվի ենք առնում և՛ սոֆթ, և՛ մասնագիտական հմտությունները։ Ինչպես գիտենք, բոլոր ճանաչված պրոդուկտները՝ Apple, Google, թիմային աշխատանքի արդյունք են, և Develandoo-Ն էլ բացառություն չէ։ Որպեսզի ճիշտ հասկանալ թիմին, ճիշտ հարցեր տալ և ներգրավվել աշխատանքում, միջանձնային հմտությունները շատ կարևոր են։ Եվ այստեղ էլ առաջնային ենք համարում, որ թեկնածուի և ընկերության մշակույթը միմյանց համապատասխան լինեն, որպեսզի թեկնածուին նույնպես հարմարավետ լինի մեր ընկերությունում և դուր գա այն, ինչի վրա աշխատում է։
– Այժմ նաև ներդրում ենք նոր գործընթաց՝ Անհատական կարիերայի պլան։ Մենք ցանկանում ենք, որպեսզի մեր աշխատակիցները մասնագիտական աճ ունենան Develandoo-ի հետ, որպեսզի զարգացնեն իրենց գիտելիքները հստակ կարիերայի աստիճան ունենալու համար։ Այս գործընթացին զուգընթաց կլինի նաև աշխատավարձի աճ։
Իսկ Հայաստանի գրասենյակի ռեքրութմենթը իրականացվում է գլխամասի՞ց, թե այստեղից են աշխատանքները համակարգվում։
– Աշխատանքս այնպիսին է, որ աշխատում եմ և՛ Գերմանիայում, և՛ Բելառուսում, և՛ Հայաստանում, բայց քանի որ այստեղի հավաքագրման ծավալներն ավելի մեծ են, ես աշխատում եմ հիմնականում լինել Հայաստանում։ Ունենք նախագծեր, որոնց հաճախորդները նախընտրում են մասնագետների հետ աշխատել անմիջապես իրենց գրասենյակում։ Այս դեպքում մենք կազմակերպում ենք մեր աշխատակիցների գործուղումը։ Օրինակ, այս պահին մեր թիմակիցներից մեկը գտնվում է Գերմանիայում այդ նպատակով։
Իսկ վերջում Լենայի հետ խոսեցինք Հայաստանի աշխատաշուկայի մասին այլ երկրների հետ համեմատությամբ՝
Շատ մեծ շուկա է Հայաստանում։ Բավականին շատ երիտասարդ կադրեր իրենց կարիերան սկսում են tech-ում՝ ապագան տեսնելով այս ոլորտում։ Անընդհատ տեխնոլոգիաները զարգանում են ու մասնագետներն էլ են ձգտում համընթաց քայլել, զարգանալ, աճել։ Մեր ընկերությունն ավելի շատ AI պրոդուկտների վրա է աշխատում։ Եվ ես նկատում եմ, որ Հայաստանում նույնպես այդ տենդենցն է․ ուսումնասիրում են մեքենայական ուսուցման, computer vision-ի տեխնոլոգիաները։
DEVELANDOO ԱՇԽԱՏԱԿԻՑՆԵՐԻՆ ՏՐԱՄԱԴՐՎՈՂ ԲԵՆԵՖԻԹՆԵՐԸ
Խաղերի սենյակ,
Առողջության ապահովագրություն,
Վճարվող sick leave օրեր,
Վճարվող ֆիզարձակուրդ,
Անգլերեն կամ գերմաներեն դասընթացներ,
Տեխնիկական ոլորտի թրեյնինգներ,
Գործուղումներ Գերմանիա կամ ԱՄՆ,
Տեխնիկական ոլորտի գրադարան,
Անվճար գարեջուր,
Եզակի աշխատանքային միջավայր, որտեղ կարելի է և՛ շփվել, և՛ աշխատել,
Գիտելիքների փոխանակման և ինքնազարգացման լայն հնարավորություններ,
Մրցունակ աշխատավարձ,
Ջերմ միջավայր:
Develandoo-ում գիտելիքների փոխանակման և ինքնազարգացմանը մեծ ուշադրություն են դարձնում։ Վերջերս հրավիրված էր մեդիափորձագետ Սամվել Մարտիրոսյանը կիբեռանվտանգության մասին խոսելու և իր փորձով կիսվելու համար։ Փորձի փոխանակման ծրագրի շրջանակներում հյուրեր են լինում նաև այլ երկրներից՝ Կորեայից, Ճապոնիայից։
ԸՆԿԵՐՈՒԹՅՈՒՆԸ ԼՈՒՍԱՆԿԱՐՆԵՐՈՒՄ
Գաղափարների ստեղծման, իրականացման ու զարգացման մեջ սահմաններ չճանաչող այս ընկերությունը շարունակում է զարմացնել աշխարհին իր նորարարություններով։ Այստեղ են ձևավորվում նոր ընկերությունները, հեղափոխում հանրության ֆիզիկական անվտանգության մասին պատկերացումները, հեշտացնում մարդկանց կյանքը։
Ու այս բոլոր հաջողությունները ուժեղ տեխնիկական թիմի, ընկերական մշակույթի, հստակ մշակված թիմային աշխատանքի շնորհիվ է։ Մենեջմենթ և աշխատակիցներ ազատ հաղորդակցման շնորհիվ էլ ամեն գաղափար արժևորվում է, իսկ նոր տեխնոլոգիաները՝ անմիջապես կիրառվում պրոդուկտներում։
Հաջողություն ենք մաղթում Develandoo-ին իր հետագա աշխատանքներում և վստահ ենք, որ նվաճումների մասին դեռ շատ կխոսենք։
