Հոկտեմբերի 13-ին մեկնարկեց այդքան սպասված՝ տարածաշրջանի ամենամյա խոշորագույն տեխնոլոգիական իրադարձությունը՝ 18-րդ DigiTec Expo 2023 I Reboot համաժողովը և նույնանուն տեխնոլոգիական ցուցահանդեսը, որն այս անգամ անցկացվում է «Մերիդիան» էքսպո կենտրոնում։ Միջոցառումն անցկացվելու է 3 օր՝ մինչև հոկտեմբերի 15-ը, և staffmedia.am-ը` որպես «ԴիջիԹեք 2023»-ի մեդիա գործընկեր, ձեզ կներկայացնի յուրաքանչյուր օրվա ամենաուշագրավ իրադարդություններն ու կփոխանցի թեք-տրամադրությունը։
Ցուցահանդեսի խորագիրն է «Tech Fusion: Connecting ideas, Transforming industries», իսկ առանցքային թեման տեխնոլոգիաների ազդեցությունն է տնտեսության և հասարակական կյանքի տարատեսակ ոլորտների վրա՝ կրթությունից մինչև բժշկություն։ Առաջին օրվա ուղղվածությունը B2B-ն է. ցուցահանդեսին մասնակցող շուրջ 100 խոշոր տեխնոլոգիական ընկերություններն ու ստարտափները ծանոթանում ու միավորվում էին։
Օրն սկսվեց բացման պաշտոնական արարողությանից. առավոտյան հյուրերին դիմավորեց և էքսպոյի մանրամասները ներկայացրեց ԴիջիԹեքի կազմակերպիչ Առաջատար տեխնոլոգիաների ձեռնարկությունների միության (ԱՏՁՄ) գործադիր տնօրենի ժամանակավոր պաշտոնակատար Սարգիս Կարապետյանը։
«ԴիջիԹեքը համախմբում և արտացոլում է Հայաստանի տեխնոլոգիական ներուժը, ձեռքբերումներն ու ապագան: Այստեղ այցելուները ծանոթանում են տեխնոլոգիական զարգացման գլոբալ տենդենցներին, ոլորտի ներկայացուցիչները ցուցադրում են իրենց նորարական լուծումները, գործարար շփումների ու նոր հնարավորությունների եզրեր են փնտրում և պարզապես՝ տոնում ոլորտային հաջողությունները», – նշում են ԴիջիԹեքի կազմակերպիչները։
Ներկայացված ընկերությունների շարքերում են ինչպես ՏՏ, ֆինանսաբանկային, կրթական, հեռահաղորդակցության, լոգիստիկայի և այլ ոլորտների գիգանտները և փոքր ու միջին ընկերությունները, այնպես էլ մի շարք ստարտափներ. Startup Alley-ում շուրջ 30 ստարտափ է ներկայացնում է իր գաղափարը և հայկական տեխնոլգիայի ներուժը։ Ստարտափների մի մասը միասնական տաղավարով ներկայացված է ՀՀ բարձր տեխնոլոգիական արդյունաբերության նախարարության հովանու ներքո։
«Մեր տաղավարում 12 ստարտափ ենք ներկայացնում. դրանք հիմնականում այն ստարտափներն են, որոնք ֆինանսական աջակցություն են ստացել նախարարությունից։ Այս ձևաչափն արդեն ընդունված է՝ թե՛ տեղական, թե՛ միջազգային շուկայում ներկայանալու համար։ Մենք աջակցում ենք, «աճեցնում» ենք ստարտափը, օգնում ենք, որ ներկայացված պրոդուկտը՝ տեղական, իսկ այնուհետև միջազգային շուկայում իր տեղը գտնի։ Բացի այդ, մեր տաղավարում ներկայացնում ենք այն ծրագրերն ու միջոցառումները, որոնք նախարարությունն է իրականցնում, պատասխանում ենք քաղաքացիներին հուզող հարցերին՝ նախարարության աջակցությունը տարբեր ձևաչափերով ստանալու վերաբերյալ», – պատմում է ՀՀ բարձր տեխնոլոգիական արդյունաբերության նախարարության շուկայի զարգացման վարչության պետ Տաթևիկ Սողոմոնյանը։
Նրա խոսքով՝ այս ԴիջիԹեքն ավելի ակտիվ է, մասնակցությունը մեծ է, ամեն ինչ շատ լավ է կազմակերպված, ցուցահանդեսն էլ մասնավոր և պետական սեկտորների միջև համագործակցության հրաշալի օրինակ է։
Ցուցահանդեսի հատվածից զատ, ԴիջիԹեքի կարևոր բաղկացուցիչ մաս են նաև պանելային քննարկումները և «բաց խոսափողները», որոնք հնարավորություն են ընձեռում վերհանելու ու քննարկելու ոլորտի առաջնահերթ խնդիրները։ Առաջին օրվա ամենաուշագրավ քննարկումն ուղղված էր համալսարանների միջև զարգացող համագործակցությանը. մասնակցում էին Ագրարային, Ամերիկյան, Ֆրանսիական և Սլավոնական համալսարանների ռեկտորները։
Օգոստոսի 29-ին ԱՏՁՄ գործադիր տնօրենի ժամանակավոր պաշտոնակատար Սարգիս Կարապետյանը և staff.am տնօրեն Նազելի Բադալյանը կնքեցին համագործակցության նոր հուշագիր, որի համաձայն ԴիջիԹեքի օրերին գործում է Կարիերայի հատուկ հարթակը, որը բաց է ոչ միայն տեխնոլոգիական ցուցահանդեսի մասնակից ընկերությունների, այլ նաև ԱՏՁՄ անդամ ընկերությունների համար։ Աշխատանքի հայտարարությունները կարելի է հրապարակել հարթակում մինչև ցուցահանդեսի ավարտը, իսկ թափուր հաստիքները տեսանելի կլինեն բոլոր օգտատերերին մինչև նոյեմբերի 1-ը։
Հետևեք staffmedia.am-ին ու տեղեկացեք «ԴիջիԹեք 2023»-ի ամեն օրվա ուշագրավ նորություններից և անցուդարձից։
