Հոկտեմբերի 13-15-ը Մերիդիան էքսպո կենտրոնում կայանալիք Digitec23 տեխնոլոգիական ցուցահանդեսում բացառվելու են բոլոր ժամանցային միջոցառումները, այդ թվում՝ Afterparty-ն և գալա ընթրիքը։ Դիջիթեքի բովանդակությունը լինելու է միա՛յն ձեռնարկատիրական՝ միջազգային մամուլի միջոցով ևս մեր ներուժը ցույց տալու, աշխատատեղերի հնարավորությունները բացահայտելու համար։
Գիտակցելով, որ անկախ իրավիճակի բարդությունից, տնտեսությունը պետք է գործի, որպեսզի կարողանանք հաղթահարել այս դժվարությունները, մեր թիմը շարունակում է ռազմավարական ուղղությունների և տնտեսության հիմքերն ամուր պահող միջոցառումները։
Ամենին զուգահեռ, մեր թիմում մարդկային, մտավոր և ֆինանսական միջոցներ են ուղղվում Արցախից բռնի տեղահանված մեր հայրենակիցներին օգնելու համար։
Ակնկալում ենք բոլորի աջակցությունը և ակտիվ մասնակցությունը՝ միջազգային հանրությանը ցույց տալու, որ անկախ դժվարություններից Հայաստանի տեխնոլոգիական ոլորտը շարունակում է գործել և վստահելի գործընկեր է:
ասվում է Առաջատար տեխնոլոգիաների ձեռնարկատիրությունների միությունից ստացված հաղորդագրությունում։
Նշենք, որ այս տարի օգոստոսի 29-ին «Դիջիթեք 2023» տեխնոլոգիական ցուցահանդեսին ընդառաջ Առաջատար տեխնոլոգիաների ձեռնարկությունների միության (ԱՏՁՄ) և staff.am-ի միջև կնքվել է համագործակցության հուշագիր, որը հնարավորություն է ընձեռում տեխնոլոգիական ցուցահանդեսի մասնակից ընկերություններին իրենց թափուր հաստիքներն անվճար հիմունքներով հրապարակելու staff.am-ի կողմից հատկացված միասնական հարթակում։
Նշենք նաև, որ այս համաձայնագրի շրջանակում Կարիերայի հատուկ հարթակը, որը հասանելի է staff.am/digitec23 հղմամբ, բաց կլինի տեխնոլոգիական ցուցահանդեսի մասնակից ընկերությունների և ԱՏՁՄ անդամ ընկերությունների համար, որոնք կարող են հայտարարությունները հրապարակել հարթակում մինչև «Դիջիթեք 2023» տեխնոլոգիական ցուցահանդեսի ավարտը, իսկ թափուր հաստիքները տեսանելի կլինեն բոլոր օգտատերերին մինչև նոյեմբերի 1-ը։
