StaffBlog-ի այս նախագծի նպատակն է օգնել աշխատանք փնտրողներին լավագույնս ներկայանալ ցանկալի գործատուին։ Ստորև ուրախ ենք ներկայացնել STDev ընկերության ՄՌ ղեկավար Հայկուհի Պողոսյանի օգտակար խորհուրդները CV կառուցման մասին։
ՀԱՅԿՈՒՀԻ ՊՈՂՈՍՅԱՆ
STDev ընկերության ՄՌ Ղեկավար
Ինչպես ասում են աշխատանք փնտրելը նույնպես աշխատանք է։ Եվ այդ աշխատանքի անբաժանելի և կարևորագույն մաս է կազմում ինքնակենսագրական գրելը։ CV գրելու համար հատկացրեք ժամանակ, գործատուներին ու կրթական հաստատությունները պարզապես թվարկելը բավարար չէ։
Քննարկենք, թե ինչպիսի տեսք պետք է ունենա գրագետ կազմված CV -ն, և ինչ սխալներից է պետք խուսափել նման գործում։
CV կազմելիս պետք է ուշադրություն դարձնել և՛ ձևին, և՛ բովանդակությանը։
CV օպտիմալ երկարությունը 2 A4 էջն է։ Ցանկալի է CV-ն ուղարկել PDF ֆորմատով։
Հավաստիացեք, որ նշել եք կոնտակտային տվյալներ։ Հաճախ թեկնածուները մոռանում են նշել կամ էլ․ հասցեն, կամ հեռախոսահամարը։
CV-ն սկսեք կարճ ամփոփումից՝ նշելով Ձեր հիմնական հմտությունները և նկարագրելով Ձեր մասնագիտական պրոֆիլը։ Սակայն խուսափեք շատ ընդհանրական ձևակերպումներից։
Հաջորդիվ հարկավոր է նշել աշխատանքային փորձը՝ սկսելով վերջին, և ոչ թե առաջին գործատուից։
Նկարագրեք Ձեր պարտականություններն ու ձեռքբերումները այդ հաստիքում։ Եթե կարող եք քանակական արտահայտություն տվեք այդ ձեռքբերումներին։
Նշեք միայն այն աշխատանքային փորձը, որ համապատասխան է հաստիքին, որին դիմում եք։ Հատկապես կարիերայի սկզբում մարդիկ տարբեր աշխատանքներ են կատարում, որոնք սակայն ոչ միշտ առնչություն չունեն հաստիքի հետ, որին դիմում եք։
Ձևակերպումները պարզ և հստակ տվեք։ Հետևեք նաև տառատեսակներին և տառաչափերին։
Եղեք յուրօրինակ, սակայն մի օգտագործեք գունագեղ ու գունազարդ օրինակներ, որոնք դժվարընթեռնելի են։
Աշխատանքի դիմելիս՝ կարդացեք աշխատանքի նկարագրությունը և ըստ անհրաժեշտության կատարեք շտկումներ CV-ում։ Հետևություն- միշտ ուղարկեք թարմացված CV։
Եթե ունեք LinkedIn էջ, ապա անպայման ընդգրկեք էջի հղումը։ Կհեշտացնեք իմ աշխատանքը ?
Եթե ծրագրավորող եք և ունեք պատրաստի աշխատանքների պորտֆոլիո, ապա ուղարկեք նաև դրանց հղումները։
CV-ն ուղարկելուց առաջ, վերընթերցեք այն կամ խնդրեք ընկերոջն անել դա։ Հավատացեք, առանց սխալների CV-ն կարդալն ավելի հաճելի է ու լավ է խոսում Ձեր մասին։
CV-ն ուղարկելիս միշտ գրեք ուղեկցող նամակ։ Նամակում կարող եք հիմնավորել՝ ինչու եք հետաքրքրված տվյալ հաստիքով։ Այստեղ նույնպես եղեք հակիրճ։ Իհարկե եթե գործատուն հատուկ բառաքանակ չի սահմանել։ Ու միշտ հիշեք, դատարկ նամակ ուղարկելը վատ տոնի նշան է։
Մի՛ դրեք խնջույքների ժամանակ արված, բաց զգեստով լուսանկարներ կամ սելֆիներ։ Ցանկալի է նկար չդնել, բացառությամբ, եթե դիմում եք այնպիսի աշխատանքի, որտեղ առնչվելու եք հաճախորդների հետ։ Եթե դնում եք լուսանկար, ապա դրեք business casual ոճի լուսանկար։
Մի ստեք CV-ում․ եթե անգլերենի իմացությունը գերազանց չէ, հարկավոր չէ նշել, որ լիովին տիրապետում եք լեզվին։ Հարցազրույցի ժամանակ կարող եք հայտնվել անհարմար դրության մեջ, եթե գործատուն ստուգի լեզվի իմացությունը։
Նույնը վերաբերում է նաև ծրագրավորողներին․ մի նշեք ծրագրավորման այնպիսի լեզուներ, որոնց չեք տիրապետում, կամ եթե սկսնակ եք նշեք իմացության մակարդակը։
Մի՛ նշեք աշխատավարձի ակնկալիքը։ Հավատացե՛ք, այդ հարցը Ձեզ բանավոր կտրվի։
CV-ն ուղարկելիս դիպլոմների, վկայականների կամ նմանօրինակ փաստաթղթեր կցելու կարիք չկա։
Մի՛ օգտագործեք տարբեր տառատեսակներ և տարբեր գրաֆիկական լուծումներ, որոնք Ձեր CV-ն խճճված ու դժվարընթեռնելի են դարձնում։
Մի՛ ուղարկեք CV-ն դիմումի վերջնաժամկետից անմիջապես առաջ։ Լավագույն թեկածուներին ձգտում են հանդիպել հնարավորինս շուտ։
Հիշե՛ք, որ CV-ն առաջին տպավորություն գործելու Ձեր հնարավորությունն է, և միայն Ձեզանից է կախված, թե ինչպիսին կլինի այդ տպավորությունը։ Եվ մի բան էլ, Դուք առաջին տպավորություն թողնելու երկրորդ հնարավորություն չեք ունենա, ուստի հատկացրեք ժամանակ այդ տպավորությունը կերտելու համար և վստահ եղեք, որ հմուտ ՄՌԿ մասնագետները կգնահատեն Ձեր ջանքերը։
