Հայաստանի լավագույն գրասենյակները. EasyDMARC-ի լուսավոր ու ջերմ աշխատանքային միջավայրը

Այսպես, 2018 թվականին հիմնադրվեց ընկերությունը՝ նպատակ ունենալով արդյունավետ և երկարաժամկետ լուծում տալ ֆիշինգային հարձակումների խնդրին։ Այժմ արդեն ընկերությունը հայաստանյան գրասենյակից բացի գրասենյակներ ունի նաև ԱՄՆ-ում, Նիդերլանդներում և Մեծ Բրիտանիայում։

EasyDMARC-ն ունի 50-ից ավելի աշխատակիցներ և նախատեսում է նոր համալրումներ գալիք տարում:

Ի դեպ, G2 հարթակում օգտատերերի օբյեկտիվ գնահատականներով ընկերությունն արդեն 3 տարի անընդմեջ առաջատարն է իր կատեգորիայում:

EasyDMARC-ի հայաստանյան գրասենյակը գտնվում է հարմարավետ բիզնես կենտրոնի շենքերից մեկում՝ հեռու քաղաքային աղմուկից: Ընտրությունը կատարվել է՝ հաշվի առնելով քաղաքի ցանկացած մասից գրասենյակ հասնելու հարմար դիրքը, ավտոկայանատեղի առկայությունը, շրջակայքում առկա զբոսանքի և ընդմիջման համար նախատեսված վայրերը։

Մեր այցի ժամանակ առաջինը, որ նկատելի էր EasyDMARC-ի գրասենյակում՝ ջերմությունն ու համախմբվածությունն էր։ Թիմը հպարտությամբ էր խոսում այն աշխատանքի մասին, որ իրենք են կատարում և այն հաջողությունների մասին, որոնց հասել են թիմով:

EasyDMARC-ի Մարդկային Ռեսուրսների բաժնի ղեկավար Մարգարիտա Հովհաննիսյանը ողջ այցի ընթացքում մեզ ուղեկցեց՝ պատմելով գրասենյակի ամենակարևոր, հիշվող ու հետաքրքիր դետալների ու առանձնահատկությունների մասին։

Քանի որ բույսերը գրասենյակում առանձին պատմություն ունեն, հատուկ ուշադրություն դարձրեցինք բույսերին, որոնցից որոշներն ի դեպ շատ հետաքրքիր ու արտասովոր էին, օրինակ՝ գունավոր կակտուսները: Մեզ պատմեցին նաև, որ այստեղ սերմից բերք ստանալու փորձ էլ ունեն, օրինակ կծու պղպեղի բերքից արդեն օգտվում են կծվի սիրահարները 🙂

Իսկ ընդհանուր առմամբ, ի սկզբանե 2 չափազանց կարևոր բան է հաշվի առնվել գրասենյակը նախագծելուց. օդափոխությունը և լուսավորությունը՝ թե բնական, թե արհեստական:

Open space ձևաչափն էլ իր հերթին է արտացոլում ընկերության արժեքները՝ թիմային համագործակցությունը, նվիրվածությունը գործին և ընկերությանը, ինչպես նաև թափանցիկությունը: Ընկերությունում գրեթե պատեր չկան և բաժանումներն արված են բացառապես ապակուց։ Չէ՞ որ այստեղ բոլոր թիմակիցները քաջ գիտակցում են, որ աշխատում են մեկ ընդհանուր նպատակի համար և վերջին հաշվով ընկերության ձեռքբերումները թիմային աշխատանքի արդյունք են:

Ելնելով EasyDMARC-ի գործունեության առանձնահատկություններից՝ գրասենյակում կան բավականաչափ առանձնասենյակներ՝ ժողովների, քննարկումների, և ամենակարևորը՝ հաճախորդների հետ շփվելու համար:

Չնայած աշխատանքի ու հանգստի համար ստեղծված հարմարավետ զոնաները շատ էին, սակայն խոհանոցը չէր զիջում իր դիրքը՝ շարունակելով զբաղեցնել թիմի սիրելի անկյուններից առաջին հորիզոնականը 🙂

Նեղ թիմային միջոցառումները նույնպես անցնում են գրասենյակի սիրելի անկյունը դարձած խոհանոցում՝ ծննդյան տոներ, տարբեր անձնական և աշխատանքային ձեռքբերումներ, ուրբաթ երեկոներ:

Գրասենյակում հանգստի կազմակերպման ավանդույթներից են նաև երեկոյան կինոդիտումները և շախմատ խաղալը։ Նաև սկսել են գրադարանի հավաքագրման գործընթաց թիմի հանգստի ժամանակը ավելի հետաքրքիր ու արդյունավետ դարձնելու համար: 

Գրասենյակում նաև հատուկ առանձնացված էր մերսման սենյակ, որտեղ օրվա որոշակի ժամերին կարելի է այցելել և հանգստացած վերադառնալ աշխատանքի: 

Չնայած գրասենյակում ստեղծված բոլոր հարմարություններին՝ ընկերությունը որդեգրել է ճկուն կանոնակարգ աշխատանքի կազմակերպման հետ կապված. կարևոր չէ՝ դու որտեղ ես, կարևոր է, թե ինչ ես դու անում և ինչպես: EasyDMARC-ի աշխատակիցները ազատ են որոշելու` որտեղ կազմակերպել իրենց աշխատանքային օրը. գրասենյակում, տանը, քաղաքից դուրս, կամ ցանկացած այլ վայրում: 

Սակայն Մարգարիտան նշեց, որ փորձը ցույց է տալիս, որ թիմակիցների մեծ մասը նախընտրում է գրասենյակ այցելել և սիրելի թիմի հետ միասին աշխատել հարմարավետ գրասենյակում:

Եթե ամփոփենք, ապա ոչ միայն մենք այցելել էինք հարմարավետ գրասենյակ, այլ տրամադրող ու ջերմ աշխատանքային միջավայր, ինչը խոսում է ընկերության ընդհանուր արժեքների, աշխատակիցների նվիրվածության, աշխատանքային անմիջականության ու այն կարևորագույն գործի մասին, որ արվում է այս թիմի կողմից։ 

Մաղթենք բազում հաջողություններ EasyDMARC-ին, ու խոստանում ենք մշտապես կիսվել ընկերության նորություններով։