staffmedia.am-ը շարունակում է «Շաբաթվա գիրքը» շարքը։ Նախորդ անգամ անդրադարձել էինք The Wall Street Journal-ի նախկին սյունակագիր, «Լավագույնը բիզնեսում» մրցանակի կրկնակի դափնեկիր Մորգան Հաուզելի «Փողի հոգեբանությունը» աշխատությանը։ Գրքում հեղինակը բացահայտում է ֆինանսական որոշումներ կայացնելու էմոցիոնալ կողմը և կարճ պատմությունների միջոցով ընթերցողին է փոխանցում արժեքավոր խորհուրդներ, որոնք օգտակար կլինեն ֆինանսական գրագետ որոշումներ կայացնելու գործում։
Այս հոդվածում քննարկելու ենք Learning as Leadership (LaL) կազմակերպության նախագահ Շեյն Հյուզի և Encore Capital Group-ի նախկին գլխավոր տնօրեն Բրենդոն Բլեքի համահեղինակած Ego free leadership։ Ending the Unconscious Habits that Hijack Your Business (Էգոյից զերծ առաջնորդություն. վերացնելով անգիտակցական սովորությունները, որոնք խափանում են ձեր բիզնեսը) գիրքը։ Գրքի ընտրությունը պատահական չէ. գրքին անդրադառնում ենք Beyond podcast-ի 6-րդ էպիզոդի հյուրի՝ Մերակիփալ ընկերության տնօրեն ու կազմակերպական զարգացման քոուչ Արմինե Մկրտչյանի խորհրդով։
Գրքում հեղինակները խորությամբ ուսումնասիրում են, թե ինչպես են առաջնորդների էգո-համակարգերը խոչընդոտում կազմակերպությունների առողջ զարգացմանը։ Հատկանշական է, որ գիրքը չի սահմանափակվում միայն տեսական դրույթներով, այլ հիմնված է իրական փորձառության վրա, որի առանցքում Բրենդոն Բլեքի անձնական պատմությունն է։ Այն հզոր օրինակ է այն մասին, թե ինչպես կարող է առաջնորդի անձնական փոփոխությունը հանգեցնել ամբողջ կազմակերպության վերափոխմանը։ Նրանց հետաքրքիր ճանապարհորդությունը պահում է ընթերցողի ուշադրությունը՝ անցնելով վերջին տասնամյակի բիզնես պատմության միջով։
1. Էգոյի մարտահրավերները առաջնորդության մեջ
Գիրքը սկսվում է հոգեբանական ուսումնասիրություններով՝ ընդունելով էգոն որպես խնդրի հիմք։ Հեղինակները ցույց են տալիս, թե ինչպես էգոն կարող է թաքնված կերպով ազդել առաջնորդների վարքի վրա և մթագնել նրանց դատողությունը: Նրանք բացատրում են, որ էգոն հաճախ հանդես է գալիս որպես անտեսանելի ուժ, որն ազդում է ոչ միայն որոշումների կայացման վրա, այլ նաև աշխատանքային հարաբերությունների, թիմային դինամիկայի ու բարեկեցության վրա։ Այս ներածական բաժնում հեղինակները հիմնականում վերլուծում են այն «թաքնված» մոդելները, որոնք պարբերաբար արգելակում են հաջողության հասնելու ճանապարհը, երբ ղեկավարը կենտրոնանում է սեփական շահերի վրա՝ բարձր դասելով դրանք թիմի և ամբողջ կազմակերպության շահերից։ Այստեղ կենտրոնական գաղափարն այն է, որ հաջողակ առաջնորդը պետք է գիտակցի իր էգոն՝ ընդունելով այն որպես սեփական բեռ՝ պայքարելով նրա ազդեցության դեմ։
2. Էգոյի ազդեցությունը առաջնորդության վրա
Այս գլխում հեղինակները ցույց են տալիս, թե որքան կործանարար կարող է լինել էգոն, երբ առաջնորդները կորցնում են ամբողջական պատկերը տեսնելու ունակությունը և կենտրոնանում են միայն սեփական հետաքրքրությունների վրա։ Էգոն ունակ է քայքայել թիմային կապերը, երբ յուրաքանչյուր անդամ սկսում է մտածել միայն իր անձնական շահի մասին։ Հեղինակները կիսվում են իրական պատմություններով, որտեղ առաջնորդները պատմում են, թե ինչպես է իրենց եսասիրությունը խոչընդոտել արդյունավետ և ստեղծագործական աշխատանքին։ Այս հատվածը խորությամբ ուսումնասիրում է այն մտային կաղապարները, որոնք սահմանափակում են առաջնորդի տեսադաշտը՝ զրկելով նրան բաց և համագործակցային մոտեցումից։
3. Անգիտակցական սովորություններ, որոնք խանգարում են առաջնորդությանը
Հեղինակները մանրամասն բացատրում են, թե ինչպես են չգիտակցված վարքի մոդելները խոչընդոտում առաջնորդության բնական զարգացմանը։ Ձեռնարկատիրական և կառավարման ոլորտում հաճախ հանդիպող անգիտակցական սովորությունները, ինչպիսիք են չափազանց բարձր ինքնագնահատականը կամ «ես ավելի լավ գիտեմ» մոտեցումը, խանգարում են առաջնորդներին լսել ուրիշներին, տալ ճիշտ հարցեր և գտնել թիմային աշխատանքի առավել արդյունավետ եղանակներ։
Երբ կենտրոնանում ենք մրցակցության վրա, մենք դառնում ենք հակազդող, իսկ երբ կենտրոնանում ենք ինքնակատարելագործման վրա, դառնում ենք նորարար
Շատ ղեկավարներ սխալմամբ կարծում են, որ իրենց հաջողությունը կախված է միայն իրենց գիտելիքներից ու հեղինակությունից, սակայն իրականում նման մոտեցումը կարող է բացասաբար անդրադառնալ ամբողջ կազմակերպության վրա։ Գրքում առաջարկվում են մեթոդներ՝ այս սովորությունները բացահայտելու և փոխելու համար։
4. Ինքնագիտակցության դերը առաջնորդության մեջ
Այս գլուխը նվիրված է ինքնագիտակցության կարևորությանը, որը շատ ղեկավարներ հաճախ անտեսում են։ Ինքնագիտակցված առաջնորդներն ավելի հեշտությամբ են հաղթահարում սեփական էգոն՝ կարողանալով իրենց ուշադրությունը սևեռել թիմի և կազմակերպության կարիքների վրա։ Քանի որ ինքնագիտակցությունը պահանջում է անաչառ գնահատել սեփական գործողություններն ու նախասիրությունները, հեղինակներն առաջարկում են արդյունավետ մեթոդներ՝ սեփական ուժեղ և թույլ կողմերը ճանաչելու համար։ Նրանք շեշտում են, որ երբ մենք գիտակցում ենք մեր մտադրությունները, ավելի մեծ հնարավորություն ենք ստանում վերահսկելու դրանք։ Սա հանգեցնում է այնպիսի առաջնորդության, որտեղ ղեկավարն ազատում է թիմին իր անձնական նկրտումներից՝ թույլ տալով կենտրոնանալ էական խնդիրների վրա։
5. Էգոյից զերծ առաջնորդության ռազմավարություններ
Այստեղ ներկայացվում են գործնական ռազմավարություններ, որոնք օգնում են ղեկավարներին հաղթահարել էգոն և դառնալ ավելի արդյունավետ։ Հեղինակները մշակել են կոնկրետ քայլեր, որոնք ներառում են ակտիվ լսելու և ընդհանուր նպատակները գիտակցելու հմտություններ։ Նրանք խորհուրդ են տալիս առաջնորդներին սովորել վստահել իրենց թիմին և բարդ իրավիճակներում պատվիրակել պատասխանատվությունը՝ առանց անձնական վերահսկողության մոլուցքի։ Հեղինակները ներկայացնում են նաև «սթափ մտածելու» տեխնիկա, որն օգնում է ղեկավարներին թուլացնել ենթագիտակցական մրցակցային լարվածությունը՝ թողնելով տարածություն նոր գաղափարների համար։
Սեփական էգոն մշակելը առաջնորդության բարձրագույն դրսևորումն է
6. Էգոյից զերծ մշակույթ ստեղծելու նշանակությունը կազմակերպություններում
Հեղինակները հատուկ ուշադրություն են դարձնում կազմակերպական մշակույթի ձևավորման վրա, որտեղ անհատական էգոն չի խոչընդոտում ընդհանուր արդյունավետությանը։ Նրանք նշում են, որ հենց մշակույթն է ստեղծում բաց և համագործակցային միջավայր, ուստի առաջին քայլը պետք է լինի կազմակերպական մոդելի վերանայումը։ Որպես հաջողված օրինակներ՝ ներկայացվում են կազմակերպություններ, որտեղ ղեկավարները ընդունել են իրենց սահմանափակումները և աջակցել թիմի անդամների զարգացմանը՝ երբեմն նվազեցնելով անմիջական վերահսկողությունը։
7. Գործիքներ և գործնական վարժություններ
Այստեղ առաջարկվում է հստակ գործիքակազմ, որն օգնում է առաջնորդներին հաղթահարել էգոյի սահմանափակումները։ Հեղինակները մշակել են հարցաշար, որի միջոցով մարդիկ կարող են բացահայտել էգոյի դրսևորումները իրենց մասնագիտական գործունեության մեջ։ Վարժությունները նպատակաուղղված են խորը արմատավորված սովորությունների վերհանմանն ու դրանց հաղթահարմանը։
8. Էգոյից զերծ առաջնորդության վերափոխող ուժը
Եզրափակիչ մասում հեղինակները ամփոփում են էգոյից զերծ մոտեցման կարևորությունը ոչ միայն առաջնորդի, այլև ամբողջ կազմակերպության համար։ Նրանք նշում են, որ միայն էգոյից ազատվելով կարող է ղեկավարը դառնալ իսկապես ազդեցիկ, համարձակ և ներդաշնակ առաջնորդ։ «Ego Free Leadership» գիրքը բացում է նոր հորիզոններ առաջնորդների համար՝ օգնելով նրանց հաղթահարել գործնական խոչընդոտները, որոնք սահմանափակում են նրանց ներուժի իրացումը։
Գրքի էջերում կարող եք գտնել ավելի շատ օգտակար և պրակտիկ խորհուրդներ սեփական էգոն մշակելու և այն փոփոխությունը լինելու համար, որը կդառնա ձեր կազմակերպության հաջողության ներուժը։
