#RepatTips. Ինչպես բարձրացնել աշխատանքի անցնելու հավանականությունը Հայաստանում․ խորհուրդներ Լարա Չոլաքյանից

756

Ուրախ ենք ձեզ հետ կիսվել Repat Armenia-ի կողմից կազմակերպած #RepatTips նախագծով, որի շրջանակներում փորձառու հայրենադարձները կիսվում են Հայաստանում ապրելու և աշխատելու իրենց լավագույն փորձով։ Այսօրվա #RepatTip-երը Վիվա-ՄՏՍ ՄՌ Վարչության պետ Լարա Չոլաքյանից են «Ինչպես բարձրացնել աշխատանքի անցնելու հավանականությունը Հայաստանում» թեմայով։

Շնորհակալություն Repat Armenia-ին այս հրաշալի նախագծի և Լարա Չոլաքյանին օգտակար խորհուրդներով և մեծ փորձով կիսվելու համար։


Հայաստանում ապրելու փորձն արդեն իսկ մարտահրավերներով լի էր, քանի որ երբեք նման առիթ չէր եղել Հայաստան տեղափոխվելու և ապրելու։ Բայց այդ ժամանակ ես արդեն Տորոնտոյից դիմել էի Հայաստանում աշխատանքի համար, այնուհետև ընդունվեցի և նոր տեղափոխվեցի Հայաստան։ Այսինքն, վերադարձս սպոնտան քայլ չէր, մինչ այդ ես ապրել և աշխատել էի Պերուում և Շրի Լանկայում և մտածեցի՝ ինչո՞ւ չփորձել ապրել և աշխատել Հայաստանում։

ԼԱՐԱ ՉՈԼԱՔՅԱՆ

#RepatTip-երին հակիրճ կարող եք ծանոթանալ StaffMedia այս հոդվածում, իսկ ամբողջականին հետևել ստորև տեսանյութում՝


ԱՇԽԱՏԱՆՔԻ ՈՐՈՆՈՒՄԸ ՀԱՅԱՍՏԱՆՈՒՄ․ ՈՐՏԵՂԻ՞Ց ՍԿՍԵԼ


Այսօր հաղորդակցության տեսանկյունից մենք հասանելիություն ունենք ամեն ինչին։ Իմ ժամանակ, երբ ես նոր էի տեղափոխվում այստեղ, ես չգիտեի ում հետ կապ հաստատեմ։ Բայց հիմա հնարավորությունները շատ են, նախքան որևէ աշխատանքի դիմելը խորհուրդ կտամ կապ հաստատել հատուկ կառույցների հետ, ինչպիսիք են Repat Armenia-ն, Birthright Armenian-ն, AVC-ն և շատ այլ կազմակերպություններ։ Նշեք, որ ունեք այս կամ այն որակավորումները և ցանկանում եք տեղափոխվել Հայաստան։ Այսինքն, իմ խորհուրդն է առաջինը խոսել այն մարդկանց հետ, ովքեր արդեն Հայաստանում են, և եթե անձամբ որևէ մեկին չեք ճանաչում, այս կառույցները ձեզ կօգնեն։


Ի՞ՆՉ ՍՈՖԹ ՀՄՏՈՒԹՅՈՒՆՆԵՐ ԵՆ ԿԱՐԵՎՈՐՎՈՒՄ ՀԱՅԱՍՏԱՆՅԱՆ ԸՆԿԵՐՈՒԹՅՈՒՆՆԵՐԻ ԿՈՂՄԻՑ


Բավականին լավ հարց է։ Իմ կարծիքով, առաջնորդության հմտություններն են, որ յուրաքանչյուր հաստիքի համար կարևոր են, քանի որ ընկերությունները փնտրում են նախաձեռնող աշխատակիցների։ Այս մարդիկ գիտեն՝ ինչ է պահանջվում և անկախ մարտահրավերներից կատարում են իրենց աշխատանքը։ Հաջորդը՝ ճկունությունը և agile լինելն է։ Մենք հաճախ ենք լսում agile կորպորացիաների կամ ընկերությունների մասին, բայց գաղափարը միայն մոդելին հետևելը չէ, այլ նաև թե ինչքան բաց ես նոր մտքերի ու գաղափարների նկատմամբ և ինչքան ճկուն կարող ես լինել տարբեր իրավիճակներում քեզ լավագույնը դրսևորելու համար։


ԻՆՉՊԵՍ ԸՆՏՐԵԼ ՃԻՇՏ ԸՆԿԵՐՈՒԹՅՈՒՆ ՁԵԶ ՀԱՄԱՐ


Երբեք միայն մի կենտրոնացեք նրա վրա, թե ինչ է գրված աշխատանքի պահանջներում, ուշադրություն դարձրեք նաև նրա վրա, թե ինչի մասին է այդ ընկերությունը, ինչ են շնչում այդ ընկերությունում, որոնք են այդ ընկերության արժեքները և արդյո՞ք կապ ունեն ձեր արժեքների հետ։ Հասկացեք, թե ինչով են զբաղվում։ Քանի որ, վերջիվերջո, աշխատանքի պահանջները չէ, որ միայն պետք է համապատասխան լինեն, այլ նաև այն միջավայրը, որտեղ դուք աշխատելու եք։ Այսինքն, բավականին ուսումնասիրություններ կան մինչև այդ նպատակակետին հասնելը։


 ԻՆՉՊԵՍ ՊԱՏՐԱՍՏՎԵԼ ՀԱՐՑԱԶՐՈՒՅՑԻ ԳՈՐԾԸՆԹԱՑԻՆ


Դիմեք աշխատանքի այն ժամանակ, երբ զգում եք, որ իսկապես համապատասխանում եք այդ հայտարարության պահանջներին։ Օրինակ, իմ դեպքում մենք օրական ստանում ենք 50-70 դիմում։ Այս դիմումները ֆիլտրելը և դիտարկելը ժամանակ է պահանջում, ուստի երբ տեսնում ենք, որ դիմել են առանց համապատասխանության ու հասկանալու, թե ինչի մասին է աշխատանքը, դա հիասթափեցնում է։

Երբեք անպատրաստ մի գնացեք հարցազրույցի։ Այնտեղ հարցեր են հնչելու հասկանալու, թե արդյոք թեկնածուն ուսումնասիրել է ընկերությունը, թե ինչով են զբաղվում, ինչ պրոդուկտների վրա են աշխատում, ինչ ծառայություններ են մատուցում կամ որոնք են այդ ընկերության արժեքները։

Հարցազրույցները Հայաստանում և Հայաստանից դուրս այդքան էլ չեն տարբերվում։ Գաղափարն այն է, որ հասկանան, թե արդյոք տվյալ թեկնածուն համապատասխանում է միջավայրին, մշակույթին, այսինքն մի կողմից ծանոթանալ որակավորումներին, իսկ մյուս կողմից էլ ստուգել մշակույթին ադապտացվելու թեկնածուի ճկունությունը։


ԱՇԽԱՏԱՎԱՐՁԻ ԱԿՆԿԱԼԻՔՆԵՐԸ


Աշխատվարձի հարցը բավականին հետաքրքիր է։ Իմ մոտեցումը հետևյալն է, հարցնել, թե աշխատաշուկայում այդ աշխատանքի աշխատավարձի շեմերը որոնք են։ Հաճախ մարդիկ, ովքեր տեղափոխվում են Հայաստան, կարող են մտածել, որ Հայաստանում աշխատավարձի նույն ակնկալիքները պետք է ունենալ, ինչպես օրինակ Հայաստանից դուրս։ Ակնհայտորեն, հայաստանյան աշխատաշուկան տարբերվում է կախված աշխատանքից, միշտ կատարեք ձեր ուսումնասիրությունը և մի նշեք կոնկրետ թիվ, ինչպես նաև մի թերագնահատեք կամ գերագնահատեք ինքներդ ձեզ։


Այս խորհուրդները յուրահատուկ ուղեցույց կլինեն բոլոր նրանց համար, ովքեր ցանկանում են տեղափոխվել Հայաստան կամ արդեն Հայաստանում են և փնտրում են աշխատանք։ Կարող եք ծանոթանալ նաև ակտիվ աշխատանքի հայտարարություններին staff.am հարթակում։