«Բրենդինգ» ասելով սովորաբար պատկերացնում ենք կազմակերպության արտաքին ներկայացումը՝ լոգոն, կարգախոսը, մարքեթինգային ուղերձները և այն, թե ինչպես է ընկերությունն ընկալվում հաճախորդների կողմից։ Սակայն, մինչ այս տարրերը կարևոր են բրենդի ճանաչելիության համար, հաճախ անտեսվում է գործատուի բրենդավորման նշանակությունը, որը նույնքան կարևոր է ընկերության երկարաժամկետ հաջողության համար:
Վերջին տարիներին աշխատակիցների հավաքագրման և պահպանման մեթոդները զգալիորեն փոխվել են։ Տեխնոլոգիական առաջընթացը, սոցիալական մեդիայի տարածումը և կարիերայի հարթակների զարգացումը հեշտացրել են աշխատանք փնտրողների համար տեղեկատվության ձեռքբերումը։ Այս նոր իրականությունում ուժեղ գործատուի բրենդինգի բացակայությունը կարող է հանգեցնել լավագույն թեկնածուների կորստի, ավելորդ ծախսերի և բիզնեսի բազմաթիվ ոլորտների վրա բացասական ազդեցության։
Այս հոդվածում կներկայացնենք գործատուի բրենդավորման էությունը, կբացատրենք դրա կարևորությունը, և կառաջարկենք արդյունավետ ռազմավարություններ՝ ընկերության դիրքը որպես գրավիչ գործատու ամրապնդելու համար։
Ի՞նչ է գործատուի բրենդավորումը
Գործատուի բրենդավորումը ընկերության համբավն է որպես գործատու և այն առանձնահատուկ արժեքը, որը նա առաջարկում է իր աշխատակիցներին։ Այն արտացոլում է կազմակերպության մշակույթը, արժեքները և աշխատանքային միջավայրը:
Դրական գործատուի բրենդը որոշիչ գործոն է որակյալ մասնագետների ներգրավման և պահպանման համար, որոնք կենսական նշանակություն ունեն յուրաքանչյուր բիզնեսի հաջողության և կայուն աճի համար։ Թեև շատ ընկերություններ իրենց ջանքերը կենտրոնացնում են սպառողական բրենդի վրա, նույնքան կարևոր է ուշադրություն դարձնել գործատուի բրենդին, քանի որ այն ձևավորում է ընկերության ինքնությունը աշխատաշուկայում։
Գործատուի բրենդավորումը հնարավորություն է տալիս առանձնանալ աշխատանք փնտրող թեկնածուների համար և օգնում է հավաքագրման թիմերին բարելավել դիմորդների համապատասխանության որակը։ Առանց գործատուի բրենդինգի նպատակաուղղված ռազմավարության, ընկերությունը կարող է արագորեն հայտնվել անբարենպաստ դիրքում՝ լավագույն տաղանդների ներգրավման մրցավազքում։
Ինչո՞ւ է գործատուի բրենդավորման ռազմավարությունը կարևոր
Գործատուի բրենդավորման կարևորությունը լավագույնս երևում է վիճակագրական տվյալների միջոցով։ Ահա որոշ ուշագրավ փաստեր, որոնք ցույց են տալիս դրա ազդեցությունը.
- Աշխատանքի դիմելու որոշում կայացնելիս, աշխատանք փնտրողների 84%-ը նշում է, որ ընկերության համբավը որպես գործատու վճռորոշ գործոն է
- Յուրաքանչյուր 10 թեկնածուներից 9-ը նախապատվություն կտա այն գործատուին, որի բրենդը ակտիվորեն զարգացվում է
- Թեկնածուների 50%-ը հրաժարվում է աշխատել վատ համբավ ունեցող ընկերությունում՝ հաճախ նույնիսկ ավելի բարձր աշխատավարձի առաջարկի դեպքում։
Ինչպե՞ս է այն ազդում հավաքագրման և տաղանդների ձեռքբերման վրա
Դրական գործատուի բրենդը առանցքային նշանակություն ունի հավաքագրման և տաղանդների ձեռքբերման գործընթացում՝ հետևյալ պատճառներով.
Բարձրացնում է որակյալ թեկնածուների հասանելիությունը: Որակյալ թեկնածուների հասանելիությունը սկսվում է ուժեղ գործատուի բրենդից։ Երբ ընկերությունը կառուցում է դրական համբավ, ներկայացնում աշխատակիցների հաջողության պատմությունները և պահպանում յուրահատուկ աշխատանքային մշակույթ, լավագույն մասնագետների ներգրավումը դառնում է դյուրին։Լավ զարգացած գործատուի բրենդն օգնում է նվազեցնել հավաքագրման ծախսերը, արագացնել թիմի համալրումը և խուսափել միայն աշխատավարձային մրցակցությունից։ Ընկերությունները, որոնք առաջարկում են գրավիչ միջավայր և աճի հնարավորություններ, ավելի հեշտ են ներգրավում որակյալ մասնագետներին՝ առանց ավելորդ ֆինանսական ներդրումների։
Բարելավում է ընկերության ընկալումը սոցիալական մեդիայում: Աշխատանք փնտրողների մոտ 25%-ն օգտագործում է սոցիալական մեդիան որպես աշխատանքի որոնման և հետազոտության հիմնական գործիք, և այս թիվը շարունակաբար աճում է։ Ավելին, մարդիկ ավելի շատ են վստահում ընկերների, գործընկերների և ընտանիքի անդամների կարծիքներին, քան տեղեկատվության այլ աղբյուրներին։ Եթե մարդիկ բացասաբար են արտահայտվում ձեր բրենդի կամ աշխատանքային մշակույթի մասին, հնարավոր թեկնածուները անպայման կհանդիպեն այս տեղեկատվությանը։
Ինչպե՞ս է այն ազդում բիզնեսի այլ ոլորտների վրա
Գործատուի բրենդինգը շատ ավելին է, քան պարզապես հավաքագրման գործիք․ այն ազդում է բիզնեսի տարբեր ոլորտների վրա։ Ժամանակակից հաճախորդները նախընտրում են այն ընկերությունները, որտեղ աշխատակիցները գնահատված և բավարարված են։ Եթե աշխատանքային մշակույթի վերաբերյալ բացասական կարծիքներ են շրջանառվում, դա կարող է ստիպել նրանց վերանայել համագործակցության որոշումը։ Հնարավոր գործընկերներն ու հաճախորդները նույնպես ուսումնասիրում են ընկերության հեղինակությունը՝ կարիերայի հարթակներում և սոցիալական մեդիայում։ Սա կարող է ազդել ոչ միայն բրենդի վստահելիության, այլև բիզնեսի եկամուտների և աճի հեռանկարների վրա։
Ինչպե՞ս մշակել գործատուի բրենդի արդյունավետ ռազմավարություն
Լավագույն թեկնածուների ներգրավման համար ընկերությունները պետք է հետևողականորեն զբաղվեն իրենց գործատուի բրենդի զարգացմամբ։ Ահա մի քանի արդյունավետ ռազմավարություն staff.am-ից, որոնք կօգնեն ձեզ այդ գործում.
Թիրախային բովանդակություն պոտենցիալ թեկնածուների համար
Գործատուի բրենդավորման համար կարևոր է մշակել թիրախային բովանդակություն պոտենցիալ թեկնածուների համար, որը կօգնի ստեղծել վստահելի գործատուի կերպար։ Դա կարող է ներառել հրապարակումներ staffmedia.am-ում, որտեղ ներկայացվում է ընկերության մշակույթը, թիմային արժեքները և կարիերայի հնարավորությունները։ Սոցիալական մեդիայում տարածվող հրապարակումներ, որոնք ցույց են տալիս ներքին աշխատանքային մշակույթը, աշխատակիցների հաջողության պատմությունները, թիմային միջոցառումների լուսանկարները և տեսանյութերը։ Այս ամենը օգնում է պոտենցիալ թեկնածուներին ճանաչել ընկերությունը և ներգրավել նրանց աշխատանքի դիմելու համար։
Առավելագույն կերպով օգտագործել staff.am-ում կարիերայի էջը
staff.am-ում գործատուի կարիերայի էջը ոչ միայն տեղեկատվական հարթակ է, այլև արդյունավետ գործիք՝ տաղանդավոր մասնագետների ներգրավման և գործատուի բրենդի ամրապնդման համար։
staff.am կարիերայի էջը հնարավորություն է տալիս ընկերություններին ստեղծել բազմաշերտ և համապարփակ պրոֆիլ, որը պարզապես թափուր աշխատատեղերի հրապարակման համար չէ: Այստեղ կազմակերպությունները կարող են ամբողջական ներկայացնել իրենց մշակույթը, աշխատանքային միջավայրը և կարիերայի զարգացման հնարավորությունները: Ընկերությունը կարող է տեղադրել մանրամասն նկարագրություն, լուսանկարներ, թիմի առօրյան ներկայացնող նյութեր և կարիերայի աճի հնարավորություններ՝ ստեղծելով գրավիչ պրոֆիլ պոտենցիալ աշխատակիցների համար։ staff.am-ի կարիերայի էջում հնարավորություն ունեք տեղադրելու նաև տեղեկատվություն ընկերության տրամադրած արտոնությունների և այլ առանձնահատկությունների մասին՝ այսպիսով ընկերությունը ներկայացնելով որպես առավել գրավիչ գործատու։
Խրախուսել աշխատակիցների մասնագիտական զարգացումը և աճը
Լավ մշակված մասնագիտական զարգացման հնարավորությունները կարևոր գործիք են աշխատակիցների պահպանման և նոր տաղանդների ներգրավման համար։ Դա կարող է ներառել վերապատրաստման դասընթացներ կամ կարիերայի առաջխաղացման հնարավորություններ։ staff.am-ի կրթական ուղղությունը՝ Career Factory-ն առաջարկում է տարբեր ոլորտների մասնագիտական դասընթացներ՝ առաջնորդությունից մինչև մարքեթինգ և դիզայն։ Կարևոր է ոչ միայն տեղեկացնել աշխատակիցներին այս հնարավորությունների մասին, այլ նաև դրանք ակտիվորեն ներկայացնել պոտենցիալ թեկնածուներին։
Օգտագործել staffmedia.am -ը որպես գործատուի բրենդավորման հարթակ
staffmedia.am-ը առաջարկում է բազմազան նախագծեր, որոնք ուղղված են գործատուի բրենդավորման և ընկերության տեսանելիության բարելավմանը։ Այս նախագծերը կարող են օգնել ոչ միայն թվային, այլև ֆիզիկական միջավայրում թիմի ներգրավվածությունը բարձրացնելու և ընկերության պրոֆեսիոնալ իմիջը ամրապնդելու համար։
staffmedia.am-ը առաջարկում է հետևյալ նախագծերը գործատուի բրենդինգի շրջանակներում՝
Staffcoverage – Ընկերության գործունեությունը, թիմի առօրյան, կորպորատիվ մշակույթը լուսաբանող նախագիծ։
Հարցազրույց ղեկավարի հետ – Հարցազրույց ընկերության որևէ ուղղության ղեկավարի, տնօրենի կամ հիմնադրի հետ, որն օգնում է անձնավորել գործատուի առաքելությունը և կապ ստեղծել պոտենցիալ թեկնածուների հետ:
Լավագույն գրասենյակ – Հարմարավետ ու հետաքրքիր գրասենյակը խթանում է աշխատունակությունն ու օգնում է նվազեցնել հնարավոր սթրեսն աշխատավայրում։ Պատմեք ձեր գրասենյակի մասին՝ դարձնելով այն ձեր մրցակցային առավելություններից մեկը:
Փաստեր ընկերության մասին – Նախագծի նպատակն է ներկայացնել ընկերության մասին կարևոր ու հետաքրքիր փաստեր, որոնք կդաջվեն թեկնածուի հիշողության մեջ և թույլ կտան ճանաչել գործատուին:
Բենեֆիթներ – Այս նախագծի շրջանակներում ներկայացվում է ընկերության կողմից տրամադրվող յուրահատուկ արտոնությունները, որոնք զգալիորեն տարբերվում են ստանդարտ աշխատանքային առաջարկներից: Այստեղ ներկայացվում են ոչ միայն ֆինանսական հատուցումները, այլև՝ աշխատակիցների բարեկեցության և անձնական աճի ուղղված արտոնություններ, որոնք դարձնում են կազմակերպությունը առավել գրավիչ պոտենցիալ աշխատակիցների համար:
Տարին ամփոփ – Այս նախագծի շրջանակներում ընկերությունը ամփոփում է անցնող տարվա կարևորագույն իրադարձություններն ու նվաճումները, ինչպես նաև պլաններն ու նպատակները գալիք տարվա համար՝ ցույց տալով կազմակերպության զարգացման տեսլականը և ռազմավարական ուղղվածությունը:
Այս և մի շարք այլ նախագծերով staffmedia.am-ը աջակցում է ընկերություններին բարձրացնել իրենց տեսանելիությունը աշխատաշուկայում, գրավել լավագույն տաղանդներին և ամրապնդել իրենց դիրքը որպես նախընտրելի գործատու: Հարթակն աշխատում է staff.am-ի հետ սերտ համագործակցությամբ, ինչը նշանակում է, որ ձեր բրենդավորման ջանքերն ուղղակիորեն կապված են Հայաստանի ամենամեծ աշխատանքային հարթակի հետ։
Գործատուի բրենդավորումը ոչ թե ցանկալի լրացում, այլ անհրաժեշտություն է ժամանակակից բիզնես միջավայրում։ Այն կարող է էական ազդեցություն ունենալ ձեր ընկերության հավաքագրման արդյունավետության, աշխատակիցների պահպանման, հաճախորդների վստահության և վերջնական արդյունքում՝ բիզնեսի աճի և եկամտաբերության վրա։
Ներդրումը գործատուի բրենդի զարգացման մեջ ապահովում է, որ ընկերությունը ճանաչվի ոչ միայն որպես արտադրանքի կամ ծառայության մատակարար, այլև որպես գերազանց աշխատավայր։ Այս համբավը ոչ միայն կօգնի գրավել և պահպանել լավագույն տաղանդներին, այլև կբարելավի ընդհանուր բիզնես արդյունքները։
Սկսեք այսօր՝ ներդրում կատարեք ձեր գործատուի բրենդի մեջ և հետևեք, թե ինչպես է այն վերափոխում ձեր բիզնեսը
