Ուրախ ենք կիսվել, որ staff.am-ի թիմը նոյեմբերի 22-24-ը մասնակցեց Հովնանյան հիմնադրամի և Repat Armenia-ի կողմից կազմակերպված Engage Armenia 2024 ֆորումին, որը տեղի ունեցավ Դուբայում՝ Միջին Արևելքի և Հայաստանի միջև համագործակցության նոր ուղիներ բացահայտելու նպատակով։ Որպես միջոցառման ցանցային գործընկեր (network partner)՝ մենք ներկայացրինք մեր լայնածավալ գործունեությունը ՀՀ-ում, տաղանդների ներգրավման մեր փորձը և աշխատաշուկայի զարգացման մեր տեսլականը։
Համաժողովի ընթացքում staff.am-ի համահիմնադիր Լուիզա Ավետիսյանը հնարավորություն ունեցավ ներկայացնելու staff.am էկոհամակարգը, ինչպես նաև մասնակցեց կարևոր քննարկումներից մեկին՝ անդրադառնալով, թե որոնք են ՀՀ-ում կարիերայի զարգացման հեռանկարները սփյուռքի մեր հայրենակիցների համար, և ինչպես կարող ենք արդյունավետ օգտագործել սփյուռքի ներուժը նոր տաղանդների ներգրավման միջոցով՝ ուղղված հայրենիքի զարգացմանը։
staff.am էկոհամակարգի համար սա բացառիկ հնարավորություն էր ծանոթանալու Արաբական Էմիրություններում և տարածաշրջանում տաղանդների ներգրավման և կառավարման մոտեցումներին, ինչպես նաև նոր կապեր հաստատելու և համագործակցության հստակ ուղղություններ նշելու համար։
staff.am-ի նպատակն է նպաստել Հայաստանի աշխատաշուկայի զարգացմանը՝ միավորելով հայ համայնքի լավագույն տաղանդներին ու նախաձեռնությունները հայրենիքում և սփյուռքում։ Engage Armenia-ն մեզ թույլ տվեց ամրապնդել կապերը Միջին Արևելքում և գտնել նոր ուղիներ՝ զարգացնելու այս համագործակցությունները:
staff.am-ի համահիմնադիր Վահե Ավետիսյան
staff.am-ի թիմը կարևորում է աշխատաշուկայի զարգացման մեջ սփյուռքում հայ համայնքի դերակատարումը։ Մենք վստահ ենք, որ այսպիսի ֆորումները հնարավորություն են տալիս ոչ միայն զարգացնելու մեր աշխատանքը, այլև խթանելու Հայաստանի աշխատաշուկայի դիրքը միջազգային մակարդակով։
Engage Armenia-ի նպատակը
Engage Armenia-ն Հ. Հովնանյան ընտանիք հիմնադրամի և Repat Armenia-ի շնորհիվ ստեղծված հարթակ է, որի շրջանակներում այս գարնանն առաջին անգամ ՀՀ-ից մի շարք սոցիալական նախաձեռնություններ առիթ ունեցան այցելելու Եվրոպական քաղաքներ՝ Լոնդոն, Փարիզ, Բրյուսել և այլն, և ներկայացնել իրենց ծրագրերը և համագործակցության հնարավորությունները հայկական սփյուռքի և տեղի գործարար համայնքի հետ։
Նոյեմբերի 22-24-ը «Engage Armenia Dubai»-ը մեկ հարկի տակ էր հավաքել ավելի քան 100 այցելու` Միջին Արևելքի տարբեր երկրներից, 14 սոցիալական նախաձեռնություն և 7 ցանցային գործընկեր ՀՀ-ից, որոնց շարքում էր նաև staff.am-ը, իսկ ֆորումի գործընկերն էր Ամերիաբանկը։
Հայաստանի հետ աշխատելը սփյուռքի մեր հայրենակիցների համար չպետք է դիտարկվի որպես բարեգործական նախաձեռնություն, այլ որպես բիզնես գործակցության, ներդրումների ու ակտիվ մասնակցության միջավայր։
Ֆորումի առանցքային նպատակներից մեկն է կամրջել սփյուռքի հայերին Հայաստանում գործող նախաձեռնությունների հետ՝ նպաստելով համատեղ ծրագրերի և ռազմավարությունների մշակմանը։ Այս համատեքստում կազմակերպվել էին մի շարք խմբային քննարկումներ հետևյալ թեմաներով՝
- Հայաստանի սոցիալական նախաձեռնությունների զարգացման խթանում,
- Միջին Արևելքի և Հայաստանի միջև տաղանդների ներգրավման նոր ռազմավարությունների մշակում,
- Մասնակիցների միջև համատեղ նախագծերի մեկնարկի նախադրյալների ստեղծում։
Ֆորումին նախորդող երեկոն սկսվեց նոյեմբերի 22-ին տեղի ունեցած ջերմ ընդունելությամբ, որը կազմակերպել էին Թալին և Րաֆֆի Փոլադյանները։ Երեկոն բացառիկ էր ֆորումի հայաստանյան մասնակիցների և Դուբայի հայ համայնքի ներկայացուցիչների միջև կապեր հաստատելու, մտքեր փոխանակելու առումով, իսկ գեղեցիկ դասական երաժշտության հրաշալի կատարումը՝ մեկ տարի առաջ ՀՀ տեղափոխված Ռուբեն Կոզինի կողմից ավելի գեղեցկացրեց երեկոն։
Հատկանշական է, որ ֆորումի մասնակից մի շարք սոցիալական նախաձեռնությունների հիմնադիրներ ՀՀ էին տեղափոխվել տարբեր երկրներից, կամ չլինելով ազգությամբ հայ՝ տեղափոխվել էին ՀՀ և մշտական բնակություն հաստատել Հայաստանում։
Որպես միջոցառման ամփոփում, առաջարկում ենք ծանոթանալ մասնակից մի շարք նախաձեռնությունների հիմնադիրների և ներկայացուցիչների կարծիքներին, որոնցով նրանք սիրով կիսվել են staffmedia.am-ի հետ։
Ուրախ էինք Դուբայի ակտիվ հայ համայնքի հետ Հայաստանի հանրային կրթության համակարգում առկա հրատապ մարտահրավերների և «Դասավանդի՛ր, Հայաստան»-ի առաքելությանը համահունչ ազդեցիկ լուծումների քննարկման հնարավորության համար։
Թալին Բաղդադլյան | Դասավանդի՛ր, Հայաստան
Սրտանց շնորհակալ ենք Repat Armenia-ին սփյուռքի և Հայաստանի միջև բովանդակալից կապերի ստեղծման գործում մեծ ներդրում ունենալու համար։
Շտիգեն Գրուպում մենք հավատում ենք Կորպորատիվ ազգային պատասխանատվության գաղափարին, որը ներառում է ազգային արժեքների պահպանությունը, մարդկային կապիտալի զարգացումը և տեղական ու համաշխարհային մարտահրավերներին ազդեցիկ լուծումներ առաջարկելը։ Շատ ուրախ եմ, որ Engage Armenia-ն դարձավ բացառիկ հարթակ մեր գաղափարախոսությունը ներկայացնելու համար։ Պատիվ էր լինել այս բացառիկ նախաձեռնության մաս և նպաստել հայրենադարձությանը՝ ցույց տալով, որ Հայաստանը մեծ երկիր է՝ լի հնարավորություններով։
Արփի Հարությունյան | Շտիգեն Գրուպ
Հրաշալի էր ծանոթանալ հայաստանյան այն բոլոր սոցիալական նախաձեռնություններին, որոնք ներկայացվեցին ֆորումի ժամանակ։ Չէի պատկերացնում, որ Հայաստանում այսքան հզոր գործիչներ ու նախաձեռնող թիմեր կան։
Թիմ Սթրեյթ | HDIF
Միջոցառումը կազմակերպված էր շատ ինտերակտիվ ձևաչափով, որն ընդգծում էր մասնակիցների համատեղ ջանքերը Հայաստանի ապագայի կերտման գործում։ Մենք վստահ ենք, որ ֆորումի հյուրերի մոտ ծնվեցին Հայաստանի հետ հեռանկարային համագործակցության նոր գաղափարներ և ուղիներ, նույնիսկ նման կարճ ժամանակահատվածում։
Ելենա Կոժեմյակինա | Վիվա հիմնադրամ
Հայաստանն ունի զգալի մարտահրավերներ, բայց միևնույն ժամանակ կանգնած է մեծ հնարավորությունների շեմին։ Այսպիսի միջոցառումները, ինչպիսին է Engage Armenia-ն, թույլ են տալիս սփյուռքի մեր հայրենակիցներին ավելին իմանալ այն մասին, թե ինչպես կարող ենք դրական ազդեցություն ունենալ հայրենիքի զարգացման գործում։ Մեր գլոբալ համայնքի նույնիսկ փոքր քայլերով է հնարավոր միասին նոր ուղի հարթել՝ ապահովելով Հայաստանի բարեկեցությունը։
Նազարեթ Սեֆերյան | Impact Hub Yerevan / VIA Fund-ի խորհրդի անդամ
Engage Armenia 2024 ֆորումը Դուբայում ուշագրավ հարթակ էր կապեր ստեղծելու և համագործակցություններ խթանելու համար։ Ուրախ ենք, որ ֆորումի ընթացքում ներկայացված ազդեցիկ նախաձեռնությունների և հայրենիքի հետ վերամիավորվելու ինովացիոն հնարավորությունների շարքում էինք։ Այս նախաձեռնությունների միասնական իրագործման միջոցով է հնարավոր ապահովել զգալի փոփոխություններ հայրենիքում և կառուցել Հայաստանի բարեկեցիկ ապագան։
Աստղիկ Օգանեսյան | Կերոն հիմնադրամ
Հովնանյան հիմնադրամի կողմից կազմակերպված այս միջոցառումները նորից ապացուցում են, որ Հայաստանն առաջարկելու շատ բան ունի։ Յուրաքանչյուր մասնակից իր ներդրումն է կատարում միջոցառման կայացման մեջ՝ ունենալով հավաքական նպատակ՝ բարձրացնել հայրենիքի տեսանելիությունը և սփյուռքի հայրենակիցների ներգրավվածությունը Հայաստանի զարգացման գործում։
Հրայր Բարսումյան | Optimize ընկերություն
Engage Armenia ֆորումը եզակի հնարավորություն է ծանոթանալու և կապեր հաստատելու աշխարհի հայերի հետ, գաղափարներ փոխանակելու և համատեղ աշխատելու նորարարական նախաձեռնությունների վրա՝ ուղղված մեր հայրենիքի զարգացմանը։ Այն հարթակ է կարևոր խնդիրների քննարկման, լուծումների որոնման և բովանդակային ծրագրերի համատեղ մշակման համար։
Մարիամ Աբրահամյան | Big Mind
Այս նախագիծը միավորում է գաղափարներն ու մարդկանց՝ գործնական հարթակ տրամադրելով նախաձեռնությունների զարգացման համար։ Պատիվ է լինել այս նախաձեռնության մասը, և հույս ունեմ, որ մեր հաջորդ հանդիպման ժամանակ քննարկված բազմաթիվ գաղափարներ արդեն իսկ իրականություն դարձած կլինեն՝ ի շահ Հայաստանի։
Ելենա Յակովլևա | Primavera Foundation
Engage Armenia-ն բացառիկ հարթակ է հաղորդակցության և կապերի ստեղծման համար՝ խթանելով միջոլորտային գործակցության եզակի հնարավորություններ։ Այն առանցքային է այն անհատների և կազմակերպությունների համար, որոնք անխոնջ աշխատում են Հայաստանի զարգացման և ապագայի կերտման համար։
Լուսինե Մանուկյան | Traveling Doctors
