Նոյեմբերի 23-ին Դուբայում տեղի է ունենալու Engage Armenia Forum 2024-ը, որն իր շուրջ է համախմբում Հայաստանի ապագայով մտահոգված մասնագետներին՝ միասին մտածելու և միասին լուծումներ գտնելու։ Միջոցառման համակազմակերպիչներն են Repat Armenia-ն, Հ. Հովնանյան ընտանեկան հիմնադրամը և Ամերիաբանկը՝ ԱՄԷ-ի հայ համայնքի խորհրդի հետ համատեղ:
Հայերի միասնականությունը մշտապես, իսկ անորոշ և դժվարին ժամանակներում հատկապես, կենսական նշանակություն ունի հայրենիքի բարեկեցության համար։ Engage Armenia Forum 2024-ը հիանալի հնարավություն է աշխարհի ցանկացած կետում ապրող հայրենակիցների միավորման և Հայաստանի զարգացման գործում ներգրավվածությունը բարձրացնելու համար։ Այս օրը Հայաստանի և հայկական սփյուռքի մի շարք նվիրյալներ կքննարկեն Հայաստանի ապագան, կառաջադրեն նորարարական մտքեր և կմշակեն զարգացման ճանապարհներ։ Հայրենիքը ունի մեր կարիքը՝ անկախ մեր մասնագիտությունից և փորձից։
Մեծ ոգևորությամբ հայտնում ենք, որ staff.am-ի համահիմնադիրներ Լուիզա Ավետիսյանը և Վահե Ավետիսյանը նույնպես ներկա կլինեն այս կարևոր և ազդեցիկ միջոցառմանը, որի ընթացքում կկիսվեն իրենց մասնագիտական փորձով և խորհուրդներով։ Պանելային քննարկումների ժամանակ Լուիզա Ավետիսյանը կխոսի Հայաստանի աշխատաշուկայի առանձնահատկությունների, հավաքագրման ժամանակակից տեխնոլոգիաների, կարիերայի, ինչպես նաև հայրենադարձության ու դրա կարևորության մասին։
Engage Armenia Forum 2024-ի հիմնական թեմաներն են՝
- կամավորություն և պրակտիկա,
- մասնագիտական զարգացում,
- բիզնես և սոցիալական ներդրումներ,
- կրթություն և առողջապահություն,
- մենթորություն և փորձի փոխանակում,
- հայրենադարձություն և ինտեգրացիա։
Ինտերակտիվ ելույթները, պանելային քննարկումները և նեթվորքինգը նպաստավոր պայմաններ են ստեղծում Հայաստանի հզորացմանն ուղղված գաղափարներ մշակելու և հայրենակիցների ու հայրենիքի հետ ամուր կապեր ստեղծելու համար։
staff.am-ը կարևորում է նմանատիպ նախաձեռնությունները և իր մասնակցությամբ նպաստում է դրանց տարածմանն ու ազդեցության շրջանակի մեծացմանը։ Իսկ staffmedia.am-ը շարունակում է ուշադրության արժանի միջոցառումների լուսաբանումը և իր լսարանին մշտապես տեղեկացված պահելը։
