Հայ-ամերիկյան EngineerX ընկերությունը նախաձեռնել է համահայկական ուսանողական մրցույթ՝ «Հայ ինժեներական ոլորտի էվոլյուցիան», որը հիանալի հնարավորություն է ուսանողների համար՝ արտահայտելու իրենց ստեղծագործական միտքն ու ինժեներական փորձը։
EngineerX-ի հիմնադիր բոստոնահայ Վահե Նիգողոսյանը նշում է, որ Հայաստանն ունի ինժեներական հարուստ պատմություն.
Մրցույթի հիմնական նպատակը Հայաստանի բուհերի ու քոլեջների ուսանողներին ոգևորելն է և միջազգային շուկայում մրցունակ դարձնելը։ Կենտրոնանալով կրթության վրա՝ ձգտում ենք կառուցել տաղանդավոր մասնագետների ամուր հիմք, ովքեր կարող են Հայաստանը տանել դեպի խելացի ապագա։
Ինժեներական մրցույթն իրականացվում է 2025 թվականի հունվար-ապրիլ ամիսներին։ Այն ներառում է ՀՀ բոլոր խոշոր բուհերը՝ Հայաստանի ազգային պոլիտեխնիկական համալսարանը, Հայաստանի ամերիկյան համալսարանը, Երևանի պետական համալսարանը, Հայ-ռուսական համալսարանը, Հայաստանի ազգային ագրարային համալսարանը և այլն։ Ինժեներական մրցույթին ուսանողները մասնակցում են 2-4 հոգուց բաղկացած թիմերով։ Այն ունի մանրակրկիտ մշակված կանոններ և գնահատման մեթոդներ, որոնք թիմերին կդրդեն ցուցաբերել ստեղծագործ մոտեցում։
Մրցույթին գրանցվել է 19 թիմ` շուրջ 57 մասնակից, ինչը վկայում է ուսանողների շրջանում առաջացրած հետաքրքրության մասին։ Ընկերությունը թիմերի բոլոր անդամներին տրամադրել է SolidWorks կրթական լիցենզիաներ ծրագրակազմի փաթեթներից օգտվելու համար, նաև ողջ ընթացքում իրականացնում է խորհրդատվություն և աջակցություն։
Ինժեներական մրցույթը կեզրափակվի ապրիլի 17-ին՝ մեծ միջոցառմամբ, որտեղ ՀՀ ինժեներական ոլորտի փորձառու ժյուրիի անդամները կընտրեն հաղթող թիմերին, որոնք կստանան դրամական պարգևներ։ Մրցույթի գլխավոր հովանավորներից են՝ «Davaro LLC» և «ME Companies» ընկերությունները։
EngineerX ընկերությունն առաջարկում է ճարտարագիտական ծառայությունների լայն շրջանակ, ներառյալ արդյունաբերական արտադրանքի նախագծում, ինժեներական վերլուծություն, արտադրական աջակցություն, նաև ծրագրային լիազորված վաճառք և աջակցություն Dassault Systèmes Solidworks-ի և 3DEXPERIENCE ապրանքանիշերի համար։ Հայ-ամերիկյան ընկերությունը հանձնառու է օգնել հայ գործարարներին ու ինժեներներին նորարարության և հաջողության հասնելու հարցում։
Հավելենք, որ Dassault Systèmes-ի Solidworks-ը համաշխարհային առաջատարն է 3D դիզայնի, ճարտարագիտության և ծրագրային ապահովման արտադրության ոլորտում: Ընկերությունը տրամադրում է ապրանքների և ծառայությունների համապարփակ գործիքակազմ, որն օգնում է աշխարհի տարբեր բիզնեսներին նախագծել, զարգացնել և արտադրել նորարարական ապրանքներ: Այն օգտագործվում է ավելի քան 3 միլիոն ինժեներների և դիզայներների կողմից ավելի քան 160 երկրում:
