Բացառիկ հարցազրույց Հակոբ Շարաբխանյանի հետ

1944

HackTech ընկերությունը մեզ և ձեզ ծանոթ մի շարք մեծ ու միջազգային բրենդերի տրամադրում է ծրագրային ապահովման լուծումներ՝ ուղեկցելով նրանց թվային փոխակերպման ճանապարհին։ Ուշագրավ է այն, որ չնայած համագործակցության աութսորս մոդելի, HackTech-ն ընտրողաբար է մոտենում գործընկերների ընտրությանը՝ համագործակցելով միայն այնպիսի ընկերությունների հետ, որոնք կիսում են HackTech-ի արժեքները և հնարավորություն են տալիս ընկերության թիմակիցներին ոգեշնչվելու՝ մի մասը կազմելով ինչ-որ կարևոր աշխատանքի։


Բոլորովին վերջերս մեր գործընկերը նշեց նաև իր նոր գրասենյակի բացումը, որն, ինչպես պարզեցինք մեր այցի ընթացքում, բացի ավելի ընդարձակ ու հարմարավետ աշխատանքային տարածք ապահովելուց, այլ կարևոր առաքելություն էլ ունի։ Սա շատ լավ առիթ էր ոչ միայն HackTech հյուրընկալվելու, այլ նաև հետաքրքիր զրույց ունենալու ընկերության գլխավոր տնօրեն Հակոբ Շարաբխանյանի հետ։ Հակոբը մեզ պատմեց HackTech-ի հիմնադրման, ընկերության արժեքների, նոր գրասենյակի, արդեն իսկ գրանցած հաջողությունների, ապագայի նպատակների մասին ու ոչ միայն։

Ինչո՞ւ որոշեցիք հիմնադրել ընկերությունը, և ո՞րն էր գլխավոր մոտիվացիան։

«HackTech ընկերությունը ստեղծել եմ 2015 թվականին «Էրեբունի» համայնքում գտնվող փոքր տարածքից՝ 2 հոգանոց թիմով։ Հպարտությամբ կարող եմ նշել, որ մեր առաջին թիմակիցները մինչև այսօր աշխատում են HackTech-ում ու շատ մեծ արժեք են ստեղծում մեզ համար։ 2015 թվականին ծառայություն մատուցող շատ ՏՏ ընկերություններ էին ստեղծվում, որոնք հիմնականում ֆրիլանս մոդելով էին աշխատում։ Հիմնական մոտիվացիան թե՛ հաճախորդներին, թե՛ մեզ ավելի մեծ արժեք տվող ընկերություն ստեղծելն էր։

Առաջին նախագծից սկսած աշխատել ենք որպես ընկերություն, ունեցել ենք շատ լոյալ հաճախորդներ, որոնց մի մասի հետ բացման օրվանից մինչև այսօր շարունակում ենք աշխատել։ Երևի, գլխավոր մոտիվացիան հենց դա է եղել՝ ստեղծել ավելի մեծ արժեք այս արագ զարգացող ոլորտում»։

Ինչպիսի՞ արժեքներով և հմտություններով պիտի օժտված լինի մասնագետը, որպեսզի միանա HackTech-ի թիմին։

«Ցանկանում եմ նշել, որ HackTech-ի թիմում համախմբած են շատ տարբեր մարդկիկ, ովքեր կիսում են մեր արժեքներն ու իրենց hard և soft հմտություններով փոխլրացնում են միմյանց։ Երևի հենց դրա շնորհիվ է, որ HackTech-ին հաջողվում է այսքան արագ զարգանալ»։

HackTech-ի հիմնական արժեքներն են՝

  • Ինքնատիպություն
  • Հետաքրքրասիրություն
  • Ծառայել միմյանց
  • Թափանցիկություն
  • Խոցելիություն

HackTech - main values

Քանի՞ մասնագետ է աշխատում HackTech-ում։

«Այս պահին HackTech-ում կա 75 աշխատակից։ Վերջին 3 տարում կրկնակի աճ ենք ունեցել՝ համեմատած նախորդ տարվա»։

HackTech-ի հիմնադրման պահից մինչ այսօր, ո՞րն է եղել ամենամեծ դասը, որ քաղել եք։ Ի՞նչն այլ կերպ կանեիք, եթե նորից սկսեիք։

«HackTech-ը շատ սահուն ճանապարհ է ունեցել։ Ավելի քան 8 տարվա ընթացքում երբեք խոշոր խնդիրների առաջ չենք կանգնել։ Որպես դրական դաս կարող եմ նշել անձնական հարաբերությունների կարևորությունը բիզնեսում, այլ կերպ ասած՝ հաճախորդների հետ ընկերական հարաբերությունների ձևավորումն ու մեծ նեթվորք ունենալը։

Քանի որ սկսել եմ 19-ի տարեկանում, բնականաբար, կցանկայի բիզնեսի մասին ավելի շատ տեղեկություններ իմանալ, բայց ինչ-որ մեծ քայլ, որ այլ կերպ կանեի, չեմ մտաբերում»։

Առաջնորդության ո՞ր մոդելն եք հատկապես ընդունում: Արդյո՞ք HackTech-ում կա կառավարման հատուկ առանձնացված մշակույթ։

HackTech CEO - Hakob Sharabkhanyan

«HackTech-ում կառավարման և առաջնորդության մի մոտեցում կա՝ «servant leadership», այսինքն, ցանկացած առաջնորդ պիտի իր աշխատանքով և օրինակով առաջնորդի մյուսներին։ Մեզ մոտ չկա «command chain» ասվածը, կա թիմ, որը մի գաղափարի ու տեսլականի շուրջ համախմբվել է և միմյանց փոխլրացնելով գործ է անում։

Ինչքան էլ նշում ենք, որ կա առաջնորդության մի մշակույթ, միևնույն է, ունենք իրարից տարբեր առաջնորդներ։ Յուրաքանչյուր առաջնորդ իր բնավորությամբ, թիմի հետ իր հաղորդակցության մեջ մյուսներից տարբերվում է։ Բայց հիմնական գաղափարը մնում է, որ բոլորը կրում են «servant leadership»-ի գաղափարը ու դրա շնորհիվ էլ փորձում են ճիշտ ձևով առաջնորդել թիմերին»։

Գործունեության ո՞ր փուլում եք որդեգրել կառավարման տվյալ սկզբունքները։

«Հիմնադրման առաջին օրվանից էլ այդ մոդելով ենք աշխատել՝ չիմանալով այդ մոդելի մասին, քանի որ, ինչպես նշեցի, բիզնեսի մասին պատկերացումներն այդ փուլում քիչ են եղել։ Ավելի պաշտոնական, որպես մեր հիմնական աշխատանքային մոդել, որդեգրել ենք այն ժամանակ, երբ թիմն արդեն հատել էր 30-ի շեմն ու կարևոր էր ավելի պրոցեսային առաջ շարժվելը»։

Թիմի մեծանալով պայմանավորված որոշակի գործընթացների անցնելու փուլում ի՞նչ մարտահրավերների եք բախվել։

«Կարծում եմ, որ ցանկացած բիզնեսի համար 30-50 հոգու շեմն անցնելն ամենակարևոր փուլն է։ Դու քո անձնական խարիզմայով, կառավարման հմտություններով կարող ես մինչև 30, իսկ կառավարման շատ ուժեղ հմտությունների դեպքում մինչև 50 հոգանոց թիմ ղեկավարել, բայց դրան հաջորդող քայլերի համար քեզ պետք կլինի կառուցվածք ունեցող ընկերություն։ Ինձ համար HackTech-ը որպես ընկերություն ձևավորվել է, երբ մենք կարողացանք անցնել 30 հոգու շեմը։ Հենց դա է եղել այն շեմը, երբ ինտուիտիվ վիճակներից անցնել ենք ավելի կազմակերպված բիզնեսի»։

Կպատմե՞ք նոր գրասենյակ տեղափոխվելու մասին։

«Կա երեք հիմնական գործոն, ինչի համար շատ եմ կարևորում այս գրասենյակը՝

1. Թիմի մոտիվացիան։ Մեզ համար գրասենյակը մի տեղ է, որտեղ մենք հավաքվում ենք ու աշխատանքից բացի շփվում ենք իրար հետ, սուրճ ենք խմում և ավելի լավ պայմաններ ու ընդարձակ գրասենյակ ունենալը մոտիվացնում է։

2. Չնայած մեր հաճախորդների մեծ մասն ԱՄՆ-ից է, բայց նրանք շատ հաճախ են գալիս Հայաստան։ Նոր գրասենյակ տեղափոխվելը շատ կարևոր էր նաև ավելի ներկայանալի լինելու համար։

3. Քանի որ գրասենյակը վարձակալած չէ՝ մեր սեփական տարածքն է և ստաբիլության տեսանկյունից նման կապիտալ ունենալը հնարավորություն է տալիս ավելի ռիսկային բիզնես որոշումների կայացմանը»:

HackTech new office

Ինչպե՞ս եք սկսել Ձեր ճանապարհը։ 

«Սովորել եմ Հայ-ռուսական համալսարանի կիրառական մաթեմատիկայի ֆակուլտետում։ Սկսել եմ աշխատել երկրորդ կուրսից, HackTech-ը հիմնադրել եմ երրորդ կուրսում ու նաև դրա պատճառով էլ չորրորդ կուրսում դուրս եմ մնացել համալսարանից և մեկ տարի հետո նոր ավարտել եմ։

Շատ գիտելիքներ է տվել համալսարանը հենց այս ոլորտում ավելի խորքային պատկերացումներ ունենալու համար»։

Կպատմե՞ք HackTech-ի հաճախորդների և այն նախագծերի մասին, որոնց շուրջ աշխատում եք։

«HackTech-ի հիմնական հաճախորդները, ինչպես նշեցի, Միացյալ Նահանգներից են։ Հիմնականում մեր գործընկերները մարքեթինգային ոլորտից են՝ QR կոդերի tracking-ի շատ մեծ պրոյեկտ ունենք, օֆֆլայն, հիբրիդ ու օնլայն միջոցառումների կազմակերպման հարթակի հետ ենք համագործակցում, խոշոր մարքեթփլեյսերի հետ ենք աշխատում նաև ունենք Legaltech ոլորտից հաճախորդ՝ շատ հայտնի Deel ընկերությունը, որը, եթե չեմ սխալվում 13 միլիարդ դոլար է գնահատվում։ Ունենք պրոյեկտներ նաև անվտանգության, սերվերների ոլորտում։ Հիմնականում զբաղվում ենք բարդ կոմպլեքս լուծումներով, որոնց համար պետք է առնվազն 6-7 հոգանոց թիմ ու առնվազն մի քանի տարի տևողություն»։

Ի՞նչ հաջողություններ է HackTech-ն արդեն գրանցել և ինչպիսի՞ ծրագրեր ունի մոտ ապագայում։

«Ընկերության գրանցած ամենամեծ հաջողությունը եղել է հենց որպես ընկերություն կայանալը։ Կարծում եմ Հայաստանում այս պահին բավականին ճանաչելիություն ունենք, որպես լավ որակի ՏՏ ընկերություն։ Ավելի լոկալ հաջողություններից ունեցել ենք հաջողված ինթերնշիփ, որի շնորհիվ շատ լավ երիտասարդներ միացել են HackTech-ի թիմին։ Հաջողություն էր նաև նոր գրասենյակ տեղափոխվելը, վերջին 3 տարում ստաբիլ մեծանալն ու շրջանառության կրկնակի ու եռակի աճը։

HackTech team
HackTech logo

Հաջորդ 3 տարվա պլաններում ավելի ագրեսիվ ու արագ զարգանալն է, քանի որ նշեցի 30-ից 50-ի շեմն անցնելը, կարծում եմ մյուս շեմը 70-75 հոգու շեմն է։ Հաջորդ 3 տարվա պլանն վաճառքով ակտիվ զբաղվելն է և թիմի ընդլայնումը»։

Ինչո՞ւ միանալ HackTech-ի թիմին։

«HackTech-ում միշտ փնտրում ենք մոտիվացված լավ մասնագետների՝ տարբեր մասնագիտություններով՝ project management, UI/UX design, տարբեր փորձի տեր և տարբեր լեզուների իմացությամբ ծրագրավորողների, DevOps և QA engineer-ի… Բոլոր հաստիքներով էլ մշտապես ակտիվ հավաքագրման փուլում ենք գտնվում։

Մեր պոտենցիալ թեկնածուներին սիրով սպասում ենք մեր նոր գրասենյակում։ Իրականում, գրասենյակի այսքան ընդլայնված ու շատ մեծ ազատ տարածք ունենալն էլ միտված է 2024թ-ին համայնքի համար շատ մեծ միջոցառումներ կազմակերպելուն։

Ցանցկացած պահի, ցանկացած թեկնածուի, ում հետաքրքրում է, թե ինչով է զբաղվում HackTech-ը կամ ինչ մշակույթ է մեզ մոտ, կարող է գալ, մեկ բաժակ սուրճ խմել մեզ հետ ու գնալ իր գործերով»։

Ամփոփելով, ցանկանում ենք ասել, որ հարցազրույցից հետո դեռ տևական ժամանակ ջերմ տպավորությունները, որ ստացանք HackTech-ում, մեզ չէին լքում։ Անչափ ուրախ էինք մեր գործընկերոջ գրանցած հաջողությունների մասին պատմել staffmedia.am-ում և ավելի քան վստահ ենք, որ նվաճումները շարունակական բնույթ են ունենալու նաև 2024 թվականին՝ էլ ավելի մեծ թափով։ Դե իսկ դուք, անպայման հետևեք HackTech-ի կարիերայի էջին staff.am-ում, որպեսզի առաջինը տեղեկանաք ընկերության թարմացումների մասին։

Powered by staff.am.