Մեր գործատուների հաջողությունները շարունակում են գրավել մեր ուշադրությունը, և մենք այս անգամ առիթը բաց չթողեցինք այցելել շինանյութի և շինարարական հարդարման պարագաների մասնագիտացված Էքստերիեր Գրուպ ընկերություն։
Նրանք, ովքեր հետաքրքրված են աշխատել հենց այս ոլորտում, առնչվել շինարարական ոլորտի մեգաներկայացուցիչների հետ, ունենալ հրաշալի թիմային աշխատանքի ամենօրյա փորձ, վստահաբար սխալված չեն լինի, եթե հետևեն Էքստերիեր Գրուպին՝ ստորև ընդամենը մեկ քլիքով, ու առաջին իսկ հնարավորության դեպքում միանան ընկերությանը։
Դե ինչ, ծանոթանանք թիմին և սկսենք մեր այդքան սպասված զրույցը․
էՔՍՏԵՐԻԵՐ ԳՐՈՒՊ ԹԻՄ
ԿԱՐԻՆԵ Գովազդի և PR-ի մասնագետ
ՍՈՒՐԵՆ Գործադիր տնօրեն
ՀԱՍՄԻԿ ՄՌ ղեկավար
ԱԼԻՆԱ Խանութ սրահի գանձապահ
ՊԱՐԳԵՎ Պահեստների և առաքման պատասխանատու
ԼԻԼԻԹ Կայքի ադմինիստրատոր
ԱԼՎԻՆԱ Հաշվետար
ԷԴԳԱՐ Խանութ սրահի մենեջեր
ՄԱՐԻԱՄ Ներմուծման գծով մենեջեր
Եվ մեր էքստերիերյան զրույցը սկսեցինք Գործադիր տնօրեն Սուրեն Ղուկասյանի հետ բացահայտելու ընկերության ակունքներն ու հաջողության գրավականները։
Էքստերիերի առաջին խանութ-սրահը հիմնադրվել է 2004թ. Կոմիտասի պողոտայում։ Այդ ժամանակ ընդամենը 5 աշխատակից ունեինք։ Երկարատև, քրտնաջան և նվիրված աշխատանքի շնորհիվ այժմ ունենք 12 խանութ-սրահ և մոտ 200 աշխատակից: Էքստերիեր Գրուպը հանդիսանում է մի շարք բրենդների էքսկլյուզիվ ներկայացուցիչը Հայաստանում։ Մեր խանութ-սրահներում ներկայացված են պաստառների և ներկերի ամենամեծ տեսականին։
Իսկ այս հաջողությունների գրավականը մեր թիմն է, երբ աշխատակիցներն աջակցում են մեկ մեկու հանուն մեկ ընդհանուր նպատակի։ Մեր բոլոր մասնաճյուղերում գործում է սպասարկման նույն ձեռագիրը, ինչը հնարավոր է դարձել միմիայն ի շնորհիվ թիմային և համախմբված աշխատանքի։
Հաջողության հասնելու ճանապարհը երբեք հարթ չի լինում, հատկապես, երբ խոսվում է շուկայում առաջատար դիրքեր զբաղեցնելու մասին։
Երբ փոքր խանութ-սրահից աստիճանաբար փորձում ես դառնալ ներմուծող և մատակարար, քայլել արդեն շուկայում գործող առաջատարներին համընթաց և ապահովել քո ուրույն և կայուն տեղը շուկայում, ինչ խոսք, շատ մարտահրավերների հետ ես առերեսվում: Այսօր Էքստերիերի դիրքն ու համբավը փաստում է այն մասին, որ ժամանակի ընթացքում այդ բոլոր մարտահրավերները հաղթահարվել են պատվով ի շնորհիվ աշխատասիրության և ճիշտ ժամանակին ճիշտ կայացված լուծումների և, իհարկե, գուցե կրկնվեմ, բայց համախմբված թիմային աշխատանքի:
Իսկ վերջում, Սուրենի հետ զրույցը ամփոփեցինք՝ խոսելով Հայաստանում գործատուի զարգացման հեռանկարների մասին։
Աշխատել շատ, զարգացնել Հայաստանը և ինքնազարգանալ:
Զրույցը շարունակեցինք Ներմուծման գծով մենեջեր Մարիամի հետ, ով արդեն շուրջ 4 տարի է աշխատում է ընկերությունում՝ դառնալով ոլորտում հմուտ մասնագետ։
Շատ պատահաբար եմ հայտնվել Էքստերիեր Գրուպում, բայց նաև շատ ուրախ եմ այդ պատահականության համար։ Շատ եմ սիրում իմ աշխատանքը։ Պատասխանատու աշխատանք է, մեծ ուշադրություն է պահանջում։ Անմիջապես կապ ենք պահում արտադրողի հետ, նաև ունենք մեծածախ վաճառք, շատ հաճախ այս ուղղությամբ էլ ենք կապ պահպանում։ Ընդհանուր առմամբ, բրենդի զարգացման հետ կապված ցանկացած աշխատանք մեզ հետ առնչություն ունի։
Մեր հարցին, թե ի՞նչ չափանիշներով է կատարվում գործընկեր կազմակերպությունների ընտրությունը, Մարիամը պատասխանեց․
Շատ հետաքրքիր աշխատանք է տարվում մեր կողմից այս առումով․ գործընկեր կազմակերպություն ընտրելիս հիմնականում հաշվի ենք առնում տվյալ ընկերության փորձը և զբաղեցրած դիրքը միջազգային շուկայում, գին-որակ հարաբերակցություն՝ հաշվի առնելով տարածաշրջանի սոցիալ-տնտեսական վիճակը։ Այնուհետև ուսումնասիրում ենք առաջարկված ապրանքը, ինչն իր մեջ տեխնիկական բնութագրից զատ ներառում է նաև տվյալ ապրանքի պահանջարկի ուսումնասիրություն։ Շատ կարևոր է նաև ընկերության ճկուն արտադրական գործընթացը, դինամիկան, ինովացիոն ծրագրերը՝ որպես արտադրող, և մի շարք այլ հատկանիշներ։ Եվ որպես մասնագետ այստեղ առաջնահերթ է դառնում ճաշակ ունենալու և այդ ճաշակը շուկային ներկայացնելու, թելադրելու հմտությունը։
Էդգարը, ով զբաղեցնում է Խանութ սրահի մենեջերի պաշտոնը, մեզ հետ զրույցի ընթացքում պատմեց, թե ինչով է առանձնանում իր աշխատանքն ու ինչ նորույթ են վերջերս կիրառել աշխատանքում։
Ճիշտ և գրագետ սպասարկումը մեր կարևորագույն առաջնահերթություններից է․ պետք է ճիշտ տեղեկություն տրամադրենք ապրանքի վերաբերյալ, որպեսզի մեր հաճախորդները գոհ և շնորհակալ հեռանան խանութից նորից վերադառնալու մտադրությամբ։
Ի դեպ, Էդգարն արդեն 10 տարի աշխատում է Էքստերիեր Գրուպում, և ավելին, երկար տարիներ աշխատելն այդքան էլ հեշտ չէ այստեղ, սա այն ոլորտն է, որտեղ յուրաքանչյուր օր պետք է նոր գիտելիքներ ձեռք բերել։
Մեզ մոտ այնպես չէ, որ եթե ապրանքատեսականուն տիրապետում ես, ուրեմն կարող ես 10 տարի սպասարկել։ Անընդհատ ավելանում են նոր բրենդներ, պետք է կիրառել նոր մոտեցումներ։ Աշխատանքը հետաքրքիր է նրանով, որ որպես հաճախորդ այցելում են նաև վարպետներ և դիզայներներ. մեր խնդիրն է հասկանալ հաճախորդի կարիքը և այնքան լավ տիրապետել նյութերին ու ապրանքատեսականուն, որ կարողանանք առաջարկել համապատասխան լուծումներ։ Ուստի մեր մտածողությունն ու մոտեցումները պետք է հնարավորինս ճկուն լինեն։
Որպես նորույթ նշեմ, որ արդեն գործում է exterior.am օնլայն հարթակը, որտեղ հաճախորդը կարող է ծանոթանալ ամբողջ ապրանքատեսականուն: Ուզում եմ շեշտել, որ կայքում կա վիրտուալ դիզայնի պատուհան, որտեղ հնարավոր է տեսնել նախընտրելի ապրանքը համադրված ինտերիերում: Իսկ պանդեմիայի պատճառով ստեղծված իրավիճակի պայմաններում սկսեցինք նաև սպասարկում իրականացնել WhatsApp, Viber հավելվածների միջոցով, ինչը նույնպես հնարավորություն է տալիս հաճախորդին ընտրություն կատարել տնից:
Լիլիթից տեղեկացանք նաև, թե կարիերայի աճի ինչ հնարավորություններից են օգտվում Էքստերիեր Գրուպում։
Ինքս՝ որպես Կայքի ադմինիստրատոր, նոր մասնագիտության ձեռքբերման և կարիերայի աճի հատուկ ուղի եմ անցել ընկերությունում. սովորել եմ թվային մարքեթինգ, SEO, ինչպես նաև գրաֆիկ դիզայն։ Իսկ, առհասարակ, մեր անձնակազմի գիտելիքների խորացման ու ամրապնդման նպատակով ուզում եմ շեշտել, որ բավականին հաճախ կազմակերպվում են սեմինարներ, ներքին և արտաքին թրեյնինգներ։ Փորձի փոխանակում տեղի է ունենում թե՛ արտերկրից ժամանած մեր գործընկերների հետ Հայաստանում, թե՛ արտերկրում` ներկրվող բրենդների արտադրամասերում, որտեղ մեր աշխատակիցները տեղում ծանոթանում են ապրանքների արտադրման և մշակման պրոցեսներին:
Այսպիսով, վստահ կարող եմ ասել, որ յուրաքանչյուր էքստերիերցի ունի կարիերայի աճի հնարավորություն, ինչի օրինակները բազմաթիվ են` սպասարկողից ավագ սպասարկող, այնուհետև սրահի մենեջեր, մինչև անգամ մասնաճյուղի տնօրեն։
Աշխատանքի ոլորտի փոփոխման ու կարիերայի աճի լավագույն փորձի մասին խոսեցինք Պարգևի հետ, ով պահեստի աշխատակցի պաշտոնից առաջխաղացումներ է ունեցել մինչև պահեստների և առաքման պատասխանատու․
Ես պատասխանատու եմ ընկերության անվտանգության, առաքումների, պահեստների, երթուղիների կանոնակարգված աշխատանքի համար։ Իմ թիմում ներգրավված են տարբեր մասնագետներ՝ հաշվետարներ, պահեստապետեր, վարորդներ, բարձող-համակարգող, լոգիստ։
Եվ անչափ կարևոր է յուրաքանչյուրի ճշգրիտ և համակարգված աշխատանքը, որպեսզի օղակի աշխատանքը անխափան լինի:
Ես պարզապես շատ եմ սիրում իմ գործը, բոլորը գիտեն, որ շատ մեծ էնտուզիազմով եմ աշխատում։ Կարիերայի աճի անցած իմ ճանապարհի հիմքում հենց դա է ընկած: Ուղղակի մեր ընկերությունում անհնար է առանց էնտուզիազմի ու ոգևորության աշխատել, հատկապես երբ աշխատանքդ գնահատվում է:
Դե իսկ, տարբեր երկրներից ժամանած հյուրերն էլ միշտ թողել են իրենց բարձր գնահատականը․
Գործնական այցերով Հայաստան ժամանած մեր օտարերկրյա գործընկերները, ծանոթանալով մեր պահեստների դասավորվածության և աշխատանքի կազմակերպվածության հետ, բազմիցս նշել են, որ համաշխարհային ցուցանիշներով այն գտնվում է շատ բարձր մակարդակում:
Կարծում ենք նման բարձր գոհունակություն կարող է լինել այն դեպքում, երբ ընկերությունում ձևավորված է ամուր կորպորատիվ մշակույթ։ Այս մասին մեզ հետ կիսվեց Խանութ սրահի գանձապահ օպերատոր Ալինան։
Արդեն իսկ մեկ տարի աշխատելով Էքստերիեր Գրուպում՝ կարող եմ իմ տեսանկյունից ներկայացնել ընկերությունում տիրող մշակույթը և թիմային ոգին։ Ըստ իս, թիմը, թիմային ոգին աշխատավայրում ստեղծվում է այն դեպքում, երբ բոլորը գիտակցում են իրենց տեղն ու դերը։ Մեզ մոտ տիրում է առողջ մթնոլորտ, փոխադարձ հարգանք և ուզում եմ անպայման նշել, հարգանք դեպի քեզ վստահված աշխատանքը։ Թիմում բոլորը պատրաստ են միմյանց օգնել, խթանել առևտրին, որպեսզի հաճախորդը գոհ հեռանա խանութից անպայման վերադառնալու միտումով։ Ընկերությունն ապահովում է ուսուցում՝ շեշտը դնելով աշխատողի աշխատանքին տիրապետելուն և պրոֆեսիոնալիզմին։ Հաճախակի կազմակերպվում են սեմինարներ կապված թե բրենդների հետ, թե ընդհանուր սպասարկման նրբությունների հետ։ Հաճախորդի ֆիդբեքը շատ ենք կարևորում, դրական արձագանքները և՛ մոտիվացնում են մեզ, և՛ պարտավորեցնում՝ նպաստելով օրեցօր կատարելագործմանը։ Եվ ընդհանրացնելով մեր զրույցը, կհավելեմ, որ ընկերությունն ունի բացառապես իրեն բնորոշ թիմային ոգի։ Հաճելի է աշխատել Էքստերիեր Գրուպում։
Հաճախ 4 բառով բնութագրել ընկերությունը, շատ դժվար է, հատկապես, երբ կարող ես շարունակ լավ, ավելի լավ ու ամենալավ հատկանիշները թվարկել, բայց մենք փորձեցինք Ալվինայի հետ, ով աշխատում է որպես հաշվետար, առանձնացնել այդ 4 բառը 🙂
ՀՈՒՍԱԼԻ
ՎՍՏԱՀԵԼԻ
ՀԵՌԱՆԿԱՐԱՅԻՆ
ԱՋԱԿՑՈՂ
Էլի հատկանիշներ կան, որ կարելի է ավելացնել, օգտվելով առիթից նշեմ՝ զարգացնող, զարգացող, հնրավարություններ ընձեռնող, դրական կողմերը շատ-շատ են, ինչը պայմանավորված է նաև Հիմնադիր տնօրենի աշխատանքով։
Ցանկալի գործատուի հատկանիշներին յուրահատուկ հավելում կատարեց Գովազդի և PR-ի մասնագետ Կարինեն՝ իր անձնական փորձով նշելով, թե ինչու է որոշել միանալ Էքստերիեր Գրուպին։
Աշխատանքն ինքնին շատ սիրելի է․ ինքնահաստատվելու, ինքնադրսևորվելու լայն ասպեկտներ է տալիս։ Հնարավորություն ունես շփվելու տարբեր միջավայրի մարդկանց հետ, տարբեր կատեգորիաների և համապատասխան ոլորտների, որոնցից լիքը սովորելու բաներ ես ունենում։
Եվ քանի որ շուկայում Էքստերիեր Գրուպն արդեն իսկ հաստատված ընկերություն է, որը երաշխավորում է բավականին մեծ առաջընթաց իր աշխատակիցների համար (ինչում և ինքս համոզվել եմ)՝ կազմակերպելով մի շարք թրեյնինգներ, ուսուցումներ՝ խթանելով աշխատակիցների որակների բարելավմանը, թիմին միանալու որոշումս ավելի հստակեցվեց։ Ինչու չէ նաև աշխատանքի ընդունվելիս բոլորիս համար կարևոր է դրամային կողմը։ Կազմակերպությունն իր ոլորտում միջինից բարձր աշխատավարձ է առաջարկում։
ՌԵՔՐՈՒԹՄԵՆԹԸ ԷՔՍՏԵՐԻԵՐ ԳՐՈՒՊՈՒՄ
Էքստերիեր գրուպ մեր այցի համար հատուկ շնորհակալ ենք ՄՌ ղեկավար Հասմիկին, ով աջակցեց ծանոթանալու թե ընկերության թիմին, աշխատանքային առօրյային, և թե ընկերությունում աշխատանքի անցնելու առանձնահատկություններին։
Ռեքրութմենթը մի շարք առանձնահատկությունների վրա է հիմնված։ Կան հմտություններ, որոնց տիրապետելն ուղղակի պարտադիր չափանիշ է։
Կարևորվում են և՛ մասնագիտական, և՛ սոֆթ հմտությունները: Սակայն հաշվի առնելով, թե որ ոլորտում է համալրումը կատարվում, կարող է առաջնային դառնալ դրանցից մեկը: Աշխատանքի անցնելուց առաջ մեր թեկնածուները փորձաշրջան են անցնում, որի ընթացքում արդեն սկսում են կիրառել իրենց գիտելիքները ընկերության պահանջներին համապատասխան, հմտանում և շարունակում են ձեռք բերել նոր գիտելիքներ ու հմտություններ:
Իսկ ի՞նչ մասնագետներ են առավել պահանջված այս ոլորտում և ի՞նչ խորհուրդներ կտրամադրեք այն թեկնածուներին, ովքեր հետաքրքրված են միանալ Ձեր թիմին։
Առավել պահանջված մասնագետները սպասարկման ոլորտի աշխատակիցներն են: Եվ այս պահանջարկն առաջանում է մի քանի պատճառներից ելնելով, օրինակ, երբ նոր մասնաճյուղ ենք բացում, կամ անհրաժեշտ է ավելացնել նոր աշխատակիցներ, և ևս մեկ կարևոր հանգամանքի շնորհիվ․ մեզ մոտ չեք նկատի սրահի պատասխանատուներ կամ մասնաճյուղի տնօրեններ, որոնք արտաքին ռեքրութմենթի արդյունքում ենք հավաքագրվել, առաջին հերթին մենք շեշտը դնում ենք ներքին հավաքագրման ընդլայնման և աշխատակիցների պաշտոնների առաջխաղացման վրա։
Խորհուրդներ…եթե փնտրում եք կայուն և հուսալի ապագա, ապա Էքստերիերը հենց ձեզ համար է, ուր չպետք է դադարել մտքի մարզումները, նորույթներին հետևելը և սովորելը, ինչու չէ նաև սովորեցնելը: Էքստերիերն այն ընկերությունն է, որտեղ կարող ես բացահայտել քեզ նորովի:
Մեր այցի ընթացքում արդեն իսկ համոզվեցինք այն հարցում, որ աշխատակիցների մոտիվացիան և կատարողականությունը առավելագույն մակարդակում են։
Այո, ճիշտ եք նկատել։ Համար առաջին մոտիվացիան աշխատանքային միջավայրն է, թիմային աշխատանքը, որի շնորհիվ ստեղծվում է առողջ մթնոլորտ ամեն օր: Շատ կարևոր է, որ մեր բոլոր աշխատակիցները ճանաչեն իրար նաև աշխատանքից դուրս, այդ նկատառումներից ելնելով՝ տարվա մեջ միայն մեկ օր` վարդավառի տոնին, փակվում են մեր բոլոր մասնաճյուղերը, և մեկնում ենք քաղաքից դուրս լավ ժամանց անցկացնելու: Դե իսկ կորպորատիվները հավելյալ թեմա են:
Էքստերիերցիներին տրված է կարիերային աճ գրանցելու հնարավորությունը, իրենց պոտենցիալների բացահայտումը նոր ոլորտներում:
Աշխատավարձը ևս մոտիվացնող հանգամանք է, հատկապես երբ մեր առաջարկած ֆիքսված աշխատավարձը բավական մրցունակ է աշխատանքային շուկայում, իսկ բացի դրանից գործում են ճկուն տոկոսային հավելավճարներ, որի շնորհիվ հենց աշխատակիցներն իրենք են «սահմանում» իրենց աշխատավարձը: Գործում են նաև տարաբնույթ խրախուսումներ, պարգևավճարներ: Մոտիվացիոն է նաև մեր աշխատակիցներին ընձեռնված հորիզոնական և ուղղահայաց կարիերային աճի հնարավորությունը:
ԹԻՄԸ ԼՈՒՍԱՆԿԱՐՆԵՐՈՒՄ
Ամփոփենք․
Ի լրումն ընկերական աշխատանքային միջավայրին, որը նաև խթանում է թիմային աշխատանքին, Էքստերիեր Գրուպն իր աշխատակիցներին հնարավորություն է տալիս մասնակցելու տարբեր էքսպոների, արտաքին և ներքին դասընթացների, գործուղումների, համագործակցելու միջազգային առաջատար բրենդների ներկայացուցիչների հետ, կիսվելու փորձով և հարստացնելու գործնական հմտությունները։ Այս ընկերությունում նաև ամեն բան կանոնակարգված է․ յուրաքանչյուրն իր գործում հմուտ է, իր գործի նվիրյալն է, իսկ ղեկավարությունը ճանաչում ու կարևորում է յուրաքանչյուր աշխատակցի ներդրումը՝ առաջարկելով տարաբնույթ խրախուսումներ և պարգևավճարներ։
