«Երբ մի դուռ փակվում է, մեկ ուրիշը բացվում է»․ հավանաբար, այսպես են մտածում համաշխարհային այն խոշոր ընկերությունները, որոնք վերջին զարգացումների ֆոնին հեռանում են Ռուսաստանից, բայց ցանկանում են պահպանել իրենց ներկայացվածությունը տարածաշրջանում և ընտրում են Հայաստանը։ Հատկապես տեխնոլոգիական ոլորտի միջազգային ընկերությունների համար Հայաստանը լավ ընտրություն է, քանի որ երկրում մեծ ուշադրություն է դարձվում ՏՏ ոլորտին, առկա է լավ բիզնես միջավայր, հնարավոր է գտնել որակյալ մասնագետների և այդ ամենն այդքան թանկ չի արժենա, որքան այլ՝ ավելի մեծ երկրներում։ Բացի այդ, հայկական մի շարք ստարտափներ և ՏՏ ոլորտի ընկերություններ հասցրել են լավ անուն ձեռք բերել միջազգային հարթակներում և Սիլիկոնային հովտում՝ ամրապնդելով երկրի՝ որպես նոր techhub-ի համբավը։
Եվ այսպես, միայն վերջին շրջանում Հայաստան մուտք է գործել համաշխարհային 5 տեխնոլոգիական գիգանտ՝ ստեղծելով նոր հնարավորություններ, աշխատատեղեր և հեռանկարներ ինչպես մեր երկրի, այդպես էլ հայ մասնագետների համար։ staff.am-ը պատմում է այդ ընկերությունների մասին։
NVIDIA
Ապրիլի սկզբերին հայտնի դարձավ, որ համաշխարհային բարձր տեխնոլոգիական առաջատարներից NVIDIA ընկերությունը գիտահետազոտական կենտրոն է հիմնում Հայաստանում։ Արագացված հաշվարկների և արհեստական բանականության ոլորտում հայտնի առաջատար տեխնոլոգիական հսկաներից մեկը, որն ունի 27 միլիարդ դոլար տարեկան շրջանառություն և ավելի քան 20,000 աշխատակից ամբողջ աշխարհում, բացում է իր նոր գրասենյակի դռները Երևանում: Հայաստանյան մասնաճյուղը ղեկավարելու է Ռև Լեբարեդյանը՝ Omniverse-ի և սիմուլյացիոն տեխնոլոգիաների ուղղությամբ ընկերության փոխնախագահը։ Ընկերության կայքում արդեն հայտարարություններ են հրապարակված ՀՀ-ում թափուր աշխատատեղերի մասին։
ManyChat
Չեթ-մարքեթինգի համաշխարհային ամենահայտնի հարթակը՝ ManyChat-ը, ապրիլի սկզբին հայտարարեց Երևանում գրասենյակի բացման մասին: Երևանյան գրասենյակում արդեն իսկ 100-ից ավելի ինժեներներ, պրոդուկտի մենեջերներ, տվյալների վերլուծության, հաճախորդների սպասարկման և այլ մասնագետներ են աշխատում: Ընկերությունում ասում են, որ գոհ են հայկական ՏՏ համայնքից և պատրաստ են մեծացնել իրենց թիմը՝ համալրելով այն նոր տաղանդներով: ManyChat-ի CTO Դմիտրի Կուշնիկովի խոսքով՝ հետազոտությունների և զարգացման երևանյան նոր գրասենյակը կարևոր դեր է խաղում ընկերության համար:
Semrush
Semrush-ը միջազգային հարթակ է, որն օգնում է համացանցային մարքեթինգի մասնագետներին օպտիմալացնել իրենց կայքերի աշխատանքը՝ որոնողական կայքերում լավագույն տեսանելիությունն ապահովելու համար։ Վերևջերս հայտնի հարթակը սկսեց մասնագետներ որոնել նաև Հայաստանում։ Ընկերությունն ունի 1000-ից ավելի աշխատակից աշխարհի 7 երկրում, հայաստանյան գրասենյակը դեռ չի բացվել, բայց աշխատակիցների հավաքագրումն արդեն սկսված է։ Այժմ Semrush-ի կայքում հասանելի է շուրջ 25 հաստիք Հայաստանից մասնագետների համար՝ դեռ հեռավար տարբերակով, բայց ամեն ինչ առջևում է։
EasyData
Վերջերս EasyData ընկերությունը, որը մեքենայական ուսուցման ոլորտում լավագույն լուծումներն է առաջարկում, նոր գրասենյակ է բացել Երևանում։ Ինչպես նշում են ընկերությունից, Հայաստանում ՏՏ ոլորտը հայտնի է գիտական և կրթական ներուժի բարձր մակարդակով, ուստի հայաստանյան մասնաճյուղի միջոցով ընկերությունը նախատեսում է սպասարկել թե՛ աշխարհի տարբեր երկրներում գտնվող իր հաճախորդներին, թե՛ Data Science-ը կարևորող լոկալ ընկերությունները։ EasyData-ում նշում են, որ Հայաստանի վրա իրենց ընտրությունը կանգ է առել ոչ միայն ՀՀ ՏՏ ոլորտի մասին բարձր կարծիքով պայմանավորված, այլև հաշվի առնելով երկրի գեղեցիկ բնությունն ու բարի մարդկանց։
Grid Dynamics
Grid Dynamics-ը՝ թվային ինժեներական ծառայությունների և լուծումների ոլորտում առաջատար ընկերություններից մեկը, վերջերս փակեց Ռուսաստանում իր գրասենյակները՝ որոշելով փոխարենն ավելացնել իր ներկայացվածությունը տարածաշրջանում ու Եվրոպայում։ Այդպես գրասենյակներ բացվեցին Հայաստանում ու Շվեյցարիայում։ Երևանյան մասնաճյուղում արդեն իսկ 100-ից ավելի մասնագետ է աշխատում, բայց ընկերությունը պլանավորում է մինչև տարեվերջ բազմապատկել աշխատակիցների քանակը՝ ներգրավելով էլ ավելի շատ թվով բարձրակարգ մասնագետների, որոնց պակասը, ինչպես համոզված են Grid Dynamics-ում, Հայաստանում չի զգացվի։ Ընկերությունն աշխատում է այնպիսի հայտնի ՏՏ գիգանտների հետ, ինչպիսիք են Google-ը, Apple-ը, Microsoft-ը, Tesla-ն և PayPal-ը։
