Հոկտեմբերի 15-ին Երևանում անցկացվեց ՏՏ նախաճաշ G5 Games-ի հետ․ միջոցառումը համընկավ Հայաստանում ընկերության գրասենյակի բացման հետ:
G5 Games-ը շվեդական ընկերություն է, որը մշակել և թողարկել է այնպիսի պոպուլյար բջջային խաղեր, ինչպիսիք են Hidden City-ն, Sherlock-ը և Jewels շարքը: Ընկերության նախագծերի վրա աշխատում է ավելի քան 900 մասնագետ ամբողջ աշխարհում (ԱՄՆ, Շվեդիա, Մալթա, Կիպրոս, Ուկրաինա, Լեհաստան, Բուլղարիա, Չեռնոգորիա, Վրաստան, Հայաստան և այլն): Ավելի քան 20 տարի առաջ ընկերությունը դարձավ աշխարհում առաջին բջջային մշակողներից մեկը և այդ ժամանակվանից առաջատար դիրք է զբաղեցնում խաղերի ոլորտում:
ՏՏ նախաճաշին ներկա էր ավելի քան 50 մարդ՝ ծրագրավորողներ, խաղերի դիզայներներ, նկարիչներ և բոլոր նրանք, ովքեր հետաքրքրված են խաղերի մշակմամբ։ Ոչ պաշտոնական մթնոլորտում հյուրերը կարողացան շփվել և քննարկել բջջային խաղերի մշակման վերջին միտումները, օգտակար կապեր հաստատել, ծանոթանալ G5-ի կարիերայի հնարավորություններին և մասնակցել օգտակար մրցանակների խաղարկությանը:
Միջոցառման սկզբում PR/еvent մենեջեր Աննան հյուրերին պատմեց ընկերության, դրա տրամադրած բենեֆիթների և կարիերայի աճի հնարավորությունների մասին։ G5-ն ակտիվորեն ընդլայնվում է և աշխատակիցներին առաջարկում ռելոկացիայի հնարավորություն այն երկրներ, որտեղ ընկերությունն ունի գրասենյակներ:
«G5-ի մասին լավագույնս պատմում է մեր առաքելությունը՝ we bring joy to millions of players around the world («Մենք ուրախություն ենք պարգևում միլիոնավոր խաղացողների ամբողջ աշխարհում»): Եվ դրա հետ դժվար է վիճել. ավելի քան 250 միլիոն օգտատեր ամբողջ աշխարհում խաղում է մեր մշակած խաղերը»,- նշեց Աննան։
Միջոցառման գլխավոր բանախոսը՝ Վսեվոլոդը, ով տարբեր ոլորտներում նախագծերի կառավարման փորձ ունեցող խաղերի պրոդյուսեր է, պատմեց, թե որոնք են F2P նախագծի մետրիկաները և ինչի համար են դրանք պետք ծրագրավորող թիմին: Վսեվոլոդն աշխատել է որպես խաղերի առաջատար դիզայներ, պրոդուկտի մենեջեր և խաղերի վերլուծաբան, իսկ այժմ match-3 ժանրի խաղ է համակարգում G5-ում։
«Մետրիկան այն ամենն է, ինչ կարելի է չափել օգտատիրոջ և պրոդուկտի փոխազդեցության գործընթացում»,- ընդգծեց բանախոսը։
Վսեվոլոդը դասակարգեց մետրիկաներն ըստ տարբեր պարամետրերի և մանրամասն խոսեց դրանցից յուրաքանչյուրի մասին՝ պրոդուկտային և մարքեթինգային, հիմնական և օժանդակ, օրացույցային և կոհորտային:
ՏՏ նախաճաշի հյուրերն ակտիվ մասնակցություն ունեցան զեկույցի քննարկմանը, հարցեր տվեցին, կիսվեցին կարծիքներով և տպավորություններով։ Միջոցառման հիմնական նպատակը նեթվորքինգն էր, որը, ինչպես նշում են իրենք՝ մասնակիցները, միանգամայն հաջողվեց։
Վիկտոր. «Փետրվարի վերջին տեղափոխվեցի Երևան և այժմ աշխատում եմ որպես նախագծերի մենեջեր ամերիկյան ընկերությունում, մենք պատվերով սոֆթ ենք պատրաստում։ Այստեղ եմ եկել, քանի որ տեսել եմ միջոցառումը սոց. ցանցերում ու հետաքրքրվել եմ դասախոսության թեմայով։ Շատ տպավորիչ միջոցառում ստացվեց, ամեն ինչից գոհ եմ: Ընդհանուր առմամբ՝ խաղային ինդուստրիան ինձ հետաքրքրում է: Մինչև միջոցառումը ես չէի լսել G5-ի մասին, բայց հիմա կհետևեմ ընկերության նորություններին»։
Անտոն. «Ես 7 տարի է, ինչ աշխատում եմ խաղերի մշակման ոլորտում, հիմա զբաղվում եմ City Builder-ների մշակմամբ և ստեղծմամբ։ Վսեվոլոդի դասախոսության մեծ մասն ինձ ծանոթ էր, քանի որ ես ինքս աշխատում եմ մետրիկաների հետ։ Ամենից շատ ինձ դուր եկավ, երբ Վսեվոլոդը, պատասխանելով ներկաների հարցերին, կիսվեց իր յուրահատուկ փորձով։ Միջոցառմանը շատ մարդիկ կան, որոնց հետ հետաքրքիր է զրուցել, հաճելի է գտնվել խաղերի մշակման ոլորտի գործընկերների շրջապատում։ Ես կսպասեմ այլ միջոցառումների G5-ից»:
Եկատերինա. «Ես մի քանի տարի աշխատել եմ խաղերի մշակման ոլորտում որպես 2D Generalist, հիմա երկարատև արձակուրդում եմ և աշխատանք եմ փնտրում: Հաճելի է պարբերաբար առերես հանդիպել քո ոլորտի մասնագետների հետ: Դասախոսությունն ինձ համար օգտակար էր, ողջ միջոցառման ձևաչափը՝ հաճելի։ Ես երկար ժամանակ հետևում եմ ընկերության նորություններին և G5-ի թափուր հաստիքներին»։
Այժմ G5-ն ակտիվորեն ընդլայնում է իր հայաստանյան թիմը․ ընկերությունն ունի թափուր հաստիքներ խաղերի դիզայնի, մշակման, մարքեթինգի, վերլուծության և այլ ոլորտներում։ Ընկերության երևանյան գրասենյակում արդեն սկսել է աշխատել մոտ 40 մասնագետ, էլ ավելի շատ թվով աշխատակիցներ ռելոկացիայի ընթացքի մեջ են։ Ընկերության հաջորդ միջոցառումների մասին տեղեկանալու համար հետևեք մեր նորություններին կայքում, սոցիալական ցանցերում (Instagram, Facebook, LinkedIn) և staff.am-ում։
