Z սերունդը աշխատաշուկայում | Ճկունություն, նորարարություն և նոր արժեքներ

Թվային աշխարհ, սմարթֆոններ, սոցիալական մեդիա և անսահմանափակ տեղեկատվության հասանելիություն։ Այո, այո խոսքը Z սերնդի մասին է։ 

Z սերունդը մեկնարկային դիրքում է մուտք գործելու և լիովին ներգրավվելու աշխատաշուկայում։ McKinsey-ի ուսումնասիրության համաձայն, 1995-2010 թվականներին ծնված այս սերունդը շարունակում է ձևավորել աշխատաշուկան իր յուրահատուկ արժեքներով, ակնկալիքներով և մոտեցումներով՝ առաջ բերելով նոր մարտահրավերներ ու հնարավորություններ:

Z սերունդն արդեն իսկ ունի մեծ ազդեցություն համաշխարհային տնտեսության վրա՝ բարելավելով տեխնոլոգիական զարգացման կիրառությունը, փոփոխելով ընկերությունների մշակույթը և նոր արժեքներ ներմուծելով աշխատանքային հարաբերությունների մեջ։ Հոդվածում կբացահայտենք, թե ինչ փոփոխություններ են նրանք բերում աշխատաշուկա և ինչպիսի ազդեցություն է դա ունենում բիզնեսների համար։

Z սերնդի առանձնահատկությունները աշխատաշուկայում

RippleMatch-ի հետազոտությունը ցույց է տվել, որ Z սերնդի 70%-ը ակնկալում է առաջխաղացում աշխատանքը սկսելուց ընդամենը 18 ամսվա ընթացքում։ Այս ակնկալիքը հանգեցնում է աշխատատեղերի հաճախակի փոփոխության, եթե առաջխաղացման հեռանկարները չեն համապատասխանում նրանց պատկերացումներին։

Z սերնդի ներկայացուցիչները հակված են լքել աշխատավայրը հետևյալ պատճառներով՝

Կարիերայի դանդաղ աճ
Z սերնդի ներկայացուցիչները չեն ցանկանում երկար տարիներ սպասել առաջխաղացմանը։ Նրանք ակնկալում են հստակ զարգացման ծրագրեր, մենթորություն և ուսուցման հնարավորություններ։

Ֆինանսական խթանների անբավարարություն
Մրցակցային աշխատաշուկայում աշխատանքը փոխելը հաճախ կապված է ֆինանսական լրացուցիչ միջոցների ձեռքբերման անհրաժեշտության հետ՝ ակնկալելով աշխատավարձի, պարգևավճարների կամ այլ ֆինանսական օգուտների զգալի աճ:

Z սերնդի ազդեցությունը բիզնեսների վրա

Մարտահրավերներ

Z սերնդի աշխատողների հաճախակի աշխատանքի փոփոխությունները կարող են բացասաբար ազդել բիզնեսների վրա:

• Բարձր հոսունություն – Սա կարող է հանգեցնել աշխատակիցների հոսունության բարձր մակարդակի, ինչը ծախսատար է ընկերությունների համար:
• Ծախսերի աճ – Աշխատակիցների բարձր հոսունությունը հանգեցնում է նոր աշխատակիցների ներգրավման ծախսերի աճի և արտադրողականության ժամանակավոր կորստի:
• Թիմային դինամիկայի խաթարում – Հաճախակի փոփոխությունները կարող են խանգարել թիմային դինամիկային և բացասաբար ազդել ընկերության մշակույթի վրա:

Հնարավորություններ

Սակայն Z սերնդի հոսունության միտումը աշխատանքային միջավայր է բերում նաև նոր հնարավորություններ նորարարության և աճի համար:

• Տեխնոլոգիական առավելություններ – Հաշվի առնելով Z սերնդի հմտությունները տեխնոլոգիաներից օգտվելիս՝ բիզնեսները կարող են օգուտ քաղել նրանց թվային հմտություններից:
• Նոր մտածելակերպ – Նոր գործիքներին ու տեխնոլոգիաներին արագ հարմարվելու կարողությունը թույլ է տալիս ներմուծել նոր գաղափարներ և մոտեցումներ:
• Մրցունակության խթանում – Երիտասարդների ակնկալիքներին համապատասխանելու ձգտումը ստիպում է ընկերություններին մշտապես բարելավվել:

Ինչպե՞ս ներգրավել և պահել Z սերնդին աշխատավայրում

Ընկերությունները կարող են կիրառել մի շարք ռազմավարություններ Z սերնդի ներկայացուցիչներին ներգրավելու և պահելու համար:

• Թափանցիկություն և հաղորդակցություն
  Երիտասարդները գնահատում են բաց երկխոսությունը, հստակ սպասելիքներն ու պարբերական հետադարձ կապը։
  

• Մրցունակ արտոնությունների առաջարկում
  Ընկերությունները կարող են գրավել և պահպանել Z սերնդի տաղանդներին՝ առաջարկելով մրցունակ արտոնությունների փաթեթներ, որոնք բավարարում են նրանց կարիքները և ձգտումները: Բացի լավ աշխատավարձից, Z սերնդի ներկայացուցիչները գնահատում և մեծապես կարևորում են լրացուցիչ արտոնությունների առկայությունը։ Մրցունակությունը պահպանելու և շուկայի պահանջներին համապատասխան արտոնություններ ձևավորելու համար խորհուրդ է տրվում իրականացնել ոլորտային համադրելի վերլուծություն։ Այդ նպատակով օգտակար գործիք է Compass by staff.am-ը, որը հնարավորություն է տալիս տեսնել, թե կոնկրետ ոլորտում որ արտոնություններն են առավել հաճախ առաջարկվում, ինչպես են դրանք դասավորվում ըստ ընկերությունների չափի, ոլորտի կամ պաշտոնների։ Այս տեղեկատվության հիման վրա ընկերությունները կարող են վերանայել իրենց արտոնությունների քաղաքականությունը՝ այն դարձնելով գրավիչ և մրցունակ նոր սերնդի մասնագետների համար։
• Ներդրում կարիերայի զարգացման ծրագրերում
  Z սերնդի աշխատողները ձգտում են զարգացնել իրենց կարիերան: Ընկերությունները կարող են պահպանել այս աշխատակիցներին՝ ներդրում կատարելով կարիերայի զարգացման ծրագրերում, որոնք ապահովում են ուսուցում, մենթորություն և առաջխաղացման հնարավորություններ: Սա ոչ միայն բարձրացնում է աշխատանքից բավարարվածությունը, այլև օգնում է կառուցել հմուտ և նվիրված աշխատուժ: Այս գործընթացում թիրախային և գործնական լուծումներ է առաջարկում Career Factory-ն՝ staff.am-ի կրթական հարթակը, որը մշակված է աշխատաշուկայի պահանջներին համապատասխան։ Դասընթացները նախատեսված են ինչպես անհատական մասնագիտական զարգացման, այնպես էլ թիմային հմտությունների կատարելագործման համար։ Երբ զարգանում է աշխատակիցը, աճում է նաև բիզնեսը։
• Ճկուն աշխատանքային պայմանների ապահովում
  Ինչպես արդեն նշեցինք, Z սերունդը կարևորում է ճկունությունը: Հիբրիդային կամ ճկուն գրաֆիկով աշխատանքը կարող է զգալիորեն բարելավել աշխատանքից բավարարվածությունը և բարձրացնել պահպանման մակարդակը Z սերնդի աշխատակիցների շրջանում:

Այսպիսով Z սերունդն աշխատաշուկա է բերում ինչպես մարտահրավերներ այնպես էլ հնարավորություններ։ Գործատուները, ովքեր կհասկանան այս սերնդի ակնկալիքները և կստեղծեն համապատասխան միջավայր, կունենան առավելություն մրցակցային շուկայում։

Ճկունությունը, տեխնոլոգիական նորարարությունը և աշխատակիցների կարիքներին ուշադրություն դարձնելը կլինեն հաջողության բանալին այս փոփոխվող իրականությունում։