staff.am–ի մեր թիմը մեծ ուրախությամբ այս անգամ հյուրընկալվել էր Ginosi Apartels & Hotels ընկերությունում ՝ աշխատակիցների հետ հանդիպելու և զրուցելու աշխատանքային միջավայրի, թիմային միջոցառումների, և առհասարակ Գինոսիում աշխատելու մասին:
Ginosi Apartels & Hotels-ը հայկական հաջողված startup է, որի գլխամասային գրասենյակը գտնվում է Երևանում, ընկերությունը գրասենյակներ ունի նաև ԱՄՆ-ում և Իսպանիայում: Գինոսի Ափարթելսը ափարթելների միջազգային ցանց է, որը կարճաժամկետ վարձակալությամբ տրամադրում է բնակարաններ հանգստի կամ բիզնես նպատակով։ Apartel բառը անգլերեն Hotel – հյուրանոց և Apartment – բնակարան բառերից է կազմված: Նշենք, որ ի տարբերություն այլ նման հարթակների, բոլոր բնակարանները, որոնք Ginosi Apartels & Hotels-ի միջոցով կարելի է ամրագրել, պատկանում են ընկերությանը և ունեն միևնույն ստանդարտները:
Շատ տարածված կարծրատիպ է, որ Գինոսին ՏՏ կազմակերպություն է, բայց իրականում Գինոսին իր բիզնես էությամբ պատկանում է հյուրանոցային բիզնեսի շարքին, որը շատ մեծ շեշտադրում է կատարել ՏՏ֊ին, լիովին գիտակցելով և օգտագործելով ՏՏ֊ի ներուժը իր բիզնես նպատակներին հասնելու համար՝ շուկայում տրամադրելով alternative guest experience (այլընտրանքային հյուրընկալություն):
Ընդամենը մի քանի տարվա պատմություն ունեցող այս ընկերությունը, որը հիմվել է 2010 թվականին, արդեն բավականին մեծ հաջողություններ է գրանցել, որոնցից մեկը միանշանակ իր որակավորված մասնագետների թիմն է, որի անդամների հետ էլ հաճույքով զրուցեցինք Ginosi –ի մասին:
Գինոսիի նպատակն է դառնալ աշխարհահռչակ հայկական բրենդ, և ինչպես շատ այլ հայկական ծագում ունեցող ընկերություններ ևս մեկ անգամ հաստատել Հայաստանը որպես տեխնոլոգիական մեծ ներուժ ունեցող երկիր:
Ginosi Apartels & Hotels-ի հիմնադիրներն են Ամուր-Դավիթ Ավագյանը և Արեգ Գինոսյանը: Ընկերությունն այս տարիների ընթացքում սպասարկել է ավելի քան երկու հարյուր հազար հաճախորդներ ամբողջ աշխարհից : Ընկերությունը դինամիկ զարգացում է ապրում, անընդհատ ավելացնելով բնակարանների թիվը և գործունեությունն ընդլայնելով նոր քաղաքներում։
Գինոսին ունի միջազգային թիմ, աշխատակիցներ՝ ԱՄՆ-ի տարբեր քաղաքներում և Իսպանիայում: Այդ համատեքստում, մեր առաջին զրուցակիցը Մարիամ Ալեքսանյանն էր, ով հանդիսանում է Regional HR Manager ԱՄՆ ռեգիոնի համար: Մարիամի աշխատանքը մեզ բավականին հետաքրքիր, բայց միևնույն ժամանակ և բարդ թվաց. նա զբաղվում է աշխատակիցների հավաքագրմամբ Ginosi Apartels & Hotels-ի արտերկրի գործառնությունների համար՝ սկսած աշխատանքի հայտարարությունների տեղադրումից՝ մինչև CV-ների դիտարկում, հեռախոսով հարցազրույց, որից հետո արդեն հավաքագրման այլ գործընթացների կազմակերպում:
Ես շատ եմ սիրում իմ աշխատանքը, քանի որ անընդհատ շփման մեջ եմ մարդկանց հետ, կլինեն դրանք իմ կոլեգաները, թե Ginosi Apartels & Hotels–ի պոտենցիալ աշխատակիցները այլ երկրներում: Իմ աշխատանքում ամենահետաքրքիրն այն է, որ ես աշխատում եմ գլոբալ մակարդակով, այսինքն կատարում եմ հավաքագրում Երևանից հազարավոր կիլոմետրեր հեռու գտնվող երկրներում, օրինակ ԱՄՆ-ի քաղաքներում, ապահովում կոմունիկացիան թեկնածուների հետ և իհարկե կազմակերպում եմ նոր աշխատակիցների հավաքագրման հետ կապված փաստաթղթային և օրենսդրական մասը: Իմ աշխատանքի մի մասը լիովին նոր մշակույթին ինտեգրվելն է և, օվկիանոսից այն կողմ՝ ինչպես մարդկանց հոգեբանությունը հասկանալն է, այնպես էլ տեղի օրենսդրությանը բացարձակ տիրապետելն է: Բացի մնացած մարտահրավերներից, աշխատանքս գերազանց և պատասխանատվությամբ կատարելը կարևոր է այնքանով, որ ես առաջին կոնտակտն եմ թեկնածուների հետ, և պետք է շատ լավ տպավորություն թողնեմ մեր ընկերության մասին:
Մարիամի հետ խոսեցինք նաև ԱՄՆ-ում աշխատակիցների հավաքագրման գործընթացի մասին:
ԱՄՆ աշխատանքային օրենսդրությունը կոնկրետ թելադրում է, թե ինչպիսին պետք է լինի աշխատանքի նկարագրությունը, ինչ չի կարելի ներառել նկարագրության մեջ, հարցազրույցի ժամանակ կան թեմաներ և հարցեր, որոնք չի կարելի շոշափել թեկնածուի հետ․ օրինակ, չի թույլատրվում հարցնել թեկնածուի բնակության վայրը:
ԱՄՆ֊ի վերաբերյալ ես կավելացնեի նաև հետևյալը,- նշեց Regional HR Manager Իշխան Մարգարյանը,- Ginosi Apartels & Hotels-ի նպատակներից է դառնալ աշխարհահռչակ հայկական բրենդ, մենք երբեք չենք թաքցնում մեր հայկական արմատները, և հպարտությամբ ենք դրա մասին միշտ խոսում: Այդ իսկ պատճառով, շատ հաճախ ԱՄՆ-ում ռեքրութմենթի գործընթացում, մենք թեկնածուին պետք է բացատրենք որտեղ է Հայաստանը, որ այստեղ նույնպես կան նման կազմակերպություններ, որոնք կարող են ԱՄՆ-ում ունենալ ներկայացուցչություն և կարող են դառնալ պոտենցիալ գործատու իրենց համար: Այսինքն մենք հաճախ ԱՄՆ-ում լուծում ենք, ոչ միայն Employer Branding-ի (Գործատուի բրենդավորման) այլև Country Branding –ի (Երկրի բրենդավորման) հարց:
Մեր հարցին թե որն է հայազգի և այլազգի աշխատակիցների հավաքագրման առանձնահատկություններն ու տարբերությունները, Մարիամը պատասխանեց.
ԱՄՆ-ում թեկնածուները շատ-շատ են. ստանում ենք բազմաթիվ դիմումներ, և պետք է բառացիորեն հատիկ-հատիկ ընտրություն կատարենք: Հայաստանում դիմորդների քանակն այդքան էլ շատ չի, սակայն որակը շատ ավելի բարձր է: Մյուս կողմից ԱՄՆ-ում թեկնածուներն իրենց շատ լավ են ներկայացնում, այսպես ասած <<վաճառում են>>, իսկ հայ թեքնածուները այդպիսին չեն, շատ ավելի համեստ են:
Շարունակելով թեման Իշխանի հետ, զրուցեցինք նաև արտերկրում Employer Branding-ի մասին, և թե ինչպես է Ginosi Apartels & Hotels-ը հանդես գալիս այդքան մրցունակ շուկայում:
Եթե ընկերությունը շատ հայտնի կազմակերպություն չի, ապա տրամադրվող առավելությունները, այսպես ասված perk-երը պետք է լինեն շատ ավելի գրավիչ: Օրինակ, ըստ ԱՄՆ օրենսդրության, գործատուն կարող է ընդհանրապես վճարովի արձակուրդ չտրամադրել աշխատակցին, իսկ մենք օրինակ տրամադրում ենք նվազագունը 15 օր տարվա մեջ: Աշխատավարձի տեսանկյունից նույնպես առաջարկում ենք մրցունակ պայմաններ, դրանով իսկ քայլ-առ-քայլ կառուցելով մեր բրենդը որպես վստահելի գործատու: Չենք մոռանում իհարկե երկրի բրենդի մասին:
Զրույցը շարունակեցինք Kyle Khandikian (Գայլ Խանդիկյան) –ի հետ, ով Գինոսիում Communications strategist-ի պաշտոնն է զբաղեցնում: Գայլը ԱՄՆ-ից մեկուկես տարի առաջ է եկել Հայաստան կամավորության նպատակով, և որոշել է մնալ հայրենիքում: Նա համեմատաբար նոր է միացել Գինոսիի թիմին, նրանից փորձեցինք հասկանալ, թե ինչն է նրան ամենից շատը զարմացրել Գինոսիում:
Ես Գինոսիի մասին շատ եմ լսել մինչև այստեղ գալը: Մինչ այդ ՀՀ-ում աշխատել եմ հասարակական սեկտորում՝ մասնավորապես մարդու իրավունքների պաշտպանության ոլորտում: Հաճելիորեն զարմացած եմ Հայաստանում նման կորպորատիվ մշակույթով ընկերություն տեսնելու համար: Իր աշխատելաոճով և կորպորատիվ մշակույթով Գինոսին շատ նման է ամերիկյան ընկերություններին: Այստեղ գալով ես շատ ուրախացա տեսնելով ինձ շատ ծանոթ միջավայրը, քանի որ մինչ Հայաստան գալս, ԱՄՆ-ում աշխատել եմ Warner Bros. ընկերությունում որպես Մարքեթինգի մասնագետ:
Մեր հարցին թե ինչպիսի առաքելություն ունի Հաղորդակցման մասնագետը ՏՏ ընկերությունում Գայլը նշեց.
Մեր ընկերությունը գնալով մեծանում է, այս պահին գրասենյակներ ունենք ԱՄՆ-ում և Իսպանիայում, այս տարի ունենք այլ քաղաքներում ներկայացուցչություններ ստեղծելու ծրագրեր, և այդ ամենի կոնտեքստում անհրաժեշտ է հաղորդակցման հստակ ռազմավարություն՝ ինչպես ներքին այնպես էլ արտաքին: Ներքին հաղորդակցության տեսակետից ես հավաստիացնում եմ, որ մեր աշխատակիցները բոլոր գրասենյակներում ստանում են նույն տեղեկատվությունն ու այսպես ասված message-ը: Արտաքին հաղորդակցության տեսանյունից, շատ կարևոր է շուկայում ճիշտ ներկայացնել մեր բրենդը, մեր կազմակերպության առավելությունները և այլն:
Գայլը նշեց, որ Հայաստանում մնալու երկարաժամկետ ծրագրեր ունի, իսկ Գինոսին լավագույն հայկական գործատուներից է:
Մեր մյուս զրուցակիցը Աստղիկ Հակոբյանն էր, ով Գինոսիին միացել է գրեթե հիմնադրման օրվանից որպես սկսնած ծրագրավորող, իսկ հիմա արդեն հանդիսանում է ծրագրավորման թիմի ղեկավար:
Գինոսին նպաստում է մեր մասնագիտական աճին, և այս հարցը շատ կարևոր հիմունքների վրա է դրված մեզ մոտ: Որպես ծրագրավորող մենք շարունակական ուսուցանման ճանապարհ ենք անցնում․ չսովորել նշանակում է այլևս չլինել մրցունակ մասնագետ: Գինոսիում տարին նվազագույնը երկու անգամ մենք հնարավորություն ենք ունենում շփվել գլոբալ մակարդակով մեր ոլորտի առաջատար մասնագետների հետ: Օրինակ, վերջերս Գինոսին հրավիրվել էր PHP-ի զարգացումն ապահովող Zend Technologies ընկերության առաջատար խորհրդատու Սլավեյ Քարադժովին, ով եռօրյա թրեյնինգ անցկացրեց Գինոսիի ծրագրավորման թիմի հետ։ Եվ արդեն այսօր կարող ենք հպարտությամբ հայտարարել, որ Հայաստանի բոլոր Zend սերտիֆիկացված ծրագրավորողների ավելի քան կեսը մեր թիմակիցներն են։
Մենք Աստղիկի հետ խոսեցինք նաև նոր տեխնոլոգիաների կիրառման մասին, և թե ինչպես են նորությունները ներդրվում ընկերության ծրագրավորման թիմում:
Թիմի ղեկավարն իհարկե մեծ դեր ունի նոր տեխնոլոգիաների ներդրումը ապահովելու գործում, բայց թիմի անդամների ներգրավվածությունն էլ շատ կարևոր է: Մենք մեր ներքին հաղորդակցման ուղիներով միշտ իրար հետ քննարկման մեջ ենք և բոլորս միմյանց հետ կիսվում ենք մեր ոլորտի նորություններով: Մեկուկես տարի առաջ նոր համակարգ ենք ներդրել, ըստ որի մենք թեմաներ ենք ընտրում մեր թիմի անդամների համար, որոնք ուսումնասիրության կարիք ունեն, ժամանակ տրամադրում դրանց ուսումնասիրության համար, ուսումնասիրության վերջնական արդյունքի համար սահմանում չափանիշներ. դրանից հետո արդեն թիմի համապատասխան անդամը մյուսներին է ներկայացնում ուսումնասիրության արդյունքները: Այսպիով շահում ենք երկուստեք, և՛ ընկերությունն է հետևում նորություններին, և՛ անհատն է զարգանում որպես մասնագետ: Օրինակ վերջերս նման քննարկումների արդյունքում մենք Zend 2-ից անցում կատարեցինք Zend 3 framework-ի, այսինքն ընկերությունը բավականին ներդրում կատարեց framework-ի փոփոխության գործընթացում:
Աստղիկն ընկերության առաջին աշխատակիցներից է եղել, և ուրախությամբ նշեց, որ ընկերությունը որպես գործատու շատ մեծ էվոլյուցիա է ապրել, ինչը շատ բնական է:
Վստահորեն կասեմ որ Գինոսին լավագույն գործատուներից է Հայաստանում,- վերջում ավելացրեց Աստղիկը:
Մեր հաջորդ զրուցակիցը Աստղիկ Բիրինյանն էր, ով նույնպես Գինոսիի ամենաառաջին աշխատակիցներից է: Այժմ Աստղիկը Finance Operations Manager-ի պաշտոնն է զբաղեցնում:
Ուրախ եմ, որ թիմին եմ միացել դեռ Գինոսիի ամենառաջին օրերից: Մեր գործունեությունը քիչ այլ էր նախկինում: Մեր միջոցով Հայաստան այցելող զբոսաշրջիկները բնակարաններ էին վարձում մեր վեբկայքի միջոցով: Այժմ արդեն բոլոր բնակարանները, որոնք հնարավոր է վարձել Գինոսիի միջոցով, պատկանում են ընկերությանը և գտնվում են ԱՄՆ-ում և Եվրոպայում: Եթե խոսենք կազմակերպության էվոլյուցյիայի մասին, ապա այն ժամանակ ընդամենը 4 հոգի էինք, և բնականաբար զբաղվում էինք ամեն ինչով: Այժմ արդեն ունենք դեպարտամենտներ և բաժիններ, և նույնիսկ ֆինանսական բաժինը, որն առաջ մեկ աշխատակից ուներ, այժմ ունի ենթաբաժիններ: Այս էվոլյուցիան տեղի է ունեցել ընդամենը մի քանի տարվա ընթացքում և ուրախ եմ, որ եղել եմ այս զարգացման մի մասը, կայանալով և աճելով որպես մասնագետ նույնպես:
Աստղիկը նշեց, որ առհասարակ մասնագիտական աճին շատ մեծ նշանակություն է տրվում իրենց ընկերությունույմ, կան բաժիններ օրինակ, որոնք կարծես ինկուբատորի դեր խաղան:
Ունենք մարդիկ, ովքեր ընկերությանն են միացել որպես սկսնակ, իսկ այժմ արդեն բաժիններ և թիմեր են ղեկավարում, և հենասյուներ են հանդիսանում ընկերության համար:
Աստղիկը որպես Hiring manager մասնակցել է բազմաթիվ հարցազրույցների, համալրելով թիմը նոր անդամներով: Նրա հետ խոսեցինք նաև, թե ինչն է նա կարևորում նոր թիմակիցներ աշխատանքի ընդունելիս:
Առհասարակ մասնագիտական որակավորմանը շատ մեծ ուշադրություն եմ դարձնում, սակայն նույնչափ կարևոր են նաև թեկնածուի անձնական հատկանիշներն ու ծրագրերի տիրապետումը: Հարցազրույցի ժամանակ իմ հարցերից են <<ինչպիսի՞ մարդկանց հետ եք սիրում աշխատել>>, <<արդյո՞ք սիրում եք ղեկավարել թե ոչ>>, <<ի՞նչն է Ձեզ մոտիվացնում աշխատանքում>> և այլն: Սրանք ստանդարտ հարցեր են, սակայն պատասախանները միշտ տարբեր են լինում, և պատասխաններից արդեն երևում է ինչպիսին է մարդը:
Թիմային միջոցառումներ
Ginosi Apartels & Hotels-ը շատ հայտնի է իր թիմային միջոցառումներով, մեր մոտ ամեն ինչ համակարգված է, այդ թվում նաև միջոցառումների կազմակերպումը: Յուրաքանչյուր տարի մեր ընկերությունում ընտրվում է հատուկ social committee (սոցիալական կոմիտե), որը բաղկացած է հիմնականում մեր այլ բաժինների աշխատակիցներից, և ՄՌԿ բաժինը այս պարագայում հանդես է գալիս որպես աջակցող մարմին, հնարավորություն տալով այլ աշխատակիցների մասնակցություն ունենալ նման հաճելի գործում: Տարվա ընթացքում նվազագույնը երեք միջոցառում է տեղի ունենում, որոնցից մեկը գիշերակացով, – նշեց Իշխանը:
Մեր այս տարվա ամենամեծ միջոցառումը գիշերակացով անցկացրեցինք Թբիլիսիում, որն ուղղակի անմոռանալի էր: Բոլոր նման միջոցառումներին մասնակցում են մեր աշխատակիցների ընտանիքի անդամները, ընկերները, հարազատները, ինչը խրախուսվում է ընկերության կողմից: Միշտ ունենում ենք նաև ամառային միջոցառում, որն անց ենք կացնում քաղաքից դուրս:
Իշխանը խոսեց նաև Ginosi Summit-ի մասին, որը ամենամյա միջոցառում է որի ընթացքում ընկերության բոլոր աշխատակիցները՝ Հայաստանից, Իսպանիայից և ԱՄՆ-ից, հավաքվում են մեկ վայրում քննարկում Գինոսիի ապագա ծրագրերը, կիսվում մտքերով և ուղղակի լավ ժամանակ անցկացնում միասին:
Մենք բոլորս, անկախ ազգությունից և բնակության վայրից, պատկանում ենք մեկ թիմի, և շատ կաևոր է, որ բոլորը զգան թիմային ոգին և այն, որ մենք բոլորս կիսում ենք նույն արժեքները,- ասաց Իշխանը:
Employer Branding (Գործատուի բրենդավորում)
Գործատուի բրենդավորումը շատ կարևոր նշանակություն ունի մեր ընկերության համար, իսկ ՄՌԿ-ն իհարկե շատ մեծ դեր ունի այդ գործընթացում, քանի որ կարծում եմ Employer Branding-ը սկսվում է հենց ռեքրութմենթից: Օրինակ, մենք կոնկրետ KPI-ներ (հիմնական ցուցանիշներ) ունենք ռեզյումեների դիտարկման, դիմորդների հետ կապ հաստատելու և առհասարակ նրանց հետ կապի մեջ լինելու տեսանկյունից: Մենք շատ լուրջ ենք վերաբերվում հավաքագրման գործընթացին, և թեկնածուները, ովքեր դիմել են աշխատանքի և մի քանի փուլերով անցել, անպայման անկախ վերջնական արդյունքից ստանում են հարցաշար, որով գնահատում են ՄՌԿ բաժնի և հավաքագրման գործընթացի արդյունավետությունը: Այս հարցաշարերին մեզ մոտ շատ մեծ կարևորություն ենք տալիս և անպայման անդրադառնում ենք թեկնածուների կարծիքներին:
Մենք մասնակցում ենք նաև տարբեր միջոցառումների, ինչպիսիք են ՏՏ ընկերությունների միջև անցկացվող ֆուտբոլի առաջնությունը, վերջերս անցկացված շախմատի առաջնությունը ՏՏ ընկերությունների միջև: Գինոսին այս տարի BarCamp Yerevan 2017-ի հովանավոր էր, և սա նույնպես լավ առիթ էր մեզ համար լավագույնս ներկայանալու որպես գործատու:
Իշխանը նշեց նաև որ staff.am-ի հետ համագործակթյունը նույնպես նպաստում է ընկերության Employer Branding-ի առաջխաղացմանը: Ի դեպ Ginosi Apartels & Hotels-ը միակ ընկերությունը չէ, որ նշում է staff.am-ը որպես Գործատուի բրենդավորման գործիք:
Աշխատակիցներին պահպանելու առումով Իշխանը նշեց, որ ընկերությունը կադրերի հոսունության խնդիր չունի:
Մեր հավաքագրման գործընթացը շատ հանգամանալից է, մենք մոտ հինգ անգամ հանդիպում ենք թեկնածուի հետ մինչև նրան աշխատանքի վերցնելը, այդպիսով կրճատելով այն դեպքերը, երբ աշխատակիցը ուղղակի չի համապատասխանում թիմին՝ ինչպես մասնագիտորեն, այնպես էլ անձնական հատկանիշներով: Մենք համոզված ենք, որ մեր մշակույթը հենց հանդիսանում է հոսունության այդքան ցածր մակարդակի գրավականը: Մեզ մոտ շատ մեծ նշանակություն է տրվում, ոչ միայն թեկնածուի տեխնիկական պատրաստվածությունը, այլև անձնային որակներին: Մասնավորապես մեր հավաքագրման վերջին փուլում մասնակցում են նաև թիմի մյուս անդամները, որոնք հարցազրույցից հետո անպայման իրենց կարծիքն են հայտնում տվյալ թեկնածուի հետ աշխատելու մասին:
Թրեյնինգներ
Մեր զրույցի ընթացքում Իշխանը նշեց, որ աշխատակիցների շարունակական զարգացմանը որպես մասնագետ շատ մեծ նշանակություն է տրվում և սա նույնպես նպաստում է հոսունության նվազմանը:
Մենք վերջերս Zend Technologies –ից մասնագետ էինք հրավիրել, ով մեր աշխատակիցների համար Zend Framework թրեյնինգ անցկացրեց, որի արդյունքում ծրագրավորման թիմի անդամները Zend Certification կստանան: Meetup-ները նույնպես մեր մշակույթի մի մասն է կազմում, նման մասնագիտական հանդիպումները անց են կացվում մեր աշխատակիցների կողմից, և կոչվում են <<Next Sessions>>: Մեր աշխատակիցները թրեյնինգների են մասնակցում նաև արտերկրում, հիմնականում մեկնում են ԱՄՆ վերապատրաստվելու:
Արտոնություններ
Գինոսիի աշխատակիցներին տրամադրվող արտոնությունների մասին խոսեցինք Իշխանի հետ: Նա նշեց, որ արտոնությունների փաթեթը կազմելիս, ընկերությունը հաշվի է առնում աշխատակիցների նախասիրությունները, իսկ նպատակն է հնարավորինս արդյունավետ աշխատանքային միջավայրի և work-life balance-ի ապահովումը:
Մեր օրը սկսվում է նախաճաշից, որը առիթ է աշխատակիցների համար, սնվելուց բացի շփվել միմյանց հետ, քննարկել իրենց օրն ու պլանները: Գինոսին հոգում է նաև աշխատակիցների ընդմիջումը, այսինքն աշխատակիցները չեն անհանգստանում դրա մասին: Յուրաքանչյուրը նախօրոք պատվիրում է ուտեստ՝ ըստ իր նախասիրության, իսկ մեր մատակարարն արդեն ապահովում է համեղ սնունդը: Օրվա վերջում մեր աշխատակիցները նույնպես թեթև սնվում են և նոր գնում են տուն:
Իշխանը նշեց նաև, որ աշխատակիցները ստանում են առողջության ապահովագրութան համապարփակ փաթեթ, քանի որ աշխատակիցների առողջությունը շատ կարևոր է:
Մեր արտոնություններից մեկը վստահորեն կարող եմ ասել, որ work-life balance կոչվածն է, այսինքն մենք սկսում ենք աշխատանքը ժամը 9-ին, նախաճաշում ենք մոտ 20 րոպե, և աշխատավայրը լքում ենք ուղիղ ժամը 6-ին: Մենք չենք խրախուսում աշխատանքային ժամերից դուրս աշխատելը, քանի որ կարծում ենք, որ դա կայուն զարգացման չի տանում: Նույնը կարելի ասել նաև մեր հիմնադիր տնօրենների մասին, և նրանք են հենց այդ մշակույթի կրողները՝ օրինակ ծառայելով մյուսներին:
Մենք օրինակ մարզիչ ենք վարձել ֆուտբոլային մեր թիմը մարզելու համար, մենք վճարում ենք նաև պարապմունքների ու անհրաժեշտ պարագաների համար,- ավելացրեց Իշխանը
Իշխանը նշեց, որ 2017 արտոնությունների փաթեթում ներառված էր նաև հետևյալը ՝ մեկ տարի ընկերությունում աշխատելուց հետո աշխատակիցներին տրամադրվում է այսպես կոչված հատուկ “արձակուրդային” բոնուս, դրանով իսկ հնարավորություն տալով աշխատակիցներին էլ ավելի հետաքրքիր կազմակերպել իրենց արձակուրդը։ Իսկ երկու տարի ընկերությունում աշխատելուց հետո, աշխատակիցը ստանում է տարեկան 25 աշխատանքային օր արձակուրդ՝ ստանդարտ 20-ի փոխարեն:
Գինոսիում տեղեկացանք նաև, որ շուտով ընկերությունը կտեղափոխվի նոր գրասենյակ, որը լիովին հագեցած կլինի բոլոր ժամանակակից հարմարություններով: Նոր գրասենյակ անպայման կայցելի նաև staff.am-ի թիմը, և առիթ կունենանք Ձեզ ներկայացնել նաև Գինոսիի նոր գրասենյակը:
Դե ինչ ամփոփենք:
Գինոսիում մեծ հաճույք ստացանք աշխատակցների հետ շփվելով: Այստեղ ամեն ինչ մտածված է՝ առողջ սնունդից և սպորտից մինչև մասնագիտական թրեյնինգներն ու զարգացումը: Այստեղ մեծ նշանակություն է տրվում work-life balance-ի ապահովմանը, ընկերությունը տրամարդում է ավելի երկար արձակուրդ, արձակուրդային բոնուս և տարեկան միջոցառումներ, որոնք նպաստում են աշխատանքային առողջ մթնոլորտին: Ընկերության հաճախորդների և տարբեր քաղաքներում աշխատակիցների թիվը գնալով աճում է, և բոլորը գիտեն, որ Ginosi Apartels & Hotels-ը Հայաստանում հիմնված ընկերություն է, իսկ աշխատակիցներն ուղղակի հպարտ են, որ ամեն օր իրենց կատարած աշխատանքով նպաստում են ևս մեկ հայկական բրենդի առաջխաղացմանը համաշխարհային շուկայում՝ այդպիսով իրենց ներդրումն ունենալով Հայաստանի՝ որպես տեխնոլոգիական կենտրոնի կայացմանը:
